روحت النهاردة الصبح لأبو الحسن اشتريت فلتر فتيس وجوان لأن العربية عاملة 126000 وكسور وهي عربية كوري استيراد و1500 مش 1600 ودي حاجة مستغرب منها شوية.

كلمت حسن الصغير عند محمد عبده اتفق معاه على ميعاد النهارده بس قال لي حاجة قلقتني جامد هو فاكرني من أول مرة وفاكر ان الفتيس اوتوماتيك كهرباء بخاصية الهولد وزر مكوب عليه باور وأنا عمري مفكرت اجربهم لأني مش فاهم استخدامهم ولا حتي النقلات 1 ، 2 ،3 اللى بعد نقلة d فلو على الهامش كده حد يفهمني يبقي كتر خيره.

المهم حسن قال لى الفتيس ده بلاش تغير الزيت بتاعه لأن زيته هايدروليك وهو مش ضامن بتاع السوق المصري؟!!!!!!!!

أنا محتار : الخبراء بيقولوا ان الكتالوج بيقول غير بعد 40000 والفلتر طبعا.

أنا خايف بعد ماغير الفتيس يحصله حاجة ... يبقي الواحد نفسه يحافظ العربية والناس تخوفه ومش عارف انه الصح وانه الغلط .. وكله إلا الفتيس مقدرش اتعلم فيه لأنه لو باظ يبقي عليه العوض في العربية.

الحاجة انا شاريها زي ماقلت ،،،، أغير ولا لأ؟ وهل زيت الفتيس هو زيت البور ونوع ايه اللى نوعا ما مضمون للفتيس الكهربا مش اللى راكب في النوبيرا الاوتوماتيك المصري..

مستني رد عاجل لأني ميعادي معاه الساعة 5 النهارده

وشكرا...