عايز اشترى سيارة فى حدود لا تزيد عن 25000 ... مبتدأ جدا وعايز رأيكم

**husseinoo** · 20-11-2009 01:14 AM

المشاركة الأصلية كتبت بواسطة islambana

ازاي حضرتك يا استاذ حسين
فتيس البيجو غياراته زي غيارات ال 128 بالظبط لكن الفرق ان فتيس البيجو في حركته اسهل بكتييييييييييييير وانعم
وتحس الفتيس وهو طالع من غيار لغيار تاني مظبوط مش بيتحرك في كل حته وبيلع لوحه زي ال 128 واللي ماتعرفوش كمان ان ال 504 انعم واسهل بكتير جدا من ال128 في السواقه حتي دريكسيونها لو مظبوط كأنه فيه باور
بس مشكلتها عن ال 128 الحجم وده هتتعود عليه مع الزمن

ازيك يا باشمهندس اسلام
ايه اخبارك
انا عارف انك مشغول ... وانك محتاج كل دقيقة عشان الدراسة ... والله يكون فى عونك

هاقول لك حاجة تضحك جامد ههههههههه
كان فيه واحد صاحبى مهندس

كان نازل بعد الثانوية من ابو ظبى عشان يقدم فى هندسة
المهم انت عارف الجو هناك محدود
والراجل نزل مصر بعد حبسة جامدة هناك

ومثل الشباب الصغير "عاش حياته" ههههههههههه
ونهاره كان ليله
وليله كان نهاره

المهم كنا نسهر عنده

هو فى اولى "هندسة"
وواحد كان فى طب عين شمس
والآخر كان فى تجارة عين شمس

كلهم شباب عشرة على عشرة ... بس كانوا لسه نازلين من ابو ظبى وعايزين يعيشوا حياتهم شوية
وانا تقريبا فى ثالثة كلية
وباقى الاصدقاء كانوا لسه فى ثانوية عامة

طبعا من كتر اللف والدوران
صاحبنا اللى فى هندسة ... كان اصدقائنا اللى فى الثانوى العام كانوا يرسموا له الخرائط اللى بيطلبها "المعيد فى الكلية"

وطبعا هو نايم فسيخة
والصبح يروح الكلية

اقوله ايه الاخبار

يقول لى : الاخبار انى سواء رسمت بنفسى او انتم رسمتم الخريطة هايشطب بالقلم عليها

المهم كل طقم "ابو طبى" سقط ورسب فى اول سنة

ثانى سنة على طول
اللى كان فى طب عين شمس ... أبوه حوله الى طب "المنيا" ههههههههههه
واللى كان فى تجارة عين شمس ... ابوه حوله تجارة "المنوفية"

وطبعا صاحبنا اللى فى هندسة
وجد نفسه لوحده
خلص هندسة على طول ....... "هو على فكرة" ذكى جدا ما شاء الله
وحج بيت الله اكثر من مرة
والآن اعتقد انه شغال فى "سيمنز"
ومحبوب ومؤدب جدا

بالنسبة للسيارة الـ 128 اللى اتدربت عليها
والله العظيم يا اسلام
وانا بكتب لك الكلام ده
انا لسه عظمى مكسر

لدرجة بسأل اخويا الكبير هو معقولة ان الدبرياج محتاج القوة دى كلها
قال لى: لأ ... دى عربيات هلكانة ... وطبعا موش كل العربيات الدبرياج بايظ بالشكل ده

اما بالنسبة للفتيس
ههههههههههههههههههههههههه ههههههههههه
انا حسيت انى راجل تخين قوى ... عشان كنت محتاج كل ما انقل "الغيار الآول" انى اضم رجلى على بعض عشان البوش اللى فى الفتيس

افهم من كده ان الفتيس بتاع البيجو
لازم اضغط عليه فى "المارشدير" زى الـ 128

شكرا لك يا اسلام

شد حيلك وربنا ييسر لك الاحوال
وتكون من الأوائل يا رب
ونفرح بك وتسعد كل اسرتك

مع اطيب التمنيات
اخوك حسين غزالة

**husseinoo** · 21-11-2009 01:06 AM

المشاركة الأصلية كتبت بواسطة islambana

فتيس ال504 بتجيب الفتيس يمين كانك هتحيب الرابع وترجع العصايه وراء بس سلس جدا عن فتيس ال 128

