الموضوع: خلاص اتخنقت ومش عارف اعمل ايه ؟

المشاركة الأصلية كتبت بواسطة أبـو آســـــر

مش عارف اقولك ايه
اصلي كان عندي نفسك ظروفك
بس في اختلاف بسيط ان صاحب الشغل الي انا كنت فيه ما كنش يقدر يمشيني
علشان كنت شايل شغل كتير جداً و كان عندنا مدير الموارد البشرية كان كاتب في تقرير عني ان الشغل الي بيحتاج 3 يعملوا
انا بعملوا لوحدي
علشان كدة ما كانش يقدر يمشيني انا و 2 كمان بس للأسف رفدهم الشهر الي فات ( طلع قرار بالأستغناء عن جميع المحاسبين القدامى في الشركة ) راجل بطيخة
بص يا سيدي انا حكايتي ممكن تاخدها كمثل ليك يصبرك
انا الحمد لله شغال اول ما اتخرجت ( قبل ما استلم شهادة التخرج كنت شغال في الشركة المشئومة الي انا حكيتلك عليها دي )
كنت رايح اعمل مقابلة على اساس اني محاسب لقيتهم طالبين سكرتير
قولت مافيش مانع اهو اعيش في الشغلانة لحد ما الاقي حاجة تانية
اشتغلت سكرتير إدارةالمبيعات و التسويق ( انا طول عمري في اوقات الفراغ بحب اخد دورات كمبيوتر فمتمكن منه لدرجة بشعة )
فضلت كدة يا معلم ثلاث سنوات و بعدين الإدارة المالية اصرت اني اتنقل ليها و حصلت مشكلة بينها و بين إدارة المبيعات
و اتنقلت المالية لمدة 6 شهور و بعد 6 شهور اترقيت بقيت مراجع حسابات
كنت مسئول عن 8 فروع في محافظات مختلفة و 26 وكيل في محافظات مصر
طبعاً سفر للجرد و الحوارت دي
المهم كان في سكرتيرة نائب رئيس مجلس الإدارة عندها حوالي 65 سنة بس عايشة في الدور شوية
هي ما كانتش بتقبلني و لا انا بقبلها بصراحة
كانت شغالة اسافين فيا
ده بيجي متأخر كل يوم
ده بيمشي بدري
هو فاكر نفسه ايه
و ساعات كنت بأسمعها بودني و هي بتأسف فيا
من ساعة ما كنت شغال سكرتير لحد ما بقيت مراجع حسابات و طبعاً كذا مرة رئيس مجلس الإدارة يكلمني بقلة ذوق علشان التأخير و مش عايز يسمع مبررات
و كنت بأستحمل و ساعات كنت برد عليه في حاجات و اقوله مش هقدر اعملها ممكن حد تاني في الإدارة يعملها
المهم الراجل ده فعلاً معقد نفسياً
كنت بروح الشغل في رمضان بعد الفطار و امشي على الساعة 12 باليل و اروح الصبح الساعة 10
غير ايام كتير بنفطر في الشركة
يجي لو في ماتش مهم يطلب منك شغل كتير جداً علشان ما تروحش تتفرج على الماتش
حتى ساعة كاس امم افريقيا 2006 كانت الماتشتات بتتلعب قدامنا في الاستاد و مش قادرين نتفرج عليها
لحد بقى ما نويت العوج و حطيت في دماغي لازم اخليه يرفدني
روحت طالب زيادة مرتب ( و هو اصعب حاجة عنده ان حد يطلب زيادة مرتب )
المهم مارضيش روحت ضارب اسبوع في البيت و لا حتى كنت برد على محاسبين الفروع او التوكيلات او اي حاجة
لحد ما اتصل بيا مديري في الشغل ( مديري ده شغال عصفورة في الشركة و هو اصلاً ما يعرفش 1+1= كام )
روحت لقيته موزدني 250 و حسسني انه بيمن عليا بيهم و قال ايه بقى يا سيدي بالـ 250 هتنقل المصنع في كوم اوشيم في الفيوم
و هنشتغل ورديات الوردية 12 ساعة علشان نراقب المصنع
قولتله ماشي و لما جهز المكاتب في المصنع كنت الحمد لله لقيت شغل تاني الي انا فيه دلوقتي
و قولتله سلامتك انا مش لاعب معاكوا
و سيبته و مشيت و سيبتله الدنيا غرقانة
بس هو يستاهل
راجل معندوش ضمير و لا اخلاق
بس بجد كنت الي انت حكيته انا عشت اكتر منه و ذيادة بس الفرق انه ما كنش يعرف يمشيني و انا كنت عارف كدة
لرجة مرة مديري بقولي انت جاي متأخر ليه
قولتله مالكش دعوة هو كدة كدة انا انهاردة غياب علشان كنت رايح الساعة 11
قالي لاْ المفروض ما كنتش تيجي روحت زقه و ضربت بقيت الاسبوع في البيت لحد ما كلمني علشان ارجع تاني

خلاصة الحوار لازم يكون عندك حاجة تميزك عن الباقي علشان تبقى انت الي ماسكه مش هو الي ماسكك
و بالنسبة للتصاميم بتاعة الأكسل
انا ممكن اساعدك فيها و هي مش هتاخد وقت زي ما انت متخيل ( هي ممكن تاخد وقت اول مرة بس )
لو محتاج اي حاجة راسلني على الخاص و انا بجد تحت امرك في اي حاجة
خد الموقع ده بتاع توظيف بيجيلي منه شغل كتير قوي بس تعمل عليه سي في جامد مش اي كلام
www.egyrec.com

ياباشا ال الف شكر ليك
واكيد انت ايدك وجعتك من كتر الكتابة
بالنسبة لموضوع الاكسيل الحمد لله انا حليته
ومانتش بالنسبة لي دي المشكلة
انا المشكلة بالنسبة هو كلامه وطريقة تفكيره في الاذية والاذلال
وانا فعلا والحمد لله مش بسهولة يمشيني
لاني المحاسب الوحيد اللي في الشركة ومعايا امين خزينة بس
وكمان كل تقارير المحاسب القانوني عن ادارة الحسابات كل 3 شهور ممتازة

بس فعلا بادأت اتخنق من الاسلوب والمعاملة بالطريقة القذرة دي

وفعلا انت ليك تجربة مريرة والله افادتني
وانا فعلا ببحث بجدية عن عمل آخر
لكن المشكلة يا اما عدم التوفيق في الخبرات المطلوبة
يا اما عند الموافقة المرتب قليل جدا

والله العظيم قبل كده من حوالي اكتر من 8 شهور كان في ناس عملاء وموردين للشركة بتاعتي طلبوني اني اروح معاهم وانا رفضت
بس ارجع واقول النصيب لسه مجاش