الموضوع: كل شيء عن التجنيد من الالف الي الياء

المشاركة الأصلية كتبت بواسطة terrible_darsh

طب انا يا جماعة مليش جيش اساســــــــــــــا .

هل فى ورق بقدمه او بعمله او اى حاجة فى الحوار ده لانى معرفش اى حاجة عنه :) :) .

ملكش جيش يعني حاجة من المقتبس الآتي؟:

حالات الإعفاء النهائي من أداء الخدمة العسكرية:

1. من لا تتوافر فيهم اللياقة الطبية لتلك الخدمة.

2. الأبن الوحيد للأب المتوفي أو المتجاوز 60 سنة أو الغير ثادر نهائيا علي الكسب.

3. أكبر المستحقين للتجنيد من أخوة أو أبناء المواطن الذي يستشهد أو يصاب بإصابة تعجزه عن الكسب نهائيا بسبب العمليات الحربية.

4. أكبر المستحقين للتجنيد من أخوة أو أبناء الضابط أو المجند أو المتطوع الذي توفي بسبب الخدمة أو الذي أصيب بمرض أو عاهة بسبب الخدمة وكان من شأنها أن تجعله عجزا نهائيا عن الكسب.

بتتوجه لمنطقة التجنيد التابع لها فور الانتهاء من الدراسة وظهور النتيجة لعمل إجراءات الإعفاء

المشاركة الأصلية كتبت بواسطة terrible_darsh

شكرا , و لكن مفيش اى اوراق بقدمها للجامعة يعنى ؟؟

انا معلوماتي إن الجامعة بتعمل تأجيل تلقائي لغاية ما تخلص دراسة
وبيطلب منك أول ما تخلص وتظهر نتيجتك حتى بإفادة النجاح إنك تروح على منطقة التجنيد تبتدي في الاجراءات.
معرفش النظام ده زي ماهو ولا اتغير وفيه نظام جديد
نصيحتي إنك متستناش ومتعتمدش على إفتاءات شئون الطلبة في الكلية
روح دلوقتي على منطقة التجنيد واعرض عليهم ظروفك وشوف كل اللي مطلوب
التجنيد من الحاجات اللي لا تحتمل المخاطرة

المشاركة الأصلية كتبت بواسطة terrible_darsh

الجامعة بتعمل فعلا تاجيل تلقائي مع نفسها .

و لكن معلش بس ممكن اعرف ايه المخاطر دى ؟ اصل انا مليش مزاج لمشوار التجنيد ده خالص .

اى حاجة فيها هيئة حكومية تولع , انا مدخلتش حربية بسب كده .

فمعلش ممكن تقولى هل فى خطورة فعلا و لا لا ؟ لان انا اصلا مليش جيش فاكيد مليش اهتمام خالص .

المخاطرة هي إنك لو خلصت كلية ومعملتش أو اتأخرت في إجراءات الإعفاء النهائي بتاعك بتعتبر متهرب بالرغم من استحقاقك للإعفاء
ويطبق عليك كل عقوبات التهرب المعروفة
انا أعرف زميل راح متأخر وبالرغم من إن دفعته كلها أخدت تأجيل انضم للدفعة اللي بعدها وقضى فترة التجنيد وده تقريباً اللي بيسموه "فقد دفعة"
هو كله وجع دماغ لا داعي له ممكن توفره على نفسك إنك تلتزم بمواعيد وإجراءات عمل الإعفاء ودي اللي زي ما قلت لك مش هاتكلفك غير مشوار لمنطقة التجنيد اللي انت تابع لها.