رابطة مالكي السويفت

**exact** · 05-12-2010 12:18 AM

المشاركة الأصلية كتبت بواسطة semsem_inside

السلام عليكم

أولا: مبروك علينا عودة المنتدى

ثانيا: أنا عندى الفواصل الموجودة بين الكبوت والرفرف واسع شوية (ازيد من 0.5 سم) - يعنى بشوف منها بوضوح المسامير اللى مربطة الرفرف من الداخل أنا أول مرة ألاحظه من ساعة ما اشتريت العربية
يا ترى ده بيكون سببه ايه وهل يمكن تضييق الفواصل دى
أنا بصراحة قلقت لما سمعت جماعة بيتكلموا ان ممكن المطبات الجامدة تفتح شاسيه العربية .. فهل ده له علاقة بالموضوع خاصة انى خدت كام مطب جامدين

وشكرا

أنا لا اعتقد ياباشا ان ده له علاقة بحوار الشاسيه ده بسبب بسيط ...ان لو كان ده حصل على ما اعتقد ان اولى انك تلاقي العربية فيها حدفة جامدة لان العجل هيتفسخ بسبب عوجة الشاسيه
ولو كنت متابع قبل عطل المنتدى كنت قلت لك راجع الصدادات الكاوتش بتاع الكبوت
ولو انت مقلق من موضوع الفتح بتاع الشاسيه ده انا كنت شفت ناس قبل كده بتركب شدادات ما بين الركب اللي في حوض الموتور بين رؤوس المساعدين بس معنديش فكرة بتيجي منين او بكام
وياريت تفيدني لو عرفت اي معلومة
ونصيحة متركزش قوي كده عشان السويفت فيها حبة حاجات غريبة شويتين

**dr_dina77** · 05-12-2010 01:10 AM

السلام عليكم
مبروك عوده المنتدى
عاوزه اسال ببساطه عن حاجه كنت دايما بسمع عنها

دايما كنت اسمع ان العربيات المستعمله بتجنن صاحبها وبتكرهه فى العربيات خالص ههههه

عربيتى قربت تعمل فيا كده

من اسبوعين البطاريه عملتها فيا وطبعا غيرتها
وكان فيها تزييقه قلت اشوف العفشجى هيقول ايه
ودتها لواحد قديم وبيقول شاطر جدا قالى محتاجه جوز مقصات وكبالن
قلت ااجلهم شويه شهر ولا اتنين

اول امبارح بقى البنزين كان اقل من النص بشويه المهم العربيه وانا راجعه عند البيت وبدير من اخر الشارع بطلت
ادور مفيش ..ابدا مش راضيه بس صوت المارش عادى والبطاريه كويسه
المهم جه الاستاذ الميكانيكى شافها قال محتاجه رداخ جديد وكمان فلتر بنزين لان ملقاش فيها فلتر بنزين اساسا

اه صحيح نسيت كمان اقول ان الشكمانطلع مخروم وكمان الكاوتش

بصراحه مش قادره اقول احساسى

بفكر بجديه ابيع العربيه بس صعبان عليا بعد ما اتعلمت السواقه ابعها

هل كل العربيات المستعمله كده يعنى ولا ايه النظام ده

مع ان كل الى شافها قال حالتها ممتازه طيب ليه وجع القلب ده وكل شويه تبطل منى فى حته شكل والناس يزقوها

جالى اكتاب بصراحه

**th_it2003** · 05-12-2010 05:12 PM

المشاركة الأصلية كتبت بواسطة exact

لو غيرت فردة واحدة بس على سبيل المثال اللي عالشمال بس واليمين قديمة هتلاقي طبعا ان الجديد تماسكه مع الارض اجمد فهتلاقيك لو فرملت جامد العجلة الشمال هتقف قبل اليمين هتخلي فيه حدفه جامدة في الفرامل ناحية الشمال وممكن تعمل مشكلة لو الارض عليها ميه او مزحلقة فعشان كده لازم يكون الكاوتش اللي عالمحور الواحد من نفس النوع والنقشة والمقاس والعمر

