الموضوع: حد يقولى اللى انا عملته ده ايه !!!

المشاركة الأصلية كتبت بواسطة أحمد كمال

سيدي الفاضل

انا مش محموق له .... هو غلطان و ابن ستلاف في سبعين الف كمان

بس مع احترامي التام

1- الاستقواء بالكوسة مش صح

2- مش من حقك تكفره حتى لو كان سب الدين لأن اللي بيسب الدين كافر فقط لو كان يعني ما يقول و دي اشك انها هي الحالة

3- مش من حقك تحتقر سائق تاكسي لمجرد انه سائق تاكسي و تقول عليه حتة سواق تاكسي ......

4- مع احترامي التام لكل العاملين بالمرور و الداخلية من اصغر عسكري لحد حبيب العادلي شخصيا

بلاش أسلوب المنة و الجباية الغريب ده

يعني ايه عاملين قوانين و يحمد ربنا؟؟؟؟؟؟؟؟؟؟

الحمد لله على كل شئ بس والدتك مع احترامي بتأدي واجبها و بتاخد حقها (مرتبها) ..... مش معنى كده ان سيادتك تجبي على كل واحد في مصر معاه رخصة قيادة او تسيير ....

بالعكس ..... مع احترامي التام ..... مرتب السيدة الفاضلة والدتك مصدره هو احنا يعني هي اللي شغالة عند الشعب مش الشعب اللي شغال عندها

ازاي؟ من الضرائب (ضريبة الدخل و ضريبة المرور و ضريبة الترخيص و ضريبة المبيعات و الجمارك و غيره من البلاوي الزرقة اللي كلنا بندفعها من لحمنا الحي) ...... هو ده مصدر مرتب السيدة الفاضلة والدتك و كل العاملين بالحكومة

5- انت لو ماكانش معاك الوسايط دي..... كنت هتفرد عليه كده و تستقوى براحتك و ترد الصاع صاعين؟

أشك ..... لأنك كنت هتخاف من العواقب القانونية و غيرها ...... هو ده استغلال النفوذ بالغلط ..... حتى لو معاك حق غلط تستغل نفوذك .....

و فيه مثل أمريكي بيقول two wrongs do not make a right

يعني الرد عالغلط بغلط مش صح

6- شعورك يبقى ايه لو مرة اتخانقت مع واحد و عملت اللي عملته و طلعت واسطته انه ابن اخت وزير و لا عضو مجلس شعب في الحزب الوطني و لا سفير ..... الخ من الوسايط السوبر ؟؟ ساعتها مع احترامي لوسايطك كنت انت اللي هتتظبط تظبيطة محترمة جدا و ماكانش حد هينفعك الا لو حضرتك مثلا ابن اخت احمد نظيف

7- احنا مش عايشين في غابة

8- لو كل واحد اتخانق مع واحد تاني عملوا في بعض كده اعتقد كلنا هنخاف ننزل الشارع و مش هتبقى عيشة

شوف يا اخ احمد انا عملتله محاضر على اللى عمله بالظبط (اتلاف ممتلاك الاخرين وسب وقذف وسلاح ابيض وتعدى وشروع فى قتل ) ودى محاضر ممكن اى حد يعملها لو شغال فى النظافه حتى
كوسه منين هو انا روحت عملتله محضر مخدرات ولا سرقه ولا روحت قولت انه كان معاه بنات وفى وضع مخل للأداب فى الطريق العام
دى حاجه ..
حتته قصد او يعنى مايقول ده مش هقدر افتى فيها بس لو كده بقى يبقى الواحد يسب الدين على طول ويقول مش قصدى او يقول انا مااقصدش السب واو اهانه الدين
وحتته احتقار اللى انت مصمم عليها وقافش فيها انا قدمت اعتذار لكل سواقين التاكسيات وقولت انهم فى منهم ناس محترمه اشيلهم فوق دماغى وفى منهم اللى قليل الادب وماينفعش اتعامل معاه بأحترام
حتته منه وجبايه دى سوق ظن واتهام بالباطل من حضرتك
هو عشان الكبير عمل قانون وقال للصغير امشى عليه بهدف الحفاظ على النظام و حياته واسرته الخ الخ الخ
يبقى بيجبى عليه !!!!
يبقى كده والدى بيجبى ويمن عليا و مدير المدرسه بيجبى على الطلبه وعميد الكليات بيجبى على الطلبه
ابقى خد بال حضرتك من الكلام قبل ماتقوله واوزنه كويس انت قاعد فى بيت ومستريح وماعندكش ضغوط ولا حاجه تخليك ترد وانت متعصب ماتساويش نفسك بيا وانا جاى من وسط معركه ودمى فاير
وماقولتش حد شغال عند حد دى قوانين يا استاذى كلنا عايشين تحت القانون وشغالين بأمره لا والدتى اللى بتقول هاتوا فلوس اعملكم رخص واركبلكم لوحات ولا احنا اللى بنقولها خدى اعملى لنا رخص واوراق ولوحات
والناس دى بتاخد فلوس اجر مجهود بتعمله كتابه وقرايه ورايحين جايين فى مكاتب وفى عز الشمس وقعده مش اقل من 8 ساعات خارج البيت مش بياخدوا الفلوس دى عشان يعيشونا فى نعيم ويعملولنا قوانين بمزاجنا

