الموضوع: محتاج رأيكم بأمانة ربنا وتكون عن دراسة وتجرية

أولا" احب اشكر الى كل اهتموا بيا بالترتيب كل الى شاركوا برأيهم وخدت من وقتهم فى الرد عليا الأخوة الأعزاء ( توربو والصاوى وأحمد سامى وشيكو وبيكو ومحمد الحسين والمهندس مخلوف ومحمد اسماعيل وأبو علم وساكسون وأيمن الخولى بجد بشكركوا من كل قلبى ويارب دايما تكونو فى صحة وأحسن حال.
وأخص بالشكر المهندس محمد مخلوف لأنة طالب منى اجابات بنعم أو لا عشان يرشحلى حاجة كويسة لأنى حاسس أنة حاطط نفسة مكانى كأنه هيشترى العربية دى ليه هو بجد شعور نبيل منك
1- هل تفكر فى بيع السيارة بعد فترة قصيرة لا
2- هل مهم لك سعر ما بعد البيع لا
3- هل بأستمرار بيكون موجود 5 أو 4 أفراد فى العربية نعم
4- هل تسافر كثيرا لا
5- هل يهمك موضوع أستهلاك البنزين نعم
6- هل تريد عربية ملفتة للنظر وغير منتشرة حفاظا على البرستيج لا
7- هل أنت ممن عندهم طرق للحصول على قطع الغيار الأستيراد لا
8- هل يهمك عامل ألأمان نعم
9- هل تهمك أن تكون العربية فيها جميع الكاماليات وأنواع الرفاهية نعم
10- هل يهمك أن يكون أداء الموتور عالى فى العزم والتسارع تحسبا لأى ظرف نعم
11- هل يهمك أن تكون العربية متوازنة على السرعات العالية فوق 140 نعم
12- وأخيرا وليس أخرا ما هو أقصى مبلغ ممكن دفعة فى العربية وما هو توقعاتك بالسعر فى حالة البيع
والله المستعان الأجابة :- أنا كل الى هاقدر ادفعة 30 ألف و هاقسط الباقى وتوقعى لتنزيل السعر فى حالة البيع لا يتعدى 10 ألاف جنيه

- بالنسبة للأخ شيكو عايز اعرف منك ايه هى الأختيارات الكتير الى فى دماغك الى فى حدود ميزانيتى وعايز رأيك فى الكيا البيكانتو لو اتحتط فى مقارنة مع الانوس والفيرنا مشكوووووووور

- ياريت الأخ توربو تطمنى عملت ايه فى عربيتك الصينى بعتها ولا لسة مستحمل مشاكلها وايه هى مشاكلها بالظبط يعنى فى العفشة ولا السحب ولا الزوايا ولا الصوت العالى ولا مشاكل فى الكماليات زى التكييف والكاسيت والسنترلوك ياريت تحددلى مشاكلها بالظبط
- وبالنسبة للصاوى ميرسى أوى على النصيحة الغالية بتاعة طقم السفرة لأن مراتى فعلا" محتاجة طقم بدل الى أتكسر فى عزايم رمضان بس أنا بقترح عليها نجيب عربية صينى ونبيع السفرة أهى منها ناكل عليها ومنها المدام تتفسح بيها فى الشقة شوية عبان ما أرجع من الشغل أهى حاجة تسليها هى والأولاد
بالنسبة للأخوة أبو علم ومحمد اسماعيل أنا مقتنع جدا" برأيكوا أنتوا بجد زى العسل ربنا يديم المعروف بينا
- تحية خاصة جدا" لبيكو ومحمد الحسين وأحمد سامى وساكسون وأيمن الخولى على على أهتمامكوا بيا ورأيكم غالى عندى أوى
وإن شاء الله هاخد القرار النهائى بعد ما المهندس مخلوف يدينى رأية النهائى بعد ماجاوبتة على أسئلتوا ويارب يجزيكو عنى كل خير
طلب أخير : ياريت تضفونى على الماسنجر ياهووو أو هوت ميل للتواصل
wael_ecs@hotmail or yahoo
أخوكم وائل جمال

