المشاركة الأصلية كتبت بواسطة elhelaly
نزلت عزبة شلبى امبارح
كنت بدور على شنب لعربيتى مو 89
بعد لف ودوران وسماع اسعار خيالية اللى بيقول 500 واللى بيقول 700
لقيت واحد قال لى انت ليه عاوز تاخده من نص أو ربع مهو كده كده هتلاقيه غالى عشان محدش هيرضى يبوظ الربع أو النص عشان شنب بسعر قليل
وقال لى انت ليه متجيبهوش جديد أحسن , فقولت له هو فيه جديد أصلا !؟
قال لى اه
ووصف لى واحد اسمه السكرى , عند أول الكابلات
رحت له لقيت شنب بلونيز جديد - وعلى حد قوله انه بولندى مش مصرى - بصراحة شكلة عجبنى سألته
بكام ده ؟ وكانت المفاجأة
..
..
..
:)
متقلقوش ب 140 جنيه
قولت الحمد لله انا كنت مفكر هيقول أغلى من كده , ده كده تمام أوى
ونسيت أقولكم برده انا كنت بدور على مقاس زيت الحمد لله ربنا وفقنى وجبت واحد من محل كده صغير ف عزبة شلبى اسمه عم يحيى
برده أقولكم الحكاية
عندك مقاس زيت ياعم يحيى , قال لى اه
ادانى شوية مقاسات وقال لى شوف كده ف وسط دول , لقيته بسرعه
بكام ده ياعم يحيى
قال ب 30 جنيه
ياعم يحيى عشان خاطرى وعشان خاطر الناس اللى ماشية والناس اللى فوق والناس اللى تحت
الحمد لله جبته ب 10 جنيه
وربنا يتمم لى على خير وان شاء الله أوعدكم بصورة لما العربية تخلص خالص
وكمان مره بحب الرابطة الجميلة :)