الموضوع: مشكلة فى البنزين وضعف السحب والتجميع فى كيا شوما

ارجو من الاخوة الاعزاء إفادتى السيارة هى كيا شوما موديل2000 وعاملة 56 الف ولسة مغيرتلهاش سير الكاتينة
المشكلة هى ان العربية وهيا ماشية ودايرة حصلت معايا مرة آجى ادوس بنزين متديش اى رد فعل يعنى ابقى دايس دواسة البنزين على الآخر ومش سامع صوت مع تقطيع يعنى كنت لما انقل على التالت او الرابع تكون العربية مخنوقة كنت ابطلها شوية واشغلها يقل العيب ولكنة يفضل موجود وكل ما كنت ازود بنزين مكانش بيفرق معاها وبعدين راحت لوحدها المشكلة دى ظهرت واختفت رحت غيرت فلتر البنزين وغيرت بوجيهات ومشيت العربية زى الفل
وبعد كام يوم لاقيت العربية بتنتش على الاول والتانى رحت نظفت فلتر الهواء وكان فية تراب كتير واتظبت وبعد فترة ظهرت نفس المشكلة الاولى تانى انى كنت ادوس بنزين مالاقيهوش يعنى عداد الار بى ام يعلى ومش سامع صوت بنزين والعربية سرعتها مبتزيدش وبعدين اختفت لوحدها
رحت التوكيل اللى فى دار السلام وطبعا مكانتش المشكلة باينة قالى العربية مفيهاش حاجة وزى الفل وسألته على تنظيف الحساسات والرشاشات قالى لا مش محتاجة وتانى يوم
كنت فى مشوار طويل وانا ذاهب كنت سايق على سرعة 100 ومكانش فية مشاكل لا فى السحب ولا التجميع وفى العودة لاقيت سحب العربية والتجميع بقى ضعيف جدا مع سماع صوت بنزين زايد مع ارتفاع فى عداد الار بى ام والعربية مبتجريش
دلوقتى انا مش عارف فين العيب ميكانيكى قالى ان ممكن يكون البنزين كان فية ميا ودة اللى خلاك تدوس بنزين ومتلاقيهوش رغم انى كنت حاطط بنزين 92 وواحد تانى قالى لازم تغير طلمبة البنزين كلها وواحد تان قالى ممكن نغير موتور طلمبة البنزين بس
والتوكيل قالى لو اتكررت تانى ممكن نفك طلمبة البنزين ونظفها بس ميكانيكى قالى ان الطلمبة اللى هينضفها دى فيها شبكة وصعب يكون العيب دة منها ودلوقتى انا احترت هل
تانك البنزين عايز تنظيف ولا تنظيف الحساسات والبخاخ ولا طلمبة البنزين باظت ولا اسطوانة دبرياج ولا اية... ارجو من الاخوة الافاضل ارشادى حيث اننى مقدم على العديد من المشواير الطويلة وخايف تعملها معايا واحتاس فى الطريق