الموضوع: احترس من المنتدى ..!!!

طبعاً قبل ما تخش على الموضوع وبمجرد قراية العنوان قلت في مصيبة.. بس انا بضمنك لا مصيبة ولاحاجة
ده مجرد موضوع حدث بالفعل معايا :حبيت اشاركوا فيه علشان كلنا ناخد بالنا
ابتديت اشتراكي هنا في المنتدى من حوالي 8 شهور تقريباً وكان سبب اشتراكي هو اني عاوز اشتري عربية ومحتاج اجمع معلومات على قد ما اقدر..
بمجرد اشتراكي وبداية تصفح المنتدى لقيت كم هائل من المعلومات محتاج شهور علشان الواحد يقدر يجمعهم ويبقى ملم بكل حاجة تخص سوق السيارات وطبعاً لقيت دعم مباشر من ملاكي السيارات بمجرد سؤالهم او عمل توبيك بالموضوع ..
واحدة واحدة زاد تعلقي بالمنتدى وبطلت ادور على اي معلومات من برة وكان جوايا ايمان تام ان المعلومات الوحيدة الموثوق فيها هي في المنتدى ومن الاعضاء غير كده مفيش (لا جرنال ولا مجلة ولاحتى السايتات الخاصة بالعربيات ..)
من وقت للتاني زاد وقت دخولي على المنتدى بالذات فترة تواجدي في الشغل وساعات لما اروح البيت وساعات وانا قاعد في كافية او اي حته فيها انترنت ..
في اوقات زاد فيها الموضوع قوي (تواجدي في المنتدى) لما كنت بحتاج استفسارات تخص العربية ومستني الرد من الاعضاء ببقى عامل زي المجنون فاتح الصفحة وعمال اعمل ريفريش كل دقيقة على امل اني الاقي رد جديد او اجابة لاسألتي ..
فضل الموضوع مستمر مع مرور الوقت والحالة بتزيد وفترة تصفحي للمنتدى بتزيد كل يوم عن التاني لحد لما بقيت بقضي اكتر من 14 ساعة على المنتدى..
ومن هنا بدأت الحياه تتغير وبدأت سلوكياتي تتغير
وابتدى يكون عندي حب توحد علشان اعرف استمتع واركز في المواضيع الجميلة اللي بتتفتح على مدار اليوم وده طبعاً أثر على كل علاقاتي في مختلف الاماكن:
1-البيت : بقيت بقعد على الكمبيوتر كتير بعد رجوعي من الشغل وده أثر بشكل سلبي على علاقتي بزوجتي اللي ابتدى يكون ليها رد فعل سلبي وعصبي بمجرد ما تشوفني قاعد على الكمبيوتر - وابنى (7 شهور ) اللي مرة جيت اشيله راح معيط والحركة دي هي اللي فوقتني وخلتني اخد بالي انه مبقاش يعرفني من كتر ما انا مش بلعب معاه لاني مشغول وعلى طول قاعد لوحدي وانت عارفين انا قاعد فين (على المنتدى )
2-الشغل : بقيت بحب اقفل باب مكتبي عليا علشان محدش يقاطعني وانا بتصفح هذا الكم الهائل من المعلومات لحد لما علاقتي بزمايلي في الشغل بقت سطحية يعني يا دوبك صباح الخير .. على الرغم اننا كنا دائماُ نفطر مع بعض ولازم يكون في ساعة على الاقل بنهزر ونضحك ... ده لسة مستمر بس من غيري لاني على طول مش فاضي... ( على المنتدى )
3-اصحابي : حتى اصحابي اللي بنتقابل كل فين وفين لما بنروح نقعد في حتة ويكون فيها واي فاي تلاقي اللاب توب اتسحب وابتدت العزلى والتوحد لحد لما الاعدة تخلص... وطبعاً ده ادى لانهم بطلوا يتصلوا بيا لانهم عا رفين اني حاجي وكأني مش موجود لأني عقعد ... ( على المنتدى )

كلامي مش معناه ان الغلط على المنتدى او ان العيب فيه ....... لا طبعاً انا عارف ان انا السبب وانا ابتديت اصحح الوضع ده وهما ساعتين بس في اليوم من انهارده ( ساعتين بس ) والباقي من ابني ومراتي واصحابي وزمايلي في الشغل..
على فكرة تنبية ده مش على المنتدى بس لأ ده على استخدام اي وسيلة تسبب التوحد او العزلى زي ( الكمبيوتر – الموبايل – التليفون – البلاي ستاشن – التليفزيون – حتى القراءه )
كل ده لازم يكون ليه وقت محدود (مش محدد ) لا محدود يعيني تعملة اي وقت بس عدد ساعات محدده.
انا قلت انقل تجربتي لعلها تفيد اي حد حاسس ان اللي حاولية بيتغيروا نحيته وهو مش عارف السبب .. او حاسس انه مبقاش اجتماعي وانه في عزلة ...
انا اسف علشان طولت .. بس الاجتماعيات اهم حاجة في الحياه محدش يقدر يعيش لوحده.
.... ارجو من مشرف القسم ميخيرش عنوان الموضوع.
شكراُ ولكم تحياتي واحترامي
ومستنى ردودكم

حضرتك زي ما تكون بتتكلم عني !!!!!

فعلا المنتدى بقى ادمان