الموضوع: ثاني حادثة بالنيو اكسنت (قدر الله وماشاء فعل) برده

المشاركة الأصلية كتبت بواسطة helmy537

قدر الله ماشاء فعل وماتزعليش واللى يجى فى الحديد يخفى اهم حاجه ربنا يسترها معاكى ومعانا يارب
بس كنت عاوز اسألك على حاجه هو اول مانزل انتى كنتى سألتيه انتا بتشتغل ايه ايه الراجل ده ده نازل يقولها انا عقيد ولا عميد ايه الى حصل حسبى الله ونعم الوكيل كنت قليله طيب كويس بما انك راجل قانون ووظيفتك تنصر المظلوم على الظالم استنى بقى لما الشرطه تيجى تعين ولا انتا بتشتغل ايه ولا انا بشتغل ايه هى فتونه ياعالم ولا ايه

الحمد لله على كل شئ.
انا لا سألته ولا نطقت انا نزلت مذهولة من اللي حصل ومستغربة ازاي خبطني الخبطة دي لإني مكنتش متوقعة ابدا انه يخبطني اصلا.
لكن اول مانزل لاقيته بيقوللي من نفسه معاكي العقيد فلان
طبعا هو قال كدة على اساس اني اخاف واكش بقي واقوله حقك عليا انا اللي غلطانالك ولو تحب تكمل على الجنب التاني بتاع العربية اتفضل ياباشا ولا هيمك فداك يعني .
او اني اصهين على الاقوال بتاعته اللي قالها بعد كدة في المحضر على اساس إنه يخلي نفسه من المسئولية لكني اصريت انه هو اللي غلطان وتمسكت بحقي وتابعت كل كلمة كتبها الامين بتاع الدورية واللي اتكتبت كمان في المحضر اللي في القسم عشان ميطبخهاش مع العكسري لاني كنت متوقعة الحركة دي وانهم هايحاولوا يجاملوه على حسابي عشان رتبته .
المهم انه في نص المحضر اللي بيكتبه الامين في الشارع الاقيه بص على رخصتي فلمح محل اقامتي فبيقول مين اللي ساكن في المنطقة الفلانية قلتله انا ليه؟
قاللي اصل اخويا كان ماسك مأمور قسم المنطقة دي ولا معرفش نيابة المنطقة دي فروحت قلتله طيب وسكت (مش فاهمة نازل يتعرف ده ولا ايه ).
هو كان متخيل اني بتهدد وبخاف واني ماليش حد .
الحمد لله انا ليا ابن خال ماما رئيس محكمة وابن خالها التاني بيشتغل وكيل نيابة ده غير مديري ليه صديق عقيد شرطة والحمد لله كلهم مازالوا في الخدمة لكن انا قلت مالوش لازمة نستخدم الحاجات دي لإني مش متهمة ولا مقبوض عليا .
وقبل ده كله انا في الاول والاخر ليا ربنا مفيش احسن منه وهو شاهد ومُطلع على كل اللي حصل .
عموما هو طلع على المعاش يعني خرج من الخدمة خلاص بس باين عليه لبط وبيحاول يعمل اي حاجة عشان يطلعله بقرشين من شركة التأمين بتاعتي (فاكر شركة التأمين هبلة ) أو على الأقل شركة التأمين بتاعتي مترجعش عليه وتطالبه بتعويض .

المشاركة الأصلية كتبت بواسطة solycar

رجاء تابعى المحضر و متتنازليش او تتصالحى

و لو حصلت مجاملة للباشا اقدمى فيه شكوى فى وزارة الداخلية انو استخدم سلطة و عملة فى اخذ حقك

و هدديه انك ممكن توصلى الموضوع للنائب العام اذا لزم الامر

و على فكرة الشكاوى دى بتأثر عليهم فى الدخلية و بتبقى نقطة سودة فى الملف

ماهو انا لو مش عارفة الخطة الجاية ايه ولو الموضوع كمل ووصل للنيابة هايكون موقفي القانوني ايه لو طلعت انا الغلطانة هو من حقه يرجع علي شركة التأمين بتاعتي ويطالبهم بتعويض عن تلفياته.
ولو طلعت انا غلطانة شركة التأمين بتاعتي هي اللي هاترجع عليه هو تطالبه بتعويض اللي الشركة صرفته على تلفياتي .
يعني في كل الحالات انا مش هاكسب منه حاجة ده غير وجع الدماغ وكمان لازم اكلف محامي بالموضوع وقضية وحوار .
عموما مديري عرض المحضر على اتنين محامين قالوله ولا هايحصل حاجة ومفيش اي حاجة تخوف عادي يخبط دماغه في الحيط.
وهو طلع على المعاش يعني الشكوى مش هاتأثر فيه اصلاً .
عموما ربنا يستر ونشوف ايه اللي هايحصل.

