هو صف تاني و خلاص؟

**Samir Elshahawy** · 31-05-2009 09:21 PM

من غير زعل و لا حاجة أي واحد راكن عربيته (مش شرط صف تاني و لا حتي تالت) لازم يخلي باله من حاجتين مهمين أوي:
- أنه مايعطلش حركة المرور في الشارع اللي سيادته راكن فيه و لو حتي لمدة دقيقتين (من باب أماطة الاذي عن الطريق)
- أن عربيته ماتكونش عرضة أنها تتخبط أو تنجرح من أي حد ماشي حتي و لو موتوسيكل أو عجلة

و من هذا الاساس انا براعي الاتي أثناء ركن عربيتي في أي شارع حتي و لو واقف صف أول:
1- اني بأحضن أوي علي الرصيف لدرجة أني أكاد أكون ملامس له حتي أضمن أشغال أقل عرض ممكن من نهر الطريق
2- التأكد من أن المكان الذي أوقف فيه سيارتي لا يعرضها للخدش مثل (الملفات - شارع ضيق - مكان به موتوسيكلات ديلفري - مكان به أطفال - موقع به بناء - .......)
3- من الممكن ان أركن في شارع أخر موازي أو بعيد حتي و لو 1 كم و لكنه مناسب من وجهة نظري خوفا علي سيارتي طبقا للبندين السابقين

لكن اللي يرمي عربيته كده في الشارع و يمشي يستاهل اللي يجري له لان لو هو مش خايف علي ماله الناس هتخاف له عليه ؟؟

**Abdo_Eldesokey** · 31-05-2009 10:20 PM

المشاركة الأصلية كتبت بواسطة MoToRiZeR

فعلاَ الإحساس نعمة .. ناس معندهاش دم !

انا قبل كدة كنت في مطعم جندوفلي اللي في المهندسين .. و راكن عمودي عالرصيف و طلعت لقيت عربية النترا سودة قافلة عليا و معشقة و متفيمة كلها و حاطط ستيكر مكان النمر اللي ورا و نسر عالنمر اللي قدام و حاطط كاب شرطة عالتابلوه .. اللي هو إرهاب يعني ناقص يعلق أمين شرطة في المرايه .. بصراحة فكرت أبلغ البوليس و أعمل محضر للحيوان ده بس قلت هو هيقعد يجيب معارفه و انا أجيب معارفي و مش هنخلص، و ده في حالة لو البوليس رد أصلاَ ! عربية مين دي يا جدعان ؟ محدش عارف .. أخبط عليها يمكن فيها إنذار ينبه صاحبها .. مفيش .

المهم الراجل اللي كان راكن جنبي كان قاعد عالقهوة اللي جنب المطعم و شافني محتاس كدة قام طلع بعربيته و قعدنا نعدل العربية عشان أطلع انا بقي من الجنب .. انا بقي إتمزجت أوي و انا بطلع العربية .. انا واخد خبطة أصلاً في جنب العربية و كدة كدة هتتصلح فا مكنتش قلقان عليه .. الراجل يقولي ورا شوية .. أيوة بس .. أقوم أعمل نفسي مسمعتش بس دي لحد ما أخبط الإلنترا .. و لحد ما عدلت العربية و طلعت كان ربنا قدرني و قدرت أدمرله الرف رف و أوقعله الإكصدام من الجنب .. و نزلت لقيت الإكصدام بتاع السيريون داخل لجوة رديته بإيدي .. و سيبتله شتيمة في ورقة عالمساحة و مشيت .

صايع صايع يا Motorizer والله ... أنا مرة عملتها مع عربية كرستالة ، بس أنا كنت بالـ 128 يعنى الاكصدام حديد ومش هيتخدش حتى

لكن انت قدمت بعض التضحية

**Samir Elshahawy** · 01-06-2009 02:17 AM

أرسل أصلا بواسطة motorizer

فعلاَ الإحساس نعمة .. ناس معندهاش دم !

