السلام عليكم ,

ياجماعة لو تفتكروا من كام اسبوع كنت عملت موضوع عن شراء سيارة جديدة في مدى ال 80 الى 85 الف وكنت حاطت عيني علي الجين 2 الجميلة و البريللانس ال frv و الجراند بونتو و ضفت مؤخرا الي القائمة السكودا فابيا ال 1400 .

لكن للاسف بعد مداولات حطيت الجراند بونتو و السكودا علي جنب علشان نفسي اعلى عن حاجز ال 80 حصان ( سياراتي الحالية 1242 سي سي 80 حصان ) و للاسف الجراند بونتو 77 حصان و الفابيا 86 .

المهم حطيت ال frv و الجين 2 وجها لوجه . و لقيت ان في حاجات كتير مشتركة بينهم و العيوب برده تقريبا واحدة و السعر متقارب ..
جينا بقى لنقطة مهمة جدا !

[overline]التــــــــــــــوكيـــــ ـــــــــــــــــل ! [/overline]

كان في واحد صاحبي معاه ويرا قالي ان فرع عز العرب بمدينة نصر ممكن يعملي test drive للسيارة .. انشغلت بصراحة جدا علشان عقبال عندكم بجهز في الشقة و كدة ..

فضيت من كام يوم خطفت رجلي .. لقيت التوكيل قافل .. كنت رايح متاخر شوية , قلت احسن حاجة تاني يوم الصبح اتصل بالتلفون احجز test drive للfrv و للgen2 في نفس اليوم علشان حتى اعرف افرق بينهم بسهولة .

المهم جه انهاردة .. اتصلت بالبافارية .

حسيبكم مع ملخص للمكالمة و انتم الحكم :


البافارية :

- مساء الخير , لو سمحت كنت بسال عن حجز ال test drive للبريللانس frv .
.... اهلا وسهلا يافندم - احمد ( مش فاكر ) مع حضرتك , طبعا يا فندم حضرتك ممكن تقوم
بعمل test drive للfrv بدون اي حجز , حضرتك شرفنا في اي فرع من فروع البافارية و يستحسن الفرع الجديد بطريق الاوتستراد في اكثر من 5 سيارات test drive و حضرتك تجربها براحتك .

- والله كلام جميل . ياترى انهي موديل المعروض ؟
.... ال 1600 الكاملة gls يا فندم و في ال 1600 الاتوماتيك كمان .

- طيب بالنسبة لل1300 ؟ هي موجودة ؟
.... موجودة يافندم بس معقتدش ان في منها test drive

- طيب ياترى ال 1600 الكاملة في منها الوان ايه ؟
.... الالوان المتاحة حاليا قليلة جدا علشان الدفعة دي تقريبا خلصت انما جميع الالوان متاحة من الاتوماتيك و ال 1300 .

- كلام جميل - ال test drive مدته اد ايه ؟ و هل ممكن اصطحب حد معايا ؟
.... الtest drive مدته لحد ماحضرتك تحب يا فندم طالما داخل مواعيد العمل من 9 الى 5 و اهلا وسهلا باي من اصدقائك او افراد العائلة لازم طبعا يكونوا مع حضرتك .

- متشكر جزيلا لذوقك
.... تحت امرك يافندم و لو في اي شكوى اتصل علي رقم xxxxx

--
قفلت و انا بصراحة من غير مااتعامل معاهم .. نقسيتي اتفتحت !

مدة المكالمة - دقيقة و نصف .


جيت بقى لعز العرب .. اتصلت بالنمرة بتاعة مدينة نصر .. مرفوع مؤقتا من الخدمة .. قلت اتصل ببتاعة الصحراوي احسن حتى ده المركز الرئيسي _
عز العرب :

- مساء الخير .
.... مساء النور عز العرب - ( اسمها ) مع حضرتك .

- لو سمحت كنت بسال عن ال test drive للبروتون جين 2
.... Test ايه يافندم ؟

- test drive ... Test drive
.... معلش مش فاهمة حضرتك ..

- قصدي يعني تجربة السيارة ..
.... اه . طيب ممكن احولك علي حد من المبيعات

- ياريت شكرا جزاكي الله خير
( فاتت 10 دقائق علي الانتظار )

- الو ؟
.... ايوا يا فندم

- لو سمحتي كنت بسال عن ال test drive للجين 2 .
.... .....

- الو ؟
.... ايوا يا فندم معاك

- لو سمحتي كنت بسال عن ال test drive للجين 2
.... اه يا فندم . هي العربية فيها مشكلة ؟

- عربية ايه ؟
.... عربية حضرتك الجين2 مش حضرتك عايز تعملها test .

-.... لا حضرتك فهمتيني غلط انا عايز اعمل test drive للجين 2 انا مش معايا العربية
.... اه مش فاهمة معلش .

- يعني عايز حضرتك اجرب السيارة علشان ان شاء الله لو عجبتني اقوم بشرائها ان شاء الله .
.... ( باللفظ و الله العظيم ) : اااااااااااااااه .. تجربها علشان تشتريها ..

- في حاجة انا قلتها غلط ؟
.... لا يافندم ثواني بس ..

( صوتها بتكلم واحد تاني .. واحد عايز يجرب جين 2 اقولوا ايه ...
صوت اخر : يجرب ؟؟ طب حوليه على مش عارف مين .. )

- الو ... ( صوت موسيقى )
.... الو ؟

- ايوا لو سمحت انا كنت بسال علي تجربة القيادة
.... اهلا وسهلا ! ممكن اتشرف باسم حضرتك ؟

- مع حضرتك المهندس كريم كامل
.... مهندس كريم ؟

- مهندس كريم كامل ..
.... اه .. حضرتك بتشتغل في توكيل ايه ؟

- يا سيدي انا مش بشتغل في توكيلات انا واحد بفكر اشتري الجين 2 و عايز اجربها قبل ماشتريها ؟
.... ايوا ايوا انا فهمت .. معلش ان اسف اصل مافيش عربيات متوفرة حاليا ..

- مافيش عربيات ؟ هو انا حركب واحدة زيرو ؟ انتوا مش عاملية واحدة test drive .
.... لا يافندم للاسف مافيش .

-طب منتم كاتيب كدة علي الموقع !! سبحان الله , طب افرد انا عايز اشتري حالا ؟
.... ساعتها نبقى نتكلم !


بصراحة عمري ماعملتها في حد ! رحت رازع السماعة في وشه ! و كرهت ال 20 دقيقية ( اه 20 دقيقية !! ) الي تكلمت فيها و كرهت عز العرب على بروتون علي كل حاجة من غير ماجرب العربية اصلا !!

ده توكيل عربيات ده ؟ بصراحة حاجة تكسف !

انا اسف لو ضايقت حد من اصحاب السيارة او من محبي بروتون او العاملين بيها .. بس لما يكون ده مستوى الناس في الحوار ! حستنى ايه في الصيانات و المشاكل ؟؟!!

الي غايطني ان في توكيلات كتير مبتعملش test drive و ده عادي في مصر طبعا بس - بس هما بنفسم الي حاطين اعلان test drive علي الموقع بتاعهم !!!!

طب يا سيدي قولي معندناش test drive ووفر وقتي و وقتك و خلص الموضوع علي كدة !!!

معلش ! كان لازم احكي لحد !