الموضوع: عيوب لانسر بومة 1300 مانوال ؟؟؟؟؟؟؟

1-هل عند حضرتك فكرة عن مركز خدمة او حد بيعمل خدمة لانسر فى الصعيد
لانه انت عارف انه برضه صعب انه الواحد كل ما يعوز حاجة ينزل مصر
ج: يافندم اللانسر مش محتاجة مركز خدمة ومش تبعها القاعدة بتاعة "كل ما يحتاج حاجة ينزل مصر" .. العربية مش بتحتاج حاجة .. مجرد زيت وفلتر كل 10 آلاف وتغيير تيل عند 20 الف أو سير عند 40 ألف إذا كان فيهم مشاكل وكل دا ممكن يتم عند الميكانيكى اللى تحت العمارة.

2-برضه فيه سؤال لحضرتك هل فى الفترة اللى انت معاك فيها لانسر 1300 مر عليك وقت حسيت انها مش عاملة اللى انت عاوزة او ندمت انك جبتها ؟؟؟؟؟
ج: الحمد لله لم أندم عليها خالص لكن زعلان من الحادثة اللى عملتها من كام شهر وراضى بقضاء ربنا وحتى العربية بعد الحادثة أدائها مرضى جدا.

3-و اذا كان قدام حضرتك فرصه تختار تانى .......هل هتختار لانسر برضه ؟؟؟
ج: من المؤكد إنى مش هختار ياريس
ممكن لانسر 1600 أو كورولا (عدا موديل 2009 شكله وحش قوى قوى فى نظرى)
ولو معايا أكتر قوى أجيب أوكتافيا أو تيريوس
غير كده يبقى هامر على طول

4-و هل فى الفترة دى حضرتك حصل معاك اى مشكلة فى العربية روحت بيها التوكيل زى عيب معين او كده ؟؟؟؟
ج: ولا الهوا بفضل الله ، وعربيتى كانت من غير ضمان وعامل بيها دلوقت 50 ألف كم.

معلش بس يا جماعه عندى كلمه عايز اقولها , صحيح انا مقتنع ان اللانسر عربيه محترمه وكويسه جدا والحمد لله مقتنع تماما بأنى اشتريتها

بس لا جدال ان الياريس عربيه قمه فى الجمال , افضل من الانسر فى الاداء

المقارنه تكون اللى هيشترى محتاج ايه اكتر , وبلاش نكون متحيزين لماركه معينه علشان راكبينها

الياريس افضل فى الامان من الانسر لا جدال فى النقطه دى ابدا , التوكيل افضل كمان لا جدال فى كدا , الياريس مش فئه اقل من الانسر علشان تتقارن بيها لو بصينا للفئات يبقى اللانسر والياريس والفيرنا واللانوس كلهم قفه واحده اسمها سيدان صغير

ومعلش استحملونى فى كمان رأى , محدش يقول اللانسر ال 1300 اداءها حلو يا جماعه علشان فعلا انا معاى العربيه وجربت غيرها 60 واحده والعربيه بتفطس فى التحميل او مع التكييف , غير كدا على طرق السفر العربيه بتمشى 110 على الخامس بتبقى على 3200 rpm تقريبا ويوم ما الواحد يدخل فى ال 120 بتبقى على 4 ( هو ده معنى كلمه فطسانه ) , اللى شايف ان الاداء ده ممتاز معلش ارجوكم حاولو تجربو الياريس ال 1300 وهى محمله مش هقول نجرب عربيات 1600

اللانسر واسعه واريح من الياريس بكتير فى الركوب الا ان الياريس برده كويسه مش ضيقه , عيب الياريس القاتل من رأى ان سعرها مبالغ فيه 4 ولا 5 حبات علشان انت بتشترى اسم تويوتا قبل ما تشترى العربيه اللى هو طبعا ميسواش جنيه

الاخ صاحب الموضوع , علشان ربنا يوفقك فى الشرا ومتندمش فى يوم هنصحك نصيحه

استقر الاول هتشترى خليجى ولا مصرى فى اللانسر وعلى اساس كدا قارن

امسك ورقه وقلم واعمل مقارنه بين العربيتين فى كل الجوانب كالاتى

السعر
الامان
الراحه
المساحات الداخليه ومساحات التخزين
الاقتصاديه
الاداء
الكماليات
اسعار قطع الغيار
مدى قابليه الاستغناء عن الوكيل
توفر الوكيل بالقرب منك
مدى مصداقيه الوكيل

