السيارات المعاد انتاجها

10-10-2007 06:54 PM

يا رب يا رب يا رب ما تقلب خناقة

بصوا بقي انا مبحبش اتكلم عن الصيني بسبب الخناقات اللي بتحصل دايما بس انا اتكلمت مرة واحده قبل كده وربنا ستر وديه المرة التانية ربنا يستر بقي

اولا خليني نتفق ان صيني هندي ماليزي ايراني كله طالع في المقدر جديد وكلها عربيات تقلق لاننا منعرفهاش قبل كده والادهي من ده ان الدول ديه يا اما منعرفش عن صناعتها حاجة زي ماليزيا يا اما عندنا تصور سلبي عنها كما هو الحال بالنسبة للصين

نرجع تاني لانهم كلهم جداد في دنيا صناعة السيارات ومين في صناعة السيارات مكانش يوم جديد كل الياباني كان جديد وكان اقتصادي ومنافس في السعر عن الامريكي واللماني وعلي حساب بعض من الجودة بردوا

وقبليهم الالماني كان منافس للصناعة الامريكيه والانجليزية بسعر اقل وبجوده اقل ( مش كل الالماني طبعا بس ارجعوا لتاريخ اودي وخسائرها الاولي وطبعا سيارة الشعب فولكس )

المهم كله بيبداء وعايز ياكل عيش ويصنع عربية وده لازم يعمل حاجة من اتنين

يا بيشتري تصميمات جاهزة ويعديد انتاجها ( وده اللي هتكلم عليه )

وبكده وفر علي نفسة تكاليف ووقت التصميم والاختبارات الخ الخ وكمان كسب شعبية السيارة الاصلية

يا اما( بيهوبص ) ولومواخذة وبيصمم من اول وجديد وهو وحظة وده انا بخاف منة مووووووووت

فقط نثتثني من ذلك الصانع الماليزي لاعتمادة علي خبرة كافية موروثة من لوتس ولتفوق الصناعات الماليزية عموما والصناعات الدقيقة علي الاخص وانتوا عارفين ان الصناعات الدقيقة والالكترونيات معيار حقيقي لتقدم صناعات الدول

امثلة علي العربيات المعاد تصنيعها

(ليونسيل - لانسر كريستاله - انتاج صيني - تصميم ياباني )
(اكسبلوجن - ديهاتسو تريوس - صيني - تصميم ياباني )
(شيري كيو كيو - دايو ماتيز - انتاج صيني - تصميم كوري )
( برودوا - ديهاتسو ميرا - انتاج ماليزي - تصميم ياباني )
( بروتون ويرا - لانسر بطة - انتاج ماليزي - تصميم ياباني)
(برايد سابا - كيا برايد - انتاج ايراني تصميم كوري / والتصميم الكوري متاخد من الياباني / والتصميم الياباني متاخد من فورد )

السيارات المعاد انتاجها معادلة صعبة حيث انها بتساوي

تصميم معروف وعادة له شعبية + سعر رخيص يقرب لسعر المستعمل + قطع غيار منتشرة جدا

طيب لو حبينا نرتب الدول الجديده ديه من حيث الاكفاء في الاقل كفائة يبقي هنقول ( ده راي شخصي طبعا واحب اسمع رايكم بموضوعية ) بس انا قيمتهم علي اجمالي مستوى صناعات البلد

1- ماليزيا 2- ايران 3- الهند 4- الصين

ماليزيا وايران عندهم صناعات الكترونيات وصناعات دقيقة وصناعات نووية ويده اعقد صناعات بعد صناعات علوم الفضاء

اما الهند فهي قديمة في وسائل النقل بس بتشترك مع الصين فافتقادهم للتكنولجيا نفسها وعلي العكس تفوقهم في التصنيع التجاري واسع النطاق او mass production

( معلش يا جماعة طولت عليكم بس هانت اهيه خلاص :lol: )

