الموضوع: عايز اشتري جين 2 2010

المشاركة الأصلية كتبت بواسطة ali357

محدش يزعل من المناقشة المحترمة ابدا , العربية دى فعلا ماتور جبار جدا ومحترم وقوى بجد واداء العربية على الطريق رهيب فعلا , بس الناس بتزم فى التوكيل بتعها اوىىىىى يمكن اكتر من توكيل هيونداى , كمان وغير كدا خامات التقفيل اللى جوة العربية ضعيفة وبتبوظ بعد فترة وبتتمسح الكتابة اللى مثلا على الفتيس وهكذا ,وغير كدا موضوع سحب البنزين 95 وانها بتسحب بنزين بقوة , الكلام ده يا جماعة من ملاك العربية والله وكمان واحد زميلى فى الشغل معايا قالى كدا لانه معاه العربية , بس بيقولى العربية فى التسارع والقوة بسم الله ماشاء الله
فيارب باذن الله الموديلات الجديدة يكون الخامات اللى نازلة فيها تكون احسن من الاول وعلجو العيوب الطفيفة اللى كانت فيها
ويارب كمان يكون التوكيل كمان يحسن معاملته افضل من كدا فى خدمة ما بعد البيع
ومحدش يزعل من كلامى ده , وانا معجب بالعربية دى والله اوى وبسعرها لان فيها كماليات وامكانيات بالنسبة لسعرها يبقا هايل لان فى عربيات كتيرة فى هيونداى وكيا واليابانى اسعارها عالية اوى على ايه متعرفش
وتقبلو تحياتى

اهلا بحضـــرتــك .. ومنور قسم بروتون والبروتوناويه كلهــم

واكيد كتير بيشرفنا المناقشه المحترمه مع الناس المحترمه زى حضرتك ... والرد على تساؤلات الناس

---

هو انا بس هاصلح كام معلومه كده بعد اذنك :-

كمان وغير كدا خامات التقفيل اللى جوة العربية ضعيفة وبتبوظ بعد فترة وبتتمسح الكتابة اللى مثلا على الفتيس وهكذا

فعلا الكلام دا كان موجود فى موديلات سابقه ... قبل تحسين الخامات الداخليه فى 2009 .

---

وغير كدا موضوع سحب البنزين 95 وانها بتسحب بنزين بقوة

هو اولا جين2 بيتحطلها 92 ...

تانى حاجه الجين2 عربيه 1600 موتور رياضى , اداء رياضى ... وبالتالى طبيعى ان استهلاكها يكون عالى ...

بس اللى حاصل ان الجين2 لو ماحرقتش على الغيارات ... ومن غير تفحيط وحركات ... استهلاكها بيقارب استهلاك سيارت الــ 1300

وهترجم كلامى لتجربه عمليه ... لكبيــــر البروتوناويه : توت عنخ امون

المشاركة الأصلية كتبت بواسطة tutankhamoun

نوع السيارة : جين 2
موديل : 2007
قوة المحرك : 1600 سي سي
القوة الحصانية : 110 عند 6000 لفة / دقيقة
العزم الأقصى : 148 نيوتن / متر
السرعة القصوى : 190 كم / س
ناقل السرعات : ناقل يدوي ذو خمسة سرعات
------------------------------------------------------------
ظروف التجارب
السيارة بها شخصين و أحيانا ثلاثة و تصل الأوزان من 150 كجم إلى 250 كجم
الهواء و الرياح ...... محايدة ( لا ضدي و لا معايا )
مكان التجارب ......... الطريق الدائري في أغلب الأحوال
نوع الوقود بنزين 92 و 95 و أحيانا مخلوط
نوعية القيادة ...... هادئة جدا .......... أو عادية ....
سيتم التفريق لاحقا بين الاستهلاك في نوعية القيادة و نوع البنزين و الإستهلاك
الأداء الناتج عن السيارة في كلتا الحالتين ........ لاحقا في التقرير

