انا عندي شيفورليه سبرنت 91 وهي نفس السويفت بلضبط
عرض للطباعة
انا عندي شيفورليه سبرنت 91 وهي نفس السويفت بلضبط
لا طبعا السوفت احسن من الفليشيا كتير لعدة اسباب
1ـ قطع غيار ارخص فيما يخص الميكانيكا والماكينة مع تقارب اسعارهم في العفشة
2 ـ صالون اوسع كثير
3ـ نعومة واداء افضل علي الطريق
4ـ سهولة البيع نسبيا عن الفليشيا
دة راي الشخصي وعن تجربة وفي بعض الناس مبتعجبهمش السو فت وتعجبهم الفليشيا بس الفليشيا تنفع شباب مش متزوج لكن مش عائلية زي السوفت
بص يا باشا انت هتروح لكهربائي بيفهم وركز اوي علي موضوع بيفهم دة مش يكون صنيعي كويس وخلاص لازم يكون عندة مخ بيفهم يعني
وتقولة شوف كتاوت الشحن عندي ولو قالك هنجرب واحد مستعمل من عندي اوعي تعمل كدة لتضرب البطارية اشتري واحد جديد هتلاقية بحوالي 35 جنية وجرب البطارية لو لسة بتهرب شحن يبقي رجعها الضمان البطارية دي بايظة وفي طريقة اوفر من الكلام دة انك تاخد بطارية حد من صحابك يكون مشية بالعربية زيك وفي نفس المسافات وتعطية بطاريتك وتجرب يومين تشوف البطارية عندة بتعمل كدة ولا اية وكدة هتعرف عيب في العربية ولا في البطارية
ا
بص يا باشا لو العربية دي اساسيتها سليمة يبقي سعرها كويس حتي لو هتصرف عليها الف او الفين جنية يبقي كويس بس اهم حاجة اساسيات العربية يعني تجيب ماكنيكي يبص علي الماكينة كويس ويجربها ويقولك حالتها كام % وتاني حاجة السمكرة ومهم جدا تشوف البارومة وخصوصا في السقف وفي جوانب الشنطة وفي العتاب وطبعا عفشة العربية الاساسيات والباقي بقي الفرش دة ب1000 جنية تعمل فرش جلد محترم والكاوتش وكدة ممكن تعدية عشان السعر كويس
عربيتي لونها اخضر زيتي ميتاليك ومحتاجة رش
ياترى ايه احسن انواع البوية؟؟
واسعارها ايه ؟؟
ومنين ممكن نشتريها في الدلتا سواء المنصورة - المحلة - طنطا؟؟
ولو فيه ورشه حلوة في سمنود أو المحلة للرش؟؟
هل يمكن تركيب مساعدين مونرو للسويفت و ما هى افضل مساعدين ؟
ايه يا رجاله
انتم رحتوا فين
كل سنة وانتم طيبين
السلام عليكم
يا جماعة أنا بفكر اشترى سوزوكى سويفت بس كنت عايز أعرف هل العربية دى عالية عن الأرض ولا منخضة .. يعنى مثلا مقارنة بالاكسنت والاكسل عملة ايه
وايه نصيحتكم لى قبل ما اشتريها
وشكرا
بص ياباشا مسألة الارتفاع دي في المقارنة بين التلاته متشغلش بالك بيها لأن التلاتة باحس انهم واحد وان كانت الاكسنت اقل في الارتفاع شوية..والسوزوكي عفشتها ناعمة فبتهبط حبيتن لو محملة وموضوع الارتفاع ده ممكن حله بسهولة في اي عربية في الدنيا بتركيب جلدة أو بطاحة زي مابيقولوا عليها عالعجل الوراني فترفع العربية شويتين..أنا معايا السويفت 94 وهي مش محملة ورا مش بتحف في اي مطب مع اني مش معليها بس لو حملت ورا بابدأ أسمع حف في الشكمان واعتقد ده مع معظم العربيات الجديدة