تعالو نحسب نفس العربيات تاني براحة وبالعقل وندي نقاط من 3 لكل من

1- جودة وخبرة الصانع الاصلي 2- مدى خبرة الصانع الجديد 3- كفائة التصميم الاصلي 4- كفائة التوكيل المحلي (وطبعا لتوكيلات كلها علي ما تفرج فهنقيم بدالها مدي توفر قطع الغيار في السوق )

(ليونسيل - لانسر كريستاله - انتاج صيني - تصميم ياباني )
تاخد 3 نجوم للصانع الاصلي و3 للتصميم واحنا ظلمة هنديها 0 عشان صيني ونديها 3 نجوم لتوفر قطع الغيار ومراكز الصيانة

فالنتجية 9/12

(اكسبلوجن - ديهاتسو تريوس - صيني - تصميم ياباني )

2 تصميم الاصلي 2 صانع اصلي 0 عشان صيني 0 عشان قطع الغيار مش متوفرة

4/12

(شيري كيو كيو - دايو ماتيز - انتاج صيني - تصميم كوري )

0 تصميم الاصلي + 2 مصنع اصلي + 0 عشان صيني + 1 عشان قطع الغيار

يبقي 3 /12

( برودوا - ديهاتسو ميرا - انتاج ماليزي - تصميم ياباني )
2 صانع اصلي + 3 تصميم الاصلي + 2 كفائة صانع الجديد + 0 توكيل وقطع غيار

7/12

( بروتون ويرا - لانسر بطة - انتاج ماليزي - تصميم ياباني)
3 صانع اصلي + 3 تصميم اصلي + 2 صانع جديد +1 توكيل وقطع غيار

9/12

(برايد سابا - كيا برايد - انتاج ايراني تصميم كوري / والتصميم الكوري متاخد من الياباني / والتصميم الياباني متاخد من فورد )

3 تصميم اصلي + 3 مصنع اصلي + 1 مصنع جديد + 3 توفر ورخص قطع غيار
10/12

فالمسئلة يا اخونا مش صيني يبقي وحش ولا ياباني يبقي حلو اللي معادلات اللي فاتت ديه مجرد طرف من المعادلة الاصلية للسيارة اللي بيتحسب فيها استهلكها للوقود وسعرها وحجمها وقسط ولا كاش وزيرو لا كسر ولا مستعمل وووو وفي الاخر لولا اختلاق الاذواق لبارت السلع واكيد الصيني هيتطور عن كده ده شركة شيري بدئت انتاجها في التسعينات فعشرة سنين وشوية حاجة قليلين كعمر شركة في السوق وفي نفس الوقت دليل قوي لا ينكر بانها شركه صاااااااااااااااااعده جدا

10-10-2007 06:58 PM

اه صحيح نسيت المغرب بتعمل عربية بتاعة رينو وباسم داتشيا الو لوجان عربية تحفة ومكسرة الدنيا بجد بره ياريت تنزل هنا

**إسلام شاهين** · 10-10-2007 07:11 PM

عقبال مصر ما تبدأ تصنع حاجة زي كده ز

بس أنا ليه ملاحظة :- إنت مش شايف إن العربيات ديه كلها رخيصة السعر وده بيبقى على حساب الجودة اللي هي كانت أساسا في العربية المتقلدة منها ؟

يعني مثلا السابا الإيراني هل جودتها زي البرايد الكوري ؟
هل البروتون زي الانسر البطة ؟
هل البيجو الإيراني الجديدة زي الفرنساوي ؟

10-10-2007 07:23 PM

بص يا سمسم البروتون اولا علي حد علمي ممتازة كسيارة اه فيه فرق في الجوده بس لا يتعدي الفابريكس والبلاستيكات وانا كواحد شاري عربية في رينج الستينات سبعينات ارحب اني اشتري عربية بجوده اقل في الكماليات والفرش وزيرو افضل من القديمة ذات الخامات الافضل

