الكوردوبا و السيراتو عربيتين حلوين و الفروق حاليا طفيفة .. هايبان كمان كام سنة الفروق الجوهرية .. كل واحد حر في ذوقه .. في واحد بيهمه سعر إعادة البيع و فيه واحد بيهمه قطع الغيار الرخيصة و في واحد بيهمه الشكل و في واحد بيهمه الكماليات و فيه واحد بيهمه أساسيات العربية و فيه واحد بيهمه السعر و ......
فيه بس شوية ملاحظات عاوز أقولها ..
الملاحظة الأولى .. سعر إعادة البيع لا يمكن الحكم عليه الأن و لا حتى ببيع السيارة في الوقت الحالي .. بالتأكيد إعادة البيع الحالي في كلا السيارتين سيخسر من قيمتها و لكن قد تكون السيراتو (أسرع) في إعادة البيع .. عموما هذه النقطة -البيع حاليا- لا يجب أن تؤخذ في الاعتبار إلا لو كنت ناوي تحرق العربية.
الملاحظة التانية .. العربية سلعة معمرة و خاصة في مصر بظروفها الاقتصادية يعني من أهم الأشياء التي يجب النظر إليها هي أساسيات العربية من موتور و فتيس و عفشة و صاج لأن دول هما اللي بيأثروا على العمر الافتراضي للعربية و بالنسبة للصاج فدا اللي بيأثر على إحتفاظ السيارة بشكل و رونقها لأطول فترة ممكنة.
الملاحظة الثالثة .. اللي بيقول أسعار الأوروبي نار و أغلى أعتقد بيقول على السمع مش عن معرفة أو تجربة و انا ليا أكتر من تجربة في الموضوع ده لما كنت بدور في الفابيا سبورت قالولي قطع الغيار غالية و لما قارنتها باللانسر لقيتها أرخص .. دا غير إن مش معنى إن قطع الغيار غالية إنها غير موفرة .. ليا صديق كان عنده لانوس و شاهين كان فيه قطعة في الكهرباء على ما أتذكر في الشاهين سعرها 100 جنيه و في اللاتوس ب 250 جنيه لكن في الشاهين كل سنة كان بيغيرها تقريبا و اللانوس لغاية ما باعها (بعد 7 سنين) ما غيرها و لا مرة .. مش هاتكلم بقى عن قطع الغيار الاماني و لا غيره .. لكن مش دايما سعر قطعة الغيار الارخص أفضل لأن المهم كمان العمر الافتراضي لقطع الغيار .. دا كفاية رزالة المشوار للميكانيكي و العطلة.
الملاحظة الرابعة .. أسعار الأوروبي هاتبدأ في الانخفاض بداية من العام القادم -كمان 3 شهور- و سيستتبع ده إنخفاض مماثل في أسعار قطع الغيار في حين إن مفيش أخبار عن إنخفاض مماثل في أسعار الكوري أو الياباني.
الملاحظة الخامسة .. ليه في بعض الحاجات بنتكلم عن خبرة سابقة و في البعض الأخر بنرفض نفس الكلام .. يعني لما بنتكلم عن الأوروبي بنقول عليها غالي مقارنة بالياباني و الكوري و الكلام ده تقريبا من السبعينيات لكن لما بنقول الالماني أعتمادية أعلى و عمر إفتراضي أطول بنرفض الكلام ده؟
الملاحظة السادسة .. في العربيتين مش ممكن تلاقي كل حاجة كويسة إنت عاوزها و بالاسعار دي .. يعني الاعتمادية العالية و كفاءة التصنيع و الأمان و جودة الخامات و كثرة الكالماليات و الاتساع الداخلي و الشكل الخارجي و اسعار قطع الغيار و توافرها و خدمة ما بعد البيع كل دي لا يمكن تلاقيها في عربية واحدة و في الفئة دي.
اخر حاجة .. طريقة القياس هنا مش واحدة للجميع و مش ثابتة و يداخلها الهوى من كل واحد فينا و أنا أولكم إلا من رحم ربي .. فالافضل دائما إن اللي هايشتري يحط لنفسه معايير الاختيار و يدي لكل معيار منهم وزن أو درجة و يطبق المعايير دي على العربيتين و اللي تجيب درجة أعلى يبقى يتوكل على الله و ياخد القرار و يستخير ربنا و بإذن الله ربنا يبارك له فيها.
المفضلات