مهازل التقفيل المصرى ومراكز الصيانه

**aymansaad** · 25-06-2009 04:26 PM

روح جهاز حماية المستهلك الاول

**Ashraf_Ashraf** · 25-06-2009 04:48 PM

اولا الصيانه المتحركه يعنى انت اللى تجرى وراهم
ثانيا خرطوم يضرب فى عربيه زيرو معناه انه خرطوم مياه بلاسيتك مش باور
ثالثا شوفت لو كنت اشتريت القديم على الاقل مش كنت اتضايقت هههههههههههههههههههههه
انت متوقع ايه غير الاسلوب ده وغير استخدام مواد وخامات غير مطابقه علشان زياده المكسب معلش ربنا يحفظهالك
بس اعتقد ماشيك من غير زيت فى الطلمبه هتسخن بشده وهتتحرق فخد بالك

**JAM** · 25-06-2009 05:14 PM

انا رأيى انك تطع على جهاز حماية المستهلك الأول... وياعالم... ممكن يحصل معاك زى ماحصل مع بتوع ابو الفتوح فى توكيل اسبرانزا ويتحكملك بتعويض 200,000 جنيه زى ماحصل من شهرين.. لان واحد اشترى منهم عربية ومش فاكر ايه اللى حصلها قام موديها لجهاز حماية المستهلك ورفع قضية واتحكمله بالمبلغ السابق ذكره... وساعتها متنسنيش بالشاى بتاعى لانى دليتك على الطريق اللى ممكن تركب بيه مش نوبيرا لأ دا انتا ممكن تركب حتة المانى

**Bob2009** · 25-06-2009 05:50 PM

اولا السلام عليكم

بص ياباشا المشكله مش مشكله التقفيل المصرى ولا الكورى ولا الالمانى انا معاك ان التقفيل المصرى مش حلو واغلب الناس بتشتكى منه لكن برده فيه كويس وبعدين لازم اى عربيه جديده يجى فيها حاجه كده على شان كده فى ضمان
وبعدين عموما هتلاقيها حاجه اى كلام فى التوكيل ان شاء الله ومتخفش
واخيرا قول الحمد لله انها جت على اد كده مش على شان العربيه ولا التقفيل لا على شان العين مشاء الله عندنا هنا فى مصر العين زى الفل يعنى فالحمد لله وخلاص بس انت اعد قول العربيه باظت منى وكده على شان الناس تخف شويه عنك
الحمد لله وان شاء الله حاجه بسيطه ومتخفش الموضوع لا هو محتاج حمايه مستهلك ولا الكلام ده كله هى حاجه بسيطه ان شاء الله
فى حفظ الله

**محمود نجيب** · 25-06-2009 05:55 PM

ما ضاع حق وراءه مطالب

**شريف** · 25-06-2009 06:54 PM

ربنا يكون فى عونك

**waelwael** · 25-06-2009 07:03 PM

نرجو التوضيح أنت إشتريت السياره من التوكيل ولا من معرض وأنت فى أى محافظه وإزاى يقولك روح المنصوره نرجو التوضيح العاجل علشان نقدر نساعدك ونقولك تعمل إيه

**samcar** · 26-06-2009 04:33 PM

اولا شكر لكل اللى اهتموا بالرد

ثانيا - عايز اوضح ان زعلى كان متركز على ان شرا عربيه زيرو مفروض يوفر الوقت ويريح الاعصاب مش العكس
ثانيا - مشكلتنا فى البلد دى ان المطالبه بالحق اما ناس بتعتبره فذلكه مالهاش لازمه - نظام كبر دماغك - وناس بتعتبره تار بايت مع الحكومه والتجار- لازم تسيح دمه -

ثالثا احكى لكم اللى حصل مع مركز الصيانه واحب برضه اسمع تعليقات لانه انا طرحت الموضوع للاستفاده

وصلت المركز قبل الساعه 5 ورغم ان اليوم خميس لكن كان فى عدد مش قليل من العملا
المركز مش مجرد خدمة دايو وبس - كان كمان كيا واسبرنزا

فى نظام وحركه سريعه بس للاسف برضه تحس ان فى مجاملات وده من كلام الناس اللى حوليك
فى ضغط واضح على العماله فى المكان وتحس ان روحهم طالعه من كتر الشغل

قابلنى مهندس طيب وواضح انه دينمو المكان - كلامه قليل بس سريع الحركه
شاف العطل - قال غيرو الخرطوم -
الفنى غير المطلوب فى حوالى 20 دقيقه -
حط زيت بدل اللى وقع - وبعدين طلب انى اشترى علبه زيت علشان يكمل قلت له مش حاشترى حاجه
جه المهندس قال له اطب علبه من المخزن - فعلا حط الزيت - المهندس قال لى مع السلامه وما دفعتش حاجه

الملاحظات على المركز هى
العماله عددها ما يتناسبش مع الضغط
ما كانش فى اهتمام بمعرفة سبب العيب - الرد التقليدى - دى حاله نادره - او عين

اللى صلح كان كانه هم وانزاح لما طلبت حد ينضف مكان الزيت اللى غرق حوض العربيه من تحت قالوا اغسلها فى البنزينه

قلت لهم احنا كده فى مصر نبوظ الطبخه على مليمين ملح او كل حاجه عندنا الا خمسه

السؤال اللى ماردوش عليه لو انا من اسيوط ولا قنا - وحصل اللى حصل كنت اعما ايه ؟؟؟
ليه مادام ربنا موسعها عليكم ما تتعاقدوش مع مراكز صيانه على مستوى الجمهوريه ؟؟؟؟

عموما انا اتعلمت درس انه مفيش فى مصر حاجه اسمها احترافيه صناعه او تصنيع -
اللى عايز يريح دماغه يشوف ماركه مضمونه تقفيل بره ويكون له معرفه فى مركز الصيانه بتاعها
وسلا عليكم