المشكلة بقي في ايران انها بتحب تنكش وتعدل في كل حاجة

السابا عدلت فيها المحرك وجابتلوه انجيكشن كوري ابن حلال مع سيستم بوش ونزلت الموتور نفسة بتاع مازدا 1300 وده اللي كان في المازدا 121 وده من نفس عيلة الموتور القديم يعني زي ما تقول خلت الاكسنت من 1300 ل 1500 البرايد بقيت من 1100 كاربراتير ل 1300 انجكشن وده نتجتة مش وحشة حتي الان
واللي اكدلي ده اصدقاء ليا في ايران واصدقاء في سوريا والاخبار العادية اللي بتيجي من سوريا وهيا ان البرايد سابا التاكسي الاول في سوريا واعلي مبيعات للاجرة والملاكي بعديها الاكسنت الجديده

السمند بصراحة خايف منها وعلي فكره في اتفاقية تعاون مشترك بين ايران وسوريا تقضي بتجميع السمند هناك في سوريا قريب جدا بشكل كامل

نرجع للمعادلات والواقع بقي كل البرايد القديم يا كوري هاتش باك يا سيدان مصري كاربراتير
وانا بكره الكاربراتير وبكره السيدان المصري بحب العصفورة جدا بس مع والدتي وبعدين انا اتخنقت من صغر شنطتها فبالتالي اخترت السابا علما بان سعرها كان بيتراوح بين 49 -50 والبرايد المصري او حتي الكوري سيدان كانت سعرها بيوصل ل 42 موديلات اقصاها 2002
فحسبة البرايد مختلفة وكل ده طبقا لظروفي ومتطلباتي كان مناسب جدا فعشان كده كل واحد ليه حسبتة اه فيه ثوابت بس لكل منا اختياراتة وتفضيلاتة

**PRO-DRIVE** · 10-10-2007 07:46 PM

وقبليهم الالماني كان منافس للصناعة الامريكيه والانجليزية بسعر اقل وبجوده اقل ( مش كل الالماني طبعا بس ارجعوا لتاريخ اودي وخسائرها الاولي وطبعا سيارة الشعب فولكس )

معلش حختلف معاك في الحته دي

اودي عمر ما كان خسائرها بسبب الجوده ولا التصنيع
اودي كان كل خسائرها بسبب الحرب

كان في 4 شركات هورش و DKW و فاندرار و NSU

الاربع شركات دول اتدمرت مصانعهم في الحرب العالميه الاولي
حصل بينهم تعاون علي اعاده الحياه ليهم
و جت الحرب العالميه التانيه برضه اتدمروا فيها

كانت DKW هي الوحيده اللي عندها راس مال راحت فتحت مصنع في المجر و بدأت تصنع دراجات و ساعدت بقيه الشركات

بعدين عملوا حاجه اسمها AUTO UNION و اقتصر دور DKW علي الدراجات الناريه
و هورش علي السيارات الكبيره و الجرارات الزراعيه و ....
و فاندرار علي السيارات المتوسطه و الصغيره
و NSU السيارات الرياضه

كل مشاكل اودي في العصر دا كانت بسبب الحروب و ليس الجوده :)

__________________________________________

بالنسبه للصناعه الايرانيه انا فعلا متفق معاك انهم مش بيحبوا التقليد
كل عربيه لازم تكون فيها حاجه من تفكيرهم

10-10-2007 10:01 PM

اودي عمر ما كان خسائرها بسبب الجوده ولا التصنيع
اودي كان كل خسائرها بسبب الحرب

كان في 4 شركات هورش و DKW و فاندرار و NSU

الاربع شركات دول اتدمرت مصانعهم في الحرب العالميه الاولي
حصل بينهم تعاون علي اعاده الحياه ليهم
و جت الحرب العالميه التانيه برضه اتدمروا فيها

كانت DKW هي الوحيده اللي عندها راس مال راحت فتحت مصنع في المجر و بدأت تصنع دراجات و ساعدت بقيه الشركات

بعدين عملوا حاجه اسمها AUTO UNION و اقتصر دور DKW علي الدراجات الناريه
و هورش علي السيارات الكبيره و الجرارات الزراعيه و ....
و فاندرار علي السيارات المتوسطه و الصغيره
و NSU السيارات الرياضه