انا قبل كدة كنت في مطعم جندوفلي اللي في المهندسين .. و راكن عمودي عالرصيف و طلعت لقيت عربية النترا سودة قافلة عليا و معشقة و متفيمة كلها و حاطط ستيكر مكان النمر اللي ورا و نسر عالنمر اللي قدام و حاطط كاب شرطة عالتابلوه .. اللي هو إرهاب يعني ناقص يعلق أمين شرطة في المرايه .. بصراحة فكرت أبلغ البوليس و أعمل محضر للحيوان ده بس قلت هو هيقعد يجيب معارفه و انا أجيب معارفي و مش هنخلص، و ده في حالة لو البوليس رد أصلاَ ! عربية مين دي يا جدعان ؟ محدش عارف .. أخبط عليها يمكن فيها إنذار ينبه صاحبها .. مفيش .

المهم الراجل اللي كان راكن جنبي كان قاعد عالقهوة اللي جنب المطعم و شافني محتاس كدة قام طلع بعربيته و قعدنا نعدل العربية عشان أطلع انا بقي من الجنب .. انا بقي إتمزجت أوي و انا بطلع العربية .. انا واخد خبطة أصلاً في جنب العربية و كدة كدة هتتصلح فا مكنتش قلقان عليه .. الراجل يقولي ورا شوية .. أيوة بس .. أقوم أعمل نفسي مسمعتش بس دي لحد ما أخبط الإلنترا .. و لحد ما عدلت العربية و طلعت كان ربنا قدرني و قدرت أدمرله الرف رف و أوقعله الإكصدام من الجنب .. و نزلت لقيت الإكصدام بتاع السيريون داخل لجوة رديته بإيدي .. و سيبتله شتيمة في ورقة عالمساحة و مشيت

تصدق أني عملتها مرة في عربية لانسر أوتوماتيك:
كنت راكن قدام سيتي بنك اللي في عمارات العبور و لما جيت أخرج وجدت لانسر واقفة ورايا و قافلة عليا تماما و معشقة الفتيس علي الباركينج أدي كلاكسات و انادي علي المنادي و لا في اي فايد أستنيت قد أيه قول 45 دقيقة في عز حر شهر 8 و بعدين فاض بيا , كان وقتها معايا اللانوس و كنت مركب في الاكصطدامات مصدات الومينيوم فرجعت ورا و خدشت لها الباب اليمن و طلعت قدام و رجعت ورا فجرحت الرفرف اليمين و أخدت حتة من اكصطدام اللانسر

هنا بقي صاحبة العربية جت و هي بتغلي و قعدت تشتم و انا جوه عربيتي مانزلتش و ماعبرتهاش و لما لاقتني هأرجع ورا و أخبط لها العربية أتأكدت اني بايع القضية و اخدت عربيتها و مشيت طبعا مشيت بس حسيت اني طلعت الغل اللي جوايا في عربيتها و علشان يبقي درس لها بعد كده

**Busquets** · 01-06-2009 08:25 AM

المشاركة الأصلية كتبت بواسطة ahmed0nouh

وهل حضرتك متخيل انك لو اتصلت بالنجده قولتلهم ان فى واحد قافل الطريق ومعطل الشارع ولو سمحت ابعتو ونش يشيله حد هيعبرنا ؟

للأسف البلاغات من النوع ده بتكون من وجهه نظرهم من واحد فاضى

فكرتني بحوار حصل
واحد كان تحت العماره من سنتين أو أكتر الحوار دة
وكان فيه مقطوره بتنزل حموله ومش عايز يركن على جنب
لأ إلي عايز يعدي من الشارع يلف من الشوارع الجانبيه !
ف كان في رجل محترم كدا زرجنت معاه وقال له هعدي يعني هعدي وطبعاً الشعب المصري معروف بقوته وجبروته!!!
بتاع المقطوره قال له أخرك اعمله !! كلم البلويس والكلام دة الساعة ٢ أو ٣ الفجر
أنا لا أعرف الراجل ولا أعرف ماذا قال له الظابط ولا الشاويش إلي رد عليه! إلي حصل إن الرجل بيقول ألو أيوة في عربية سدة الشارع ومش عارف أوصل بيتي ! إيه الحل يعني !! ألو ألو ألوووو !!! :) طبعاً الأخ قفل في وشه! حول مره تانه وأول ما يسمع صوته أو يشوف الرقم يقفل في وشه!
بلد لطيفه جداً! و فعلاً من يبلغ عن هذه الأشياء يعتبروه تافه ومجنون عشان كدا البلد ماشية بالدراع

**MoToRiZeR** · 01-06-2009 05:24 PM

يا أستاذي الفاضل بدون زعل طبعاَ و إحنا بنتناقش .

