الكورسا اتجننت

**sheco** · 16-08-2009 04:08 PM

بصوا يا جماعه
الصبح دورت كارثتي وسبتها تسخن حبة وقمت مدي أولاني وطالع
رحت لقيت المجنونة دي قامت جارية وانا لسه حتى مالمستش البنزين
وصوتها علي جداااا قمت مبطل ووقفت كده وسميت بالله ودورت تاني
وقلت أطلع والسخونة هتظبطها ومشيت وبرضو الأخت مع نفسها من غير نقطة بنزين
واديت التاني وبرضو من غير ما المس البنزين وببص في العداد لقيتها على 40
والدنيا زنقت عليا وماشي ورا اوتوبيس تاتا تاتا وهي هتموت وتسيبني وتجري
وكل ما ادوس ع الدبرياج عشان ألمها تعمل صوت عالي كأنها بتتخنق
وأخوكو أصلا بيتعلم ومش حمل المفاجآت دي
رحت راكن تانى على جنب وفضلت أحايل وأدادي فيها وشوية و سلمت امري لله وطلعت تاني وهي هتموت برضو وتجري
الفرامل تمام وبتفرمل معايا وده اللي نجدني كذا مرة الحمد لله
بس ايه اللي فيها ده؟؟؟؟؟
الكورسا بتاعتي مو95
أفيدونا أفادكم الله

**ehabbasha30** · 16-08-2009 04:25 PM

اكيد والله اعلم سلك الاكسراتير معلق مع الدواسة
ابقى حاول ترجع الدواسة برجلك لبرة تانى عشان البنزين يخف لغاية لما تروح لميكانيكى يربطلك الدواسة كويس
هيفك العمة ويربط المسمار اللى ماسك سلك الاكسراتير عشان يرجع السلك تانى لما تشيل رجلك من على الدواسة

**Bob2009** · 16-08-2009 04:37 PM

اولا خلى بالك ولما تعمل كده اركنها على شان الفتيس واسطوانه الدبرياج ممكن تتحرق من الحركه الى انت عملتها دى.
ثانيا السبب هتلاقيه فى السلك بتاع دواسه البنزين بيقفش وعاوز شويه زيت او لو كاربرتير الباب بيعلق.

عموما متلعبش انت فيها روح عند اى مكانيكى وخليه يعملها هو هيزيت وخلاص واديله 5 جنيه وامشى او جيب مزيل صداء عموما خليك فى المكانيكى افضل

**sheco** · 16-08-2009 05:11 PM

طيب هي عملت معايا كده امبارج برضو وطفيت ودورت كذا مرة وسيبتها تسخن كده شوية قامت اتعدلت ومشيت تمام
يكون الموضوع ليه علاقه بانها مش واصله لدرجه حرارة معينة عشان تمشي عدل؟

**aYaBooY** · 16-08-2009 05:22 PM

كونها عاوزة تجري ده بيرجع ان الكورسا من العربيات الصغيرة و عادتا بتكون خبرتها صغيرة برده فحاول تفهمها ان الجري غلط و خصوصا لما يكون قدامك اتوبيس
ههههههههههههههههههههههههه ههههههههههههههههههه
روح لميكانيكي و يفضل لو من الناس بتوع الاوبل العيب ده ممكن يكون من الشفاط الاليكتروني الي عندك
يعني المفروض لما تدور العربية الموتور بيكون عالي لحد ما يسخن و بعد كدة صوتة يوطي و يعدل سلانسيه بس انت العنصر المسؤل عن كدة عندك اليكتروني و بيعلق و ممكن يكون محتاج تنظيف او تظبيط
و ممكن برده الموضوع من سلك الاكسراتير بس انت المفروض تحس بيه في رجلك ان الدواسة مش بترجع
و برده ممكن يكون باب الكاربرايتر بيعلق و في كل الحالات الموضوع محتاج ميكانيكي علشان يظبطها

**sheco** · 19-08-2009 12:00 AM

المشاركة الأصلية كتبت بواسطة ayabooy

كونها عاوزة تجري ده بيرجع ان الكورسا من العربيات الصغيرة و عادتا بتكون خبرتها صغيرة برده فحاول تفهمها ان الجري غلط و خصوصا لما يكون قدامك اتوبيس
ههههههههههههههههههههههههه ههههههههههههههههههه

ههههههههههههههههههههههههه هههههه

جامده يا باشا
أنا كذا مرة أقولها بلاش تهزر مع النقل وهي برضو راكبة دماغها

المشاركة الأصلية كتبت بواسطة ayabooy

روح لميكانيكي و يفضل لو من الناس بتوع الاوبل العيب ده ممكن يكون من الشفاط الاليكتروني الي عندك
يعني المفروض لما تدور العربية الموتور بيكون عالي لحد ما يسخن و بعد كدة صوتة يوطي و يعدل سلانسيه بس انت العنصر المسؤل عن كدة عندك اليكتروني و بيعلق و ممكن يكون محتاج تنظيف او تظبيط
و ممكن برده الموضوع من سلك الاكسراتير بس انت المفروض تحس بيه في رجلك ان الدواسة مش بترجع
و برده ممكن يكون باب الكاربرايتر بيعلق و في كل الحالات الموضوع محتاج ميكانيكي علشان يظبطها

أنا حاسس فعلا ان الموضوع سخونة عشان الدواسه بتاعه الاكسلاتير زي الفل
عموما ان شاء الله اروح للميكانيكي يوم الجمعه وأهي مركونة توريني بقى هتجري ازاي
شكرا لردك عليا

**Matrix_Reloaded** · 19-08-2009 12:57 AM

ربنا يستر وتطلع حاجة بسيطه

قبل ماتروح للميكانيكى افصل البطاريه لمدة ساعة على الأقل وفك فيشة ال تى بى اس ونضفها كويس بمنظف هيد زى الأكاى الأزرق ونشفها كويس وهات سبراى دبليو دى 40 ورشه بحرص على الناحيه التانيه من البوابه (اللى فيها سلك البنزين) ووصل البطاريه ودور وسيبها دايره لمدة 5 دقائق على السلانسيه وبعدين خدها مشوار صغير بسواقه عاديه من غير شد وقولى أخبارها ايه المجنونه دى