الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

المشاركة الأصلية كتبت بواسطة the-hero

بس ده سعر اغلى نوع المشلان وكوتش عيض بتاع الجنط
وفيةكوتش انواع كورى وليزى نفس الفردة ب 220 ج

مساء الفل على اجدع "هيرو"

طيب ممكن نعرف متوسط العمر الافتراضى للميشلان ؟
متوسط العمر الافتراضى للكاوتش الماليزى مثلا؟

هل يوجد علاقة بين حجم السير بالسيارة والعمر الافتراضى للكاوتش
يعنى مثلا لو قلنا ان متوسط الكاوتش الميشلان 4 سنين سواء كنت تسير مسافات طويلة او مشيك بالسيارة قليل جدا

يعنى الكاوتش "يتلف" بعد مدة معينة سواء كنت بتمشى مسافات طويلة او مشاير صغيرة

هل يمكن تركيب كاوتش "عادى" موش عريض على نفس "الجنط"

معلهش هى "اسئلة غبية شوية" ... لان انا مبتدأ وبلاطة

النهاردة رحت مدرسة القيادة
واخذت الجدول
عبارة عن 6 حصص
ثلاثة فى اسبوع
ثلاث حصص بعد العيد
يعنى على اول شهر 12 اكون خلصت تقريبا

الحصص مدتها 2 ساعة
او
3 ساعات

لكن ما اعرفش هل 6 حصص كافيين ان الواحد يتعلم فيهم بشكل جدى

وانا مروح ركبت تاكسى بيجو 504 ... شوف الحظ
وكانت حالتها "عادى" ... موش هاقول ممتازة ... ولا جيدة جدا ... حالة عادية
وبرغم ذلك صاحبها كان طاير بيها
وقال لى فردة كاوتش منها تساوى اى عربية من الجداد

وانه بيحط تقريبا 25 لتر بنزين 80
بيمشى بيهم من الساعة 1 الى الساعة 6 متواصل كل يوم
وهو عمره ما حسب هو مشى اد ايه

والغريب انه يؤكد انه "مافيش عربية بيجو 504 عمرها ما رشت"

وان لو الموتور كفائته 70% ممكن يحتاج عمره بعد 2 سنة
فى حالة ان اللى راكبها كان تعبان وموش عارف يتعامل معاها

ده كان آخر حوار على الماشى

مع اطيب التمنيات
اخوكم حسين غزالة

الاول عايز رايك فى احد الاصدقاء كاره البيجو جدا وبيقول انه فى سنتين صرف التالى :
طبلة باب - رفرف - سوستة الشنطة ـ طارة دركسيون ـ يد الفتيس ـ عوامة البنزين ـ كربراتير سوليكس اصلى ـ دينامو ـ مارش ـ شكمان ـ 3 مساعدين مستعملين ـ نصف عمرة موتور ـ طقم جلب وصبابات وشمبر ـ بلية ودسك واسطوانة دربياج ـ طقم ماستر دبرياج ـ ملشغل لمبة الفرامل ـ البوبينة ـ كتاولت وفيوزات وكل سلوك الفوانيس ـ مفتاح النور

تفتكر كل ده كلفه كام ؟
تفتكر حالة العربية دى كانت كام %
وعربية بالحالة دى المفروض انها تساوى كام

-------------------------------

طيب ايه رايك فى راجل
اشترى عربية بيجو 504 بـ 100 دولار
وموش عايز يبادلها بعربية بيجو 407

ويقول لك البيجو 504 لها شخصيتها
وانه بيلاقى شخصيته فيها

اتفرج وقول لى رايك
هل من الممكن ان تثق فى سيارة عمرها اكثر من 35 سنة وتحبها كل هذا الحب

مع اطيب التمنيات
اخوكم حسين غزالة
[youtube]http://www.youtube.com/watch?v=t5T9A6S27Ps[/youtube]

السلام عليكم ورحمة الله وبركاته

يوم السبت ذهبت لاول حصة فى مدرسة القيادة التابعة لحى مصر الجديدة
زى ما توقعت جلسة سريعة مع احد السائقين يشرح بعض الاساسيات بخصوص تغيير الزيت والفلاتر وزيت الفرامل وزيت الفتيس وملىء الراديتير بالماء ... اغلب الكلام معروف وفضلت السكوت على اساس انه كان فيه بنات من ضمن المجموعة واكيد فيهم كثيير موش عارفين الكلام ده

المهم ذهبت النهاردة يوم الاثنين
عشان الحصة الثانية
قالوا احنا هاندمج الحصة الثانية مع الثالثة
قلت لنفسى احنا هانبدأ من دلوقتى فى الحركات دى
ده كل الحصص 6 حصص "عمى"
طار منهم كده ثلاث حصص

المهم قلت اصبر شوية وشوف الموضوع هايمشى ازاى
ركب معاى احد السائقين
وقال لى : انت طبعا موش عارف الدبرياج فايدته ايه ولا عندك فكرة
قلت له : والله انا عندى فكرة معقولة وافتكر انى مرة ركبت العربية بس من 15 سنة
قال لى : خلاص تعال اركب مكانى
وكمان النهاردة هانمشى "بالدبرياج والفرامل" فقط