المشاركة الأصلية كتبت بواسطة pro_samir

لا حول ولا قوة الا بالله

ربنا يصبرك ويعوضك خير

ويا ريت تاخدى بالك فعلا لأن معظم الحوادث سببها أخطاء الغير زى ما بيحصل معاكى ، خدى بالك

وممكن تركنى العربية فترة كدة لحد ما اعصابك تهدى

الحمد لله على كل شئ
ماهي كدة كدة لازم تتركن في التوكيل عشان تتصلح بس بعد العيد بقي بإذن الله.

المشاركة الأصلية كتبت بواسطة أحمد كمال

إخواني الفاضلين موضوع الدبح للعربية ده بدعة ولا يجوز

الدبح يكون لله فقط

و يكون تصدقا او اضحية او عقيقة او هدي في الحج ..... الى اخره من الذبح الشرعي المعروف

انا برده سمعت المعلومة دي قبل كدة.
عموما انا مدبحتش انا اكتفيت بإني طلعت كام مبلغ كدة في اوجه الخير.

المشاركة الأصلية كتبت بواسطة walidadel

كل دا وليسه صيانة الالف ماتعملتش

عموما قدر الله و ماشاء فعل يعني و الحاجات دي بتبقي نصيب

المهم انها بتيجي في الصاج ة خلاص

و ياريت حضرتك تتوقعي خطأ الغير بنسبة 1000% علشان السواقه بقيت صعبه اوي

يعني انا شايف لماكنتي اختي بالك ان الراجل مش باصص قدامه ولا مركز مكنتيش طلعتي اصلا ولا قطعتي عليه الطريق بس المهم الحمد لله الخبطات بسيطه و ربنا معاكي في حوار التامين دا

اه شوفت كل ده ولسة صيانة الالف مكنتش اتعملت
مانا كمان وانا رايحة اعمل الصيانة محدش كان مصدق ان دي صيانة الالف بس فاكرينها مثلا صيانة ال 50 الف مثلا .
ومهندس الصيانة بقوللي انتي وجَبتي مع العربية جامد في الفترة دي (على الخبطات يعني) قلتله محدش بيسيب حد في حاله وانت عارف الباقي بقي .

المشاركة الأصلية كتبت بواسطة mido01050

للأسف انتي نقصك حاجة مهمة جدا للسواقة في بلدنا
توقع خطأ الغير دائما , مش أحيانا لأ دائما

عموما انا دلوقتي بقيت اتوقع خطأ الغير في كل الاوقات وكل الاحيان لدرجة اني بحس اني في سيرك وانا سايقة او بلعب لعبة معركة حربية على الكمبيوتر الغرض منها الطلوع بأقل خسائر ممكنة من غير مايحصل Game Over.
عموما انا برده فضلت اقول لنفسي لو كنتي استنيتي والكلام ده كله لكن برجع استغفر ربنا واقول الحذر لايمنع القدر وده مكتوب يعني وبقول الحمد لله قدر الله وماشاء فعل .

المشاركة الأصلية كتبت بواسطة yasserwin

من الأفضل انك تستريحى شوية من السواقة لفترة كدة
لأن القلق والرعب من الحوادث الى فاتت هايسيطر عليكى

ان شاء الله هاستريح منها غصب عني وهي بتتصلح في التوكيل

المشاركة الأصلية كتبت بواسطة eslamrace

يا نهار ابيض حادثه تانى انا لسه فاكر الحادثه الاولانيه ده معداش عليها شهر حقيقى كان الله فى عونك وقدر الله وما شاء فعل
وبعدين معناه ايه ان واحد اول مينزل من عربيته يقول وظيفته هى الوظيفه تحميه من الخطا حقيقى حاجه تضايقارجوكى تمسكى بحقك فى المحضر ومتتنازليش بالزات عشان هو باشا يعنى الفلوس مش حتفرق اوى مع سيادته والله لو كان واحد راكب عربيه على قدها كنت ممكن اتعاطف معاه انما كده لااااااااااااااا


