تمبرا مو 91 مفيهاش عزم خالص 1400cc

**hany121** · 13-06-2009 06:10 PM

يا جماعه انا اشتريت العربيه من 20يوم ولاحظت ضعف العزم.. العربيه الغيار الاول بيجيب 15ك علي RPM 2.5 و30ك علي التاني 50ك علي التالت 70علي الرابع 85ك علي الخامس ومابتجبش اكتر من كده حتي لو عليت ال RPM... الموتور كان عايز طقم شنبر وطقم دبرياج.. عملت الشغل اللي فيها وغيرت لبوجيهات NGK تلاته شمعه وغيرت فلتر الزيت والهوا وبرده نسب التسارع والعزم ضعيف.. يا تري ده طبيعي ولا ايه.. ارجو المساعده من الخبراء واسف علي الاطاله...

**Ashraf_Ashraf** · 13-06-2009 06:21 PM

ماشوفتش ليه اسطولنه الدبرياج اكيد فيها تأكل كبير بيضيع عزم العربيه

**mikology** · 14-06-2009 12:37 AM

لا انا معايا اختها و التانى بيجيب 45 و التالت 75 والرابع يجيب ال 100

**ZALABANY** · 14-06-2009 08:55 AM

لا طبعا ده مش طبيعي شيك على الإسطوانه والدسك

**mezo73** · 14-06-2009 04:44 PM

دة بيقول انة غير طقم دبرياج!!!!!!!!!!!!!!!!!!!!!!!!!!!!
طيب انت لما عملت الشمبر عملت وش السلندر ولا لا
يعني المفروض لما بتعمل شمبر بتودي وش السلندر الخرطة يبص علي الصبابات يشوفها لو سليم بيعمل رودية ويظبط تاكيهات ولو الصبابات باظت يتم تغييرها
طبعا ظبط التاكيهات بيفرق في سحب العربية
واكاد اشك ان سير الكانينة متأخر
انت لازم تروح لميكانيكي كويس
لان العادي الاول 25 كم
التاني 40-50
التالت 80-90
الرابع100-110الخامس 160
انا كنت ماشي من كام يوم وواحد بتمبرا شد معايا علي طريق الاسماعيلية
شوية ببص لقيت نفسي ماشي 160
اللي انت بتقولة مش طبيعي خالص
بس الاكيد انك روحت لواحد مش ميكانيكي خالص

**galilio_mad** · 15-06-2009 04:31 AM

طيب حضرتك جبت الشمبر زيرو كام , و لينت العربية ازاى ؟؟؟؟؟؟؟؟؟؟؟

و العربية كاربراتير ولا انجكشن ؟

و بالمناسبة , اول 40 , تانى 82 , تالت 121 , رابع 158 , خامس 178
و عربية الحاج التمبرا بتعمل ارقام شبه دى برضو

**ZALABANY** · 15-06-2009 07:34 AM

المشاركة الأصلية كتبت بواسطة galilio_mad

طيب حضرتك جبت الشمبر زيرو كام , و لينت العربية ازاى ؟؟؟؟؟؟؟؟؟؟؟

و العربية كاربراتير ولا انجكشن ؟

و بالمناسبة , اول 40 , تانى 82 , تالت 121 , رابع 158 , خامس 178

و عربية الحاج التمبرا بتعمل ارقام شبه دى برضو

جاليليوا الأرقام اللي انت بتقولها دي لما rbm بتاع العربية بيوصل 6 على كل غيار ولا كام انا حاسس ان الواحد لو استنى على كل غيار لحد ما يوصل للسرعه دي يبقى بنضغط على العربية جدا

**hany121** · 15-06-2009 11:00 AM

يا جماعه انا مش عارف اشكركم ازاي علي استجابتكم السريعه ده..

انا غيرت طقم دبرياج كامل والشنبر جبته زيرو 10 والعربيه كربراتير ووش السلندر لما اتفك كانت الميه والصدي واكل المجر بتاعة الميه فوديته للخراط ملاه انتمونيا ومسحه وغير كاوتش صباب وقال انه مش محتاج تغيير صبابات او اي حاجه تاني..

انا لينت بحرق صفيحه علي الواقف وبعدين 200 ك جوه البلد و300ك علي طريق مصر اسكندريه الصحراوي وكنت حريص ان ال RPM ميوصلش ل 3 وموصلتش السرعه ل 100ك/س ومكنتش بثبت السرعه او الRPM عند مستوي معين لفتلره طويله..

انا اسف للاطاله بس لو حد يقدر يساعدني او يحب يشوف العربيه انا ممكن اجيله في اي مكان او توصفولي ميكانيكي كويس يكون بيفهم في العربيه اروحله..

سؤال اخير. هو ممكن العجل اللي ورا يكون مقفول او مفتوح. اقصد مش Straight لاني بحس ان العجل مقفول لجوه شويه من ناحيه الباب ولا انا بيتهيألي علما بان العربيه فابريكه يعني مش واخده خبطه ولا حاجه..

انا اسف مره تانيه ومتشكر ليكم جدا

**ZALABANY** · 15-06-2009 11:03 AM

في ميكانيكي أستاذ في السيده عيشه في سوق الحمام القديم إسأل على الحاج إمام الميكانيكي ألف من هايدلك

**galilio_mad** · 15-06-2009 04:47 PM

المشاركة الأصلية كتبت بواسطة hany121

لو حد يقدر يساعدني او يحب يشوف العربيه انا ممكن اجيله في اي مكان

سؤال اخير. هو ممكن العجل اللي ورا يكون مقفول او مفتوح. اقصد مش straight لاني بحس ان العجل مقفول لجوه شويه من ناحيه الباب ولا انا بيتهيألي علما بان العربيه فابريكه يعني مش واخده خبطه ولا حاجه..

انا ساكن فى مصر الجديدة لو تحب قابلنى و ربنا يقدرنى و اعرف افيدك ( احمد جلال 0124234223 )

موضوع العجل ده خداع نظر , عشان الصدام فيه سوكه و بروز عن جسم العربية
و اى بتاع زوايا بيعرف لو العجل فاتح او قافل او مرحل قدام او ورا