السلام عليكم
أنا بحكم ان كان عندى سويفت و بعتها و جبت بعدها سويفت برضة أحب انى أقول على بعض العيوب المشتركة فى العربيتين...مبدئيا أنا لما جبت العربية الأولانية كنت مقتنع جدا بالسويفت..حجمها كويس و شكلعا حلو و يابانى و استهلاكها فى البنزين ممتاز بس العربية الأولانية (موديل 1996 حمراء) كانت متبهدلة شوية فبعتها وقلت أجيب واحدة نضيفة عشان ملاقيش نفس العيوب اللى فى الأولى وفعلا اشتريت الثانية اللى معايا لحد دلوقتى (موديل 1997 رصاصى) من واحد صاحبى و العربية كانت نضيفة جدا ما شاء الله لدرجة انى كنت لما أمشى بالعربية من قدام سمكرى ولا سروجى يشاوروا عليها ويقولوا العربية دى جديدة.
المهم أنا هقول بعض العيوب المشتركة فى العربيتين:
- العفشة طبعا..ضعيفة و بتبوظ بسرعة..خصوصا الكبالن و الأسكترا ..لدرجة انك لو مشيت بعربيتك فى أى حتة فيها صنايعية (وكالة البلح أو التوفيقية مثلا) تلاقى واحد طلع لك يقول لك كبالن يا بيه؟
- الفرش جودتة سيئة .. أنا العربيتين اللى معايا كانوا مصرى ..الفرش اليابانى أحسن كتير .. المصرى محتاج عناية جامدة ولو جت مية على فرش الأبواب بيقوس و يطلع من مكانة ويتهرى.
- الأبواب بتخبط فى المطبات و مش عارف صوت الخبط دة من مكن الزجاج ولا من حاجة جوة ولا من الأبواب نفسها.
- مفتاح النور بيعلق لما تنور النور الواطى وعشان تعدلة لازم تنور العالى كذا مرة عشان الواطى يلقط تانى...ودة حصل معايا فى العربيتين.
- الزجاج الأمامى برضة جودتة مش كويسة .. بيزغللك لما تكون عربية جاية فى وشك .. أنا غيرتة فى العربية القديمة بس ندمت عشان اللى ركب الجديد ملزقهوش كويس فبيدخل هوا .. أنا عندى بيزغلل برضه فى العربية دى بس هسيبه.
- أنا العربيتين كاوتشهم عريض .. فمحستش بمشاكل فى الثبات زى ما الناس بتقول.
- حصل عندى مشكلة ان الحرارة عليت فى العربيتين .. فى الأولانية كانت مشكلة صباع الحرارة و غيرتة .. فى الثانية كانت مشكلة كتاوت المروحة و غيرتها.
دى العيوب اللى أنا شفتها مشتركة فى العربيتين بس عموما هى ماشية كويس الحمد الله فى العربيتين أنا ملمستش الموتور و الحمد لله شغال كويس.