الموضوع: ممكن احول الماتركس بنزين 80 ؟

المشاركة الأصلية كتبت بواسطة eng\ahmed

اعتقد مفيش كلام يتقال بعد الكلام دة
--------------------------------------------------------------------

هزود بس حاجة صغيرة بالنسبة لموضوع الفيشة والكلام دة

- اولا تقديم وتأخير الشرارة فى المحركات الحديثة بيتم بطريقتين : حساس الصفع knock sensor ودة بيدى اشارة للكمبيوتر يعدل توقيت الشرارة اوتوماتيك فى حالة حدوث تسقيف والتاينة هى الفيشة وبيتم تعديلها مانيوال وبالتالى مش شرط وجودها فى كل العربيات

- ثانيا : بالنسبة لموضوع ان مفيش علاقة بين نسبة الانضغاط ورقم الاوكتان فامعلش الكلام دة مش مظبوط
* نسبة الانضغاط هى نسبة حجم الاسطوانة قبل شوط الانضغاط وحجمها بعد شوط الانضغاط
وبالتالى مع ثبوت قطر الاسطوانة هيفرق فى مشوار المكبس داخل الاسطوانة , كل لما مشوال الانضغاط هيزيد هيسمح بانضغاط اكبر للخليط وهيسمح باستفادة اكبر من المحتوى الحرارى للوقود فى مشوار التمدد نظرا لزيادة ال stroke بتاع المكبس وبالتالى زيادة القدرة المستفادة من المحرك

معنى كدة انى محتاج وقود بمواصفات معينة لتحمل نسبة الانضغاط الاعلى ومقاومة الاشتعال الذاتى لاعطاء الشرارة فى الوقت المناسب بواسطة البوجية

*معروف انة بزيادة رقم الاوكتان بيزيد مقاومة البنزين للاشتعال الذاتى وبالتالى كل لما اعلى نسبة الانضغاط محتاج رقم اوكتان اعلى لمقاومة الاشتعال الذاتى وتقليل زمن انتشار الحريق flame propagation وبالتالى كفاءة حريق اعلى

- طيب اية اللى هيحصل لو حطيت اوكتان اقل فى محرك نسبة انضغاطة اعلى؟؟
اولا فى احتمالين:
1- احط اوكتان اقل مع ثبوت توقيت الشرارة
فى الوقت دة هيحدث اشتعال ذاتى للوقود اثناء صعود المكبس لأعلى وقبل حدوث الشرارة من البوجية وهيبدأ الخليط فى التمدد اثناء حركة المكبس لأعلى لضغطة ودة سبب حدوث الصفع او التسقيف اللى بنسمعة حركتين مضادين لبعض وعكس بعض فى نفس الوقت وبالتالى احمال زيادة على اجزاء الموتور الداخلية وليها تأثير على المحرك وممكن تؤدى لكسر دراع البيلات connecting rod وبالتالى انهيار شوط التمدد وفقد كبير فى قدرة المحرك
2- تانى احتمال وهو تقديم توقيت الشرارة لتفادى التسقيف
والحل دة اللى الناس بتعملة بتغيير الفيشة (طبعا التقديم بنسب مش مطلق ) .. نتخيل كدة حركة المكبس لأعلى بدل ماكانت شرارة البوجية بتحصل قبل النقطة الميتة العليا top dead center مباشرة حصلت وليكن فى بداية الربع الاخير من نهاية المشوار معنى كدة ان عملية التمدد هيضيع منها جزء فى نهاية الربع اللى باقى بتاع مشوار الانضغاط وباقى التمدد هيحصل فى شوط التمدد .. معنى كدة اننا فقدنا جزء من القدرة المستفادة فى المحرك بدون فائدة

معنى كدة ان العلاقة طردية بين نسبة الانضغاط ورقك الاوكتان للحصول على اعلى اداء من المحرك
يبقى مينفعش ان بنزين 80 زى 90 زى 100 ومفيش فرق فى الاداء بينهم واللا كانت شركات السيارات بتهرج والعالم كلة عايش فى اوهام

بالمناسبة انا معايا فكترا ولانوس والاتنين فيهم الفيشة
الفكترا كانت الفيشة على 87 وبحط 90 مفيش مشكلة وبعدين حطيت 92 طبعا الاداء اتحسن بصورة بسيطة .. بعدها قلبت الفيشة على 91 وفضلت على ال 92 الاداء اختلف بصورة ملحوظة عن الاول
اللانوس حطيتلها 92 من غير ماغير حاجة فى الفيشة , النهاردة لو اتضريت احط 90 بيبقى فى فرق واضح فى الاداء بالرغم من ان الفيشة على الوضع القديم فما بالك ب 80 حتى لو غيرت الفيشة

بصراحه كلام البشمهندس سبعاوى من الاخر خالص وصحيح 100% وبالنسبه للشوائب الى فى ال 80 نفسها وزيها فى ال90 دا بيختلف من بنزينه للتانيه على حسب نظافتها بس الاتنين واحد فرق بس الاضافات الى عليه
اما بالنسبه لحوار الاشعال بيحصل قبل الtdc دا مش صحيح الاشعال بيحصل بعد tdc بلحظات بسيطه جدا جدا اى فى بدايه مشوار نزول البستم
الحاجه التانيه الى عايز اعلق عليها ازاى الشراره بعد ما بنقدم الشراره يحصل فى مشوار نزول البستم يا اما انا مش فاهم قصدك ( مع العلم ان فى الربع الاخير فى نهايه مشوار التمدد بيكون الوقود الموجود بقى عباره عن ادخنه ( اتحرق كله يعنى ) لان الشوط الى بعده بيبقى شوط طرد الغازات المحترقه من غرفه الاختراق) ؟؟

ياريت توضحوا لنا هل هناك ضرر من البنزين 80 لو استخدم فى سيارة هيونداى اكسنت 98/ 1300 cc انا استخدمه دون اى تعديلات وبدون اى مشاكل فى سحب السيارة او التسقيف والضرر يكون على اى جزء فى السيارة وهل ممكن علاجه بعد ذلك وهل تكلفة العلاج مقارنه بالتوفير فى سعر البنزين مناسه ام لا