الموضوع: ثرموستات الموتور فى الابيزا 98

اصدقائى عشاق الابيزا
عندى موضوع صغير بس مهم جدا وهو طبعا عن ثيرموستات الموتور
انا عاوز احزركم من فتى احبابى الصنايعيه الضالين اللى خربوا عربياتنا بافكارهم المنيله دى واشهر فتيه فى مصر احنا بلد حر احنا مش زى اوروبا لازم تشيل الثرموستات بتاع الكوع اللى هو ثيرموستات الموتور و طبعا يجيلك فى الحته اللى تحوفك ده بيخلى العربيه تسخن و تولع و تجيب وش سلندر و انت يامسكين تقر و تعترف و تقوم يا فالح شايله و راميه و سامع كلام حبيبى الصنايعى الضال اللى محسوب على الميكانيكيه

انا مش هقولك كلام زى اللى ممكن تسمعه من الناس المثاليه و يقولك المصنع مش مركب حاجه ملهاش لازمه و اكيد هو مهم بس هخليك تثبت معايا انه مهم و من غيره العربيه هتجيب هتجيب و ش سلندر لو شيلته

اولا مكانه فين
مكانه فى متور العربيه وراكب فى الشجره قبل خرطوم المياة اللى طالعه من الموتور رايحه للريداتير وطبعا د ى المياه الاكثر سخونه على الاطلاق
ايه وظيفته


وظيفته ببساطه انه بيحافظ على

1. تثبيت درجه حرارة الموتور فى جميع ظروف التشغيل صيف و شتاء
2. بيحافظ على عدم رجوع المياة البارده الى وش السلندر اللى ممكن تشرخه او تخليه يقفع و النتيجه انتم عارفينها
3. اهم فائده بقى انه بيحافظ على الموتور عارفين ازاى احنا عارفين ان المعادن بتتمدد بالحراره طيب المعادن هل درجه تمددها زى بعض طبعا لا طيب الموتور يحتوى على كام معدن وش السلندر المونيوم جسم الموتور موديلات حديد زهر وموديلات المونيوم جسم السلندر نفسه من الصلب البستم نفسه نو مختلف من الحديد

لما العربيه بتوصل لدرجه الحراره المطلوبه بتثبت عندها طبعا لو الثرمو ستات راكب و تفضل على الحراره دى
لو مش متركب العربيه طول ما هى ماشيه ودايره بتقف فى اشاره فتسخن تجرى بيها شويه تبرد يعنى درجه الحراره متزبزبه يعنى مجموعه المعادن بتتمدد و تكش طول ما انت ماشى بالتالى الحديد و الومنيوم بيتمدد بشكل بيخرب فى العربيه على المدى المتوسط وصاحبنا اللى ادى دماغه لحبيبى اللى مالوش فيها يلاقى عربيته جابت جوان وش سلندر و بعديها داخل و ش سلندر وربنا يارب يحفظ الجميع منه
ايه رايكم فى اهميه ثيرموستات العربيه مهم ولا نشيله مع العلم انه مصمم لجميع الاجواء

مستنى مشاركتكم
يارب ماكونش نسيت حاجه
مع تحياتى محمد مصطفى

انا ياجماعة روحت اعمل دورة التبريد في البنزينة تنضيف واحط مياه خضرا ولما فكها لقى ان الثرموستات مش موجوده فعلا وانا كنت شاريها على كده وما كنتش اعرف المهم انا اتفاجئت واتضايقت جدا بجد قلت خلاص اشوفها واركبها قالى لا لا مالهاش لازمة انا بنصح الناس انها ما تركبهاش ولكن زى ما قال الاخ ابيزا 50 انها فعلا مهمة لانى ديما كنت مستغرب من حاجه بردو انا مجرد ما اركن العربية حتى لو 10 دقايق واجى اركب تانى لازم اسخن العربية عشان ما تبرجلش لانها بتبرد بسرعه انا هروح ادور عليها واجبها ان شاء الله بس سؤال يا جماعه انا شغلى جنب بيتى وخروجى بالعربية جوه البلد وممكن بخرج بيها مرتين او تلاته في الاسبوع بس هل ممكن يكون اثر على الماتور عندى او لا مع العلم ان الماتور عندى سحبه كويس
وسؤال تانى انا لما بحرق بنزين وانا واقف مكانى وبجيب اربي ام مثلا 4 بتطلع عادم اسود خفيف اوى مش دخنه هل ده عادى ولا المفروض ما يطلعش اى حاجه وشكرا ليكم