ويا ريت تشغللى قران كتييييييييييييير فى العربيه لان كده مش طبيعى

وكمان مره متزعليش وقدر الله وما شاء فعل وحاولى تتخطى الموقف

الظاهر ان دي الذكرى الشهرية بتاعة الحادثة الأولانية والمفروض بعد كدة اتوقع حادثة كل اول شهر
على فكرة انا فعلا دلوقتي بقيت على طول مشغلة القرآن لدرجة اني لو شغلا الراديو شوية او اغاني ابقي خايفة واحس بالذنب وبقيت مريضة بالكلاكس كل ماعدي تقاطع او شارع جانبي حتى لو الشارع فاضي وانا متاكدة انه اتجاه واحد بس اللي هو اتجاهي برده ادي كلاكس لايكون حد من المعاقين ذهنياً ونفسياً سوّلت له نفسه يمشي عكسي ولا حاجة على حظي يقوم لابس فيا انا وانا مش ناقصة .
عموما الباشا طلع باشا شكلا فقط وليس موضوعاً لإنه أولا طلع على المعاش ده بالنسبة للرتبة وبالنسبة للفلوس طلع لبط ومش هايدفع حاجة بالعكس عايز تعويض عن اللي حصله كمان وبيبالغ في تلفياته عشان يطلعله بقرشين مني او من شركة التأمين.
عموما ربنا يعيني على اللي جاي بقي .

المشاركة الأصلية كتبت بواسطة mhDeeb

ربنا يعوض عليكى
بس عايز اعرف انتى بتسوقى بقالك كام سنة
وربنا يستر طريقك باذن الله
يجب ان تكون لديك قاعدة ثابتة وهى بان :
جميع من يسوق حولك لا يعرف قليل عن القيادة وعن اداب القيادة

انا بسوق بقالي حوالي سنة ونص
طبعاً هاتقول قليل ولسة متعلمتيش كويس
هاقول لحضرتك اني بداية تعليمي السواقة مكنتش متمرسة فعلا وقعدت شهرين خايفة ومرعوبة ومش بحاول ابدا اعدي عربية قدامي لكني مع الوقت وخصوصا ان طريقي يوميا شارع عين شمس (وشارع عين شمس ده للي ميعرفوش يستحيل حد يعرف يمشي فيه الا لما يكون سواق ماهر لإنه صعب كله ميكروباصات ونص نقل وكله تقاطعات وكله ملفات وساعات حتت مكسرة وناس بتمشي عكسي وحاجة تقرف يعني ) وكمان انا بخرج بالعربية كل يوم تقريباً مش راكناها يعني.
وكمان سوقت على طرق سريعة منهم صلاح سالم (لما بيكون فاضي وزحمة كمان) لإنه جنب شغلي وطريق السويس ومصر اسكندرية الصحراوي ومصر اسكندرية الزراعي والدائري وكنت باخد غرز ساعات (بس من غير مارعب الناس اللي حواليا يعني بعملها بتعقل مش بغشومية وساعة الضرورة يعني).
يعني اكتسبت مهارة السواقة اسرع من اي حد تاني في نفس الوقت ده.
وجه عليا وقت ايام ال 128 الله يرحمها كنت انا اللي بكسر علي سواقين الميكروباص واخليهم ميعدوش لحد ماواحد منهم مرة استأذني عشان بس اعديه لإنه حاول يكسر بالبلطجة المعهودة بتاعتهم لاقاني مخوفتش وكبست عليه ومرضيتش اعديه لكن لما استأذن بأدب عديته .
يعني الموضوع مش موضوع توقيت اني بسوق بقالي كام سنة وبس
لكن المهم بسوق فين وبسوق ازاي وبسوق كل يوم ولا لأ وايه نوعية الناس اللي بتسوق حواليا .
عموما انا في الأول كنت شاكة ان بعض اللي بيسوقوا حواليا مبيعرفوش يسوقوا ومعندهمش اداب القيادة لكني دلوقتي اتأكدت ان اغلبهم ان مكنش كلهم كده.
ومن هنا ورايح هاتعامل على هذا الأساس