كل مشاكل اودي في العصر دا كانت بسبب الحروب و ليس الجوده

تسلم يا باشا علي التوضيحات القيمة

وانا متفق معاك تماما بس ده كان حال الصناعة الالمانية عامة ولم ينج الا فولكس بسبب الدعم الحكومي لها والدعم ده كان علي كافة الاوجة سواء ماديا او بحثيا كمان وده خلي الصناعة الالمانية في الوقت ده تكون من اوائل الدول في انتهاج فكر الانتاج المسلسل الواسع المدى او ال mass production

**Ahmed Anwer** · 10-10-2007 10:16 PM

شوف حضرتك التقرير ده
http://www.forbes.com/2004/01/26/cx_dl_0126feat.html
بإختصار بيقول مبقاش في عربية حديثة نقدر نقول عليها وحشة
و ده يشمل في وجهة نظرهم حتي السيارات الصغيرة الرخيصة و إنتاج دول العالم النامي
و الفضل ده يرجع لليابانين اللي علوا مستويات الجودة و التكنولوجيا و الأخطاء و قلة الأعطال
يعني مفيش عربية هتسخن و متدورش الصبح و الحاجات اللي كانت بتحصل في العربيات القديمة
ده مش كلامي ده كلام مجلة فوربس
بس مش عارف ده يشمل كمان العربيات الصيني و العربيات ذات التكنولوجيا القديمة نسبيا و لا لأ

10-10-2007 10:39 PM

انا معاك يا احمد بس طبعا كلام المجلة كبير اوي عشان بيقارن بين عربيات زمان اوي دو وصل للحرب العالمية التانية

انا هقولك قصدي بشكل عملي انا شخصيا عطلت مني العربية بعد 3 شهور من ما جبتها ومكانتش بتدور الا بالزق وطلعت البطارية خرمنت وعرفت بعد كده وقابلت بعد كده 3 غيروا البطارية في اول سنة بعد ما عملتلهم مشاكل

الامثلة ديه ممكن متكونش عامة بس وارده الحدوث في السيارات المعاد تجميعها فالبنسبة لي مش وحش بالمقارنة بسعرها وكماليتها وبرضوا افضل من المستعمل بالنسبة لشخص تاني فضيحة ان عربيتة تتزق وهيا لسه مكملتش 3 شهور

ده غير الكاوتش اللي دون مستوي الكاوتش اللي كان بينزل مع الصانع الاصلي وهكذا الامثلة كتيرة في كل العربيات المعاد تصنيعها
الادا المصري فعلا تختلف عن الروسي في خامات الفرش علي الاقل
الشاهين خامتها اقل جوده من الدوجان والدوجان اقل جوده من ال131
والويرا اقل جوده من الانسر بطة واقل جوده من الاكسيل لما كانت زيرو علي الاقل في الخامات برضوا والتلاتة نفس العربية اصلا
ونروح بعيد ليه البرايد برضو ما هي الا نسخة معادة التصنيع بشكل اقتصادي من المازدا 121

اه كل العربيات ديه اتلاقت عيوب شائعة في التصميمات الاولي بس فلسفة التصنيع في النهاية قائمة علي الاقتصاد في التكاليف فشنطة المازدا 121 اللي بتفتح بمساعدين هيدروليك وكنبة خلفية متحركة مش ينفع تبقي زي البرايد الكوري حتي واحد كلف وواحد عمل اللي يشغل بشكل اكثر توفيرا وهكذا

**3mr Farrag** · 10-10-2007 10:49 PM

انا اللي اعرفه ان الاكسيل موتور لانسر بطه.....هل هو فعلا نفس الموتور ولا نفس تصميم الموتور....

10-10-2007 11:06 PM

ظني انه معاد تصنيعة بمعرفة هيونداي وبترخيص من ميتسوبيشي ولو كان كوري وده اغلب الظن فهو موتور جامد برضوا واحتفظ بنفس اداء المحرك الاصلي وان كان بيبخر زيت اكتر من الموتور بتاع البطة مش عارف ليه ؟ هل ده فرق في التقفيل ولا عيب جوانات ولا انا اللي حظي بشوف مواتير اكسيل مزيتة :lol: