الموضوع: أخطاء يقع فيها مبتديء القيادة

من افضل المواضيع المطروحه حاليا
بالنسبه ليا وانا مبتدئ حاليا كل اما اقرا حاجه من اللى بتقولوها اتخيلها وافكر هاعمل ايه لو حصلى كده
شكرا ليكم كلكم على المشاركات المفيده
انا شايف انى من اهم العقبات عندى هى معرفة ابعاد العربيه يعنى الحته دى هاتعدينى ولا لا

بالنسبة لى انا فى الاول الثقة الزايدة فى نفسى

لانى اتدربت من كذا حد وفى كذا مكان من خالى وابن خالتى ودول بسم الله ماشاء الله عليهم سواقتهم جامدة بس بيجروا وكمان رحت مدرسة وكل اللى كانوا بيعلمونى كانوا بيمدحوا فيا فخدت مقلب فى نفسى وفكرت انى خلاص فى شهر بقيت البت السواقة المحترفة وكمان شوية هياخدونى فى فيلم ترانسبورتر وبقيت بجرى ومع اول طلعة بعربية ابن خالتى لوحدى هو كان جنبى يعنى بس قلتله ملكش دعوة رحت مدشدشاله عربيته ومش عربيته بس لا عربية مجنى عليها كانت واقفة فى حالها خالص

معرفش كنت المفروض ماشية بسرعة والمفروض هدخل من الشارع اللى بعد الجاى قفلت معايا فجأة انى هدخل الجاى هديت وكسرت الدريكسيون بس للاسف مهدتش كفاية ومكسرتش الدريكسيون عالاخر وطاااااااخ فى العربية اللى راكنة ربنا كرمها زى ماكرم السادات

المصيبة بقى انى ساعة الخبطة اتلخبطت ودوست بنزين بدل الفرامل فالعربية اتروقت صح يعنى

الحلو بقى فى الموضوع ان الحوار ده حصل قريب من بيتنا فابن خالتى نزلنى وهو هيطق ومن غير مايكلم قالى روحى انتى طبعا انا خدت ديلى فى سنانى وقلت يافكيك

وهو طبعا اتدبس فى الفلوس والخناقة
ولحد دلوقت والكلام ده من سنتين ابن خالتى مفتنش عليا محدش يفتن عليا بقى ولا يقول لماما

المهم بقى من يومها اتعلمت كذا حاجة
1- انك متفكرش انك بقيت شاطر فى السواقة لانك لو فضلت عمرك كله تسوق برضه متعرفش كل حاجة
2- الحذر هو اهم حاجة خد بالاسباب
3- فى الملفات لازم تهدى كفاية عشان الملف يجيبك ومتخبطش او العربية متتقلبش لو على سرعة عالية
4- اهم حاجة بقى لو انتى بنت وخبطتى انفدى بجلدك وسيبى اللى معاكى هو اللى يتدبس فيها جوزك خطيبك او قريبك المهم ان حد تانى هو اللى يشيلها

المشاركة الأصلية كتبت بواسطة mahmoudselim

والله المشكلة الاكبر مش في المبتدئين .. في ال فاكر نافسة شوماخر عصرة يا ولداة
بص يا صاحبي المبتدأ في بلدك هو الوحيد ال بيطبق اكبر قدر من قوانين المرور.. اول ما يفتكر نفسة خلاص بقي محترف ومن بكرة هياخد ال اوتو كروس بيقلب لمواطن مصري محترف سواقة اصلي

هو ده ايلي بيحصل فعلاً

أحكي أنا بقي شوية عن نفسي
بداية تعلمي السواقة كانت مع واحد بيعلم السواقة علي عربية لادا و اكن بيخاف ملتزم بقوانين المرور لحد كبيييير جداً
بعدها بكام يوم أتعلمت علي تاكس ( واحد صحبي عرفني علي سواق تاكس بيعلم ) و ده بقي صاحب الفضل الكبير بعد ربنا طبعاً
عشان عرفني يعني إية سواقة بجد ( و بعدها بقي أعز أصدقائي )
مواقفة حرجة طططاه
أول يوم نزلت مع صاحبي علي التاكسي بتاعه قالي سوق و ملكش دعوة و راح منزلني في الشوارع الزحمة مرة واحدة و قالي أخبط ميهمكش أنا مش عايز التاكس ( أداني ثقة في نفسي بجد )
بعدها بكام يوم قولتله لأ أنا مفيش فيا أمل و مش هعرف أتعامل في الشوار الزحمة لوحدي و كنت فقدت الأمل خلاص
بس لقيته بصلي كده ( الظاهر صعبت عليه ) و قالي أنت هتتعلم يا منعم هههه
المهم قالي إنسي بقي ايلي انت اتعلمته خالص و ابدأ معايا من الأول تاني و الحمد لله بقيت بسوق

مواقف بقي كل ما افتكرها أدحك جامد
بعد ما تعلمت السواقة خلاص قالي خلاص يالي بقي يا حلو تعالي نركب ناس ( زباين يعني ) و أنت ايلي هتسوق التاكس
1- مرة واحد هي و جوزها ركبوا و قالولي الحتة الفلانية أنا بقي كان عندي عيب فظيع أنى و أنا سايق بنسي الأماكن تتراح إزاى مع إني عارف المكان ( غريب مش كده ) المهم كنت أقوله منين يا حسن فالناس ايلي راكبة تقولي هو أنت لسه بتتعلم
يرد عليهم صحبي يقولهم لأ ده تمام بس هو مش من هنا
المهم الراجل و الست ركبوا و مشيت بالتاكس عادي و السكة كانت محفرة و الراجل يقولي براحة يا أسطى أقوله ماشي و أرجع امشي بسرعة تاني أخر ما زهق راح قايلي إية يا عم الوليه حامل براحة ههه
2- مرة واحد كانت تخينه قوي ركبت معايا و طبعا ركبت ورا عشان أنا ايلي سايق و صحبي قدام معايا
المهم وقفت عند المكان ايلي هى نازلة عنده و الست راحت فاتحة الباب و نزلت ( أنا أفتكرت أنها نزلت ) و رحت مدي الأول و ماشي ألاقي صوت ( أقف يا بني براحة يا بني ) أتاري الست نزلت رجل و رجل لسه في التاكس ؟؟
فصحبي قالي أوعي بعد كده تمشي بالعربية غير لما تسمع صوت قفل الباب ايلي وري