هزة في الدركسيون بعد تركيب الكبالن

**bassem.naguib** · 10-06-2009 03:07 PM

غيرت الكبالن اللي عندي .. وبعد السؤال عن الأنواع الكويسة الموجودة في السوق .. كل الناس اجمعت ان الموجود في السوق كله مضروب .. ومضروب بمضروب نصحوني اني اجيب الكبالن الصيني وأهي تقضي الغرض وشغالة عن تجارب .. وأهي تاخد وقتها وبعد كدة تتغير لو نزلت حاجة نضيفة .. المهم اشتريت الكبالن الصيني وركبتهم .. وكنت محتاج أظبط زوايا قبل تغيرهم لأن كان فيه حدفه يمين في العربية بس مش بشكل كبير .

الحدفة دي زادت بعد تركيب الكبالن .. وزاد عليها أني بقيت حاسس وانا ماشي أكن في حد ماسك الدركسيون وبيحركه ناحية اليمين على خفيف (اكن واحد بيعلم حد السواقة وماسك معاه الدركسيون وبيعدله مسار العربية).. وده بيحصل لو مشيت على حته مكسرة شوية أو الأرض فيها حتت طالعة ونازلة إنما في الطوالي والأرض مستوية مبيحصلش الكلام ده أو بتخف حدته بشكل عام .. المهم رحت ظبطت الزوايا والحدفة فعلاً قلت شوية (بس مرحتش) وحركة الدركسيون دي لسه موجودة

المهم ناس قالت ليا ان فردة الشاسية اليمين ممكن يكون فيها شرخ صغير :K_crying[1]: ودي بسيطة وبتتلحم .. وناس تانية بتقولي علبة الدركسيون (بس هي شبه جديدة مبقالهاش سنة ونص) .. وناس تالتة بتقولي روح عند حد نضيف وأظبط الزوايا تاني ويقولك على المشكلة فين

افيدوني افادكم الله .. لأني من ساعة ما سمعت حكاية الشرخ في فردة الشاسية دي وانا بطني مكركبة .. مع العلم أن العربية 128.. وشكراً لمروركم مقدماً .

**tananybasha** · 10-06-2009 11:19 PM

المشاركة الأصلية كتبت بواسطة ayabooy

يا راجل يا طيب بطنك كركبت من حتة شرخ دا ايام المرحومة كنت كل شهر تقريبا اروح ازور اخوايا و حبيبي السمكري زي زيارة اخي الميكانيكي زوجتى الثانية هههههههههههههههه
لا موضوع الحدفة ده بسيط و من حسب كلامك ممكن نقول انه الاخ الي ركب الكبالن ممكن ميكونش بيتهم كويس في المشرشر بتاع الاكس و ممكن برده علشان مظلمهوش يكون حظك العثر جه في كوبلن اصلا بايز و ده بيحصل و ليه حل من الاتنين انك تمشي بيه شوية يمكن يلين او تغيرة
و موضوع الشدة بتاعت الدركسيون ممكن تكون كذا حاجة تانية و المفروض الباشا بتاع الزوايا هو الي يحدد انهي فيهم
ممكن يكون المقص مش مربوط كويس و بالتالي بيلعب مع المطب او الجلب عاوزة تغير
ممكن يكون البارة خفت و محتاجة تغير او كبس
ممكن تكون الاسكترا (علبة الدركسيون ) محتاجة تغير الفبرة الداخلية و سنة و نص عمر كافي اوي علشان تحتاج تغير العلبة ديه
و ممكن يكون فيه مشكلة في الكاوتش نفسة حصل فيه رفة و ده عادتا احتمال محدش بيبص عليه بس حصل مع اخوك
عموما انت المفروض تروح لحد بتاع زوايا كويس و ممكن يكون المشكلة كلها محتاجة هلالة مقص علشان يظبط الدنيا
عموما انا نصحت ناس بالكبالن الصيني و بنصح بيها تاني عن تجربة كانت افضل الكل

و هل بعد هذا الرد المستفيض من كلام تمام يا باشا