رأيي يا رنا خدي بالك من العربية وصلحيها في التوكيل طالما انك كدة كدة مأمنة عليها !!!! التوكيل انظف في الحاجات وسيبك من مراكز الخدمة والكلام دا عن تجارب !!!!!!!
واذا هتتابعي موضوع الظابط دا يبقى بس من باب انه لازم يتربى ويعرف ان فيه ربنا أكبر من أي حد والعينة دي فعلا من الظباط زي مابعض الأخوة قالوا بيخافوا على سمعتهم و و و وو دا كمان ناقص عشان بدأ كلامه معاكي بكدة يعني قصده يخوفك ومجرد انك توصليله احساس انك مش خايفة ويعني ايه عقيد دا بس لوحدة كفاية وانك رحتي لحد القسم ومخفتيش وكملتي المحضر و و و و ورأيي سيبك منه و ركزي في شغلك وودي عربيتك التوكيل وهتاخد وقت كتييييير بس هتستلميها ان شاء الله زيرو تاني وبلاااااااشششش مراكز الخدمة التوكيل على كل عيوبه بس برضة ميزته في النهاية هتاخدي شغل نظيف

واعتبري نفسك الوحيدة اللي بتعرفي تسوقي وكل اللي حواليكي تيييييييييييييييييييييييي ييييييييييييييييييييييييي يت
يعني مثلا اللي بتتعلم دي ( وغيرها ماهو مش كل اللي سايقين متعلمين السواقة اصلا ) كان لازم تعملي حسابها اكتر من كدة وبالكتير تبقي وراها لكن ماتجيش جنبها ولا قدامها ولا في اي اتجاه ممكن تجيلك منه

المشاركة الأصلية كتبت بواسطة BASKOTA

حمد الله على سلامتك رنا وربنا معاكى
العربية دى منظورة ولا ايه

المهم طمنينا عملتى ايه وايه الاخبار

الله يسلمك يابسكوتة
الظاهر كدة انها منظورة او منحوسة مش عارفة الحقيقة .
الاخبار انتي عرفتيها ادعيلي بقي ربنا يسهل في اللي جاي

المشاركة الأصلية كتبت بواسطة ezzatfox

اية الحكاية يا رنا .. كل دى حوادث فى شهر واحد
كدة كتير اوى .. انتى اكيد واخدة عين حلوة
الحمد الله ان انتى سليمة .. متزعليش و يا ريت تخلى بالك و تتوقعى خطأ الغير

اعمل ايه بس حظي مع العربية مش متظبط لدرجة اني بقيت اتوقع كل يوم حد يخبطني
عموما الحمد لله على كل شئ وقدر الله وماشاء فعل

المشاركة الأصلية كتبت بواسطة evoo90

والله انتى صعبانه عليا قوى انتى وعربيتك اللى بقت ملطشه دى
بصى قصه عقيد دى ماتقلقكيش من حاجه راجل زى ده بيتحامى فى سلطته وسمعته وتقريبا مالوش غيرهم بدليل انه اول مانزل بيقولك انا عقيد ( ده ممكن يعتبر اسلوب تهديد ) خدى منى بقى مفتاح الناس الكبيره دى بما انى اتعاملت مع كتيييير منهم
الناس الكبيره سواء شرطه او جيش او داخليه او مباحث او رجال اعمال كبار نقطه ضعفهم الوحيده سمعتهم وسمعه مركزهم
اولا قبل اى حاجه اوعى اوعى اوعى تتنازلى عشان موقفك بقى وحش بجد بعد الاتهامات والكوسه اللى بالباطل دى
ثانيا لو رفض يصلح عربيتك او يغير اقواله واصر على موقفه وانه يلبسك فى الحيط زى مابتقولى يبقى لازم فورا تعملى محضر عدم تعدى وتروحى فى وشه وتقوليله البقين دول ( بص يا عقيد انا بنت فلان الفلانى انت دلوقتى ماتعرفوش بس هتعرفه بعدين وهتقعد فى وشه كتيير انا فاضيالك لاورايا بيت ولا عيال ولا شغل ولا دراسه وممكن اقعدلك فى الاقسام والمحاكم 24 ساعه فى اليوم هرفع قواضى لو اضطريت الحمد لله المحاميين اصحابى كتيير ) وشويه من عندك بقى انا هقريكى كل الكلام
حسسيه انك عادى جدا ومش فارقه معاكى اى حاجه وممكن تبهدليه
بينكم محظر عدم تعدى ومش هيقدر يعملك حاجه
وهددتيه باغلى حاجه عنده اللى هو عايش عليها ( السمعه والسلطه )
لو قدرتى تقنعيه انك تقدرى تبهدليه حتى لو بعد البهدله مش هاتخدى حقك يبقى وصلتى لنقطه ضعفه
اللى زى ده يخاف على سمعته قوى وساعتها مش هتفرق معا 8000 ملطوش هيديهوملك او حتى اقل من كده
اهم حاجه البرود والتناكه فى الكلام معاه

