(( بسم الله الرحمن الرحيم ))


_ اولا بعتذر للغياب عن المنتدي ودخولي المتقطع نظرا لبعض الانشغالات معا اصدقائي في اشياء هامة وان شاء الله خلاص قربت اخلص وارجع راشق في المنتدي من جديد
مبدئيا كدة الي هيقرأ الموضوع يجبلة كوباية شاي او كيس شيبسي او اي حاجة يتسلي فيها لانة هيشرفني في الموضوع شوية
_ العربية حاليا عامل بيها 10800 كيلو تقريبا في 4 شهور و اسبوع بالظبط .. ( قولو ما شاء الله )
___________

( المشاكل الي قابلتني من اول ما اشتريت العربية )
.........
1.نور الاستوب مبينورش غير بالضغط بقوة علي الفرامل .. تم حلها
2.عضة في المارشدير .. ( لم يتم حلها بسببي اني مكنتش فاضي واجلتها واتحلت في صيانة ال 10 الاف )
3.الكاسيت بيعلق ( مازال بيعلق وهيبعتو واحد جديد .. يااااا مسهل )
4.حدفة يمين .. تم حلها
5.ارتفاع دواسة الدبرياج .. تم حلها
.. دة الي متذكرة حاليا ودة لحد صيانة الالف ..
_ من الالف ل 5 الاف ..
1.عوامة البنزين باظت .. تم حلها في شهر ونص تقريبا وباظت تاني و اتحلت تاني ولحد الان الحمد لله تمام
2.جلدة الزجاج فكت .. تم لزقها
(( من ال 5 الاف لل 10 الاف ))
1_ ( صدأ في الباب الخلفي شمال ) تم الاتصال بالتوكيل وحجز ميعاد وعند الذهاب للهياكل لم يتم دخول السيارة ودة بسبب ان العربية متبلغش بيها في الهياكل بسبب استهتار المهندسين ولم اذهب وماشي في الاجرائات القانونية لحماية المستهلك حاليا
2.التكييف التبريد ضعيف .. تم شحن الفيريون ودي عملتها وانا 9800 كيلو عشان اضمن حقي قبل انتهاء ضمان الفيريون
3.الهاند ضعيفة وتم ربطها اقوي
4.صوت صفارة معا الفرامل .. تم حلها
5.لمبة التشيك انجين نورت لازل مرة اول امبارح وطفيتها في الصيانة امبارح وبسال المهندس قالي بنزين قلتلة انا ماغيرتش البنزينة ولا مرة من ساعة الشراء قالي معا الوقت الحساس نور عشان البنزين مش نضيف 100%
دي المشاكل الي قابلتني بالعربية ..
__________

( تقييمي انا بقي لمشاكل العربية من وجهة نظري الشخصية او بمعني اصح الي مش عاجبني في العربية )
.........
1.القائم الشمال للعربية شايل جزء من الرؤية وعشان تشوف الي وراة لازم تحرك راسك يمين وشمال
2.الوان الفرش فاتحة وبتتوسخ بسرعة
3.دواسة البنزين كهرباء وكنت بفضل تكون واير عشان الاستجابة تبقي اسرع
4.خامات الطابلوة معقولة بس كان ممكن تكون افضل من كدة
دة الي مش عاجبني في العربية
غبور مسترخص في حجات كتير زي الكاسيت وتيل الفرامل الي بينزل هبو وبيوسخ الطنابير و الجنط
____________

( مميزات العربية )
.........
1.طبعا الشكل جميل ما شاء الله
2.وااااااااااااسعة جداااااااااا و الشنطة بحررررررررر
3.فيها اماكن تخزين كتير
4.اوبشن جميل جداااااااا ولا يقارن باي عربية في نفس الفئة السعرية
5.فرامل ما شاء الله جميلة وبتلحق الواحد كتير
6.ثبات ممتاز علي السرعات العالية
7.السحب ضعيف في الاول لاكن بعد 2 ونص ار بي ام بتلاقي معاك وحش ما شاء الله
8.استهلاك البنزين بصراحة مش عارف اقول اية بس هوة معقول هوة بحالات بصراحة يعني اوقات اللتر يعمل معايا 14 كيلو و اوقات بيعمل معايا 9 كيلو في المجمل معقول
9.التكييف اوقات بيكون تلاجة و اوقات بيحتاج بتاع تلت ساعة عشان يسقع ولو ركبت الستائر بيسقع بسرعة
10.ال abs . ebd بصراحة ممتازين ما شاء الله
11.الانوار بتاعة العربية بالليل جميلة و جوة العربية بتتحكم في اضائة الطابلوة و اللون ازرق جميل مريح للعين
12.البارك سينسور ممتاز ومفيد جدا بس للاسف صوتة مش عالي قوي يعني عشان تسمعة لو مشغل الكاسيت خلي الصوت علي 5
في حجات مش في بالي حاليا لاكن علي العموم الكل عارف مميزات العربية
____________

