يا جماعة انا في ورطة بجد ومحتاج المشوره من خبراء الفيرنا

**zakiali** · 09-09-2009 02:37 AM

السلام عليكم ..

المشكله باختصار اني عملت حادثة بالفيرنا -الحمد لله علي كل حال - .. دخل فيا ميني باص ودمر الرفرف اليمين قدام بس المشكله مش في الرفرف ، انا غيرته وجبت واحد استيراد وعملت سمكرة ورشيت ...
المشكله دلوقتي في الأتي .. ياريت حد يقولي أعمل ايه ..

1- العجله اليمين قدام بتصرخ علي الأسفلت وفاتحة لبرة لأن الصاج والكرتيرة اتفعصوا عليها من فوق.
2- العجله القدام شمال بتعمل صوت سف علي الأسفلت والرمل
3- الخبطه لأنها جت في الرفرف والعجلة اليمين ، الدركسيون طبعا مش متسنتر
4- العربية بتعوم جامد جدا .
5- الدركسيون خف أوي .. حاسس انه فيه حاجه مفكوكه وحاسس ان حركة الدركسيون مش بتتنقل كويس للعجل .
6- الجنط الحديد اتعوج والكاوتش فش .
7- صوت الموتور اتغير مش عالي ولا واطي بس اتغير ،
8- حاسس ان الموتور فيه سخونية جامده طالعه منه وحاسس ان فيه صوت ميه بتغلي مش عارف جي منين ، بس مؤشر الحرارة بين النقطتين .
8- السحب كويس والفرامل كويسه والهاند بريك تمام ومستوي الزيوت تمام ومية الرادياتير .

من فضلكم حد يقدرلي الخساير ويقولي ايه العمل ؟
العربيه عامله 37 الف .
أروح التوكيل ولا هيطالبني بمبالغ خياليه ؟
ا-نا مش عارف افكر ... أنا عندي اكتئاب حاد واتشائمت من العربيه مش عارف اروح الشغل ولا اعمل اي مشوار .

جزاكم الله خيرا .

**walids** · 09-09-2009 03:20 AM

بداية قدر الله و ما شاء فعل

و الحمد لله انك طلعت منها بخير ـ كله بيهون .. اهم شيء ان الواحد يطلع من ده كله بخير

انا معنديش خبره في موضوع التوكيل ده و ان شاء الله اخوانا الفيرناوية هيفيدوك بالموضوع ده

**zakiali** · 09-09-2009 03:22 AM

المشاركة الأصلية كتبت بواسطة walids

بداية قدر الله و ما شاء فعل

و الحمد لله انك طلعت منها بخير ـ كله بيهون .. اهم شيء ان الواحد يطلع من ده كله بخير

انا معنديش خبره في موضوع التوكيل ده و ان شاء الله اخوانا الفيرناوية هيفيدوك بالموضوع ده

الف شكر يا استاذ وليد علي مشاعرك الطيبة .. والحمد لله علي كل حال .

.. هل من مجيب يا اخوانا ؟

**mando_07** · 09-09-2009 03:48 AM

يا باشا مكتئب ليه أحمد ربنا أنك بخير وفي داهية أي حاجة وكمان الحمدلله أنها حادثة صغيرة كل اللي أنت بتقول عليه ده سهل وقريب يتعالج إنشاء الله بس أنا معنديش خلفية عن التكليف الصراحة

**maka** · 09-09-2009 03:49 AM

انا مش عارف اقولك ايه ربنا يقويك

و حضرتك لازم تروح لعفشجى نظيف او مركز صيانة يرجع على العفشة وعلبة الدركسيون ولازم تكبس دورة التبريد لايكون فيه غليان وتسريب

**max_ziro** · 09-09-2009 04:00 AM

انشاء الله الحل بسيط و زى ما الاخ مكة قال
الحل ف عفشجى نضيف و المشكلة ب اذن الله تتلخص ف مقص و طيش و بيض طرف و انشاء الله مفيش زيادة عن كدة و الجنط بيستعدل و كدة تمام قوى قوى و الموضوع دة لو ف عربيتى السيفيا الى هى قطع غيارها اغلى بكتير من الفيرنا ف المقص ب 150 و الطيش ب50 ة البيضة ب 40 ة كدة انشاء الله تمام و طبعها ف الفيرنا ممكن يكون ربع كدة ولله اعلم انا عارف ان قطع غيارها رخيصة جدا و بعد كدة ظبطة زوايا كمبيوتر و كلة ب اذن الله يكون زى الاول ....

ربنا معاك ..

**SAMEH_FOUAD** · 09-09-2009 04:04 AM

الحمد لله على سلامتك وربنا يكفيك ويكفينا شر الحوادث

اول حاجة انا هاجاوبك على اسئلتك سؤال سؤال على حد علمى يعنى بردة شوف رائى باقى الاخوة الاعضاء
بس هتبقى اجوبتى على ان عندك المكان اللى بيركب فية المساعد سليم وماتاثرش يعنى كل العيب اللى عندك حصل بس فى الرفرف

1:عجلة فاتحة لبرة يبقى كدة انت عندك مقص اتعوج
2:عندك العجلة اخرت عن العجلة اليمنى
3:كدة الخبطة اثرت فى بارات الدركسيون
4/5:نتيجة طبيعية للى حصل
6:الجنط اتعوج ماشى لكن اية الكاوتش فش دية ,يعنى بدأ يهوى ,يبقى كدة تشيل الجنط دة وتركب الاستبن لحد ماتعدل الجنط دة وتمشى بية على انة استبن مش جنط اساسى
7:هو ممكن مايبقاش صوت ماتور بس عشان الالات الجر عندك فيها مشاكل فعاملة خشونة
8:اتاكد ان الخبطة ماجتش جنب طلمبة المياة

تقدير الخسائر مش هيبان الا لما الميكانيكى يشوف هايعمل اية واية اللى عايز يتغير ,دة غير انها هاتطلع بعد على بتاع الزوايا
التوكيل فى خبطة زى دية هايطلب اضعاف مضاعفة المبلغ اللى هاتدفعة برة وممكن العربية تشرف عنهم فترة طويلة لكن لو واحد برة وشاطر مش هاتتكلف ان شاء الله وبعدين دة شغل عفشة كلة مش محتاجة توكيل
والحمد لله ماتضايقش ولا حاجة اهم حاجة انك سليم وكل واحد معرض لحاجة زى دية وربنا يسترها معانا