اخبار تسارع اللواجن بعد التليين إيه؟

**MMamdouh** · 24-11-2009 12:43 PM

فيه فرق كبير بين الصراحة و التجريح... الصراحة هى انك تقول الحقيقة بغض النظر عن العواقب... و التجريح انك تغلط فى الناس

لما تقول انى "متحيز" فى ارائى يبقى دة تجريح... انا لاحزيد حتة لما حد يحب او يشترى اللانوس ولا حنقص حتة لما حد يشترى اللوجان...

سواء دة حصل او دة حصل انا حفضل زى ما انا... بالتالى النقطة الاهم بالنسبة ليا هى صورتى امام نفسى و امام الناس... و اعتقد انى مش حشوة صورتى عشان خاطر حتة حديدة... فى الاخر اللى يهمنى ان يتقال "كلام ممدوح صح" بالتالى مينفعش اقول حاجة غير الصح بغض النظر انا بتكلم عن مين او عن ايه او عواقب الكلام دة... لان سواء شئت او ابيت لا يصح الا الصحيح

و اعتقد لو كنت تابعت مواضيعى السابقة خصوصا فيما يخص مقارنة اللانوس باللوجان كنت حتعرف ان انا مش متحيز خالص... والا ببساطة مكنتش قولت على العيوب اللى فيها بصراحة شديدة... دة فيه ناس كانت داخلة بتتكلم عن عيوب اللنوس و هى مركبتهاش اساسا واللا كانوا شافوا العيوب العيوب اللى انا قولتها بسهولة جدا و برضة انا مش بقول على عيوبها عشان اتزنقت مثلا او عشان اكسب ود حد فى المنتدى... لو لاحظت حتلاقى تحت اسمى مكتوب "استشارى قسم الدايو" يعنى المفروض انى عارف الدايو كويس اوى اوى و فاهم كل حاجة فيها... بالتالى يوم ما يبقى فيها عيب و انا اتجاهلة يبقى اما انا مبفهمش حاجة او راجل "متحيز" زى ما انت بتقول... و فى كلا الحالتين لا استحق اللقب اللى ادارة المنتدى ادتهولى

و انا سبق و قلت كذا مرة انى مسوقتش اللوجان... و مركبتهاش الا مؤخرا بالتالى حكمى على الاداء و الثبات هو من خلال الناحية النظرية فقط لحين ما اسوقها فعلا... و لما ركبتها قلت على اللى شوفتة فيها بصراحة و كان معظمة فى مصلحتها... كان ممكن لو انا "متحيز" كنت مجبتش سيرة الحوار دة او حتى قولت انى ركبت العربية و لقيت فيها العبر او ثباتها مش قد كدة او ان مكنتها مش قوية او اى كلام فارغ و خلاص...

او لو انا "متحيز" للانوس و خلاص كانت طلعت جربتها مع عربيتى (اللى متعدل فيها حاجات كتير اوى) و ساعتها اضعف الايمان كنت حعمل اداء متوازن مع اللوجان بفرض انها افضل من اللانوس بكتير... و كنت برضة سهل اقول ان عربية 2001 عاملة 100 الف زيها زى اللوجان ال2010

لو القصة تحيز و خلاص كان حيبقى عندى مليون سكة و سكة للرغى الفاضى و الكلام اللى (مياكلش عيش) زى ما بيقولوا... بس فى الاخر انا اللى حخسر لان انا مش بتكلم على عربيتين فى الفضاء الخارجى... دول عربيتين منتشرين فى السوق و ناس كتير جربت دى و دى و سهل على اى حد يعرف انى بفتى او بقول اى حاجة لترجيح عربية على عربية و فى الاخر انا اللى حخسر

دة فيما يخص التحيز.... قصة انى "مش عايز اشوف انها واطية" معناها انى كداب... انا بعتبر ان دى اهانة مش وجهة نظر الحقيقة

و سبق و قولت ان العربية معايا من سنة 1998 و محستش بموضوع انها واطية بغباء زى ما ناس بتقول و سبق و قولت ان فيه عربيات اوطى منها بكتير زى السيفيك 92 و اللانسر 98 و 99... و سبق و سالت اصدقاء ليا عن الحوار دة و قالوا ان العربية مش واطية بالطريقة اللى الناس بتحطيها و من ضمن الناس دى صاحب اللوجان اللى انا ركبتها للعلم بالشىء... فا معلش لما تقول انى "مش عايز اشوف" يبقى قصدك تقول "انت كداب"

