عمليات ضبط المغذى (الكربوراتير )

**samirayad** · 08-08-2009 02:35 PM

الله يخليك يا أستاذ: شريف

**stlony** · 04-09-2009 03:38 PM

طب هو ظبطة الكاربراتير صح لازم تخلي الشكمان يعرق ميه ولا مش شرط يعني هل ده دليل حصري علي ان الكربراتير مظبوط وبدونه اعرف انه لسه مش مظبوط كويس؟؟

الموضوع عشره علي عشره قريته من اول حرف لاخر حرف

**stlony** · 04-09-2009 04:11 PM

وكمان سوال ليه

4- أدر مسمار الهواء بمقدار 90 درجه للداخل (رباط يعنى)....
5- فك مسمار الهواء مره تانيه بمقدار نصف لفه (180 درجه )....

ليه اعمل الخطوتين دول بالطريقه ديه طب ماختصرهم في خطوه واحده يعني اربطه 90 وارجع افكه 180 طب مكنت فكيته من الاول 90 وخلاص ولا انت شايف ايه؟؟؟

كمان سوال هل ظبط الكربراتير صح يخلي البوجيه طالع من الموتور سنه ابيض بيلمع كانه جديد (مش مهبب او مسود)؟؟؟

**samirayad** · 04-09-2009 08:17 PM

المشاركة الأصلية كتبت بواسطة stlony

طب هو ظبطة الكاربراتير صح لازم تخلي الشكمان يعرق ميه ولا مش شرط يعني هل ده دليل حصري علي ان الكربراتير مظبوط وبدونه اعرف انه لسه مش مظبوط كويس؟؟

الموضوع عشره علي عشره قريته من اول حرف لاخر حرف

ملوش دخل ضبط سلانسيه المكنه أو الكربوراتير عامة بتعريق الشكمان
أساسا تعريق الشكمان ونزول قطرات من الماء من آخر ماسورة الشكمان ليست دليلا على كفاءة دورة الحريق
وأنما دليلا على زيادة نسبة الرطوبه فى الهواء الموجود داخل ماسورة الشكمان والجو الخارجى عامة

**samirayad** · 04-09-2009 08:26 PM

المشاركة الأصلية كتبت بواسطة stlony

وكمان سوال ليه

4- أدر مسمار الهواء بمقدار 90 درجه للداخل (رباط يعنى)....
5- فك مسمار الهواء مره تانيه بمقدار نصف لفه (180 درجه )....

ليه اعمل الخطوتين دول بالطريقه ديه طب ماختصرهم في خطوه واحده يعني اربطه 90 وارجع افكه 180 طب مكنت فكيته من الاول 90 وخلاص ولا انت شايف ايه؟؟؟

ههههههههههههههه
أنت عندك حق فعلا .....أنك لاحظت النقطه دى
بس واضح أنك مقريتش دى كويس

- أحنا بنعمل أيه دلوقتى ....بنربط فى مسمار البنزين على خفيف ....لحد مادوران المكنه يبقى منتظم (المكنه مابترعشى ) وعلى أقل سرعه ممكنه ....أى صوت المكنه يبقى واطى ومعقول ......

- بعد كده حنربط مسمار الهواء أو البنزين 90 درجه للداخل ....علشان نخللى السرعه تانى مضطربه ...المكنه ترعش تانى لأضعاف نسبة الخليط ....

- بعد كده حنفك تانى مسمار الهواء نصف لفه (180 درجه )....

فين بأه اللى قريته بتركيز ....لما بتقول

الموضوع عشره علي عشره قريته من اول حرف لاخر حرف

كمان سوال هل ظبط الكربراتير صح يخلي البوجيه طالع من الموتور سنه ابيض بيلمع كانه جديد (مش مهبب او مسود)؟؟؟

نعم

**anwarnono** · 07-09-2009 03:11 AM

شكرا جدا يابشمهندس على الموضوع الفوق الرائع.
وانا كان نفسى انا الى اضبط الكربراتير بتاعى بنفسى،بس عندى مسمار واحد وده انا بقول عليه السلنسيه علشان ده الى بيعلى ويوطى صوت الماتور والى بيعلى او يوطى rbm فده مسمار ايه بالضبط،وانا ضبطه على 9 فى rbm بس مش شايف مسمار تانى خالص.
هل النا عمله صح ولا خطأ وانا بقالى فترة حاسس ان سحب العربيه قل شويه مع انى مركب بوجيهات اريديوم وفلتر k&n اوريجنال مكان الاصلى،بس حاسس فى الشتاء الفات كان السحب افضل مع الرغم ماكنتش معدل كده.
ايه رأى حضرتك،علشان انا مش عاوز ميكانيكى محترم يلعب فى العربيه.

**samirayad** · 07-09-2009 07:03 PM

شكرا جدا يابشمهندس على الموضوع الفوق الرائع.

الله يخليك

وانا كان نفسى انا الى اضبط الكربراتير بتاعى بنفسى

نصيحه ...لو مليكش فى الأمور الميكانيكيه دى بلاش

بس عندى مسمار واحد وده انا بقول عليه السلنسيه علشان ده الى بيعلى ويوطى صوت الماتور والى بيعلى او يوطى rbm فده مسمار ايه بالضبط،وانا ضبطه على 9 فى rbm بس مش شايف مسمار تانى خالص.

ده مسمار البنزين ....اللى أما بتربطه شويه بتعلى عدد لفات المكنه وده اللى أنت عملته ....وسرعة 900 لفه / ق كويسه برضه ومقبوله فننيا
وأنت عندك مسمار هواء فعلا .....بس حتلاقيه محطوط عليه طبه بلاستيك مثلا
كان الموضوع ده موجود عندى فى كربوراتير أوبل
والمصنع بيغطى المسمار ده بطبه أو غطاء بلاستيك فوقه علشان محدش يلعب فيه (أى مسمار الهواء )
وهو ده المفروض
بس أحنا بنراجع عليه مع قدم عمر المحرك .....لأن مسار هواء السلانسيه بيتأثر من آثار الرمال والأتربه مثلا ( اللى ممكن تعدى من بيك السلانسيه وتمشى فى مسار هواء السلانسيه ) وتأثر على خط هواء السلانسيه ....
علشان كده بنراجع على مسمار الهواء ....لما بنحتاج للقصه دى

هل النا عمله صح ولا خطأ

عادى ...مفيش مشاكل ...وكده المكنه حتبقى شده حيلها شويه على السلانسيه
وده كويس مش وحش

وانا بقالى فترة حاسس ان سحب العربيه قل شويه مع انى مركب بوجيهات اريديوم وفلتر k&n اوريجنال مكان الاصلى،بس حاسس فى الشتاء الفات كان السحب افضل مع الرغم ماكنتش معدل كده.

لا هو موضوع السحب ده حاجه ....والموضوع بتاعنا الحالى ده حاجه تانيه
لأن فيه فرق بين حمل المكنه على السلانسيه وحملها مع الأحمال المختلفه
أى وقت السحب والتسارع

ايه رأى حضرتك،علشان انا مش عاوز ميكانيكى محترم يلعب فى العربيه

هههههههههههه
رأيى أعمل موضوع منفصل عن مشكلة السحب عندك فى الورشه
وقولنا على كل البيانات بتاعة عربيتك
وكلنا حنفكر معاك ...لأن واضح أن عندك مشكله ما