واخيرا انت نفسيا مرتاح لمين فيهم

بالورقه والقلم لو اتحسبت صح هتطلع بأختيار مش هتندم عليه ابدا , مش دايما رأى الغير هيهديك للأختيار الصح لأن محدش عارف ظروفك زيك , ونسيت اقولك متنساش تبص على الخيارات المتاحه فى نفس الفئه السعريه

1- حد قاللى انه سير الكاتينة بتاعها جلد و ده لازم يتغير كل فترة لكن الياريس السير بتاعها جنزير و مش بيتغير
ج: فعلا سيرها جلد وبيتغير عند 80 ألف على الأقل ، والكورولا برضه جنزير ، بس دى نقطة بسيطة ومش مكلفة

2- انا شوفت اسعار قطع الغيار فى الاتنين لاقيت الانسر اغلى بكتير يعنى الاكصدام فى الانسر 1440 بينما فى الياريس 750 جنيه و برضه الكبوت بتاعها 750 و كمان الكشافات و القطع الميكانيكية ارخص برضه ....فأيه رأي حضرتك ؟؟؟؟
ج- زى ما قلت لحضرتك قبل كده ان اكصدام اللانسر مش حاجة واحدة ، عموما زى ما فيه أصلى فيه تايوانى ب 400 جنيه + إضافات بحوالى 250 ، القطع الميكانيكية لا أظن انها أرخص ، فيه قطع غيار تايوانى ويابانى خارج التوكيل ومنتشرة جدا بأسعار مقبولة ، وغالبا احتياج هذه القطع نادر إلا فى حال الحوادث لا قدر الله، ومتنساش انك ممكن تلقى أماكن كتير جدا لقطع غيار اللانسر سواء جديد أو استيراد وبأسعار متفاوتة أنما الياريس لأ.

3- برضه حد قاللى انه لانسر 1300 بتنزل بجنط 14 و الياريس 15 و كده اليياريس فى الجنط احسن
ج: صح ....

4- الاستاذ احمد نوح و هوا من ملاك لانسر 1300 بيقول بتبقى فطسانة و هيا محملة و مشغل التكييف ... وواحد صاحبى النهاردة قاللى انه كان ركب مع واحد لانسر 1300 مانوال و هما 4 و ماشيين على 160 بالتكييف ...مش عارف مين صح و مين بيبالغ ؟؟؟؟؟
ج: يختلف الشعور بالسيارة من واحد لواحد حتى لو على نفس السيارة ، عن نفسى شعرت بتأثير بسيط للتكييف على السحب لكنه لم يزعجنى لانه مش مؤثر.
على فكرة أنا سقت الياريس وكتبت تقرير عنها فى قسم المقارنات من فترة كبيرة وهدور لك على اللينك

المشاركة الأصلية كتبت بواسطة abohalmos

متشكر ليك يا استاذ احمد

بصراحة حضرتك صريح جدا و بتبدى عيوب السيارة اللى انت مالكها و دى مش حاجة اى حد يعملها

و بصراحة كمان تفكير حضرتك مرتب اوى اكيد حضرتك مهندس او حد عنده عقلية مرتبة و مميزة

العناصر اللى انت حاططها دى هاتبقى معيار المفاضلة عندى ان شاء الله

كمان انا بصيت على عربيات كتيرة بس فى الاخر حصرت اختيارى فى الاتنين دول لانهم اكتر حاجة عجبانى و بعدين انا عندى مرض انى بعمل عشرة و تعود مع الاشياء اللى حواليا و مش باسيبها بسهولة فأنا عاوز تكون عربية بتستحمل و متجربة و موجودة فى الصعيد بكثرة و ده متوفر فيهم

برضه احب اعرف رأى حضرتك بالنسبة للحاجات اللى انا لسه سائل عليها دكتور احمد

و برضه عاوز اسئلك هل لو رجع بيك الوقت كونت اخترت الياريس و لا لانسر 1300

كمان لو حضرتك ليك تجربة مع الياريس ...... ياريت اعرفها

و جزاك الله خيرا

و متشكر مقدما

ربنا يكرمك يا فندم وربنا يقدرنى واكون حيادى فى كل حاجه علشان ربنا هيحاسبنى على اللى انا بقوله

