حملة لمقاطعة التاكسي الجديد

**MMamdouh** · 19-07-2009 01:08 AM

التاكسى الجديد يمكن يكون احسن حاجة اتعملت فيما يخص المرور و تنظيم سيارات الاجرة فى البلد

يكفى ان المشوار مش حينتهى بفصال و خناق مع السواق ولا حيساومك على الاجرة قبل المشوار ولا حيتنطط و يسيبك فى وسط الشارع عشان المشوار مش عاجبة

بنديرة التاكسى الابيض معروفة و هى 2.5 جنية كسر عداد و 1.25 جنية للكيلو... و طبعا كل العربيات الجديدة دى مكيفة (لو مش مشغل التكييف قولة يشغلة) و مفيش سواق حيتنطط على مشوار لان عليه اقساط عايز يسدها

المشوار من بيتنا للشغل بياخد فية التاكسى الاسود ( و مهبب) حوالى 12 جنية و غالبا ما السواق بيطمع فى ال15 جنية لو اديتة 15 جنية مقفولة عشان معاييش فكة و دايما بيحصل فصال و خناق

التاكسى الابيض اجرتة 12.75 جنية فى المشوار دة

MMamdouh

**MMamdouh** · 19-07-2009 01:13 AM

المشاركة الأصلية كتبت بواسطة Terrible_DaRsH

انا مقاطع التاكسي الابيض نهائي و لكن لسبب

لما المشوار اللى كنت بروحه ب 5 جنيه اروحه ب 18 جنيه يبقي اقاطع و اقاطع كمان .

معلش دى جت ازاى؟؟

معنى كدة انك بتمشى حوالى 13.4 كيلو... (12.4 كيلو فى جنية و ربع + كيلو ب 2.5) يعنى اكنك راكب من المطار لحد كوبرى الفردوس.... ازاى بقى التاكسى الاسود بياخد 5 جنية فى المشوار دة؟؟؟؟

MMamdouh

**MMamdouh** · 19-07-2009 01:17 AM

المشاركة الأصلية كتبت بواسطة sara2001

يا جمااعه التاكسيات الجديده فعلا اتضرت وفي كتير منها بيشاور للناس علشان تركب والسبب الوحيد في كده ان الأجره مضاعفه بينه وبين التاكسي القديم زي تاكسي العاصمه
وبديهي ان الأغلبيه حتفرق معاها الزياده دي
انا شخصيا باستخدم التاكسي يوميا وبختار التاكسي القديم في معظم الأحوال اللي هو بيكلفني يوميا 20جنيه وصعب جدا اضاعفهم واخليهم ل40 جنيه يوميا وده لمشوار خاص بالشغل فقط وتخيلوا اي مشاوير اضافيه في اليوم للمشوار الأساسي
اللي انا اقصده ان الأجره اصلا كانت مكلفه ومعظم من يستخدمون التاكسي يوميا لا يملكون رفاهية اختيار الجديد واللي هو احسن طبعا بس صعب لو للإستخدام اليومي

الفرق مش كبير للدرجة اللى بتتكلموا فيها دى و انا مجربة قبل كدة... الفرق كان بتاع 2 الى 3 جنية بس يكفى انى راكب عربية نضيفة و بتكييف و مش حتخانق مع السواق على الاجرة لما اجى نازل..

اضافة الى ان التاكسى الابيض علية اقساط و مش حمل تناكة على الزباين فى المشاوير... التاكسى الابيض بتشاورلة بيقف و بعد ما تركب تقولة روح التة الفلانية بيتجة زى الالف... اما التاكسى الاسود فا بيبيع و يشترى فيك كما لو كنت حتركب ببلاش.. خلليهم يتعلموا الادب و يعرفوا ان الله حق و اللى بيتبطر على النعمة بتزول من وشة

نعم للتاكسى الابيض

و يسقط التاكسى الاسود

MMamdouh

**MMamdouh** · 19-07-2009 01:29 AM

مثال تانى حسبتة فى السريع... المسافة من بوابة 13 بالرحاب حد باب بيتنا فى الحلمية 33.77 كيلو (من خلال الطريق الدائرى)

التاكسى الابيض حياخد 43.50 جنية (32.77 * 1.25) + (2.5)

التاكسى الاسود قاللى اخد 80 جنية و لما سالتة ليه؟؟؟... قال اصلى حرجع فاضى

MMamdouh

**sara2001** · 19-07-2009 11:50 AM

المشاركة الأصلية كتبت بواسطة mmamdouh

الفرق مش كبير للدرجة اللى بتتكلموا فيها دى و انا مجربة قبل كدة... الفرق كان بتاع 2 الى 3 جنية بس يكفى انى راكب عربية نضيفة و بتكييف و مش حتخانق مع السواق على الاجرة لما اجى نازل..

