بعد ماحكيتلكوا علي حادثتي الاولانية بتاعة النيو اكسنت اللي كانت في الموضوع ده
أول حادثة بالنيو اكسنت (قدر الله ماشاء فعل)

واللي انتهت بإني اشتريت جنط جديد وفردة كاوتش جديد من التوكيل بمبلغ 1026 جنيه مصري ده غير المشورة من مركز كارفان الرحاب لشركة التامين لكارفان الرحاب تاني لكرافان مدينة نصر وبعدين لشركة التأمين وبعت الفاتورة لشركة التأمين وفي انتظار الشيك اللي لسة قدامه شوية حلوين علي ماييجي
وبعد عدة خبطات بسيطة
أولها بنت بتتعلم سواقة على عربية فيرنا محطوط عليها تعليم قيادة وماشية وماسكة يمين اوي وعلى مدخل شارعين ومش محددة هي رايحة وانا مدية اشارة يمين من بدري (فتوقعت انها داخلة يمين برده لإنها كانت مهدية اوي) فروحت عديتها من الشمال ودخلت الشارع وافتكرت غنها هاتلف معايا وإني خلاص عديت منها لكنها لحقتني وخبطتني في الرفرف الخلفي فوق العجل كدة واسفل الباب الخلفي يمين اينعم الخبطة بسيطة لكنها جرحت جزء من الدهان في الباب والرفرف ونزل الولد اللي بيعلمها وقعد يزعقلي وانا اقوله مانا مدية اشارة ومعدياها من الشمال وهي ماسكة يمين وده مخدل شارع فضل يزعق وكان عايز الشرطة تيجي (اتاريه كان بيحاول يهددني بالشرطة عشان يطلب فلوس تصليح لعربيته) هو خسايره عنده فانوس امامي شمال اتنطر لبره بس متكسرش وتطبيقة في الاكصدام الأمامي شمال. المهم لما لاقيته مستفز كدة قولتله انت اللي المفروض تدفعلي تصليح فضل يزعق ويتخانق والناس طبعا المطيباتية معلش دي بسيطة اصله هايدفعها من مرتبه قولتلهم يعني انا اللي هلاقي الفلوس في الشارع يعني واصلح؟ ماهي برده من مرتبي قولتله عايز تعمل محضر تعالي نعمل محضر فجاب ورا لما قولتله كدة وقعد يتحسبن ومن حظة كان في امين شرطة معدي بالصدفة قلتله مش كنت عايز الشرطة اهي الشرطة جت حاول يخلع لكني صممت نروح القسم وفعلا اخد رخصي ورخصه ورخصة البنت اللي سايقة وطلع معايا الامين في عربيتي علي القسم.
وهناك بقي الضابط سألنا حصل ايه حكيتله اللي حصل لكن الولد مسكتش وفضل برده يتكلم بنفس الاسلوب الظابط خلاه يحكي وبعدين سال البنت دي الحصة الكام ليكي قالتله التانية او التالتة قالّه يامفتري الحصة التانية وتطلعها علي جسر السويس وعبد العزيز فهمي البنت قالته انا بسوق وكان عندي عربية بس قلت اجرب الفيرنا واخد عليها كام حصة .

انا قلت للضابط انا كنت ناوية امشي واستعوض ربنا وخلاص لكنه فضل يزعق وصمم نعمل محضر الضابط بعد مابص في رخصه راح قايلله يابني انت متخلف انت عارف انك كدة كدة هاتطلع غلطان ومع ذلك عايز تعمل محضر (اتاري العربية تقريبا مكنتش مترخصة تعليم وكمان مش بإسم صاحب المكتب ومكتوب عليها ملاكي دقهلية) وغالبا كمان الولد مش معاه رخصة تععليم قيادة المهم موقفه القانوني كان منيل بنيلة الضابط قالله ماتدفعها اللي هي عايزاه وتعمل تصالح قاله ياباشا ادفع مين انا اللي مضرور قالله طيب مش انت اللي مضرور خلاص خد يابني اتحفظلنا علي العربية دي ودخلها جراجد القسم وراح معاه فعلا وبعدين خد مفتاح العربية حطها في الدرج عنده.
انا بصراحة لما لاقيت الموقف تفاقم كدة حسيت اني لو كملت وعملت محضر هاحط الولد في موقف صعب وهايتورط جامد فخفت اني اكون افتريت عليه ولا حاجة وقلت بلاش اصلي مش هاستفيد اي شئ لو اتحبس ولا اتحفظوا علي عربيته وهايتأذي في شغله جامد فقولت للظابط انا متنازلة وعملنا محضر محضر مشادة كلامية وصلح ومشينا واستعوضت ربنا في الخبطة وخلاص.
تاني خبطة بقي واحد راكب BMW جمرك السويس كان بيرجع بظهره عشان يخرج من ركنته رغم اني كنت بعيد عنه وكان المفروض يكسر عجله يمين او شمال عشان يطلع في طريقه لكنه فضل يرجع لروا يرجع لورا (مش عارفة كان رايح فين بصراحة) لحد ماخبطني فنزلت زعقتله ونزل مخضوض وبقوله انت عملت كدة ازاي انت معندكش مرايات رد عليا قاللي لأ عندي بس اهدي بصيت علي عربيتي لاقيته طبقلي جزء في الرفرف الامامي شمال قلتله طب اعمل ايه انا دلوقتي قاللي معلش انا اسف عموما لو عايزاني اصلحهالك اصلحهالك قلتله تصلح ايه بس هو انا كل حد يخبطلي العربية وسيبته مشيت.
كل اللي فات ده كووووم ومش مشكلة وانا قلت بسيطة والموضوع عدة ومش مشكلة وحصل خير لكني الحادثة بتاعة امبارح دي كووم تاني خالص.
وهاعملها في المشاركة الجاية عشان مش مكفية مشاركة واحدة.
يتبع