محتاج رأيكم بأمانة ربنا وتكون عن دراسة وتجرية

**wael_ecs** · 15-10-2007 06:26 AM

أنا اخ جديد ليكم فى المتدى الجميل ده وارجوا نى اكون من اسرتكوا الجميلة ومحتاج رايكوا بصراحة لأنى قررت انى اشترى عربية من كتر بهدلتى فى الموصلات انا والمدام وولادى وبفضل ربنا قدرت اجمع مبلغ ادفع منه مقدمة عربية و أقسط الباقى والمبلغ الى قدرت أجمعة حوالى 30 الف جنية والباقى بالتقسيط ومتحير بين 4 عربيات فى حدود امكانياتى ( فيرنا و لا سبيرنزا ولا دايوو لانوس ولا أكسبلوجان من المسلمى الى شبة التريوس أكيد عارفنها ) والمشكلة الى محيرانى انهم تقريبا متقاربين فى الفئة السعرية ، لكن الى محيرنى أكتر انى مش عارف الصينى ولا الكورى الأحسن ولا مبقتش فرقة فى رأيكم أنهى أفضل ويكون عن تجربة وهل الصينى اثبت نجاحة وكفائتة ولا مشاكلة عادية زى الكورى الى اتعودنا علية منذ فترة ولا فعلا معظم الى اشتروا الصينى وخصوصا الى سبرنزا حاسيين انهم اتدبسوا وبيفكروا يبيعوها زى ماهم كاتبين ولا دى قلة كان حظهم فى النسبة الى فى كل العربيات الى بيصبها عيوب الصناعة واللى اشترى الفيرنا ياريت يشارك برأيه وبرضوا ال لانوس والاكسبلوجان .أسف انى طولت عليكم بس بجد أخوكوا مزنووووووووووووووووق يا جدعان ومحتاج مساعدتكوا .. ماحدش يفهمنى غلط مش عشان تدفعولى الأقساط أنا بس عايز نصيحة لله مش هتكلفكوا جنية وكل سنة وأنتوا طيبين ( قال رسول الله صلى الله عليه وسلم :- الدال على الخير كفاعلة ) ربنا مايعطلكوا عربية أبدا وجزاكم الله كل خير
أخوكم فى الله
وائل جمال wael _ecs

**ahmed_gamal** · 15-10-2007 06:49 AM

دايو لانوس افضل اختيار في العربيات اللي حضرتك كاتبها انا كنت بفاضل بردو بين العربيات دي و اتدبست وجبت عربية صيني ماشكلها كتير و نصيحة ابعد عن الصيني كمان اللانوس سعر اعادة البيع بتاعها افضل من كل اللي انت قلته وي وم ماتقول عايز ابيع هتلاقي مليون مشتري و العربية حلوة مش واحشة في فئتها و حدود سعرها

**الصاوي** · 15-10-2007 07:09 AM

بالنسبة للدايو الانوس و الفيرنا انا شخصيا اخترت الانوس لموتورها و عفشتها و بعض مشاكل عاصرتها مع ملاك الفيرنا
لكن بصراحة الأتنين تقريبا واحد و مسألة أذواق لكن ممكن تجيب الصيني طقم للسفرة بس لا أكثر

**Ahmed Samy** · 15-10-2007 07:26 AM

انا ماركبتش ولا واحدة فيهم
بس من اللي باسمعه
مافيش حد اشتكى من اللانوس ,أما الباقي فحدث ولا حرج

**Chicco** · 15-10-2007 07:32 AM

الأخ الفاضل نصيحة مخلصة إبعد عن الصيني علي الأقل دلوقت......لانوس تكسب الفيرنا في كل حاجة....... لو مايفرقش معاك الزيرو فيه إختيارت كتيرفي حدود ميزانيتك والله الموفق

**Ahmed_Ezz** · 15-10-2007 08:42 AM

المشاركة الأصلية كتبت بواسطة Chicco

الأخ الفاضل نصيحة مخلصة إبعد عن الصيني علي الأقل دلوقت......

