العربية بتسخن - ايه الحل ؟

**hhnnaayy** · 06-07-2009 11:43 PM

السلام عليكم و رحمة الله و بركاته

انا عندي عربية ريجاتا موديل 85 و المشكلة انها بتسخن جدا و المياه لازم ازودها كل يوم
الميكانيكي قالي غير الاربة بتاعت المياه عشان بتسرب فغيرتها و نفس المشكلة لسة
قالي الغطاء بتاع الاربة مش بتاعها و العربية بتاخد هواء غيره فغيرته و نفس المشكلة لسة موجودة قالي المروحة بتاعت الريداتير مش بتاعتها دي بتاعت ال 128 وانا مش عارف اغيرها ولا المشكلة ممكن تكون من حاجة تاني ؟ وهل طبيعي اني قبل ما انزل كل يوم ازود مياه ؟ مع العلم ان العربية لما فضى منها الهواء اللي قال عليه درجة حرارة العربية 90 دايما هل دة طبيعي ولا المفروض تكون اققل من كدة ؟

**faron525** · 07-07-2009 12:07 AM

1- السخونة ممكن تكون من عدم تنظيف الردياتير يعني ممكن يكون عايز يتسلك وده سهلة .
2- طرمبة المياة بتقلب ولا ايه حاول تبص عليها .
3- الترموستات بتاعة الحرارة شغالة ولا فيها عطل .
4- ممكن يكون في تسريب من الكوعة .
وربنا يوفقك وتتحل المشكلة

**samirayad** · 07-07-2009 12:08 AM

طيب أنت لاحظت حاجه على العادم بتاع الشكمان .....لونه أبيض شويه عن الأول ......مع الأمبيلهات ..........وجرب كده وأنت واقف ....خللى حد يزود بنزين من عند البكره اللى على الكربوراتير أو بالدواسه .....وبص أنت على العادم .......وهل الميه بتغللى فى القربه ......زى مايكون فيها نفخ هواء

**hkyfgvyiyu** · 07-07-2009 12:50 AM

اعتقد الحل تسليك الريداتير

**hhnnaayy** · 07-07-2009 10:46 AM

طيب انا نضفت الريداتير بالبلاور هل دة كفاية ولا لازم يتفك يتنضف ؟
و فعلا المية بتغلى ف الاربة بس لما درجة الحرارة بتعدى ال 100 و الشكمان اعتقد زي ما هو مفيش حاجة

**Samir Elshahawy** · 07-07-2009 11:18 AM

أنصحك تعمل الاتي:
- مراجعة خطوط التبريد و الوصلات و الكلبسات و التأكد من أن الخراطيم مش ناشفة أو بها تشققات يحدث منها التسريب
- التأكد من أن الوصلات و الكيعان سالكة و ليس بها اي سدد او أعاقة لسريان المياه
- التاكد من أحكام غلق الاربة و أن سن القلاووظ بتاع الغطاء مش مفوت أو به تأكل
- تنظيف الردياتير من الخارج بالهواء (من داخل الحوض الي الخارج)
- تنظيف الردياتير و تسليكه من الداخل و التأكد من سلامته
- التأكد من أن الثرموستات سليم و شغال
- التاكد من ان المروحة تعمل بعدد اللفات الطبيعية مش أقل