وبرضه حضرتك مش انت اللى تقول تاخد فلوس من فلوسنا اوشغاله عندنا القانون والنظام الدستورى هو اللى يقول وليه الحق يزود او ينقص المرتب وليه الحق مايديهاش مرتب خالص
(ضريبة الدخل و ضريبة المرور و ضريبة الترخيص و ضريبة المبيعات و الجمارك و غيره من البلاوي الزرقة اللي كلنا بندفعها من لحمنا الحي) . زيى زيك بندفع كل ده

انت لو ماكانش معاك الوسايط دي..... كنت هتفرد عليه كده و تستقوى براحتك و ترد الصاع صاعين؟
هى الام بقت واسطه والاستنجاد بالاهل وطلب المساعده منهم بقت واسطه !!!!

وقصه غابه دى الساده الاعضاء يردوا عليك فيها اقرا كده مواضيع المنتدى الاجتماعى وانت تعرف انت عايش فين !!

كلمه اخيره مقدر شعورك وزى ماقولت انت قاعد فى بيتك ومستريح مافيش اى حاجه ضاغطه عليك ولا حاجه خانقاك تخليك ترد الردود دى شوف بقى اللى جاى من وسط معركه وخناقات ومحاضر واقسام المفروض يرد ازاى .. هيدخل يضحك ويقعد يهرج ويقول نكت .. !!!

حاجه تانى انا لو بستقوى بوسايطى اللى انت بتقول عليها اللى هى والدتى كنت خالف القانون والمرور بقى
نفس الطريق اللى حضرتك ماشى عليه بمشى انا عليه وجنبك ونفس المطبات والحفر اللى بتكسر عربيتك برضه بتكسر عربيتى نفس الخنقه والزحمه اللى بتشوفها بشوفها واللى بتدفعه من ضرايب ورسوم برضه بدفعه
لكن مش انت ماشى على الارض فى القرف وانا طاير فوقيك فى النعيم ولا معمولى طريق خاص عشان معايا واسطه زى مابتقول ولا مركب زينون وبعمى الناس ولا مفيم واقعد اخبط فى العربيات ولا مالى العربيه استيكرات ولا مركب جى ام وماشى مشغل اغانى هابطه ولا مركب لوح vip ولا شرطه ولا حكومه زى مابيعمل البعض من الناس اللى معاها وسايط طبعا حقى ما اسيبهوش حتى لو هو يعرف ناس اكبر من اللى انت بتقول عليهم وسايط

المشاركة الأصلية كتبت بواسطة yobaaa

أنا ليا رأى بسيط
الاول حمدالله على سلامه والدك
تانى حاجة متنساش أن سواق التاكسى انتا عملت فيه كتير
1- انه كان على كبوت عربيتك و انتا جريت و رميته كنت ممكن تدوسه
2 - انك حاولت تانى انك تدوس عليه
و ده برضه شروع فى قتل
و يا ربت متزعلش من كلامى انا و الاعضاء

