موضوع هام و أرجو المشاركة: كيفية التصرف عند عومان العربية

[ashouhdy]

السلام عليكم ياشباب المنتدى
عايزين نتناقش مناقشة جدية تعمل اية لو العربية عومت منك
مثال:
من كام يوم كنت ماشى 130 ع الصحراوى و اللى قدامى كبس فرامل جامد جدا كنت حلبس فية طبعا كسرت شمال جامد لقيت نفسى داخل فى الرصيف رديت يمين تانى و كانت النهاية !
العربية فضلت ماشية بالعرض تماما بتاع 50متر ولولا ستر الله ان مفيش عربيات حواليا و انى ملبستش فى الرصيف كنت اتقلبت

المطلوب:
نتناقش نعمل اية فى المواقف اللى ذى دى انا اللى فكرة ان فى الكام ثانية دول اعترف انى اتسمرت و كانت رجلى دايسة لسة ع بنزين و كل اللى بعملة بلف الدركسيون يمين فى شمال و بعد فترة طبعا بالنسبة ليا كانت ساعة ! فقت و كبست فرامل خفيف لحد ماالعربية اتلمت .....

اية الحل المثالى فى الظروف دية و نعمل اية عشان نرد العربية تانى لطريقها .... بصراحة انا خفت اشد الهاند لتعوم اكتر ...

عايز اراء ممكن بالذات .........

[Amr_tika88]

منتظرين الرد من وحوش نايل موتورز

[ashouhdy]

اية يا شباب هو كلة بيعوم و يلبس برضة ولا اية :))))))))))

[الصيداح]

موضوع جميل جدا
تحيتي إليك
أعتقد أنه في السرعات العالية من الخطأ أن تشد مكابح اليد لأن ممكن السيارة تعوم جامد جدا
والحل هو أن تضغط على الفرامل بهدوء حتى تتوقف

أما عن كلامك عن الحل والعربية بتعوم فأعتقد أنه من الخطأ الضغط حتى على المكابح العادية وأن الصحيح أن تظل متشبثا بعجلة القيادة إلى أن تهدأ الاسيارة

وممكن الإخوة يفيدونا أكثر

وجزاك الله خيرا على موضوعك

[amr.elsayed]

دى بتختلف من شخص لأخر ومدى تمكنه من سواقه السيارة وسرعة رد الفعل
ودى اللى بنقول عليها المواقف الصعبة للقيادة او تلافى اخطاء الغير اثناء القيادة والتعامل معاها
طبعا لو العربية فيها نظام abs يبقى حتلف الطارة مع الضغط على الفرامل وطبعا دى ميزة ال abs
معندكش abs يبقى تفرمل بقوة لحد ما سرعة العربية تقل قدر الامكان وبعد كدة تشيل رجلك من على الفرامل وبعد كدة تبدأ تكسر الدركسيون وتاخد اللى بنقول عليها الغرزة
ودى اخر حاجة نفكر فيها وتتعمل لو مافيش عربيات جانبك
طبعا دى محتاجة رد فعل من السائق ومحتاجة مراقبة دائمة لحالة الطريق طول ما انت ماشى على الطرق سريعة
لكن سرعة عالية مع فرامل بقوة مع كسر الدركسيون مع عدم وجود abs يبقى العربيى حتعرض لا محالة وفى احتمال كبير للانقلاب لا قدر الله
والاهم من كل دة انك تتوقع حالة الطريق وتدى مسافة الامان المناسبة لتوقف السيارة فى اى موقف طارئ
واخيرا اعرف امكانيات عربيتك كويس عشان تعرف تستخدمها صح وما تحملهاش اكتر من طاقتها
وخلى بالك على نفسك يا ashouhdy وبلاش 130 دى خليك ماشى 100 حلو وعلى مهلك اصلها بتفرق ال 30 ك/س دول

[horas3000]