فهمت كده من نفسى "انهم معليين الكاربراتير عشان العربية تمشى بمجرد ما تنقل وترفع رجلك عن الدبرياج" حتى ولو ما دوستش على البنزين

المهم الحمد لله الراجل وجد استجابة عندى كويسة
راح قالى بعد عشر دقائق مشى بسيطة
خلاص لف "اليو تيرن" على شكل حرف يو
وارجع للخلف
مرة اثنين ثلاثة اربعة
قال لى خلاص كمل لوحدك وانا هاشوفك من بره العربية

وتركنى لوحدى

قلت لنفسى : احسن برده عشان اعرف اركز ... لانه بصراحة احيانا بيلغبطنى هههههههههه
او فى اول عشر دقائق كان فيه لخبطة بسيطة

المهم : الشهادة لله
فضلت رايح جاى حوالين حرف "اليو"
اروح
وارجع بضهر العربية
واحاول انى اعدلها
وانى لا ابعد عن الرصيف بشكل كبير

الحمد لله
باقى المجموعة : كان معانا واحد
هههههههههههههههههههههههه
وجدته بجوار الرصيف
مطلوب منه انه يروح ويرجع "بس جنب الرصيف" لحد ما وقته خلص

الظاهر انهم شافوه "عطلان شوية" وموش هايجيب معاهم بسهولة

وكان فيه واحد مسكين كل شوية العربية تعطل منه ويروحوا يشغلوها "كانت عربية نص نقل"
ما عرفش العيب منه ولا من العربية .... اعتقد انه "ضعيف شوية" والله اعلم

وكان فيه "بنوتة" .... جاية "بحتة كيا برايد عصفورة"
بس معاها كنسولتوا من 4 اشخاص عشان يعلموا حضرتها
هههههههههههههه
وطبعا العربية عطلت ووقفت الناس شوية

لكن الاسطى اللى كان بيعلمنى
قال لى: اطلع منها

وبصراحة قال لى : ارجع بضهرك وعدى من جنبها وماتخفش

عايزين الحقيقة "انا برده لاغيت الراجل " عشان يشتغل معايا بنفس
وفعلا كنت آخر واحد ماشى من التدريب

التدريب كان على "صديقة الميكانيكى" ههههههههههههههه
اوعى تقولوا ان مافيش حد موش عاريفها

لأ الكل طبعا عاريفها التدريب كان على "فيات 128"

بس بصراحة حتة عربية "شقيانة" وطالع "عين ابوها"

قلت لنفسى : كويس اتمرن على عربية شقيانة عشان تتعلم كويس

لكن النتيجة بعد التدريب هههههههههههه
اكنى جالس فى فرن "هدومى كلها عرق"
حرارة الموتور "اعوذ بالله"
كلها طالعة علي برغم ان الجو برد

اما عن "الدبرياج"
ما اقولكش
كان لازم "العب شوية رياضة" .... لان رجلى "انخلعت" من كتر الضغط عليه

معقولة كل العربيات "الدبرياج" محتاج القوة دى كلها
ولا انا اللى كبرت وعجزت هههههههههههههه

اما بخصوص الفتيس
فده حكاية
برغم ان السيارة صغيرة "لكن اتربالى عضل فى صوابعى"
خصوصا وانا احرك الفتيس "للخلف"

طبعا انا الحمد لله موش غشيم
احاول انقل بالعقل والحكمة
هههههههههههه
لكن والله الفتيس "ابن لازينه"

عايز اسأل سؤال
هى العربية البيجو 504 على سبيل المثال
لازم اضغط على الفتيس لأسفل ... قبل ما اعشقه للخلف "مثل الـ 128"

يعنى فى الـ 128
كنت احرك الفتيس الى اليمين
ثم اضغط لاسفل
ثم احرك الفتيس للخلف ثم يسار

البيجو عشان احركها للخلف "هاعمل معاها زى الـ 128"

وبعدين انا شايف ان فتيس البيجو "حجمه صغير جدا"
وشايف ان تحريكه "بالاصابع" وبسهولة جدا ... والله اعلم

لكن فى الحقيقة انا النهارده استفدت جدا
لمدة ساعتين على الاقل
رحت بوش العربية ورجعت "على شكل يو تيرن"
كان يوم مفيد

بس ما اعرفش هايحصل ايه
فى الـ 3 حصص اللى فاضله
حد عنده فكره

ولا هاأقضيها حوالين "اليون تيرن" هههههههههههههههههههه

على فكرة كنت بكلم سائق منهم على يوم المرور العالمى "هايكون ايه ظروفه"
قال لى : ربنا يسهل واحنا معاك
قلت له : ماشى عشان برده اعمل حسابى
بصراحة انا موش عايز اعمل فيها "عشر رجالة"
وفى الآخر اطلع "راسب"
هايبقى شكلى وحش قوى اما الواد ابنى الصغير هههههههههههههههههههه

المهم يا ريت نصائحكم الغالية جدا جدا
آخد بالى من ايه
اركز على ايه
كل كلمة هاتقولوها هاستفيد منها جدا
خصوصا انكم "ناس متعلمين وفاهمين قوى"
وتقدروا توصلوا المعلومة وممكن اسهل من الشخص اللى بيعملنى

فى انتظار آرائكم القيمة
مع اطيب التمنيات
اخوكم حسين غزالة