مابتدورش من أول مرة؟!!
أكيد أنت مش بترفع السخان
طب إيه السخان ده يا زيكا؟!
السخان ده بنرفعه لما نيجي ندور العربية أول مرة الصبح
هتلاقيه تحت في الطابلوه ناحية شمال الدركسيون
تشده لبره و تدور من غير ما تكارك بنزين
و إن شاء الله تدور من أول تكة
لكن لأن العربية قديمة فهتطفي بعد خمس ثواني و المفروض ماتطفيش
فأنا قبل الخمس ثواني ما يخلصوا بزود بنزين و أنزل السخان في نفس اللحظة
ممكن تفضل دايرة و ممكن تطفي
لو فضلت دايرة مش بزود عن 3000 rpm
و لو طفت برفع السخان تاني و أكرر نفس الخطوات إللي فاتت
أنا بعمل الحركة دي اختصارًا للوقت
(المفروض العربية تفضل دايرة و السخان مرفوع حتى لو هتطفي و أدورها كذا مرة)
لو فضلت سايب السخان مرفوع و العربية دايرة هتلاقي بعد شوية دخنة سوداء طالعة من الشكمان و ده معناه إن البنزين بدأ يوصل للكربراتير بمعدله الطبيعي و السخان ماعادلوش لازمة و ساعتها نزله و ممكن العربية تطفي بردو و ساعتها ارفع السخان تاني و دور أو زود بنزين شوية و أنت بتنزل السخان.
مع الوقت هتعرف تتعامل إزاي مع عربيتك
أنا في الأول العربية كانت بتدور بعد 15 محاولة على الأقل
دلوقتي بتدور من أول مرة
ممكن تطفي تاني و تالت بس على الأقل دارت.
جرب و قول لنا عملت إيه.