اضافة الى ان التاكسى الابيض علية اقساط و مش حمل تناكة على الزباين فى المشاوير... التاكسى الابيض بتشاورلة بيقف و بعد ما تركب تقولة روح التة الفلانية بيتجة زى الالف... اما التاكسى الاسود فا بيبيع و يشترى فيك كما لو كنت حتركب ببلاش.. خلليهم يتعلموا الادب و يعرفوا ان الله حق و اللى بيتبطر على النعمة بتزول من وشة

نعم للتاكسى الابيض :s_thum1[1]: و يسقط التاكسى الاسود :t_thum1[1]:

Mmamdouh

انا ما جربتش التاكسي الجديد بس جربت تاكسي العاصمه اللي هو ازيد في البنديره جنيه واحد فقط عن التاكسي الجديد وبيستناني عند البيت
الأجره كانت من الروضه لأول عباس العقاد 35 جنيه وبيطبعلك فاتوره بالمبلغ ولك مطلق الحريه تديله بقشيش او لأ والسواقين ناس متعلمين ومحترمين
في حين ان التاكسي القديم بيطلب مني 20 جنيه بدون اي فصال وبياخدهم وهو راضي لأن ده طلبه والمشوار ده عملته اكتر من مره يعني الفرق في التاكسي الجديد حيكون كده برده
ده غير ان التاكسي الجديد السواقين بيطلبوا بقشيش علشان تساعدهم في الأقساط ومش كلهم مشغلين العداد وده عرفته من ناس ركبته وعلشان كده في حمله من المرور عليهم علشان يراقبوهم إذا كانو مشغلين العداد ولا لأ؟
يعني في الحاله دي تاكسي العاصمه بالنسبه لي افضل طبعاً
وارجو ان ما يتفهمش قصدي ان انا موافقه على المقاطعه دي لأ طبعا انا ضدها لأن ده حراام
لكن انا بحلل بس الموضوع من وجهة نظري ووجهة نظر بعض الناس اللي اعرفهم وجربوا التاكسي الجديد
وفي النهايه السواقين والمستهلكين هما اللي مظلومين في البلد دي

**MMamdouh** · 20-07-2009 03:41 PM

المشاركة الأصلية كتبت بواسطة sara2001

انا ما جربتش التاكسي الجديد بس جربت تاكسي العاصمه اللي هو ازيد في البنديره جنيه واحد فقط عن التاكسي الجديد وبيستناني عند البيت
الأجره كانت من الروضه لأول عباس العقاد 35 جنيه وبيطبعلك فاتوره بالمبلغ ولك مطلق الحريه تديله بقشيش او لأ والسواقين ناس متعلمين ومحترمين
في حين ان التاكسي القديم بيطلب مني 20 جنيه بدون اي فصال وبياخدهم وهو راضي لأن ده طلبه والمشوار ده عملته اكتر من مره يعني الفرق في التاكسي الجديد حيكون كده برده
ده غير ان التاكسي الجديد السواقين بيطلبوا بقشيش علشان تساعدهم في الأقساط ومش كلهم مشغلين العداد وده عرفته من ناس ركبته وعلشان كده في حمله من المرور عليهم علشان يراقبوهم إذا كانو مشغلين العداد ولا لأ؟
يعني في الحاله دي تاكسي العاصمه بالنسبه لي افضل طبعاً

بصى يا سارة

المسافة من ميدان الباشا لحد محطة البنزين اللى على ناصية عباس العقاد هى 16.25 كيلو و دول يعملوا (2.5 اول كيلو + 1.25 للكيلو x مسافة 15.25 كيلو) 21.50 جنية... يعنى ازيد من التاكسى الاسود ب جنية و نص

انا معرفش تاكسى العاصمة بيحاسب ازاى بس واضح انة مكلف جدا جدا... بس بحسبة صغيرة حنلاقى ان الجنية الزيادة فى البنديرة اللى قلتى عليه فى 16 كيلو يطلع 16 جنية... لوحطناهم على ال 21.50 يطلعوا 37.50 جنية اللى هى تقريبا نفس الفلوس اللى بتدفعيها لتاكسى العاصمة بالفعل...

اذا التاكسى الابيض اوفر من تاكسى العاصمة و دة فى مقابل انك مش حتقدرى تتصلى فى التليفون و يجيلك لحد عندك لكن مفيش فرق بين الاتنين من اول ما تركبى التاكسى لحد ما تنزلى

MMamdouh