اختيارك موفق فى جانب الاعتماديه العربيتين ما شاء الله منتشرين وحاجتهم متواجده بسهوله والماركتين جودتهم عاليه سواء تويوتا او متسوبيشى , لو رجع بيا الوقت برده هجيب لانسر 1300

اولا انا كان مهم عندى جدا الراحه فى الركوب والمساحات الداخليه والتخزين وده اللانسر تتفوق فيه عن الياريس , الاداء مكنش مهم قوى بالنسبه لى انا اساسا مش بجرى ابدا فى الشارع وعلى طرق السفر مبزودش عن 130

اسعار الاكسسوارات الخارجيه وقطع الغيار كذلك كانت مهمه فى حين انى بتعامل مع ميكانيكى شاطر قوى من سنين فالتوكيل مش فارق معاى , وكان اساسى ان العربيه تكون اقتصاديه علشان انا طالب وبصرف عليها من جيبى

وغير كل ده نفسيا انا مكنتش مرتاح للياريس خالص خصوصا موضوع العدادات اللى فى النص ده بيضايقنى جدا مع انى سوقت الياريس والماتريكس كتير وسفريات طويله بس مستريحتش ليه ابدا

الياريس مع صديق لى جربتها كتير فى سفر وجوا البلد وعلى اساس كدا كان اختيارى وانا من خلال التجارب دى وضحت لحضرتك الفرق بين العربيتين

ربنا يوفقك للخير , ومتنساش الاستخاره مهمه جدا جدا

وبالمناسبه انا مهندس فعلا

المشاركة الأصلية كتبت بواسطة abohalmos

متشكر جدا لمعلومات حضرتك و بجد افدتنى جدا
جزاك الله خيرا

و انا برضه شايف انه العربيتين حلوين جدا و فعلا محتار بينهم و الاتنين منتشرين هنا فى الصعيد عندى و كذا واحد من اصحابى معاه لانسر و ياريس و الاتنين بيشكروا فيهم .....

انا كان عندى عربية 128 قعدت معايا حوالى 4 سنين عمرى ما خبطها نهائى الا مرة واحدة كونت ماشى فى طريق سريع و ضيق و لاقيت عربيتين داخلين عليا فى المقابل و مفيش منفذ ليا .....المهم الحمد لله خبطت وش فى وش مع ميكروباص رمسيس اكيد عارفه طبعا...... و العربية لفت حوالين نفسها و نزلت بيا فى الزرع اى نعم الوش بتاعها اتبهدل بس انا الحمد لله طلعت بدون خدش واحد .....فانا اتعلمت حاجة انه مهما كونت حريص و بتعرف تسوق الحوادث و الخبطات دى قدر برضه و مكتوبة .....انما برضه الواحد لازم يفكر فيها لو حصلت هايعمل ايه و يصلح فين .... يمكن لغاية امبارح انا كونت مقتنع جدا بالانسر و جمعت معلومات حلوة عنها بس عرفت انه تويوتا ليها توكيل فى الغردقة و دى قريبة من قنا يعنى مسافة ساعتين بالعربية ....... فأنا شايف انه دى نقطة مرجحة للياريس شوية ...... لانه مفيش حد صيانة او توكيل للانسر فى الصعيد يعنى اى خبطة و لا حاجة لازم تنزل بيها القاهرة ...... و دى حاجة مش سهلة بالذات لو كانت العربية مش هاتقدر تمشى بيها

معلش لو دوشتكوا معايا بس الصراحة انا محتار و بجد حابب الاتنين اوى و انا بفكر مع اخواتى بصوت عالى

و محتاج النصيحة منكم برضه .... و برضه مش فاهم كلمة حضرتك لما بتقول شرف للياريس انها تتقارن بلانسر .......مع ان حضرتك بتشكر فى الياريس جدا ...... و اخيرا لو حضرتك مكانى تختار ايه ؟؟؟؟؟؟؟؟؟؟

اللهم بلغنا ليلة القدر يا رب العالمين

الموضوع إن الياريس فئة أصغر من اللانسر اللانسر هى نفس فئة الكورولا
أنا عن نفسى لو بختار بينهم حجيب اللانسر لو مانيوال
لكن نصيحة أوعى تجيب لانسر 1300 أوتوماتيك لو عايز أوتوماتيك هات الياريس