رواسب غير نظيفة في فتحة تغير الزيت

**abo_lamar** · 06-09-2009 11:36 PM

السلام عليكم ورحمه الله وبركاته

النهاردة مش عارف ايه اللي خلاني افتح الغطاء بتاع زيت الموتور لقيت الغطاء مترسب فيه (انا أسف للفظ ) وساخة سوداء ولقيت كمان الوساخة دي (زي حبيبات رمل بس سوداء مخلوطة بالزيت) جوه فتحة الموتور اللي بنغير فيها الزيت .. انا بغير الزيت Mobile XHP على 3000 كم وكل مرة بغير معاها الفلتر فمش عارف ده نتيجة ايه بالظبط يمكن اللي اشتريت منه العربية (اشتريتها تقريبا من 6 شهور ) ماكنش مهتم بتغير الزيت بانتظام ؟ وهل الوساخة دي ممكن تأثر على الموتور ؟ ولو رحت للميكانيكي ممكن ينظفه ؟ بس الزيت لما بشيك عليه بالمقياس بتاعه بيكون طبيعي ... ياريت حد يدلني ويعرفني أعمل ايه ؟
حاجة تانية .. من يومين بحس برعشة بسيطة للعربية في السلانسية .. ياترى ايه السبب؟
وشكـــــــــــــــــــراً

**samirayad** · 06-09-2009 11:41 PM

هل بتزود زيت

**abo_lamar** · 06-09-2009 11:43 PM

لا خالص يا باشمهندس سمير

**samirayad** · 06-09-2009 11:50 PM

لو المقاس ثابت معاك على طول يبقى فعلا دى رواسب زيت قديم

يمكن اللي اشتريت منه العربية (اشتريتها تقريبا من 6 شهور ) ماكنش مهتم بتغير الزيت بانتظام

والمفروض تبقى تعمل فلشنج لدورة الزيت لتنظيف المكنه من الداخل
حفاظا على كل مكونات المحرك
ولو عاوز تسقط الكرتير وتعمل دور نظافه لكل الرواسب اللى فى الكرتير واللى على مصفة طلمبة الزيت
يبق تمام أوى
وبالنسبه للجزئيه دى

من يومين بحس برعشة بسيطة للعربية في السلانسية .. ياترى ايه السبب؟

يفضل نظافة بلف الأيدل والبوابه وعمل أيدل ليرننج
مع الكشف على البوجيهات والأطمئنان على قوة الشراره
مره من عند البوبينا ومره من عند البوجيهات ( لمجرد الأطمئنان فقط )

**abo_lamar** · 06-09-2009 11:58 PM

شكرا لحضرتك يا باشمهندس سمير والله حضرتك دايما شاغل نفسك بمشاكلنا

**Hany A Fattah** · 06-09-2009 11:58 PM

المشاركة الأصلية كتبت بواسطة samirayad

والمفروض تبقى تعمل فلشنج لدورة الزيت لتنظيف المكنه من الداخل
حفاظا على كل مكونات المحرك

هو ده المفيد

**samirayad** · 07-09-2009 12:03 AM

المشاركة الأصلية كتبت بواسطة elakawy

شكرا لحضرتك يا باشمهندس سمير والله حضرتك دايما شاغل نفسك بمشاكلنا

ياباشا الله يخليك ....كلنا أخواتك وتحت أمرك

المشاركة الأصلية كتبت بواسطة razini89

هو ده المفيد

ماشى يابركه
وكل سنه وأنت طيب
ورمضان كريم

**samirayad** · 08-09-2009 09:05 PM

بس خلى بالك مش عاوز اتكهرب ...........

طالما خايف ......يبقى بلاش
هههههههههههه
الميكانيكى بيعمل أيه
علشان يختبر قوة الشراره ويشوف البوجيهات واصلها كهرباء ولالا
- بيجى من عند البوجيهات والمكنه شغاله على السلانسيه
ويفصل كبل كبل ويقربه من جسم المكنه
وأول مابيقرب الكبل بنفس مقاس الثغره بتاعة البوجيه من الداخل بتتولد الشراره
ومن خلال شكل وقوة الشراره بيطمن أن البوبينا شغاله تمام هى والكابلات
هو بيحاول يطلع الأحداث اللى بتحدث بين ثغرة البوجيه جوه الغرفه
علشان يشوف الصوره قدامه على الطبيعه (نوع من الفطره اللى تعود عليها الصنايعيه )
طبعا عملية تقريب كبل كبل ....بتتم للأربع كبلات بالتتابع
كل مابيطمن لشراره حادثه بين كبل وجسم المكنه بيركبه مكانه ويفصل التانى وهكذا لحد ما ينتهى من فحص شرارة الأربع كبلات من عند البوجيهات
لقاهم تمام .....والوضع العام زى بعضه بالنسبه للأربعه
بيحكم على البوبينا والكابلات أنهم تمام بصوره تقريبيه
وطبعا دى بتكون قريبه من الصح

بيجى بأه من عند البوبينا .......الأربع مخارج بتوعها وأنت نازل من فوق لتحت
بتفصل كبل كبل من مكانه بالبوبينا
وتروح مقربه بصوره عدله تماما....كأنك حتركب الكبل فى مكانه بالبوبينا
وعند وضع خلوص معين ومع حدوث شراره ( لأن المكنه شغاله والبوبينا بطلع كهرباء )
حدوث الشراره بنفس الصوره للأربع بوجيهات بيبين أن البوبينا تمام
برضه ده بصوره تقريبيه

عاوز بأه أاقولك أيه تفسير حدوث شراره من الجنبين بالشكل ده
على الرغم أنك بتبقى فاصل مخرج معين سواء من هنا أو هنا
1- من عند البوجيهات ....بتكون الكهرباء اللى ماشيه لحد نهاية الكبل بتمثل القطب الموجب للبوجيه .....وجسم المكنه بيمثل القطب السالب للبوجيه
ولحظة التقريب لنهاية كبل البوجيه مع جسم المكنه ( بتمثل خلوص البوجيه الازم لأحداث شراره مناسبه )
يعنى أنت تحايلت على الوضع وعملت سيناريو لللى بيحصل بين ثغرة البوجيه ( وأنت مش شايفه )
2- نفس الوضع من عند البوبينا
هنا بأه بيبقى مخرج البوبينا المنشال كبله بيمثل قطب موجب للبوجيه
والقطب السالب بيمثله الكبل اللى أنا ناوى أركبه عند لحظة تقريب معينه (بتناظر ثغرة هوائيه لازمه لأحداث شراره مناسبه )

أتمنى أن أكون وفقت فى تصوير سيناريو الأحداث اللى بتتم تجاه هذه الأختبارات