----------------------------------------------
الإستهلاك العملي ..... التجربة الأولى
قيادة هادئة جدا جدا ( تسارع بطئ ..... تغيير سرعات عند 3 rpm و عدد 2 شخص في السيارة حمولة حوالي 150 أو 160 كجم
و السرعة لا تزيد عن 80 إلى 90 كم /س على الغيار الخامس
و نوعية البنزين 95 و مخلوط على بنزين 92
عدد اللترات هو 21 لتر بنزين 95 على 28 لتر بنزين 92
و الإستهلاك كان 367 كم مقابل 21 لتر بنزين مخلوط
-----------------------------------------------
التجربة التانية
قيادة هادئة جدا جدا
السرعة لا تزيد عن 80 إلى 90 كم / س على الغيار الخامس
عدد الأشخاص 3 و الوزن حوالي 250 كجم
و نوعية البنزين 95 مخلوط على 92 و نسبة البنزين 95 حوالي 10 لتر فقط
و الإستهلاك كان 345 كم ...... لكل 21 لتر بنزين مخلوط
-----------------------------------------------
التجربة الثالثة
قيادة هادئة جدا جدا و السرعة من 80 إلى 90 كم /س على الغيار الخامس
عدد الأشخاص 2 وزن حوالي 150 كجم
نوعية البنزين 92 فقط
الأستهلاك حوالي 340 كجم لكل 21 لتر بنزين 92
----------------------------------------------
الأداء الناتج ....
طبعا أداء عادي جدا و ليست فيه أي قوة بمعنى على الأداء ده مقدرش أشد مع حد أو أسابق حد
---------------------------------------------
التجربة الرابعة
قيادة عادية
تغيير عصا السرعات عند 4000 لفة / دقيقة ...... rpm
السرعة تتراوح ما بين 100 إلى 130 كم / س على الغيار الخامس و عداد rpm بيكون عند 3900 إلى 4000 لفة / دقيقة

نوع البنزين 92 فقط
الحمولة 150 كجم و هي حمولة شخصين
الأستهلاك بيكون 250 كم لكل 21 لتر

و الأداء الناتج عن تلك القيادة
اداء قوي تشعر بقوة السيارة على حساب استهلاك البنزين طبعا

قيادة داخل المدينة
بنزين 92 فقط
و قيادة عادية مملة
الأستهلاك بيكون من 200 إلى 250 كم لكل 21 لتر

و دي كانت أخر تجارب قمت بها بعد آخر موضوع فتحته عن تقييمي للجين 2 بعد فترة من الأستخدام

و الرقم 21 ده جاء بالصدفة ........ لأني لما مونت بنزين حطيت 21 لتر و كان ده الرقم اللي فول التانك
و تاني مرة لما العلامة وصلت تقريبا عند النصف ( قبل النصف قليلا ) فولت و برضه المسدس بتاع البنزين وقف و كان 21 لتر و تالت مرة نفس الرقم عند نفس موضع المؤشر

وبخصوص التوكيل هو فعلا خدماته عاديه (وليست سيئه) ... بس اللى مصبرنا انه بيتحسن ... وان شاء الله الايام القادمه هيكون فى اختلاف بإذن الله .

---

بجد منور ... وكتير سعداء بمشاركة حضرتك معانا

وكـل سنه وحضرتـــك طيب

تحيــــــــــــــــاتــــ ــــى

المشاركة الأصلية كتبت بواسطة ali357

بصراحة انا اللى سعيد بردك المحترم وذوقك ده
انا عارف موضوع الحرق ده فى اى عربية لازم يسحب بنزين وحتى وانا معايا البولو 99 وماتورها 1000 سى سى بيزيد معدل الاستهلاك بتاع البنزين وقت القرص والجرى والسرعة وخصوصا لما بتزيد على الار بى ام وبتحرق على الغيارات

بس فى حاجة كنت عاوز اتاكد من حضرتك منها وهى
هل لو حطيت بنزين 92 فى الجين 2 فى لمبة بتنور عشان العربية مصممة على ان يتحط فيها 95 وبنضطر نروح التوكيل عشان يحلو الموضوع ده ولا الموضوع ده مبقاش موجود فى الموديلات الجديدة

