ليا ملحوظة بس علي حكايات العربيات الصيني ده ، و هقارنها بالكوري في بدايته بمصر و ليه الصيني قدامه كتير :_
1- الكوري كان نازل ثلاث ماركات بس دايوو ، هيونداي ، كيا
فكان الحكم عليه سهل غير الصين بلد سدس سكان العالم فيها ففيها كمية مصنعين غير عادية و اللي نزل السوق المصري ماركات صيني لا حصر لها فاتاخد العاطل في الباطل
مثلآ أنا عارف إن الشيري A11 عربية كويسة جدا ، عشان مع ناس قرايبي و بيشكروا فيها جدا
لكن النهاردة كنت في معرض المصرية اتفرجت علي العربية Landwind Fashion اللي منزلها وليد توفيق ، من بره شكلها حلو أوي و بتاخد سبعة راكب ، بس بصراحة لما تقلب في العربية ميبقاش فيه تعليق غير أيه القرف ده ، التابلوه بلاستيك ردئ مطبوع خشب شكله وحش، الأبواب فيها سوسته بلغة النجارين ، المصيبة العربية و هيا لسه في المعرض قلت أتفرج علي الكراسي الإضافية بتفتح إزاي لقيت المقبض البلاستيك اللي بتشد منه الكرسي مقطوع و هيا لسه في المعرض قلت عادي يمكن زبون شده بطريقة غلط لقيت مقبض الكرسي التاني برده مقطوع فجريت بعيد عنها لحسن بتوع المعرض يقولولي انتا اللي كسرت العربية
و عربية تانية هاتشباك مش عارف و الله ماركتها أيه عند أوتو ماجد ب 55 ألف 1500 CC تقفيلها عار العار لازقين استيكر مجمع هوا علي الفيبر الداخلي و الظريف بيقولك دي موتور فيات أي هجص و السلام ،، و الكاسيت بقه نوعة ساتيو :mrgreen: :mrgreen: ، الظريف إن فيها abs و ضمانها 20 ألف كيلو ،، و الله ناس قلبهم جامد :mrgreen:
2- الكوري نزل في وقت كان اللي عنده عربية فيها تكييف و باور و زجاج كهربا أصحاب الماركات الألماني الفاخرة فقط و الياباني اللي المصريين نازلين بيها من الخليج ،فأصبح منافس جدا إن ساعتها في منتصف التسعينات بأربعين و ثلاثين ألف جنيه تقتني عريية فيها الأوبشن اللي الناس كانت شايفاها وهمية و متحلمش بيها
الصيني دلوقتي مش لاقي أوبشنز يغري الناس بيها لأن بقت خلاص حاجات أساسية في أي عربية محدش بيشتري عربية زيرو دلوقتي من غير تكييف و باور
3- الكوري كان نازل بينافس الفيات (النصر) و الياباني بتاع بلاده فكانت المنافسة من ناحية السعر في صالحه جدا غير جودته مقارنة بالفيات في النعومة و قلة الأعطال ، كان مرحلة جديدة بالنسبة للمصريين
الصيني نازل بينافس الكوري أساسا ، اللي هو سعره معقول و في منه تجميع محلي أرخص و أرخص غير المستورد من الماركات الشهيرة بس من بلاد العالم النامي ،، فمش عارف ينافس بالسعر حتي الآن ، مفيش فرق سعر مغري بينه و بين الكوري اللي خلاص أثبت نفسه يخلي الناس تقبل المغامرة
4- الكوري مسكه توكيلات جامدة غبور و ابو الفتوح و وليد توفيق
الصيني بإستثناء الإسبرانزا مسكه توكيلات مغمورة مش عارفة تنشره
لكل الأسباب دي الصيني قدامه كتير في مصر ،،،
5- مبدأ كويسة علي قد فلوسها مبدأ سليم ،، بس في حد أدني للإسترخاص يعني علي الأقل العربية تقعدلها أربع خمس سنين ماسكة نفسها و من غير مشاكل جامدة و الصيني ماثبتش ده لحد دلوقتي و الجيلي خير مثال ،، اللي تشوفها دلوقتي تفتكرها بقالها عشرين سنة
بس انتوا بتبالغوا شوية في حكاية إن الصيني بيعمل علي قد فلوسك عشان دي صعبة في مجال العربيات ،، مش قصدي إنها عربيات كويسة بس قصدي إن لو المصنع بيعمل عربيات وحشة يبقي كل العربيات وحشة مش اللي رايحة مصر بس ،، هوا طلع عينه عشان يصنع موتور مش معقول يطلع عينه عشان يعمل موتور أوحش مخصوص للسوق المصري
المفضلات