ده أنا فتيس الـ 128 جاب لى الضغط
ههههههههههههههههههه

من كتر حجم "البوش" فيه

شاكر افضالك يا اسلام

**husseinoo** · 21-11-2009 07:02 PM

منذ وقت قليل كنت بشترى لبس العيد للاطفال الصغيرة
كل سنة وانتم طيبين

المهم وانا راجع
دخلت شارع فى روكسى جانبى عشان اروح

الاقى فى مسافة 50 متر ... حوالى مثلا اربع عربيات بيجو 504

قلت لنفسى حاجة غريبة قوى

طبعا فيه ناس فى مصر الجديدة كثير راكبين بيجو
لكن فى الحقيقة مستوى المنطقة "بصراحة عالى " ... واغلب السيارات هناك "حكاية"

قلت لنفسى معقولة السكان هنا بيحبوا البيجو للدرجة دى

ام الاولاد قالت لى : دى تلاقيها عربيات التجار اصحاب المحلات
قلت لها : كلام صح ومية مية

لازم تكون بتاعتهم
لان موش هاينفعهم غير الاسد الفرنساوى
شيل ناس مافيش مشاكل
شيل بضاعة مافيش مشاكل
سافر ما فيش مشاكل
المشكلة الوحيدة أن الاسد "عجوز" .... والناس عايزة تركب عربيات "توت فروت" منظر وخلاص

العربية دى من تعديل ابنى عمر "اولى ابتدائى"
هو اللى اختار لونها ... وقال لى هاوريك "شعوذة خطيرة قوى فى العربية"
ههههههههه
بيهدى العربية دى لى

قلت له: ولمين كمان
قال لى : لاصدقاء منتدى البيجو

وده شكل ولون العربية الأصلى

كل سنة وانتم طيبين

مع اطيب التمنيات
اخوكم حسين غزالة

**the-hero** · 22-11-2009 06:30 AM

طب ليه يا استاذ حسين مفكرتش فى ال 405 كن تركب حاجه الفرنساوى الشكل القديم فى رينج 30.32 الف وتشترى دماغك تماما
وعمرك مهتفكر تحدث تانى ابدا
كانت قدام واحدة مو 90 صاحبهاطالب 30 الف
فكر فى الموضوع ده كويس جدا
ممكن تصبر لحد ماالمبلغ يوصل 30 استك وهتبقي جامدة جدا

**husseinoo** · 22-11-2009 02:11 PM

المشاركة الأصلية كتبت بواسطة the-hero

طب ليه يا استاذ حسين مفكرتش فى ال 405 كن تركب حاجه الفرنساوى الشكل القديم فى رينج 30.32 الف وتشترى دماغك تماما
وعمرك مهتفكر تحدث تانى ابدا
كانت قدام واحدة مو 90 صاحبهاطالب 30 الف
فكر فى الموضوع ده كويس جدا
ممكن تصبر لحد ماالمبلغ يوصل 30 استك وهتبقي جامدة جدا

صباح الفل يا هيرو

المشكلة انى ما عنديش فكرة خالص عن السيارات

كل اللى اعرفه معلومات عامة
واغلب اللى اعرفه عن السيارات التقليدية اللى انا عايشتها شوية
مثل الـ 504 - 131 - 132 - الفولكس

حتىالموتوسيكل الهوندا 125 .... ده كان حجمه صغير بس كان مكسر الدنيا والطلبة كلهم عندهم الموتسيكل ده وكان حكاية ... لحد ما اختفى كل ما هو يابانى من الموتسيكلات الزيرو ولم يظهر غير الاستيراد وريسنج فقط المهم