وبعدين بردوا انا بعيب على التوكيل وده من الموضوعات اللى قرتها هنا فى قسم بروتون , لقيت الناس بتقول انها مثلا كانت بتشتكى من حاجة وتروح التوكيل تطلع بالعربية من عندهم بعيب تانى , او نفس العيب يفضل موجود , وشكاوى كتيرة اوى مش فى المعاملة وبس ولكن فى التصليح والصيانة
وصدقنى اكتر حاجة مخليانى مقلق من شراء العربية هو التوكيل وكان الخامات الضعيفة بس انت طمنتنى انها اتحسنت

فى سوال اخير برضوا معلش وهو
لو قدام جيت 2 2010 وبيرسونا 2010 تجيب اى واحدة بس بعيد عن الشكل لان انا عارف ان الجين 2 شكلها رائع خالينا نتكلم من الناحية العملية

ومرة تانية احب اشكرك على ردك الرائع اللى بيدل على انك شخص واعى وهادى وحكيم
وانت اللى منور قسم البروتون مع عائلتك البروتونية وربنا يوفقك

ربنا يكرمك ... حضرتك اللى شخصيه محترمه وذوق

----

انا من ساعة ماجبيت العربيه ... ومش بحط غير 92 ... ومره حطيت 90

ومافيش لمبه عندى نورت .

انا فعلا كنت بسمع عن المشكله دى زمان ... شكلوهم ضبطوها بعد كده الموضوع دا .

----

و فعلا التوكيل .. ممكن اكتر حاجه تخلى الواحد يفكر قبل مايشترى البروتون ... لانه يعتبر اكبر عيب موجود فى العربيه ....

بس حاليا الواحد بقى مطمن ... لانى شفت ان فعلا فى تطورات داخليه بتحصل ... ولما حاجات معينه تخلص ... هتنتهى معاه المشاكل دى

----

بعض المشاكل :-

مثال 1 :

عميل بروح ... ويقولهم على كام مشكله ... يجيى يستلم العربيه يلاقى نفس العيوب ومافيش حاجه اتحلت ... او خربوا شىء ثانى فى السياره ...

الحل اللى شاغلين فيه دلوقتى ...


مركز صيانه كبيــر فى القريه الزكيه .. شاغلين فيه دلوقتى والافتتاح قريبا ... ودا هيحل مشاكل كتيره جدا جدا ... وهيقلل الضغط على فرع ابو رواش ... وبالتالى المشاكل دى هتختفى ...

لان المشاكل دى ناتجه عن زيادة الضغط عالفرع .. مقارنه بحجمه وامكانياته

----

مثال 2 :

قطع الغيار وعدم توافرها باستمرار


على كلام م.امــــر .... حاليا المشكله دى بتتحل ... بانهم بدوا يعملوا استوك قطع غيار ... عشان يوفروا طلبات العملاء

وفى حاجه ان شاء الله ... لو كملت هتحل مشكله قطع الغيار فى مصر نهائيا .

--------

دول العيبين اللى فى التوكيل ... ودى الحلول اللى متوقع بتنفيذها ... تنتهى معاها المشاكل

---------

* ملحوظه : انا شخصيا وناس كتيره اعرفهم لم يتعرضوا لمثل هذه المشاكل مع التوكيل ... يعنى مش كل الناس هتلاقيهم قرفانين من التوكيل

والامثله اللى استخدمتها ... تعتبر اقصى حاجه ممكن تقرفك من التوكيل

----------

بخصوص جين2 , بيرسونا :-

حسب احتياجاتك :-

عاوز شنطه : بيرسونا ----- عاوز حاجه ليفت باك : جين2

هو دا الفرق الجوهرى اللى بينهم

لا صحيح ... وفى حاجه كمان ... بستغلثها جدا فى البيرسونا .. وهى ...

انها من جوا الفبر - اسود * رمادى - ... واللون الفاتح مبين شويه ان الخامات رديئه ..

بس كده

----------

وانا تحت امرك فى اى استفســــــــــار

تحيــــــــــــــــاتــــ ـــــى