اعتقد ان اول حاجة تعملها انك تشيل رجلك من علي البنزين و برضه متدوش فرامل و تحاول تعدل العربية من خلال الدريكسيون علي قد ما تقدر و ممكن تستخدم البنزين بعد كده بس براحة كويسلة برضة لاعادة الاتزان الي العربية بعد كده فرامل زي ما انت عايز

[ahmedyehia515]

متهيألى موضوع التعويم ده ليه علاقة بالعربية، يعنى المفروض كل العربيات الجديدة فيها esp اللى هو بيمنع تعويم العربية اصلاً حتى لو كنت ماشى على 200 و كسرت الدركسيون يمين و شمال جامد، بس طبعاً معظم العربيات بتنزل مصر من غير الموضوع ده اصلاً رغم اهميته.

المهم، رداَ على سؤالك، عشان تعدل العربية و هى بتعوم باستخدام فرامل اليد لازم تكون تنين سواقة و عندك سرعة استجابة مذهلة و الموضوع نظرياً ممكن، لأن اللى بيحصل لما العربية تعوم انك بتحس ان العربية ابتدت تمشى بالجنب فمتهيألى نظيريأ انك لو شديت فرامل اليد جامد و سبتها مشدودة فترة ( فترد ده معرفش قد إيه) العربية حتتعدل بس لازم تكون بتحرك الدركسيون بسرعة عشان تعدل نص العربية اللى قدام و كمان على الاغلب حتكون بتدوس فرامل و بنزين بطريق مدروسة عشان تعدل العربية . ده وجها نظرى بخصوص انك تعدل عربية بتعوم بغستخدام فرامل اليد، شبه مستحيل.

الطريق الصح انك تشيل رجلك من على البنزين و تحلول تسيطر على الدركسيون و متحركوش بسرعة عشان لو حركته بسرعة الوضع حيبقى اسوأ. فى نفس الوقت دوس براحة على الفرامل عشان تهدى سرعة العربية بوجه عام مع العلم انك لو دست جامد و معندكش abs حتفقد السيطرة على العربية عشان الكاوتشات حتكون بتتزحلق مش بتلف و اثناء "زحلقة" الكاوتشات، محاولة تغيير اتجاه العربية بالدركسيون مبيكونش ليها اى تاثير.

طبعاً الحل الأسلم و ده اللى انا شخصياً بعمله، كل ما زادت سرعتك زادت نسبة ان العربية تعوم لأى سبب من الأسباب. طرق مصر بوجه عام معمولة انك متعديش 120 عليها و انا شخصياً لو إيه حصل أخرى 110 و لما الطريق يكون سامح بالموضوع ده، يعنى ميكونش فى عربية قدامى و قريبة و اطير وراها حتى لو هو ماشى على السرعة ده عشان لا قدر الله لو وقف يحخبط فيه يا العربية حتعوم منى و ممكن انط على الناحية التانية و ساعتها يبقى السرعة معملتش حاجة.

يعنى بكل بساطة فى التأنى السلامة و الفرق بين انك تمشى على 100 او 140 انك ممكن توصل بدرى دقائق بس نسبة احتمال وصولك اصلاً اقل بكتير. و ربنا يكفينا شر الحوادث

[M.FOUAD]

لو العربية مانيوال سقط نقلة مهما كانت سرعتك و ربنا يستر على الفتيس هتفرمل بالموتور و امسك الدركسيون كويس جدا جدا
بالنسبة للاتوماتيك محصلتش معايا قبل كدة و مش عارف هعمل اية صراحة

[N.a.j.d]

لو العربيه عومت معاااك اوعى ترفع الهاند او تدوس فرامل مره وحده كدااا
لازم تخفف السرعه عن طريق تدوس فرمله صغيره شويه وبعدها تغير عكسي وهكدا طبعا لو عربيه خدت شمال ح تاخد الدركسيون يميك وبراااااااااااحه وكدا بتمسك العربيه وبتسيطر عليها اكتر
ربنا يبعد عنا شر العربياااات

[N.a.j.d]

الاتومااتيك معنديش معلومات عنه خااللص عشان مجربتوش
بس اكيد المانيول بسيطر ع العربيه اكترمن الاتو