( مواقف حصلتلي بالعربية بقي )
.........
طبعا 70% من المشي بتاعي سفر وفي مواقف كتير حصلتلي لولا ستر ربنا كنت ضيعت فيها
1.مرة كنت ماشي بالليل علي 140 وقدامي مطب ماشفتوش وقبل المطب بحجات بسيطة لمحتة قمت كابس فرامل علي الاخر ال abs اشتغل و العربية وقفت قبل المطب بالظبط وفرحت جدا بكدة والي فرحني اكتر ان الانتظار اشتغل لوحدة وبطل اول ما دوست بنزين
2.موقف تاني كنت ماشي بالعربية علي 100 تقريبا ولاقيت عربية طالعة قدامي مرة واحدة وماشي علي 20 تقريبا ومفيش بيني وبينة بتاع 20 متر قمت دايس فرامل علي الاخر والعربية الي جمبي كانت بتجري علي 100 قمت واخد مكانها بسرعة ولولا ستر ربنا كنت هلبس في الي قدامي و ال abs اشتغل وخلاني اتحكم في العربية كويس ما شاء الله
3.مرة كنت مستعجل وورايا امتحان وكنت طاير علي 130 تقريبا ومقضيها غرز والعربية ما شاء الله مكلبشة في الارض ومساعداني جدا خصوصا ان كان في ملف حاد انا هديت غصب عني فية وكنت خايف اتقلب بصراحة واخدتة علي سرعة اقل طبعا بس ماركزتش كام والعربية اخدتة عادي ومعامتش مني
.._اكبر مدة سواقة وسفر بالعربية كان 480 كيلو و 9 ساعات قيادة العربية سافرت بيها 150 كيلو وبعدين ريحتها ساعة ونص وسافرت بيها باقي المسافة دايركت و الحمد لله مخزلتنيش
______________
( تقييمي للوكيل )
.........
بصراحة استجابة الوكيل للمشاكل زي الزفت و الحلول بطيئة جدااااااااا ولازم تزعق وتهدد بحماية المستهلك عشان يحلو الموضوع الا موضوع الصدأ دة من ساعة ما زعقت معا المهندس الي كلمني وللاسف كان بيكلمني بكل برود محدش عبرني ولا قالي تعالي حل مشكلتك ولا اي حاجة زي ميكون بيقلي اخبط راسك في الحيط واديني ماشي معا حماية المستهلك
مراكز الخدمة الي رحتها واحد فقط ( ايجي اوتو ) ودة في طنطا عندنا و الخدمة فية بصراحة جيدة جدا وليست ممتازة يفتقد بعض الشغل وقصدي مش الخدمة لا يعني راحة العملاء واماكن الانتظار لازم يكون فيها واي فاي ومكان اكبر للاستراحة لان المكان ضيق يعني شوية شغل لراحة العملاء و المهندسين الي هناك ناس محترمين خصوصا المهندس احمد سعيد الي بصراحة بيعمل اي حاجة ممكن عشان يساعد العملاء ويرضيهم انما المركز الرئيسي و الهياكل زبالة وزي الزفت و خدمة العملاء زفت و الاستقبال و التعامل زفت
اسعار الصيانات في الوكيل للاسف في نظري غالية
قطع الغيار بتيجي بعد فترة من 10 ايام لشهر حسب التساهيل
عشان مطولش عليكم ..
_______________

