نطه فى الغيار (فتيس اتوماتيك) برجاء المساعده

**lovernan** · 29-09-2009 01:46 PM

شباب المشكله عندى فى اكورد 85 اتوماتيك هيا انى غيرت قواعد الموتور كلها جديده واصليه بما فيها قاعده الفتيس وبعدين عملت اصلاح للفتيس الاتوماتيك
المشكله فين؟
بعد الاصلاح الفتيس بينقل كويس وعلى 2.5 ار بى ام لكن مع كل غيار بحس بنطه فى العربيه ساعات تكون هاديه وساعات تكون شديده
ومش قادر احدد المشكله فى الفتيس ولا فى القواعد ولا فى ايه

**aYaBooY** · 29-09-2009 04:01 PM

ممكن تكون المشكلة من طقم الدبرايج بتاع العربية او ما يوازيه لو مكنش فيه حاجة كدة بالنسبة للاتوماتيك و عموما اصبر لحد ما مهندس سمير عياد يرد عليك

**sab3aawy** · 01-10-2009 07:07 AM

ياريت تقول لنا ايه اللى تم فى اصلاح الفتيس،
النطة دى لها كذا سبب، ممكن يكون فلتر زيت الجير عايز يتغير لو السيارة مزودة بواحد، وممطن يكون فيه سدد بسيط فى مجارى قاعدة البلوف (فالف بودى)وممكن تكون بلوف السولينويد محتاجة تتغير، لذلك كل ده لازم يتراجع بواسطة متخصص فتيسات

**samirayad** · 01-10-2009 02:57 PM

بالأضافه للكلام الطيب اللى أشار بيه أخونا
المهندس : خالد

عندى ملحوظه بسيطه كده أتمنى تراجع عليها

واضح أن الفتيس عندك تقريبا (التحكم فيه لايتم ألكترونيا ).....لأن العربيه موديل 85

non-ECT transmission

ومعروف فى هذا النوع أن ضغط عملية الخنق لبوابة الكربوراتير (فى المحركات التقليديه )
أو بوابة جسم الخانق فى محركات الحقن الألكترونى
عليها عامل كبير فى تحديد نقاط النقل (نظرا لعدم تواجد كمبيوتر خاص بالفتيس لتحديد نقاط النقل كا النوع الألكترونى )

والعنصر الذى يتحكم فى تحديد ضغط الخانق
هو واير الأكسراتير
وبما أنك كنت بتعمل صيانه لللفتيس

علشان كده من رأيى ....أنك تشوف مركز خدمه كويس
وتخليه يعيد رجلاش وضع واير الكسراتير (زى الكتاب مابيقول )

طبعا ده بالأضافه الى ضبط سرعة السلانسيه ومنسوب الزيت للأوضاع المناسبه لعمل الفتيس الأوتو (كجانب وقائى آخر )

**tananybasha** · 02-10-2009 01:25 AM

عند ابويا بس راحت لما غير الفغتيس خالص

**samirayad** · 03-10-2009 07:47 PM

ده عنوان واحد (زميل فى الدايو بيشكر فيه )

بص فى واحد أسمه مجدى أتوماتيك فى شارع أحمد سعيد قدام السنترال أنا متعملتش معاه شخصيا بس أبن عمى معاه هوندا سيفيك 93 وبيتعامل معاه وبيشكر فيه وبيقول انه عمرله الفتيس كله 700 جنيه