[ashouhdy]

شكرا ع الردود ليكم كلكم .... الفكرة انى ملحقتش ادوس فرامل نهائى اصلا اللى قدامى اللى فهمتة منة انة لقى حفرة قام كابس فرامل عشان يخدها براحة ! انا اصلا ملحقتش المس الفرامل كل اللى عملتة انى كسرت شمال بتاع نص لفة و طبعا ع السرعة دى 130 او حتة90 ياجماعة العربية حتعووم بس هو كان رد فعل و اعتقد ان صعب اوى اى حد فى رد فعل بياخد جزء من الثانية انة يحرك الدركسيون سنة عشان فرق السرعة ....
هى شمال ف يمين و خلاص قفدت التحكم نهائى فى العربية لف الدركسيون براحتك مفيش فرق.....

يعنى فى اللى قال فرامل براحة
وفى اللى قال شد الهاند
وفى اللى قال دوس بنزين تانى

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا سمعت ان دوس البنزين ممكن بظبط العجل من انة يبطل لف حوالين نفسة الكلام دة صح ولا غلط ؟

انا عن نفسى كبست فرامل بس طبعا بعد ما كانت ماشية بالعرض و كنت لافف الدركسيون عكس دوران العربية لحد ما وقفت ...

[ashouhdy]

fouad nor
حكاية تسقيط نقلة فعلا ممكن تجيب نتيجة اعتقد بس بصراحة مجتش ع بالى نهائى انا كنت مخضوض جدا :(

Ringo
حتى لو على 100 او 90 لو حصل اللى حصلى بعد الشر عليك حتعووم برضة؟؟
astradti,ahmedyehia,horas300

شكرا للمشاركة و يتهأيلى موضوع الABS يفرق بس لو كنت ضربت فرامل الاول و بعدين لفيت الدركسيون ... لكن العكس ذى اللى حصل معايا اعتقد مش حتفرق كتيير

[ashouhdy]

والله طلعت فدماغى انى انزل اشوف ارض فاضية واسعة و اجرب كل الطرق بعد اللى شفتة

[Eng.Geo]

اللانوس علمتني اعمل ايه
وده بسبب غباء فراملها
انا وانا بفرمل بعمل نفسي كأني بكارك ( فكرة عمل ال abs )
والحكاية ده في حالتين : بلف او العجل خلاص هيقفش
وده بتحمي الي حد كبير من العومان

[yahiahelaly]

العربيه عومت مني مرتين
مره كانت باخد ملف على سرعه 70 بس هوة كان شديد شويه وتقريبا فية مياه في الارض وشعرت فرامل ويمين في شمال في يمين ومشيت بعرضها لغاية ما بستر ربنا وقفت بعرض الطريق في شارع حيوي جداجدا جدا في عز الذروة كانت تقريبا 1.5 الضهرومحصلش حاجة
مره تانية كنت ماشي لوحدي الفجر وخير الله ماجعله خير قولت اشوف خبار التيل الي ورا ايه لان المكانيكي قلي فرب يخلص
قومت على سرعه 30 او 40 رافع الهند تكين بلضبط وهووووووووووووب مراجيح يجدعاااااااااااان يخبطها في الرصيف يا في صف عربيات راكن اتكلت على الله ودخلتها في الرصيف
والخساير شداد وشمعدان الحمد لله الصاج محصلوش حاجة غير حاجة بسيطه في العتب
والسبب وجود مياااااااااااااااااااااه في الارض مع ان الكاوش كان جديد بس المياه الخفيفه اشد تاثيرا من الكتيرة
ومن واقع خبرتي في التعويم سيطر على الدركسيون بقدر الامكان وبلاش فرامل غير لما تهدى العربية وتدوس دبرياش عشان تفصل الموتور
وفي ناس اعرفهم [OVERLINE]بتطبل العربية[/OVERLINE] وده غلط لان الدركسيون هيتقل واحتمال يقف كذالك الفرامل شكرت كده