بالنسبة للبيجو 405
واضح من الصورة انها سيارة رائعة

بالنسبة للبيجو 504
قطع غيارها متوفرة
قطع الغيار موجود بمستويات مختلفة اصلى وغير اصلى زى ما انت عايز
نرجع الى الدعم الفنى ههههههههههههههههههههههههه
موش هالاقى اكتر منكم فاهمين فيها قوى
وكمان هاتلاقى صنايعية فاهمينها حتة حتة
حتى القديم منها "اى واحد منكم يقدر يحكم على الحالة بتاعتها"
ولو حبيت تعرف تكاليف صيانة اى شىء فيها هاتلاقى كثير من الاصدقاء الاوفياء مثلكم هايقول لى تتكلف كام

يعنى تقدر تقول عليها كتاب مفتوح
مئات من السيارة الاجرة بل آلاف 504
كثيير من الميكانيكية متخصصين فى البيجو 504
كثيير جدا من السمكرية وخلافه

والأهم
انها سيارة تقليدية
يعنى مافيهاش الغاز ولا حركات ولا انجيكشن ولا كمبيوتر كل شىء واضح فيها جدا من الألف للياء

العيب الوحيد
هو موضوع الموديل " واكذوبة الاحلال" اللى عمرها ما هتحصل ... لأن دى ملكية خاصة وفيه ناس كثيير جدا جدا لا يملكون من حطام الدنيا غير سيارتهم ... وزى ما بيقولوا "المشرحة موش ناقصة قتله" هههههههههههههههههه

اليوم بعد كلامك
دخلت على كونتاكت كار
ووجدت فعلا سيارة 405 موديل 94 تقريبا على 37000 يعنى صاحبها عايز 35000 الف جنيه
وباقى السيارات بيدور حوالين 37000 الى 44000 الف حسب الموديل

ثوانى
سندوتش البيض وقع على ... هههههههههههههه
وام العيال هاتيجى تقول لى : انت بهدلت الدنيا عشان العربيات برده
الحق الم اللى وقع
هههههههههههههههههههههههه

نرجع تانى
طبعا انا اول ما شوفت الـ 405
عجبنى شكلها
حديث
موديل حديث
وواضح انها عربية قوية موش سهلة
والـ سى سى بتاعها تقريبا فى رنج 1600 سى سى

ده كل اللى اعرفه عنها

عارف شعورك لما تركب سيارة "اسد" وقوية جدا
وفى نفس الوقت انت مشيك بالعربية قليل جدا
ده معناه ايه
معناه انها هاتعيش معاك العمر كله
واكثر حاجة هاتفكر فيها صيانة دورية

والله لو انتم واثقين من الـ 405

ممكن نكلم عنها ونعرف منكم معلومات قيمة عنها
ونقارنها مع الـ 504

على فكرة ابويا الله يرحمه
اشترى عربيات كثيير
آخرها
ههههههههههههههههههه
فيات 1300
واخويا الكبيير "على المعاش" هو اللى راكبها حتى الآن
سألته موديل كام العربية دى
قال لى : تقريبا 1964
يعنى بقالها فى السوق اكثر من 45 سنة وشغالة عادى جدا بالماكينة الاصلية بتاعتها موش بموتور 131 زى الناس ما بتعمل لها

ما بالك بالاسد الفرنساوى اللى عمره يا دوب 30 سنة ده لو عيد ميلاده 1979 هههههههههههههههه

فى انتظار تواصلكم معانا

مع اطيب التمنيات
اخوكم حسين غزالة

**husseinoo** · 22-11-2009 10:59 PM

المشاركة الأصلية كتبت بواسطة mido_seyana

بسم الله
أنا اخوك محمد عبد السلام
هحاول أقولك رأيى فى حكاية البيجو ولا اى عربيه تانيه أنا زيك لسه جديد فى موضوع العربيات وهشترى إن شاء رب العالمين بيجو 505 لأنها من أشدوأقوى السارات وتحفة إنتاج البيجو ومايميزها إن أغلبها بيجو نزلتها بموتور الـ 504 وقلت زيك كده أجيب الجديد أبو شكل حلو ومستعمل برضه ولا أخلينى فى البيجو رد الكل عليا وقالى زىمكون غلط فى البخارى ( البيجو طبعا وإلا هتبقى قفل ) أمنت على كلامهم وقلت ع البركه وبقول يارب وأدينى بتفرج على عربيات.