+10000000000000
انا كنت عامل زيك بس ما بين لانوس و فيرنا 1600 و الحمد لله جبت الفيرنا العربية معايا زى الفل و للعلم انا كنت راكب لانوس 1 مدة كبيرة و بجد الفيرنا سيارة تستحق الاحترام فى رأى و كمان عربية على قد تمنها و لا ارى اى مشاكل فيها.
و ربنا يوفأك ان شاء الله.

**mohamed el hussien** · 15-10-2007 09:42 AM

verna 1
lanos 2

bs keda

**eng_mkhalaf** · 15-10-2007 10:14 AM

أولا أهلا بيك فى هذا المنتدى وندعو الله أن تستفاد وتفيدنا بأحس المعومات إن شاء الله
ثانيا - طبعا من ردود الأخوة الزملاء لانجد أحد منهم أقتنى عربية صينى إلا الأخ العزيز تربو - ومن هذة النقطة سو أبداء سرد حديثى
معلومة هامة - من خبرتى فى السوق المصرى لمدة طويلة أحب أنوهك أن العلربيات الصينى فى بعضها مقلب وبعضها ملوش حل بالنسبة لسعرة وذلك عن تجربة متابعة لمدة طويلة وتجربة أقتناء أتمنى إن شاء الله أن تدوم
لشراء عربية صينى - من رأى الشخصى - يفضل بشدة أن تكون كسر زيرو علشان نغطى تماما نقطة أعادة البيع وقيمتها
من مميزات السيارات الصينى أنك بتاخد مميزات وكماليات لو موجودة فى عربية كورى أضرب التمن فى 2 ولو يابانى أضربة فى 3 - بس فى سبيل دة أنت بتتنازل عن بعض الأشياء وأهمها توافر قطع الغيار ودية نقطة مهمة جدا لازم تأخذها فى الأعتبارسواء حتجيب يابانى أو كورى أو أروبى
ثالثا
لآبد من تحديد أحتياجاتك ومتطلباتك فى السيارة قبل أختيار الماركة لأن قرار شراء سيارة فى مصر ليس بالسهل أبدا - وللرد الوافى عليك فأنى محناج منك للرد على الأسئلة الأتير بنعم أو لا
1- هل تفكر فى بيع السيارة بعد فترة قصيرة
2- هل مهم لك سعر ما بعد البيع
3- هل بأستمرار بيكون موجود 5 أو 4 أفراد فى العربية
4- هل تسافر كثيرا
5- هل يهمك موضوع أستهلاك البنزين
6- هل تريد عربية ملفتة للنظر وغير منتشرة حفاظا على البرستيج
7- هل أنت ممن عندهم طرق للحصول على قطع الغيار الأستيراد
8- هل يهمك عامل ألأمان
9- هل تهمك أن تكون العربية فيها جميع الكاماليات وأنواع الرفاهية
10- هل يهمك أن يكون أداء الموتور عالى فى العزم والتسارع تحسبا لأى ظرف
11- هل يهمك أن تكون العربية متوازنة على السرعات العالية فوق 140
12- وأخيرا وليس أخرا ما هو أقصى مبلغ ممكن دفعة فى العربية وما هو توقعاتك بالسعر فى حالة البيع
والله المستعان

**mohamed ismail** · 15-10-2007 10:47 AM

اهلا بيك في المنتدي ومنورنا
انا كنت في حيرة من امري زي حالاتك كده بالضبط
وكنت برضة محتار بين نفس العربيات بس بصراحة قررت اجيب اللانوس بعد تفكير عميق
لانها
1- اقل عربية فيهم الناس ذكرت فيها مشاكل تليها الفيرنا ثم الصيني
2- سعر اعادة البيع
3- الفلوس اللي الواحد بشتري بيها العربية دي بتبقي تحويشة عمرة وسالف عليهم كمان فمعتقدش انه ممكن يشتري عربية لسه بتتجرب في السوق ويخاطر بتحويشة عمرة ويبقي مديون
وربنا يهديك للصالح ان شاء الله