سيادتك ممكن مؤقتا تخللي الفردة البايظة دي استبن وتنزل الاستبن في مكانها لحد اما يبقى عندك فردتين بايظين...بعد كده تجيب جوز كاوتش جديد (واقترح عليك بريدجيستون بي 250 بالمقاس اللي يعجبك وان كان الانسب 175-70-13 انا كنت جايبه من عند اولاد عمام بعد مزلقان السكة الحديد اللي عالشون من سنتين وجبت السنه دي نفس النوع والمقاس للجوز التانيين من اعجابي بيه ومتنساش تاخد منه بلوف جديدة)...وتركب دايما الجديد قدام ...لأن الجر من قدام و مركز تقل العربية قدام...وبالتالي حمل الفرامل الاكبر قدام...وان شاء الله اما تيجي تغير بعد كده تعمل نفس الحكاية وترجع اللي قدام لورا وهكذا

ألف شكر على الافادة

**ultrasoft** · 05-12-2010 07:05 PM

الحمد لله على سلامة المنتدى ... وبجد وحشنا كتير
استفسار يا رجالة .. العربية احيانا بتفصل فى الملفات واليوترن .. على الرغم من انى ببقى فاصل الفتيس كالعادة .. يا ترى دى ممكن تكون مشكلة ايه ؟؟ .. والف شكر

**exact** · 06-12-2010 12:34 AM

السلام عليكم
مبروك عوده المنتدى
عاوزه اسال ببساطه عن حاجه كنت دايما بسمع عنها

دايما كنت اسمع ان العربيات المستعمله بتجنن صاحبها وبتكرهه فى العربيات خالص ههههه

ساعات كتير والله الواحد بيحس ان فيه حالة نحس راكباه وان كل مشوار بمشكلة...بس ساعات العكس...بتعمل مشاوير صعبة جدا بال 400 كيلو وان شوت بدون استراحة

عربيتى قربت تعمل فيا كده

ليه كده؟؟ دانتي لسه مبقاش لكي شهرين تلاتة...وبعدين انا فاكر كنت كاتب لك لستة بالحاجات المطلوب نعملها واحدة واحدة وشكلك طنشتيها

من اسبوعين البطاريه عملتها فيا وطبعا غيرتها
وكان فيها تزييقه قلت اشوف العفشجى هيقول ايه
ودتها لواحد قديم وبيقول شاطر جدا قالى محتاجه جوز مقصات وكبالن
قلت ااجلهم شويه شهر ولا اتنين

خير البطاريــــــــة قطعت؟؟
واللي اعرفه ان الكبالن بتطقطق مش بتزيق
والمقصات اعرف انها يا سليمة يا مكسورة فهل هي اتكسرت؟
انا كانت عندي قاعدة مقص ورا اتكسرت والسمكري لحمها ب 10 جنيه
واعتقد ان التزييق ممكن من المساعدين
اذا كنتي فالمحلة روحي لميمي العفشجي او مركز ابو سعدة فمنطقة الزراعة
او ممكن تجربي تغسلي العربية بالسولار من تحت فالبنزينة وخللي الراجل فالبنزينة يبص على كاوتشات الكبالن ويضوف اذا كانت المساعدين جابوا زيت وللا لأ

اول امبارح بقى البنزين كان اقل من النص بشويه المهم العربيه وانا راجعه عند البيت وبدير من اخر الشارع بطلت
ادور مفيش ..ابدا مش راضيه بس صوت المارش عادى والبطاريه كويسه
المهم جه الاستاذ الميكانيكى شافها قال محتاجه رداخ جديد وكمان فلتر بنزين لان ملقاش فيها فلتر بنزين اساسا

هل العربية شغالة بنظام الرداخ(طلمبة البنزين الميكانيكية الملزوقه فالموتور)...لو كان النظام كده والرداخ ده باظ يبقى احسن لك اشتري طلمبة بنزين كهربائية ودي بتركب جوة التانك وفعالة جدا اكتر من الرداخ العقيم
فلتر البنزين فالسويفت له مكان من اتنين...يا اما جوه حوض الموتور..وده مش عندي ولله الحمد عشان مشاكلة كتير جدا وده ب 5 جنيه...والمكان التاني تحت العربية قدام العجلة الشمال ورا(على آخر العتب من جوه) وده احسن يتغير والعربية مرفوعة وده تايواني ب 10 جنيه