LANOS

تمام يا أخ وائل أنت كدة قربت المسافات قوى
بما أنك ناوى على زيرو علشان مفيش كسر زيرو تقسيط وكمان أنت عايز بعد ما تركب العربية وتخلص قسطها وتبعيها ومتخسرشى غير فى حدود 10 إلف جنية - فنصيحة منى على الرغم من أنا معى سيارة صينى أن تبعد عن الصينى تماما لهذا السبب فقط-
ولكن فى سبيل هذا لابد أن تضحى ببعض مميزات الصينى وبالذات العربية التى أقتنيها وهى A11 وأولها الموتور القوى وقوة التحميل العددى والكماليات الكثيرة وجمال الشكل وعدم الأنتشارية
وعلى الرغم من ذللك فى حالة أقتنائك سيارة مثل الدايو فأنك سوف تكسب توافر قطع الغيار وسعر ما بعد البيع ولكنك سوف تخسر قوة الموتور وميزة التحميل العددى وأيضا العربية منتشرة يعنى بريستجيها مش قد كدة - وخلى بالك العربية سوف يتوقف أنتاجها فألى حد ما مستقبلها غامض فى سوق زى السوق المصرى بس بينى وبينك أنتشارها لوحدة كفاية
بالنسبة للفيرنا هيا الدايو بس مع موتور عصبى بالذات 1600 موتور مشكلة بس عيبها أنها مش واسعة زى الانوس لو موضوع الوسع دة مش يهمك وأنت يعنى إلى حد ما مش محتاج قوى لموتور عفى يبقى الانوس تكسب
هو بصراحة حالتك معقدة لأنك ناوى على زيرو وأجابتك نصها بتحققها A11 والنص الأخر بتحققها الدايو
الخلاصة - لو زيرو يبقى لانوس بس هيا دلوقتى مولعة داخلة فى 70 إلف وانا لو مكانك عمرى ما أدفع فيها المبلغ دة لأنة كتير قوى عليها -الفيرنا راى سيبك منها مع أنى كنت من أكتر المعجبين بيها أول ما نزلت لكن الأيام أثبتت العكس تماما - أما للصينى وأرشحلك الشيرى A11 كسر زيرو أو BYD كسر زيرو ودية نادرة حبة فدية ممكن تبقى صفقة كويسة ليك مع التضحية ببعض التعب فى موضوع قطع الغيار مع أنة إن شاء الله سهل نسبيا مع التعود او التضحية بسعر أعادة البيع فى حالة الشراء زيرو
أرجو أن أكون أفادتك - ولو انت ناوى على الشراء أنا ممكن أقابك وأديك عربيتى تجربها وتختبرها وكمان يا ريت حد من الخوة الأعضاء معاة لانوس وواحد كمان معاة فيرنا نتقابل سوا وتجرب العربيات وتا خد قرارك
والله المستعان

المشاركة الأصلية كتبت بواسطة TURBBO

العفو يا باشا علي ايه بس بجد ماتجبش غير اللانوس و لو معجبتكش هتعرف تبعها و مش هتخسر بالنسبة لعربيتي فهي قاعدة علي قلبي ومش عايزة تسبني هي سحبها حلو جيدا واستابل اكتر ممتاز احسن من اللنوس :twisted: بس بقي عفشة طين و تقفيل زي الزفت وصوت موتورها عالي جدا

طب ما تحاول تبيعها فى السوق أو على الأقل حط عليها ورقة واعلان على كونكت ونزل فى السعر وأخسر حبة مش مشكلة لأنك غلط - حد يروح يجيب عربية ملهاش أساس خالص - طب كنت جيبت شيرى A11 على الأقل سيات توليدو ومتجربة فى السوق من 3 سنيين وشغالة زى الفل أو جيب أسبيرانزا فيها حبة مشاكل بس مشاكل هبلة قوى لا ترقى لمعنى كلمة مشكلة أو جيب BYD عفشة تويوتا وموتور ميتسوبيشى يعنى حبة مضمونة أو جيب اليونسيل على الأقل زى الانسر القديم وكمان وكيل محترم زى الرواس - لكن مابل :( :( على العموم اديك أتعلمت
أنا لما حبيت أجيب الشيرى كانت مع واحد صاحبى بقالها 2 سنة وتحت عينى ومن غير كدة مكنتش قدرت أخد قرار جرىء زى دة وكمان لما جبتها كانت كسر زيرو علشان مبقاش خسرت كتير وبكدة تبقى ولله الحمد أتلعبت صح وربنا يباركلى فيها ويباركلك فى عربيتك ويوفقك
والله المستعان