واهم حاجه اهم حاجه بعد ماتقرى الرد ده تنزلى ترفعى العربيه على طوب وتغطيها وتربطى الغطا كويس اوى وتطبطبى عليها وتبوسيها وبعد كده تطلعى تردى هنا

متشكرة اوي لاهتمامك بموضوعي
والحمد لله اصلا هو طلع على المعاش او متقاعد يعني اهميته بقت اقل بكتير من لو كان لسة في الخدمة.
وبصراحة انا مبحبش وجع الدماغ لإني عارفة اني في الاخر لا هاخد منه لاحق ولا باطل (لإنه راجل مش سهل وباين عليه لبط) بس كفاية اني اتحسبنت عليه وربنا شاهد علي الظلم اللي هو ظلمهولي من بهدلة العربية للفلوس اللي هادفعها للمشورة بتاعة القسم لمشورة التوكيل للعطلة لكل الغلب ده .
وانا بصراحة مش فاضية اقعد اوجع دماغي بسكة الاقسام والنيابة والمحاضر والمحامين والحوارات دي خصوصاً اني مش عايزة اهلي يتورطوا في مشاكل بسببي .
وهو من كلامه وسلوكه لا هايدفع ولا هايعمل حاجة بس هو كان فاكر إنه لما يقوللي رتبته هاخاف ومرضاش اعمل محضر وكدة لكن انا مهمنيش وصممت اعمله محضر عشان على الاقل اضمن حقي مع شركة التأمين رغم انه حاول يحبطني ويقولي شركة التأمين مش هاتدفعلك حاجة لاني هاطلعك في المحضر غلطانة لكني صممت وقلت كل اقوالي واخدت محضري ومشيت.
بس مش عارفة الخطوة الجاية ايه بصراحة من ناحية القسم يعني هل المحضر هايتحول للنيابة وهل هايستدعوني عشان ياخدوا اقوالي والموضوع يتحول لقضية ولا هايعملوا ايه .
انا عن نفسي مش هاجري ورا المحضر لاني عارفة اني مش هاستفيد اي شئ لكن لو هو اللي سعى ورا المحضر بقي وتابعه هايكملوا خطوات المحضر ازاي.
ياريت لو حد هنا فاهم في القانون يفيديني في النقطة دي لأني مش عارفة (بس اغلب الناس قالتلي ولا هايعمل اي حاجة والمحضر مالوش لازمة ومش هايعمل بيه حاجة)
عموما الحمد لله انها جت على أد كدة وربنا يستر بقي في اللي جاي .

المشاركة الأصلية كتبت بواسطة محمد ابراهيم 1

معلش يا رنا
الحمد لله على كل شىء
أنا شايف الموضوع من وجهة نظر تانية وعن تجربة
إن التعامل مع البنوك لا يؤدى إلى الخير أبدا كذلك الرأى القائل بحرمانية التأمين ليس من فراغ
نصيحة صلحى العربية وبيعيها وادفعى الأقساط اللى عليها من تمنها وربنا حيعوض عليكى بأحسن منها 100 مره