فعلا يوبا عندو حق
ياريت يا أستاذ ايفو تحترم ادمية اللى قدامك اكتر من كدة شوية وماتزعلش منى انت اللى ابتديت وكنت ناوى تخبطه فلازم تتوقع رد فعله الطبيعى سواء محترم او مش محترم وف لحظة غضب انه يعمل كده فى والدك....بس الحمد لله وحمدلله على سلامة والدك وياريت نعرف نحل المشاكل بأسلوب اهدى من كدة

متزعلوش منى يا جماعه ايفو عمل الصح لان اى حد مكانه ووالده اتهان واخوه بيضررب وعربيته اتخبطت قدام عيلته كان لازم يعمل كده وده اقل واجب يتعمل مع انسان زى ده
اسف بس احيانا كتير سواق تاكسى بيخبط عربيتك ولما تنزل تلاقيه محترم واللى حضرتك عايزه بتقوله روح لحالك حتى لو ممعكش تصلح عربيتك وفى بيبقوا ولاد تيت عايزين ضرب الجزم
وكل مهنه فيها المحترم وفيها ابن التيت
عشان كده بقولك يا ايفو متزعلش وانا لو مكانك كنت عملت اكتر من كده مش بلطجه بس كرامه

واهم حاجه حمدا لله على سلامه والدك

المشاركة الأصلية كتبت بواسطة nadernabil

موقف في رغم بساطتة بدايته...إلا انه إنتهى بشحنة أخري من الغضب و السخط و الحنق تجاه المجتمع سواء من جهتك أو من جهة سائق التاكسي...و نرجع تاني نقول مش عارفين نعيش!!!

انا خارج الدائرة!

الله ينور عليك يا نادر .. انا بصراحة قاعد أقرأ الموضوع و مش مصدق كمية الكره و العنف اللي طلعت لمجرد حكة مراية !

كان هيحصل إيه لو أخوك سايق كويس من الأول؟ أو لقيتوا الراجل مجنون ركنتوا دقيقة واحدة و سيبتوه يروح لحاله ؟! بص مهما عملت في الراجل ده من بهدلة في الأقسام بعد كدة ده ميساويش حاجة قدام جرجرة أبوك في الشارع و بهدلة أختك و والدتك معاكم ..

و اللي يجنن أكتر الناس اللي بتقول كدة الصح و خد حقك بدراعك و شيل مش عارف إيه في العربية
عامة اللي شايل سلسلة ولا عصاية هوكي ميبقاش يزعل لما واحد ينزله بطبنجة .

انا خارج أم الدايرة !

المشاركة الأصلية كتبت بواسطة MoToRiZeR

الله ينور عليك يا نادر

انا خارج أم الدايرة !

يا جماعه كل سنه وانتم طيبين انا استغفرت ربنا على اللى عملته فى الواد وحطيت فلوس فى المسجد عشان اللى عملته فى العربيه بتاعته واطعمت ناس مسكينه
كل ده مش عشان الواد لكن عشان ربنا مايزعلش منى ويوقف الواد ده قدامى يوم القيامه ويقولى انت غلط فيا وانا ليا عندك حق وياخد من حسناتى القليله وعشان ده شهر كريم وكل سنه وانتم طيبين

المشاركة الأصلية كتبت بواسطة evoo90

يا جماعه كل سنه وانتم طيبين انا استغفرت ربنا على اللى عملته فى الواد وحطيت فلوس فى المسجد عشان اللى عملته فى العربيه بتاعته واطعمت ناس مسكينه
كل ده مش عشان الواد لكن عشان ربنا مايزعلش منى ويوقف الواد ده قدامى يوم القيامه ويقولى انت غلط فيا وانا ليا عندك حق وياخد من حسناتى القليله وعشان ده شهر كريم وكل سنه وانتم طيبين

انا بردوا من كام يوم واحد كان عايز يضرب إبن خالى بورقة سوستة بتاعت نص نقل "سواق " المهم نزلنا فيه ضرب و بعدين خدت النمر و كنت هبلغ عنه و كنت رايح أقول عمل أى حاجة و السلام لولا إنى فوقت فى أخر لحظة و معملتش حاجة و إفتكرت "و الكاظمين الغيظ و العافين عن الناس"