بس مش عارف ليه باحس برضه ان الصالون في الاكسيل احسن شويتين من حيث العرض والوسع..بس هاقول لك على نقطة برضه لو عاوز تجيب هيونداي يبقى تجيبها 1500 سواء اكسيل او اكسنت بينما لو 1300 يبقوا زي بعض مع مراعاة موضوع الصالون ومراعاة ان السوزوكي موتورها ياباني واكثر اقتصادية في الوقود يعني انا بامون بنزين 80 الصفيحة بتقعد 290 كيلو متنوعة مابين قيادة داخل المدينة وخارجها
من حيث قطع الغيار فكلهم نفس الشئ تقريبا ممكن تلاقي حاجة رخيصة في السوزوكي وممكن حاجة رخيصة فالهيونداي بس عامة في المتوسطات على ما اعتقد ان الاكسنت اغلى من الاكسيل اغلى من السويفت...وكل حاجة السويفت متوفرة
فيه ملاحظة ان السويفت ماكينتها سبائك المونيوم فمش بتتخرط عند معظم الصنايعية فلو لا قدر الله حصل اهمال او حاجة بتغير الماكينة بس هي مش غالية قوي
أنا من جوايا لوالعربيات اتساوت في الحالة العامة من حيث الجودة مش عارف هيبقى الاختيار صعب بس باميل شوية للاكسيل
اي عربية عشان تاخدها لازم تكون حالتها ممتااااااااااااااااازة عشان متقرفكش ومتحطش في دماغك موضوع هابقى اعملها دي...أو موضوع السعر...انا اشتريت السويفت غاليه حبتين بس ريحت دماغي ولله الحمد
أرجو أن أكون قد أفدتك بمعلومة
ألف ألف شكر على الرد .. بصراح أنا بقالى فترة كبيرة محتار وكان نفسى حد يفيدنى
أنا بصراحة ميال أكتر للأكسنت
بس ايه موضوع الجلدة أو البطاحة .. يا ريت التوضيح أكتر ..
وهل الموضوع ده ممكن يأثر بدرجة كبيرة على ثبات العربية أو يخلى شكلها مش كويس
وايه أقصى ارتفاع ممكن تزويده بالطرقة دى علشان نبقى فى الامان
وشكرا
بص يابرنس
البطاحة او الكاوتشة دي هتلاقيها على راس المساعد من فوق ودي اللي بين المساعد والشاسيه وبتبقى مغطيه السوسته برضه وهي تقدر تقول كده فيها شبه من القمع المقلوب المساعد في النص والسوسته او الياي على أطرافه والشاسيه كابس عليه من فوق.... وبعض العفشجية لتعلية السيارة بدل الواحدة بيركبوا اتنين أو بيأيفوا واحده تخينة شويتين بحيث تركب في المكان وبالطريقة دي ممكن تعلى العربية حوالي من 2 الى 4 سم...بس الطريقة دي ممكن تتعمل للعجل الوراني بس وطبعا يستحسن انك ما تبالغش في تزويد الارتفاع...أما من الجهة الامامية فلا ينصح باللعب في ارتفاعها على الاطلاااااااااااااااااااا اق بسبب وجود المحرك فيه واي تلاعب في الارتفاع سيؤدي لتغيير مكان مراكز الثقل والدفع وبالتالي يخل من اتزان السيارة بشكل كبير..وأي استفسار وآسف على التأخير في الرد
انا كنت بسمع صوت صفاره مستمره كدا
لكن مع الجرى السريع مش بسمعها
العفشجى قالى سوست خزنه تيل الفرامل
جبت طقم وركبتو كلو تمام
سعر الطقم(عباره عن 8 سوست) بــ 10 جندى (والله غالى وحرام) بس جابو نتيجه الصراحه
سلام عليكم
انا عايز اشارك معاكوا انا معايه سويفت 93 ومستعد لاى استشاره فيها ان شاء الله
أخيرا سأنضم للمنتدي وللرابطة بصغيرتي سويفت 93 ياباني
السلام عليكم
يؤسفنى انى ابلغكم انى بعت عربيتى السويفت الاسبوع اللى فات
دى كانت تانى سويفت أجيبها...ان شاء الله هحاول أغير بأه المره دى
هى عربية جميلة بصراحة وأنا مفتقدها جدا بس كانت محتاجة أغير فيها شويت حاجات وأنا مكنتش فاضى فقلت أغير بأه.