والله يا أستاذ احمد انا للحظة فكرت بوجهة نظر حضرتك دي
لكن قلت انا استخرت ربنا قبل مامشي اي خطوة في الموضوع كمان اخترت بنك اجراءاته تتوافق مع الشريعة الي حد كبير وأطلعت على كل الاوراق عشان اتاكد من مشروعية الأجراءات ولما كنت على وشك اني افركش الموضوع لما لاقيته طول استخرت ربنا تاني قبل مانهي الاجراءات وارجع في كلامي مع البنك لكن لاقيت الموضوع اتسهل وتم علي خير.
وكمان التأمين اجباري عشان تقسيط
انا لو صلحت العربية وبعتها زي ماحضرتك بتقول أولا صعب ان لم يكن مستحيل اني الاقي مشتري يديني الفلوس كاش قبل مافك حظر البيع وكمان تمنها مش هايكمل باقي الاقساط اللي عليها وهاتكون خسارة بالنسبة ليا من كل ناحية ده غير اني هارجع تاني لبهدلة المواصلات وقلة القيمة اللي كانت بتحصل للواحد كل يوم في كل انواع المواصلات حتى التاكسيات .
عموما ده قضاء ربنا وانا راضية بيه وان شاء الله ربنا يعوضني خير عن اللي بيحصلي ده .

المشاركة الأصلية كتبت بواسطة med

لا حول ولا قوة الا بالله انا لله وانا اليه راجعون بسم الله الرحمن الرحيم (والذين اذا اصابتهم مصيبة قالوا انا لله وانا اليه راجعون )صدق الله العظيم ربنا يعوض عليكى ويديكى احسن منها الف مرة الحمد لله انها جت على قد كده ومحصلكيش حاجة ده ابتلاء من عند ربنا اذا صبرتى واعتمتدى على الله حيديكى احسن منها متخرجيش اسطوانه القرأن من الكاسيت طوال شهر رمضان وبعد كده عايزة تسمعى اغانى وانتى نازله رايحة الشغل تشغلى القرأن وبليل مثلا تسمعى الانتى عايزاه وحاولى تقرأى مبتلات الحسد وبالنسبة للمحضر لا تتنازلى عن المحضر وعن حقك

الحمد لله على كل شئ
انا لله وانا اليه راجعون
اللهم اجرني في مصيبتي واخلف لي خيراً منها
انا فعلا احتسبتها عند ربنا وصبرت (اينعم من جوايا زعلانة ومقهورة) لكني بحاول اصبر نفسي كل شوية بدعاء ربنا واستغفر ربنا من اي وسوسة تقولي لو كنتي عملتي كذا مكنش حصل كذا وكذا.
هو نصيب وقدر وانا لازم اصبر عليه.
انا فعلا بشغل قرآن وادعية دينية في العربية بصفة يومية حتى ولو لفترة بسيطة لكن مش بخليها تنقطع تماماً من العربية وعلى طول بقول دعاء الركوب وانا سايقاها.
بالنسبة للمحضر انا مش عارفة المفروض اعمل ايه تاني واتابعه ازاي؟

المشاركة الأصلية كتبت بواسطة Dr_Smart

حسبي الله ونعم الوكيل

انا اللي مزعلني حاجه واحده بس

تلاقيكي عمرك مادخلتي اقسام بوليس ودلوقتي كل يوم والتاني متبهدله في الاقسام عشان العربيه

ربنا يعوض عليكي

عارف انا اول ماقريت جملتك دي عيطت ولاقيت دموعي انهارت وجملتك دي وجعتني بجد لإن فعلا دخول الاقسام ده بالنسبة ليا شئ غريب متعودتش عليه انا فاكرة اني دخلت القسم ده تقريبا 3 مرات بالعدد مرة عشان اعمل بطاقة ومرة عشان ابلغ عن ضياع محفظتي اللي فيها كل اوراقي ومرة عشان ابلغ عن موبايل اتسرق مني كان تمنه الفين جنيه وقتها .
يالا ربنا مايحكم على حد بدخول الاقسم ده ابداً

رغم ان قسم النزهة الناس اللي فيه محترمين ومعاملتهم كويسة واحقاقا للحق محدش فيهم اساء التعامل معايا بأي شكل بالعكس انا شوفت منهم ذوق واحترام مشوفتوش من ظباط او عساكر في اي قسم تاني.
لكن برده كلمة قسم ومحضر شرطة كلمة تقيلة وتخض
بس هانعمل ايه بقي كان لازم اروح عشان اضمن حقي مع التأمين على الأقل.
يالا منه لله بقي اللي كان السبب في البهدلة اللي انا فيها دي