( تقييمي للسيارة من كل شئ )
.........
1.السحب .. ضعيف قبل 2 ونص ار بي ام جبد جدا بعدها وياخد 7/10
2.استجابة الموتور .. بطيئة في جزي من الثانية عشان الدواسة كهرباء وتاخد 6/10
3.السحب معا التكييف ياخد في البداية 3/10 بعد 2 ونص ار بي ام ياخد 6/10 السحب معا التكييف بيقل اوي في البداية بس معا الغيار ال 3 و الجري بيبدء يخف لحد ما بعد سرعة 100 مبيكونش في تاثير علي السحب نهائي
4.الفتيس .. كان فية بعض الخشونة في الغيارات وتم حلها وحاليا جيد وياخد 6/10
5.الراحة في العربية جيدة جدا حاليا وكانت متعبة في الاول وتاخد 8/10
6.الثبات علي الطريق ممتاز وتاخد 9/10
7.الفرامل ممتازة ما شاء الله وتاخد 8.5/10 بسبب ان معا تشغيل التكييف بحس ان الدواسة بتنشف شوية معا ضغط الفرامل
8.الشكل ودي ازواق 8/10
9.الاتساع و المساحات 10/10
10.اماكن التخزين 8/10
11.استهلاك البنزين بحالات في المجمل 7/10
12.التكييف 6/10
13.الانوار و الاضائة الليلية 8/10
14.التسارع قبل 3 ار بي ام 4/10 بعد 3 ار بي ام 7/10
15.الدهان 6/10 بيتقشر لو حكة قوية انما في الاكصدام بيتقشر من الهواء وياخد 3/10
16.ال abs . ebd تاخد 8/10
17.صاج العربية ياخد 5/10 محمل في اماكن وفي اماكن ضعيف
18.العفشة ناشفة شوية ودي ميزة وعيب الميزة انها بتدي ثبات علي السرعات العالية و العيب بتحس بكل طوبة علي الطريق و معا المطبات بتحس بهبدة لو اخدتة جامد و المساعدين ورا كان يفضل نوع افضل شوية عشان النوع الموجود حاليا بيهبط معا التحميل فرد واحد ورا هتعدي فردين هتحك وخد المطبات بالعرض لو مطب عالي لو واطي او بمعني اصح مطب قانوني مش بتاع اهالي قشطة هتعدي ولو محمل 5 ومالي الشنط و تاخد 7/10
19.النظام الصوتي زفت زفت زفت السماعات قدام جيدين جدا الي ورا ضعاف وكمان الكاسيت زي الزفت بيبوظ بسرعة جداااا وبيهنج كتير وبيعمل بلاوي وتقييمي للنظام الصوتي 2/10
20.العزل جيد جدا ولما بتقفل الزجاج مبتسمعش اي حاجة برة الا بصعوبة ومبتسمعش صوت الموتور خالص الا بعد 3 ونص ار بي ام بتبدء تسمع صوتة بيعلي وتاخد 8/10
21.التوكيل و الاستجابة صــــــفـــــــر/10
22.مركز الخدمة الي جربتة 7/10
___________

في المجمل العربية الحمد لله جميلة ومريحاني وصفقة رابحة بالنسبة ليا حتي معا موضوع صدأ الابواب دة الحمد لله راضي عنها وربنا يديمها نعمة ويحفظها من الزوال
عيب السيارة الوحيد حاليا في نظري الصدأ الي ظهر في الابواب عند بعض الناس وانا منهم واتمني ان غبور يتدارك المشكلة بسرعة و الملاك الجداد ميكونش عندهم حاجة غير كدة العربية جيدة جدا وافضل سيارة في الفئة السعرية بتاعتها بدون منافس ودي وجهة نظر شخصية انما حاليا بسبب موضوع الصدأ انا بنصح اي حد ميشتريش حاليا لحد ما الوكيل يعلن رسميا انتهاء المشكلة دي و البدائل في نظري عربيتين مالهمش تالت البي واي دي و الاسبرانزا ام 11 ودول افضل عربيتين في رايي ..
معلش طولت عليكم وتقرير كبير شوية و ربنا يبارك للجميع في عربياتة ويكرم الجميع

معلش التقرير غير منظم بالشكل الكافي وبرضو ماقدرتش اكتب كل نقطة عاوزها لاني وانا بكتب خايف الكهرباء تقطع في اي لحظة وبكتب الي ييجي في بالي بسرعة وملحقتش ارتب افكاري كلة بسبب الكهرباء