اه صحيح نسيت كمان اقول ان الشكمان طلع مخروم وكمان الكاوتش

يتلحمـــــــوا عادي جدا وبتحصل في احسن العربيات

بصراحه مش قادره اقول احساسى

وحدي الله واركني العربية يوم او اتنين كده وابقى سمي قبل اما تركبي

بفكر بجديه ابيع العربيه بس صعبان عليا بعد ما اتعلمت السواقه ابعها

هل كل العربيات المستعمله كده يعنى ولا ايه النظام ده

السؤال الاهم...اما تبيعيها هتجيبي ايه تاني بدالها وللا هترجعي للمواصلات
وعلى فكرة الزيرو برضه هتبسطك سنتين ولازم هتعملي صيانات

مع ان كل الى شافها قال حالتها ممتازه طيب ليه وجع القلب ده وكل شويه تبطل منى فى حته شكل والناس يزقوها

جالى اكتئاب بصراحه

قولي الله المستــــــــــــــــعان

**exact** · 06-12-2010 12:36 AM

المشاركة الأصلية كتبت بواسطة ultrasoft

الحمد لله على سلامة المنتدى ... وبجد وحشنا كتير
استفسار يا رجالة .. العربية احيانا بتفصل فى الملفات واليوترن .. على الرغم من انى ببقى فاصل الفتيس كالعادة .. يا ترى دى ممكن تكون مشكلة ايه ؟؟ .. والف شكر

لو عندك ار بي ام العربية بتقرا عند كام تقريبا؟؟
وهل يا ترى انت عملت صيانة قريب؟؟او حد لعب فالكربيراتير؟؟

**exact** · 06-12-2010 12:41 AM

المشاركة الأصلية كتبت بواسطة exact

أنا عملت حادثة يارجالة

فيرنا كبستني من ورا على اكسيل كانت قدامي

والحمد لله الذي انجانا

والحمد لله العربية ممكن تتعمل عالبارد
الله يحرق الغباوة عاللي بيتغابوا
ربطة الحزام مهمة حتى وانت في وسط الزحمة

كلاكيت تاني مرة في قليوب

تم بتر المراية اليمين اللي انتو شايفينها

بواسطة سواق نص نقل غشيم

وطبعا وقعت تحت العجل

مش عارف قليوب مش حباني ليه

سترك يا رب

**dr_dina77** · 06-12-2010 08:48 AM

متشكره جدا دكتور مصطفى على رد حضرتك

فعلا الكبالن بتطقطق مش بتزيق سورى ههههههه هو فعلا العفشجى لما جربها هو الى قالى
ولما رفع العربيه برضه قالى على المقصات بس دول حاجه مش ملحه دلوقتى على ما اعتقد
هو ربط العفشه وزيت المقصات والتزييق خف كتير

بالنسبه للرداخ اشتريته امبارح من المنصوره يابانى والكهربائى ركبه وقال كويس هو رداخ خارجى
بس للاسف قريت كلام حضرتك ناو لانه ركبلى فعلا فلتر جوه المتور الى ب5 ج

يلا خير ان شاء الله
الحمد لله لما رجعت سوقتها تانى رجعت فى كلامى وصرفت نظر عن البيع هههههه

الحاجه بس الى قلقانى شويه كل ما اقول لحد عاوزه اغير سير الكاتين يقولى اصبرى شويه ملدلم انتى مش بتسافرى بيها ومشاويرك قليله ربنا يستر بقى

**dr_dina77** · 06-12-2010 09:57 AM

معلش كمان حاجه بعد إذن حضرتك
حكايه الشكمان دى لو مشيت بيها شويه كده وحافظت على المشى بحرص لانى مش فاضيه خالص دلوقتى اعمله فيها مشكله ؟

**abdousaleem** · 07-12-2010 06:23 PM

كلنا سويفت
..
..
..
1994

الموضوع: رابطة مالكي السويفت

LinkBack

أدوات الموضوع

عرض

-

-

-

-

المواضيع المتشابهه

رابطة مالكي البيجو 305

رابطة مالكي ال f0

فين رابطة مالكي فورد

استفسار من مالكي السويفت

رابطة مالكي السريون

الكلمات الدلالية لهذا الموضوع

المفضلات

المفضلات

ضوابط المشاركة