ربنا يوفق الجميع لما فيه الخير
السلام عليكم
هى كانت موديل 1997 فابريكة دواخل بالكامل بس فى خبطة فى الكورنر الشمال ورا و معموله على البارد + السقف من الحارج فابريكة
اللون: رصاصى ميتالك
الكماليات: تكييف (مش أصلى) + سنترلوك
حالة الموتور : ممتازة (متلعبش فيه) حالة العفشة: جيدة جدا حالة الفرش: الأصلى ممتاز
محتاجة: كمبروسر تكييف + رش السقف (باهت من الشمس) + رش ديول الرفارف عشان كان فيها بارومة و كمت لسه عاملها
سعر البيع: 30500
كده كويس ولا ايه؟
محتاج مساعدتكم ضرورى جدا
انا لسة شارى عربية سويفت 96 من اسبوع وامبارح وانا بجربها علىالطريق وكنت عاوز اشوف سحبها لاقيت ان الماكنة صوتها عالى جدا وبتزعق جامد وباسمع كمان صون نحر جدا او صوت عالى مكتوم زى مايكون مركب شوكمان ديفيل العربية كانت بتسحب معايا بص صوتها العالى كان قارفنى جدا
وهل طبيعى انة لازم اكبس على دواسة البنزين جامد على شان العربية تسحب اكتر والا المفروض انى طالما دايس انها تجمع لوحدها ارجو الافادة ...........شكرا
وانا انضم ليكم
معايا سويفت 97
يا شباب ارجو الافادة
بسمع صوت صفارة وانا سايق علي الطريق زي ما يكون في عصافير تحت العربية كمان ظهرت لي باروما في جنب الشنطة من ورا وفي السقف ايه الحل وهل دا هيأثر جامد علي سعرها لو فكرت ابيع
بالنسبة للصفارة دى ممكن تكون تيل فرامل .. روح لأى حد بتاع عفشة و هو هيقولك ان كان عاوز يتنضف ولا يتغير .. أو ممكن يكون التيل أصلا نوعه وحش.
البارومة من المشاكل المعروفة فى السويفت .. خصوصا فى السقف .. لو ناوى تخلى العربية معاك اعملهم .. لو هتبيع بيعها كدة و متوجعش دماغك فى سمكرة و دوكو و أكيد هينزل من تمن العربية طبعا.
أحب أنضم لكم بالسويفت مو95 بعد عودتى لها منذ بعتها من خمس سنوات
السلام عليكم
يا جماعة ايه مميزات وعيوب السوزوكى سويفت من وجهة نظركم
ويا ترى العربية دى كربراتير ولا انجيكشن
انا بتكلم بالتحديد على موديل 1995
وشكرا
انا انضم للرابطه ب سويفت 96
كنت عايز اسال على الجنوط هل فعلا بتثبت العربيه ولا شكل وخلاص وايه المقاس اللى ينفع معاها ؟؟؟
العربيه كربراتير
المزايا
عربيه سريعه وصغيره وشكلها شبابى
عرض العربيه قليل وده بيخليك تدخل دخلات عربيات كتير ما تعرفش تدخلها
اقتصاديه جدا فى البنزين
عيوبها سهله واى حد بيفهم فيها
قطع غيارها رخيصه
العيوب
العربيه ضعيفه شويه بس دى بتظهر لما يكون اكتر من اتنين فى العربيه
التكييف مش حلو وبيضعف العربيه
خفيفه على الطريق خصوصا بعد ال 100 كم
بس
وانا يسعدنى الانضمام للرابطة
انا معايا سويفت 96 حمراء:b4_048:
يسعدنى الانضمام للرابطه معايا سويفت حمراء مو 94 انا د نيبو
جميل جدا اسماحولى اشترك معاكو بعربيتى السويفت موديل 95 وجايبها من 15 سنة على الزيرو
السلام عليكم اخواني الكرام
ممكن اعرف اخر قرار..
اجيب سويف ولا اكسيل عشان احسم الموضوع بالنسبالي
وشكرا لحضراتكم
انا عاوز اشتري سويفت بس تكون ياباني و مكيفه وحالتها ممتازه
ياريت ياجماعه اللي قدامه واحده يدلني عليها
انا جاهز للشراء بشرط الحاله
تليفوني 0124549247
د/محمد
انا رايى سويفت
اخي الكريم
ايه رأيك نعمل رابطه للمحتارين زينا..................
بس انا تقريبا استقريت علي الاكسيل رغم عشقي للسويفت
انا دلوقتي في مرحلة بحث عن اكسيل .. يعني بعمل تحريات عنها من حيث الموديل الافضل .. ورنج السعر ..
يا ريت لو عندك معلومات تفيدني بيها .. وشكرا
عندي سويف 93 والمشلكلة لما السرعة بتزيد اسمع صوت كانه في عربية ورايا..ايه المشكلة والحل
افيدوني
يشرفني نضم للربطه انا معايا سويفت 95 ياباني
و عندي معلومات عن العربيه
و يشرفني أرد علي اي استفسار لأي عضو في الرابطه