و مش معنى انى موافقك على نقطة ان دى نقطة لا تقبل الجدل و انت بس اللى فاهمها صح... كل ابن ادم خطاء... و بعدين لاحظ انك "متدايق" ان حد لة وجهة نظر محتلفة عنك... و فى نفس الوقت مستغرب انى زعلت لما اتهمتنى "بالتحيز" و "الكدب"... طيب منين الزعل حلو ليك لما حد يخالفك فى وجهة النظر ووحش لينا لما تغلط فينا؟؟؟

لاحظ كمان ان ناس كتير موافقانى الراى فى ان اسلوبك فى الحوار معايا مش كويس و اعتقد دة واضح... الا اذا كانت الناس دى برضة "متحيزة" او انى "مش عايز اشوف" انك صح... راجع اسلوبك فى الحوار و مفهومك لوجهة النظر

MMamdouh

**MMamdouh** · 24-11-2009 08:49 PM

انا مش زعلان يا زعيم ... انا بس حبيت اوضح نقطة معينة و معتقدش الزميل best 2010 يقصد اى حاجة وحشة

كل عام و انتم طيبين

MMamdouh

**gebreel** · 24-11-2009 11:18 PM

يا جماعة كل سنة و انتم طيبين
القصة مش قصة لوجان ولا لانوس ولا فيرنا ولا حتى اسبيرانزا
القصة زي ما محمد حامد اتفضل و قال انها احتياجات و مقارنة بين عيوب و مميزات
محمد حامد معروف في المنتدى و اشهر من النسر اللي على علم مصر :) و بصراحة عن تجربة شخصية معاه الراجل مبيتأخرش على حاجة و في قمة الاحترام و بيساعد الناس لوجه الله دون اي شئ
و بيست بردو من الناس المحترمين اللي موجودين في المنتدى و اكيد ميقصدش اي تجريح لكن كلام طلع بدون قصد و خلاص معلش
نيجي بقى لحبيبة قلبي اللوجان لما نقارنها مع عروستنا اللانوس بالمناسبة انا كنت محتار بين ال2 و وجعت دماغ منتدى الدايو بالاسئلة و كان محمد ممدوح من ضمن الناس اللي كانو قربوا يكرهوني من كثرة الاسئلة على اللانوس و في الاخر معلش بقى اشتريت لوجان :)
اللانوس انا مسقتهاش كتير قوي يعني هما مسافات بسيطة على اكثر من مرة
اللي معجبنيش فيها الكراسي بتاعتها حاسس اني غطسان كدة فيها و مش كاشف الطريق علما باني مش من الناس اللي يفرق معاهم انهم يشوفوا الكابوت ولا لأ انا الحمد لله باقلم نفسي مع اي عربية لكن يمكن الموضوع ده نظرا لاني قصير بس مع اللوجان تحس انك قاعد شايف الدنيا كلها ميكروباص ميكروباص يا ممدوح باشا
اللوجان دبرياجها ممتع بعد ما كنت عمال اققول انا تعبت من المانيوال من كثر الزحمة و ان شاء الله العربية اللي جاية هتبقى اوتو غيرت رأيي لكن دبرياج اللانوس مش تقيل هو عادي
باور اللوجان اتقل من اللانوس بس ده بيدي ثبات اكثر في السرعات المختلفة لكن اللانوس بتبقى الذ في الركن و المناورة بسرعة صغيرة
عفشة اللانوس معرفش عنها حاجة لاني زي ماقلت قبل كدة مجربتهاش كتير بس كانت كويسة مش وحشة
عفشة اللوجان حاسس انها حمالة اسية
ثبات اللانوس اعتقد معقول لحد 130 او 140 العربية تبقى ماسكة نفسها كويس اما بالنسبة للوجان فانا مجبتش بيها اكثر من 120 بدون قصد اثناء التليين بس مكنتش حاسس اني ماشي 120 بالرغم من علو العربية
شكل اللوجان شافو من قدام حلو و من ورا هتاخد عليها اما اللانوس فالدايو شكلها احلى من الشيفروليه من حيث الشبكة حتى علامة الشيفروليه مش لايقة عليها
استهلاك البنزين للوجان اكثر من رائع في حين ان من ملاك اللانوس استهلاكها عالي نسبيا مقارنة باخواتها و اللي انا شايفو عادي لان معايا لادا سمارة 2004 1500 سيسي و تقريبا نفس الاستهلاك اللي الاعضاء بيقولوا عليه
فرامل اللانوس اضعف من اللوجان لكن مع شوية تعديلات بتبقى زي الفل
الصاج مش شايف فيه فرق و على فكرة اللي بيقول ان صاج اللانوس ضعيف علشان كان بيسمع صوت الرمل بيخبط في الرفرف فده مش مقياس و في الاول و في الاخر القصة مش قصة ضعف و قوة الموضوع ده انتهى من زمان في العربيات العبرة دلوقتي بقت في امان الركاب و في حالة لا قدر الله حدوث حادث توزيع قوة الحادث على بدن العربية
نيجي بقى لعوامل الامان لو كانت التوكيلات بتاعتنا محترمة كانت اللانوس و اللوجان بقم في التوب لان بكل بساطة اللانوس بتنزل برة بايرباجز بردو و الكراش تيست بتاعها شوفتو كان ممتاز بالنسبة للفئة بتاعتها
يمكن سعر اللانوس بالنسبة لانها عربية تجميع محلى يكون عالي لكن اللوجان كانت ممكن تكون سعرها اكثر من كدة لولا اتفاقية اغادير و بالتالي كانت قلة اللي هتبصلها
ده اللي جاي على بالي دلوقتي
لكن اسمحلي يا ممدوح باشا اني اقول كلمة انت قلتها اننا منخليش حتة حديد تأثر علينا في الاول و في الاخر كلنا اخوات و كلنا بنحب عربياتنا و كلنا منحبش نسمع كلمة وحشة عليها و كلنا بنساعد بعض و بنتكلم مش علشان نقول مين صح و مين غلط لكن علشان نوصل للصح و يكون المنتدى هنا مرجع لأي حد بيفكر في اي عربية انو يعرف مميزاتها و عيوبها بحيادية تاااااااااااااامة فيا جماعة كلكم استغفروا ربنا كدا و قولوا الحمد لله على انو خانا نتقابل في المنتدى ده
تحياتي
محمود جبريل
و بعتذر لو كنت طولت

