الموضوع: حكايتى مع البوجيهات

احد الحاجات اللى جننتنى فى عيشتى البوجيهات، العربية تبتدى تعمل اعراض بوجيهات قديمة، أغير البوجيهات ألاقى الأعراض زى ما هى ، او تتعدل يومين وترجع تزرجن تانى، جربت ابو شمعة واحدة وابو تلاتة شمعة وابو عشر شمعات وتورته وبرضه الحال هو هو، لحد اخر ما زهقت تذكرت انى كنت بسمع ان الناس فى عهد الفقر الأزلى فى الحقبة الناصرية كانو بيفكوا البوجيهات القديمة ويحرقوها ويركبوها تانى علشان مافيش جديد، فقلت اجرب اشوف ايه اللى بيحصل، وحيث اننى من هواه جمع البوجيهات القديمة فحفرت تحت البلاطة وطلعت كنز البوجيهات الاثرية الموجودة عندى، وولعت المنقد ورصيت كام حجر (قصدى كام بوجية) وهاتك يا حريق، بصراحة كانت تجربة مثمرة جدا واليكم النتائج:
1-قمت بحرق طقم بوجيهات شامبيون شمعة واحدة كان خدم معايا كويس جدا وقضى عمره وخرج من الخدمة، وقمت بتركيبه بعد الحريق مكان طقم NJK تلاتة شمعة، النتيجه كانت عجب، احسن من الجديد، والسبب الفنى واضح، ان البوجيهات الجديدة تصيبها الرطوبة اثناء الشحن والتخزين مما يؤدى فى النهاية الى ترسيب جزء من شحنتها اثناء التشغيل عبر العزل الخزفى المصاب بالرطوبة، فى حين ان حرق البوجيه يطرد الرطوبة من العزل الخزفى

2-خدت الطقم ال NJK اللى كان راكب وكان عامل معايا مشاكل، وبرضه حرقته، بس لفيته فى فويل كام يوم علشان ميرطبش(كنت عايز اعرف لو اتخزن بعيد عن الرطوبة هايشتغل وللا لا) وبعدين ركبته فى العربية الصغيرة مكان طقم دنسو كان راكب ومش عامل مشاكل ، بصراحة ال NJK المحروق كان احلى من الدنسو الجديد برغم ان الدنسو خارج من العربية سليم تماما

3-قمت بحرق طقم بوش كان قديم عندى واتفك من العربية بعد اقل من 2000 كيلومتر عمل، بس دا حصلت فيه ظاهرة غريبة جدا، فى حين ان كل البوجيهات التانية كان الكربون(السواد) اللى عليها بيروح مع الحرق وترجع بيضة زى الفل ،البوجيهات الfوش القلاووظ والسن والخزف بتاعاها هبب وتخول للإسود كأنك بتحرق بوجيه خشب، وطبعا كان واضح جدا انها لن تصلح للإستعمال ثانيا، ودا اكدلى الملحوظة اللى انا محتفظ بيها من فترة ان البوش الموجود فى السوق معظمه يا إما مضروب او معاد تصنيعه ، لأن تفسيرى لحكاية التهبيب دى ان لون المعدن الفضى اللى على البوجية دا طلاء عادى وليس جلفنه(غش)، علشان كدة الطلاء هبب واسود مع الحريق

4- يصلح الحريق فقط مع البوجيهات الاصلية والتى لم يتآكل سن الحريق الخاص بها

5- انا كنت بحط البوجيهات على البوتاجاز لحد ما كل الرواسب الكربونبة اللى على سن البوجية تروح، والشمعة الخرفية اللى على السن ترجع بيضاء اللون والسن يحمر، وطبعا يجب ملاحظة ان البوجيه بيقضل سخن ربع ساعة على الأقل بعد اطفاء النار فيجب الحذر عند محاولة الإمساك بيه

طيب دى فى البوجيهات القديمه طيب و الجديده اللى بتحتوى على مقاومه لمنع الذبذبات برضو ممكن ينفع معاها كده و لا المقاوقمه هاتبوظ