الكبالن و الطقطقة من تانى

**Lion_Heart** · 11-06-2009 09:45 PM

كنت غيرت كبالن للــ اكسل بكبالن ايطالى الكل كان مشكر فيها افضل من الالمانى كمان
المهم بعد ما غيرتها ما شاء الله مفيش اى طقطقة او صوت لكن بعد اقل من الف كم لقيت الطقطقة رجعت تانى
فياترى هل الطقطقة دى عيب من حاجة تانية غير الكبالن بالرغم من ان الطقطقة و انا فى اتجاه طوالى لكن و لنا ماشى بالراحة على السرعة مش بتظهر و كذلك فى الملفات من الجهة اليمين ولا العيب ده ان الميكانيكى ماعرفش يركبهم كويس و الافضل انى اروح مركز صيانة ؟

**yoko** · 11-06-2009 10:14 PM

بصراحة معرفش بس أنا ماشي بال١٢٨ والكبالن بايظة بقالي بتاع ٦ شهور وكانوا إيطالي برده وبعمل بيها حوالي ١٢٠ كم في الإسبوع
والي أعرفة إن الكبلن مبيعملش صوت غير في الملفات أنا عمرة ما عمل معايا على الطريق الطوالي ولا حتى الملفات الي في الطرق السريعة

**samirayad** · 11-06-2009 10:59 PM

عموما مش حتخسر كتير لما تطمن على بلى العجل .....وتطمن على الترصيص بالمره ..........علشان تشوف حالة البلى الأمامى للعجل ( جايز يكون هو السبب فى الطقطقه ....لأن دى أعراض بلى برضه )

**SAMEH_FOUAD** · 11-06-2009 11:01 PM

الكبالن لما بتبوظ بتعرفها من حاجتين لائما بتصدر صوتا فى الملفات (طقطقة),لائما بعد سرعة عالية مثلا بعد ال100 كيلو بتبدأ ترعش العربية جامد ودية مرحلة بتكون فيها الكبالن بتجيب اخرها,وانت بتقول عندك صوت الطقطقة دية بتبان والعجل ماشى فى طريق مستقيم طيب ماغالبا هيبقى من الكبالن الداخلية مش البرانية ,ولو عايز تتاكد فى طريقتين:

1:هتلاقيها فى الطلعة مع الغيار الاول بالذات بتعمل صوت كان حديد بيخبط فى حديد
2:ممكن توديها للميكانيكة يكشفلك عليهم عن طريق انة يمسك الاكس الامامى سواء الناحية اليمين او الشمال ويحركها شمال ويمين لو لقى فيها بوش يبقى كدة العيب منها

وبردة عشان تكون عارف طريقة عمل الكبالن الداخلية هى كالاتى:

بتبقى عبارة عن كبالن بس جواها صليبة مش بلى والكوبلن دة بيتحرك فى اتجاهين فقط فوق وتحت بس ,بعكس الكبالن الخارجية بتتحرك شمال ويمين عشان كدة سهلة انها تبوظ بسرعة,لكن الكبالن الداخلية بتستحمل جامد جدا عن الكبالن العادية

لو لقيتها بايظة ايبقى الميكانيكى هيفك الكبلن دة وهيشوف اية اللى محتاجة غالبا بتكون محتاجة صليبة بتكون عايزة تتغير

وممكن تكون محتاجة تغير علبة الكوبلن نفسها لوجود بوش في الاماكن اللى بيركب فيها الصلايب ,
ونصيحة فية ميكانيكى هيقولك انا هزودلك مكان البوش ومش هتحتاج تغير علبة الكوبلن نفسها ودة عن طريق انة بيوديها لبتاع الكبالن وبيملى الكوبلن عن طريق لحام كهرباء وبيقولك تمام وجرب وعلى ضمانتى وتعود معاك عشر ايام وبعد كدة تلاقيها عملت تانى وبالعكس بيكون ضمرلك علبة الكوبلن خالص,فبلاش تصلحها وهاتلك واحدة استيراد نظيفة احسن واى استفسار انا فى الخدمة

**SAMEH_FOUAD** · 12-06-2009 11:12 PM

كل كوبلن بيبقى فية تلات صلايب وشكل الصلايب الشمال غير الصلايب اللى فى اليمين,وبتبقى الواحدة تقريبا ب15 جنية النظيفة
وسعر الكبالن الداخلية صعب اوى انك تلاقيها جديدة بس لو لقيتها هتعمل مثلا 500 جنية,ولو استيراد مش هيعدى تمن الكوبلن الواحد ,100 جنية وممكن اقل بس مش اكتر من كدة ,وخد معاك ميكانيكى عشان زى ماقولتلك قبل كدة ممكن يكون حد مزودلها لحام كهرباء عشان يملاها