المشاركة الأصلية كتبت بواسطة sss2000

الحمد لله انها جت علي قد كدة عليكي بدعاء الركوب كل يوم في الصباح قبل ركوب السيارة وسماع القرأن في السيارة خير حافظ

المشاركة الأصلية كتبت بواسطة abdelrahman82

الحمد لله ياانسة رنا قدر الله وماشاء فعل وبرده ماتنسيش الصبح وانتي خارجة بالعربية تقراي اية الكرسي واذكار الصباح وان شاء الله مفيش حادثة تاني

المشاركة الأصلية كتبت بواسطة ghada_zaky

اذا علمتم الغيب لاخترتم الواقع ...الحمد لله انها جت على اد كده وربنا يعوض عليكى خير ان شاء الله

الحمد لله على شئ وقدر الله وماشاء فعل
ومتشكرة اوي ليكوا ياجماعة على اهتمامكوا ودعائكوا ليه.

المشاركة الأصلية كتبت بواسطة EslaM_NagY

قدر الله وما شاء فعل

الحمد لله انك كويسة الحديد يتعوض

انا كنت لسة فى مكانك بالظبط بعدى طريق وواحد جاى طاير ومش باصص قدامه ووكنت خلاص فى نص الطريق رحت فارك ومعدى من قدام شنبه بفارق بسيط.

الحمد لله

الحمد لله انك لحقت وعديت ربنا يصبرنا على النوعية دي من الناس لإن بجد حرام اللي بيحصلنا بسببهم ده.

المشاركة الأصلية كتبت بواسطة survey

السلام عليكم ورحمه الله وبركاته

قدر الله وماشاء فعل
اكيد ربنا فدي حاجه تانيه
استودعكي الله

المشاركة الأصلية كتبت بواسطة vayron

لا حول ولا قوة إلابالله

الحمد لله أنك بخير ودة إختبار من ربنا سبحانة وتعالى

وإذن اللة خير وتعدى على خير بإذن الله

وربنا يا رب يزيح عنك بيها الشر يارب ويغنمك الخير

تحياتى

الحمد لله على كل شئ متشكرة اوي لاهتمامكوا ودعائكوا ليا بالخير.

المشاركة الأصلية كتبت بواسطة Marwanelbendary

نصيحة مهمة جدا:

(اية الكرسي) و أقسم بالله ان لا انتي ولا عربيتك هاتتلمس الا اذا نسيتي تقرأيها

أنا كان معايا سكودا فيليشيا اتروقت و أنا بيها , ماتشغليش بالك وما تحطيش الكلام بتاع الحسد (مع انه موجود) و التوتر ده في دماغك
والعملية بسيطة بس مش هادفع

والله فعلا مافيش مشكلة رفرف وفانوس هايتغيروا والباقي هايتسمكر احمدي ربنا و ربنا يحفظك و يحفظ المؤمنين في ناس ضيعت عربيات كاملة و ضيعت نفسها برضه.

و كلنا عملنا أكتر من كده قبلك بس انتي بس علشان جديدة في الكار

متشكرة اوي يابشمهندس مروان وانا فعلا من هنا ورايح بإذن الله هاواظب على اية الكرسي كل ماركب عربيتي وربنا يحميني بقي من شر الطريق.
المشكلة ان العربية هاتكلف فلوس كتير ده غير العطلة .
يالا الحمد لله على كل شئ.

المشاركة الأصلية كتبت بواسطة marwanelbendary

ماينفعش شغل المنطق والعقل والذوق في شوارعنا علشان احنا سايقين مع............!!!!
لازم تبعدي عن أي واحد تحسي انه معتوه..
ولازم ماتمشيش قريبة من أي حاجة عالية قدامك تحجب عنك رؤية ما هو أمامها واللي فاجأة ممكن يبقى قدامك بعد ما هو يفاديه وبعد الشر الواحد ياخده بالحضن.
اوعي تفادي عربية من على اليمين.
اوعي تفادي عربية في ملف أو في مطلعاية أو منزلاية
ولو داخلة شارع يمين أو شمال افخي اللي وراكي واعملي فرح بالكلاكس وانتي داخلة الشارع واللي يصدع يصدع
ولو في تاكسي أو ميكروباص واقف على أول شارع انتي عايزة تدخليه تضربيله كلاكسات لغاية لمل ودانه تفرقع و ماتحاوليش تماما تعدي من قدامه.