ومتقلقش من موضوع البنزين لأن دى طبيعة العربيه علشان تديك أعلى أداء وربنا يوفقك.

مساء الفل يا استاذ محمد
واهلا بك فى اى وقت
بالنسبة للـ 505 دى عربية حكاية
شوف جمالها من الداخل
حاجة عظمة قوى

ايه الجمال ده ... ما شاء الله

لكن الـ 504 طبعا اقدم وكمان أكثر انتشارا

على العموم انا وجدت سعر السيارة فى كنتاكت كار "بيدور حول رقم 40 الف جنيه"

طبعا اعلى بكثيير من الـ 504 ولكن الموديلات تبدأ من سنة 1980 و 1984

لكن الـ 504 وجدت سعرها فى سوق السيارات
يبدأ من 25000 .. حتى 30000
وفيه شريحة تانية بيطلب 35000 الى 40000

لكن الأغلبية بيكون بين 35000 الى 25000
يعنى تقدر تقول
ان السيارة اللى بـ 25000 المفروض تكون حالتها مقبولة
والسيارة اللى بـ 30000 المفروض تكون جيدة
والسيارة اللى بـ 35000 المفروض تكون جيدة جدا
والسيارة اللى بـ 40000 اواكثر المفروض تكون ممتازة
ده فى حالة المساواة بينم فى نفس الموديل والماركة

يعنى مثلا 1979
وكمان بيجو GL

اما لو كانت السيارة موديل 77 او 76 طبعا سعرها يقل حوالى الفين جنيه

والله اعلم هل الرأى ده صحيح ولا انا بحسبها غلط
ده اللى انا شفته فى سوق السيارت

لكن على فكرة فى تاجر سيارات فى السوق قال لى : ما تتحسبش بالشكل ده

انا بقى نفسى اعرف حالة البيجو تتحسب ازاى
وتساوى كام

الجميع يقول
الاساسيات
والحوض والشنطة ما تكنش رشة

ماشى ده كلام اساسى وسليم

لكن فيه حاجات تانية تؤثر ايضا فى السعر
يعنى مثلا لو واحد مركب كاوتش جديد "يبقى عايز فلوسه"

ده لو واحد مجدد سيارته "3 سنوات" ... يبقى عايز اللى دفعه

حتى الآن موش عارف احدد السعر المناسب للسيارة المعقولة
يعنى تقدر تقول عليها "سيارة جيدة"
جيدة يعنى هاتمشى مع الواحد بشكل كويس بدون مشاكل

بغض النظر عن الشكل "يعنى موش قصدى تكون مخبطة"
قصدى مثلا دهان مقبول
مافيش بارومة
فرش مقبول "وموش فاخر" هههههههههههه

موش مهم اى كماليات "تكييف - كاسيت - السنتر - الإنذار - والكلام ده كله"
موش مهم الكاوتش العريض
موش مهم الطارات الاسبور

عايز سيارة كويسة ومعقولة وحالتها جيدة موش هاقول جيدة جدا
المفروض يبقىسعرها كام وشكلها ايه وايه اللى ممكن تحتاجه فى المستقبل

على العموم ربنا يوفقك
ويسعدك
ويكرمك فى سيارة كويسة يا رب
وتفرح بها وعمرك ما تغيرها ابدا

وطبعا يهمنا نعرف اخبارك وكل ما يتعلق بشرائك السيارة إن شاء الله

مع اطيب التمنيات
اخوكم حسين غزالة

-

-

-

الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

LinkBack

أدوات الموضوع

عرض

-

المواضيع المتشابهه

عايز عربية بتكييف في حدود 25000 كويسة

ساعدوني لوجه الله ...عايز عربية اتوماتيك في حدود 25000!!!!!!!!!

سيارة فى حدود 25000

عايز اشترى سيارة فى حدود 18000 ... رأيكم مهم جدا لو سمحتم

عايز اشترى سيارة فى حدود 35 الى 40 الف جنية

الكلمات الدلالية لهذا الموضوع

المفضلات

المفضلات

ضوابط المشاركة