**MMamdouh** · 24-11-2009 11:52 PM

المشاركة الأصلية كتبت بواسطة superiorboy

لكن اسمحلي يا ممدوح باشا اني اقول كلمة انت قلتها اننا منخليش حتة حديد تأثر علينا في الاول و في الاخر كلنا اخوات و كلنا بنحب عربياتنا و كلنا منحبش نسمع كلمة وحشة عليها و كلنا بنساعد بعض و بنتكلم مش علشان نقول مين صح و مين غلط لكن علشان نوصل للصح و يكون المنتدى هنا مرجع لأي حد بيفكر في اي عربية انو يعرف مميزاتها و عيوبها بحيادية تاااااااااااااامة فيا جماعة كلكم استغفروا ربنا كدا و قولوا الحمد لله على انو خانا نتقابل في المنتدى ده
تحياتي
محمود جبريل
و بعتذر لو كنت طولت

MMamdouh

**MMamdouh** · 25-11-2009 12:02 AM

المشاركة الأصلية كتبت بواسطة Eng.Geo

كلام تمام
بس عايز اعاتبك علي حاجة
انا قلت في مشاركة الكلام ده :

وحضرتك سيبت كل الكلام وارديت علي " انابرده مصر علي اللي بقوله " بقولك

ليه ماردتش ؟؟؟؟؟؟؟؟؟
هو الكلام مش واضح !!!!!!!!!!!!
انا في الحقيقة ماقدرتش اقول غير "الله يخليك"

الكلام واضح طبعا... بس انت مصر على رائيك... طيب انا حعمل ايه؟؟

فيديو اللانوس واضح... فى الطلعة ركز مع تحرك عداد السرعة مش مع صوت الموتور... حتلاقى فرق بين الاتنين يعمل معاك فرق فى الزمن

و فى الوصول الى 100 كلامك مضبوط عن زاوية الرؤية و الاسقاط... لاحظ ان المسافة بين ابرة العداد و ارضية العداد 2 مللى يعنى الفرق اللى بتتكلم علية بسيط جدا يكاد لا يذكر بالتالى مش حيعمل فرق وقت بالشكل اللى انت متصورة

MMamdouh

-

-

الموضوع: اخبار تسارع اللواجن بعد التليين إيه؟

LinkBack

أدوات الموضوع

عرض

-

-

-

-

-

المواضيع المتشابهه

التليين؟؟

التليين

سؤال هام عن التليين

ما هو التليين؟؟

التليين ؟؟

الكلمات الدلالية لهذا الموضوع

المفضلات

المفضلات

ضوابط المشاركة