عموما كلاكس الأكسنت اللي سايقين في الطريق بيستهيفوه وما حادش بيوسعلك علشان كدة أنا غيرت الكلاكس
وعموما نتشرف بتشريفك في اليوم المفتوح للقاء الهيونداوية لحل مشاكلهم....
برجاء الاتجاه الى هذا الموضوع..
http://www.nilemotors.net/nile/93449-a.html

ميرسي جدا يابشمهندس على النصايح القوية دي وفعلا انا بعمل جزء كبير منها وان شاء الله هاعمل بباقي النصايح من هنا ورايح.
بالنسبة للكلاكس بالعكس انا بحس ان صوته مزعج ولما برزع حد قدامي كلاكس بحسه بيتخنق جدا من صوته بس يمكن مقارنة بكلاكسات تانية هو اقل ولا حاجة يمكن .
عموما الموضوع اللي حضرتك عاملة هايل بس للأسف مش عارفة هاقدر احضر في اللقاء بتاع اليوم ده ولا لأ
خصوصا ان العربية بتتصلح دلوقتي في التوكيل عشان منفعش تأجيل اصلاحها لبعد العيد زي ماكنت عايزة.
عموما اتمنالكوا يوم ظريف وتعملولنا تقرير وافي عن اليوم ده بإذن الله.

المشاركة الأصلية كتبت بواسطة amrrr

رأيي يا رنا خدي بالك من العربية وصلحيها في التوكيل طالما انك كدة كدة مأمنة عليها !!!! التوكيل انظف في الحاجات وسيبك من مراكز الخدمة والكلام دا عن تجارب !!!!!!!
واذا هتتابعي موضوع الظابط دا يبقى بس من باب انه لازم يتربى ويعرف ان فيه ربنا أكبر من أي حد والعينة دي فعلا من الظباط زي مابعض الأخوة قالوا بيخافوا على سمعتهم و و و وو دا كمان ناقص عشان بدأ كلامه معاكي بكدة يعني قصده يخوفك ومجرد انك توصليله احساس انك مش خايفة ويعني ايه عقيد دا بس لوحدة كفاية وانك رحتي لحد القسم ومخفتيش وكملتي المحضر و و و و ورأيي سيبك منه و ركزي في شغلك وودي عربيتك التوكيل وهتاخد وقت كتييييير بس هتستلميها ان شاء الله زيرو تاني وبلاااااااشششش مراكز الخدمة التوكيل على كل عيوبه بس برضة ميزته في النهاية هتاخدي شغل نظيف

واعتبري نفسك الوحيدة اللي بتعرفي تسوقي وكل اللي حواليكي تيييييييييييييييييييييييي ييييييييييييييييييييييييي يت
يعني مثلا اللي بتتعلم دي ( وغيرها ماهو مش كل اللي سايقين متعلمين السواقة اصلا ) كان لازم تعملي حسابها اكتر من كدة وبالكتير تبقي وراها لكن ماتجيش جنبها ولا قدامها ولا في اي اتجاه ممكن تجيلك منه

انا فعلا قررت اصلحها في التوكيل عشان خفت من العك اللي ممكن يحصل بره.
وكمان عشان التأمين يغطي معظم التكلفة ومصلحهاش كلها على حسابي الخاص.
وفعلا انا عن نفسي مش فاضية لحوارات المحاضر والاقسام دي ولو هو عايز يتابع ويكمل بقي براحته وانا هاشوف هاقدر اعمل ايه وقتها.
انا كان اهم حاجة عندي المحضر اليل عملته عشان التأمين وبس.
وانا فعلا من هنا ورايح هاطبق قاعدة ان اللي حواليا كلهم مش بيعرفوا يسوقوا عشان اتلافي اخطائهم الجسيمة دي.
ومتشكرة جدا لاهتمام حضرتك نصيحتك ليا.