طب ليه متعكسش الموضوع ؟
يعني ليه منفرضش إن الشارع اللي البيه قفلوا ده .. كان معدي فيه عربية إسعاف فيها مريض أو رايحة لمريض بين الحياة و الموت .. أو فيها طالب متأخر علي إمتحانه .. أو فيها واحد مراته تعبانة أو واحد مستعجل ! هل الموقف هيبقي فيه رفاهية إن انا أنزل و أقعد أدور عالبيه و أجيب ناس تشيل العربية و لو مبقتش أستناه و أعاتبه .. ماهو حضرتك إحنا في بلد نص الشعب مقضيها إستعباط .. فا انا لو عملت كدة مع واحد إحتمال كبير يجيلي في الأخر أصلاَ يزعق و يقولي إيه هي الدنيا طارت .. يبقي هقضي نص يومي بدور عالناس اللي قافلة الشارع !

اما حد يسد علي عربية تانية إنها تطلع، أو يسد عالناس الطريق اللي ماشيين فيه .. و يعشقها و يمشي .. دي رسالة ضمنية للناس اللي في الشارع " إضربوا دماغكوا في الحيط .. عضوا في الأرض .. اللي عندكوا إعملوه !" .. و لأنه واثق إنه في هذه البلد مفيش بوليس ولا قانون يحكم موضوع زي ده، بيعمل كدة بمنتهي البرود .. و لذلك موقف زي ده هيخليه يبقي يدور علي ركنة كويسة زي الناس المحترمة .

المشكلة فعلاَ البرود و قلة الأدب و الذوق بقت ماشية في مصر زي السرطان .. ولا أكن إن العادي هو إن الواحد يبقي معندوش دم!

و بالنسبة للي عايز يشتري حاجة بسرعة أو بتدخل ولادها الأسانسير و راجعة بسرعة دول -و بقابلهم كتير- بيشغلوا الإنتظار و تلاقيهم نازلين يجروا و راجعين يجروا .. و هي حركة برضه إن انا أستني سعادته بس حتي الإنتظار بيهيأني نفسياَ إن العربية دي هتتحرك بسرعة .. إنما مش أبقي ماشي ألاقي الشارع مقفول و واحد بيه قافلهولي بركنته اللي زي وشه !

**احمد عز** · 01-06-2009 05:54 PM

المشاركة الأصلية كتبت بواسطة ash_rsi

اكيد طبعا بس للاسف الكل بيقول انا وبس مش مهم يركن غلط ويقفل الشارع مش مهم يعمل اى مشكله بسبب سوء السلوك
احيانا الواحد من غيظه من النوعيه دى بيبقى نفسه يكسر العربيه وصاحبها لكن اكيد مايننفعش ولا لى الحق فى ده
مافيش غير اننا نتمنى ان الاحساس والذوق يعودوا للناس من تانى

تسمحلى اختلف معاك فى الموضوع ده يعنى انا لو داخل سوبر ماركت ولا صيدليه او اى حته حجيب منها حاجه وحمشى ادور على ركنه ملقيش او لقيت ركنه عوزلها مواصله علشان اروح الحته الى انا عوزها وخصوصه ان انا حقعد اقل من 3 او 4 دقائق حعمل ايه فطبيعى حركن اى حاجه يعنى ساعات الواحد بيبقى غصب عنه بس فى الحاله دى بيسيب الهاند بريك مش مشدوده علشان ميعملش مشكله للناس

**ashouhdy** · 01-06-2009 09:40 PM

دى بقت سلوكيات خلاص
انا ضد الصف الثانى
وضد ان كل واحد ياخد حقة بدراعة عشان كل واحد حيقولك انا اللى صح
انا مع سيادة القانون الصح اللى تمشى ع الكل
و ضد كلبشة العربيات بتاعت الونش دى
واحد واقف صف تانى فى شارع واسع بس قافل عليا جة الونش كلبشة اعمل انا اية !!!!!! انا و سعادتة اتكلبشنا مش هو بس
!!!!!!!!!!!!!!!!!!!!