الموضوع: الحاجات دي بتروح فين ؟ محتاج افهم بس !!

المشاركة الأصلية كتبت بواسطة Bob2009

هى مش بتروح ولا حاجه كل الفكره ان الفلوس دى بتتسرق مش اكتر اما بتتسرق ازاى فهى بتتسرق نسبه كبيره منها من القروض
والباقى من خزانه الدوله والوزارات نظام خنصره يعنى
بس هى دى الفكره ان البلد بتتسرق وخلاص
الى نفسى بقى افهمه الى بيسرق بالمليار ده بيعمل بيهم ايه بس نفسى اعرف الاجابه بس مش لاقى ليها حل قولت يمكن بيفتح بيها مشاريع بره طيب المفروض المشاريع دى بتزود راس المال قولت بيصرفهم مش هيلحق يخلصهم
مش عارف بقى هو بيسرقهم ليه ونفسى اعرف ليه

هههههههههههههههههه فاكر ال 4 مليار الي راحو سويسرا ومشحونين في عربيات بتلف عالبنوك ومفيش بنك راضي يقبلهم ؟ وكان السفير المصري هو الي عمال يتحايل عالبنوك علشان تقبلهم

والله نفسي اعرف صحيح هيعمل ايه بالفلوس دي كلها

المشاركة الأصلية كتبت بواسطة frankshtin000

الله اعلم بس انا مش عارف امتا البلد دى هيتصلح حلها دة محدش فى العالم عندو قناة السويس دى الا احنا ومع ذلك افقر خلق الله

تفتكر نعمل جبهه شعبيه لمحاسبة الحكومه , زي المحاكمات الشعبيه الي بتتم دي ؟؟ بما ان الحكومه في بعضها ومفيش حد بيتكلم والجهاز الغلبان بتاع المركزي للمحاسبات مابئاش ليه هيبه زي زمان

فاحنا الشعب نمشي امورنا بمعرفتنا ونخلي بالنا من فلوسنا ولا ايه رايك ؟

المشاركة الأصلية كتبت بواسطة AK1981

بص يا سيدي بتروح فين

في توضيب مكاتب السادة رؤساء مجالس الادارات

في المخصصات بتاعة كل الضباط من سيارات و خلافه للباشا و مدام الباشا و ولاد و بنات الباشا

في عربيات المواكب اللي لازم تبقى كلها مرسيدس ..... ما الوزير يركب مرسيدس و بقية الموكب يبقى حاجة تانية؟؟؟؟؟؟؟

في تكسير بلاط الارصفة و تركيبه من جديد كل سنة مع ان المفروض البلاط ده عمره طويل و يستحمل البري

في سوء التخطيط ...... مشروع توشكى و شرق التفريعة و غيره من المشاريع المنيلة بستين نيلة اللي اتصرف عليها مليارات عالارض

في الشارع اللي كل شوية يتكسر و يتسفلت من جديد عشان العمولات اللي بياخدوها من المقاولين

في السلع المدعومة اللي الموردين بيدفعوا رشاوي للحكومة عشان ترسى عليهم العطاءات .... و بعدها الحكومة تدعمها من جيبنا ....... و بعدها تروح لمن ليس له وجه حق بالكوسة سواء تجار بيشتروها و يبيعوها بسعرها او غيره

في دور افراح الجيش اللي كل سنة بتزيد ..... او عالاقل بتتجدد و تتظبط عالاخر ...... من ميزانية التسليح !!!!!!

في ماموريات للخارج و لا ليها تلاتين لزمة

في مراكز بالخارج سواء ثقافية او سياحية او غيره مالهاش اي لزمة غير تظبيط الموظفين بتسفيرهم

في جامعة عين شمس اللي بدل ما يجددوا المدرجات و المباني صرفوا كام مليون على تجديد الواجهة و الاسوار





و غيرهم كتير ...... يا شيخ ده انا كل ما باشوف الضرايب في ال pay slip كل شهر باتقهر و باحس انها فلوس مرمية في الزبالة لاني مش باخد بيها اي حاجة ........

ياباشا خلاص هم زهقو اصلا من الشوارع الفاضيه دي وقالو هيعملو تاكسي طاير عباره عن طيارات هليكوبتر ودي هتكون للساده الوزراء ورجال الاعمال

وهيسيبولنا الشارع الحمد لله نقع في الحفر بتاعته وعربياتنا تبوظ من المطبات الي ارتفاعها متر


سوء التخطيط في توشكى او شرق التفريعه ههههههههههههههه اول مره اسمع عن التفريعه دي , او ترعة السلام في سينا
والحاجات الي كنت بسمع عنها زمان في صباح الخير يا مصر وعايزينا تبئى خضره الارض الي في الصحرا :d فعلا اتصرف على اسمه كتييييييييييييييير لكن المشاريع ماخدتش حقها اصلا


عفوا ,, ابعد عن الجيش واخباره ممنوع الاقتراب والتصوير احسن دا مفيش تفاهم على طول كدا


اما بئى عن الضرايب فوالله حرام فعلا ( ضريبة مبيعات - ضريبة مرتب - ضريبة دخل على اصحاب المشاريع - ضريبة عقارات - ضريبة ملاهي - ضريبة على العربيات - ضريبه على الطرق الصحراويه وبين المحافظات - !!!!!!!!!!!!! هو باقي ايه مش عليه ضرايب ؟؟؟؟؟؟؟؟؟؟؟؟؟


هههههههههههههههه طيب الشعب يستلف علشان يدفع ضرايب ولا ايه ؟ مش فاهم برضو وياترى مين هيسلفه ؟ ولما يستلف هيدفع ضرايب على الي استلفه كمان بما انه دخل ليه

المشاركة الأصلية كتبت بواسطة ahmed0nouh

لاحظ كمان ان الارباح اللى بتطلع من مؤسسات كتير زى هيئه قناه السويس والسياحه وخلافه ده صافى بعد السرقه :)

يعنى لو حزم هناك فى المصاريف هنطلع الضعف

ليا صديق مهندس كهرباء فى الهيئه بيحكيلى عن بلاوى سوووده

ياباشا دا مش الكهربا بس دا المعظم بئى كدا , واكيد كل الارباح الي بيتم الاعلان عنها بعد ما يتظبط التظابيط والدفاتر والحسابات والذي منه :b4_592:

المشاركة الأصلية كتبت بواسطة pop3

تعتبر مصر من أغني الدول العربية بل و من أغني دول العالم ليه؟؟؟ لأنها من 7000 سنه و هي بتتسرق ولسه الناس عايشه و بتحمد ربها و الحمد لله " أحمد رجب "

وأحلى حاجه اننا شعب صابر وطيب على رأي عم احمد ابو نجم , ربنا يديله الصحه هو والعائله الكريمه

المشاركة الأصلية كتبت بواسطة نور القمر

متشغلش بالك عشان متعبش نفسيا ويجيلك اكتئاب
فكرك يعني كبار المسئولين اللي عايشين عيشة ولا عيشة قارون في زمانه عيشينها منين
ده على سبيل المثال يعني وما اكثر الامثلة
خلي الكبار يعيشوا

طيب واحنا نروح فين هنفضل صغيرين ؟ طيب بلاش احنا !!! اولادنا ؟ واولادهم ؟ مش هيلاقو ياكلو !!! مستقبلهم في رقبتنا نعمل ايه ؟

ماينفعش :b4_039: