مشاكل فى بيجو 301 ورد فعل التوكيل

[damasry]

السلام عليكم ورحمة الله

صديقى اللى معاه العربية حصلت معاه مشكلة فى العربية والمشكلة دى حصلت مرتين قبل كده فى العربية، مرة وهى 4 الاف كيلو وكسر ومرة وهى 5 الاف وكسر.

اول مرة راحت لوحدها ومرحش التوكيل بعديها وتانى مرة

المشكلة بتحصل لما العربية بتكون راكنة بليل والصبح يجى يدورها يلاقى صوت مروحة العربية عالى اوووووى ومش عايزة تقف وطالعله رسالة معناها Engine Failure

كان بيبطل العربية ويسيبها 10 دقايق كده المروحة تفضل شغالة كام دقيقة وبعدين تقف، ويسيبها لل10 دقايق ويدور متظهرش تانى.

عملتها معاه اول مرة زى ما قولت والعربية عاملة 4 وشوية ومظهرتش تانى لحد ما ظهرت تانى مرة بصورة اوحش.

تانى مرة فى ال5 الاف وشوية نفس الموضوع اتكرر بس المروحة مش عايزة تبطل وطولت لحد ما فصلت ولمبة الايرور ظاهرة مش عايزة تروح من العربية، طبعا حجز مع التوكيل ونصحته بفرع غمرة بناء على نصيحتكم هنا، وقالوله تعالى فى اى وقت بدون حجز وها تدخل على طول.

راح التوكيل واستقبلوا العربية وقالولها ها نحطها على الكومبيوتر ونشوف فيها ايه، طبعا هو واصل 11 ماشى 5 من هناك.

غيروا سوفت وير العربية وقالوله دا عيب ظهر وحصل فى كام عربية واحنا بنغير السوفت وير وبيتم حل المشكلة.

وفعلا غيروا السوفت وير والمشكلة راحت لكن فوجئت بعديها انه جاى يقولى اسمع كده صوت العربية وقولى مش صوتها كده عالى عن الاول!!!

وفعلا صوت العربية كان عالى شوية بالنسبة للى متعود على صوتها، وبعديها لقيته بيقولى الار بى ام بقى يعلق منه ساعات وميرداش ينزل تانى.

وراح تانى للتوكيل وبردو دخلوها على الكومبيوتر وقالوله خلاص عالجنا المشكلة وان شاء الله مش ها تظهر تانى.

طبعا اول مرة انا كلمته قولتله خد ورقة تثبت المشكلة اللى العربية دخلت بيها وقالوله ممنوع.

تانى مرة صممت انه ياخد ورقة وقولتله خليهم يصوروا الJob بتاع العربية وفعلا اصر انها يصوروها ليه.

================================================== ======

مشكلة تانية موجودة فى العربية من اول يوم وهى مش تشغيل التكييف الهوايات اللى تحت الزجاج الامامى بتاعة الDemisting بتطلع هواء رغم انها مقفولة وده بيقلل من كفاءة التكييف شوية.

فى صيانة ال2500 اللى تمت فى فرع صلاح سالم كنت مع صديقى وقولنا للمهندس على المشكلة قالنا فى صيانة ال10 الاف ها نعيد برمجة وحدة التكييف.

لما صديقى راح المرتين دول وقالهم على المشكلة قالوله انها مشكلة فى العربية ومش عارفين يحلوها وبعتوا لفرنسا عشان تلاقى حل ولما يتم الرد عليهم ها يبعتوله.

================================================== =====

انطباعى عن التوكيل انه مش بيهرب من مشكلة وبيحاول يحلها رغم انه بيتبع سياسة عدم تفهيم العميل سبب المشكلة ايه.

[kar!m]

للأسف كل حاجة في مصر بايظة .. و خصوصا احترام العميل و اعطاءه حقة .. مش فاهم ازاي يرفضوا يدوله تقرير بمشكلة كانت عنده و اتصلحت!

[ابو هنا]

ربنا يستر وتتحل هذه المشكلة الخطيرة قبل ما استلم

[Hema_Basha]

غريبة اوي الحكاية دي العربية معايا من شهر 7 ومحصلش حاجة زي دي خالص

[Silent~Dream]

اكيد فى حاجه غلط فى العربيه و عيب تصنيع ولازم تفضل معاهم لحد ما تعرفوا فيه ايه و يتغير فى الضمان

[sonybony]

توكيلات مصر علي قدها للاسف

[Akram.Gamal]

المفروض حضرتك و انت بتدور العربيه و خصوصا الصبح
تلف المفتاح فى الكونتاك لما لمبات التشيك تنور و تطفى و بعدين سيبها ثانيه او اتنين و دور
و ان شاء الله مش هتحصل ..
اما بالنسبه لحوار التكييف ده انا بقفل الهويايات خالص .. و لكن بفضل سامع صوت الهواء و بحس فعلا انه جاي من قدام من عند الهوايات الى تحت الازاز

[damasry]

المفروض حضرتك و انت بتدور العربيه و خصوصا الصبح
تلف المفتاح فى الكونتاك لما لمبات التشيك تنور و تطفى و بعدين سيبها ثانيه او اتنين و دور
و ان شاء الله مش هتحصل ..
اما بالنسبه لحوار التكييف ده انا بقفل الهويايات خالص .. و لكن بفضل سامع صوت الهواء و بحس فعلا انه جاي من قدام من عند الهوايات الى تحت الازاز

اكيد عن نفسى مش بدور على طول وبستنى طلمبة البنزين تسحب وتضخ البنزين للرشاشات.
واعتقد صاحبى بيعمل نفس الكلام، رغم ان اللى حضرتك بتقول عليه ملوش اى علاقة بالمشكلة اللى بتحصل.

بالنسبة للتكييف فحضرتك مش فاهم يعنى ايه بتقفل الهوايات خالص؟؟؟ تقصد انك بتكون قافل التكييف وقافل الهوايات وبردو بتسمع صوت الهواء جاى من الهوايات الى تحت البرابريز؟؟؟

لو اه يبقى معنى كلامك ان حتى سيستم ال Recycling مش بيتقفل وبيجب هوا من بره.

وكلام التوكيل انه مشكلة فى العربية وموجودة فى عربيات كتير ومستنين حل ليها من بره وياريت كل ملاك ال301 يشوفوا المشكلة دى موجودة عندهم ولا لأ.

[Ahmed Amin]

تكييف البيجو عموماً بما فيهم ال 307 وال 308 وال 508
لما بتقفل التكييف وبيكون موديل التكييف تاتش بيكون عامل Recycle للهواء جوا العربية أوتوماتيك,,
وبيدخل نسبة هوا صغيرة من بره عشان يحافظ علي تجديد الهواء جوا العربية والتنفس بشكل طبيعي وأنت قافل الأزاز كله.

وطبعاً الهواء بيعدي من فلتر الهواء, يعني مش هيدخل عفرة ولا تراب,,
بس لو الجو فيه دخنة أووي برة هتشم ريحة دخان بسيطة مش زي اللي برة العربية.

فا دا مش عيب في ال 301 تحديداً,, ودا التصميم بتاع التكييف في البيجو عموماً.

الموضوع دا طبيعي وموجود في ال 307 وال 308
وحتي مع زملينا أسلام معاه 508 وقال نفس الموضوع.

http://www.nilemotors.net/Nile/3875295094-post15.html

وبالنسبة للمشكلة الأولي دي في الغالب بوجيهات مرطبة وهتتغير في الضمان,
لأنها كانت ظهرت مع ناس قبل كدا وراحت بتغير البوجيهات.

[damasry]

تكييف البيجو عموماً بما فيهم ال 307 وال 308 وال 508
لما بتقفل التكييف وبيكون موديل التكييف تاتش بيكون عامل Recycle للهواء جوا العربية أوتوماتيك,,
وبيدخل نسبة هوا صغيرة من بره عشان يحافظ علي تجديد الهواء جوا العربية والتنفس بشكل طبيعي وأنت قافل الأزاز كله.

وطبعاً الهواء بيعدي من فلتر الهواء, يعني مش هيدخل عفرة ولا تراب,,
بس لو الجو فيه دخنة أووي برة هتشم ريحة دخان بسيطة مش زي اللي برة العربية.

فا دا مش عيب في ال 301 تحديداً,, ودا التصميم بتاع التكييف في البيجو عموماً.

الموضوع دا طبيعي وموجود في ال 307 وال 308
وحتي مع زملينا أسلام معاه 508 وقال نفس الموضوع.

http://www.nilemotors.net/Nile/3875295094-post15.html

وبالنسبة للمشكلة الأولي دي في الغالب بوجيهات مرطبة وهتتغير في الضمان,
لأنها كانت ظهرت مع ناس قبل كدا وراحت بتغير البوجيهات.

شكرا على شرح فكرة عمل التكييف والRecycling فى العربيات البيجو :)

يا احمد انا بتكلم فى مشكلة فى تكييف العربية مش فى الDefault بتاع كومبيوتر التكييف انه بيكون مفعل خاصية تدوير الهواء وبيجيب هواء من بره إلا لو انا قفلته بنفسى.

المشكلة ان لما صاحبى بيكون قاااافل اوبشن تدوير الهواء ومشغل التكييف ومحدد اتجاه الهواء يطلع من الهوايات الامامية فقط، اللى بيحصل ان نص الهواء بيطلع من الهوايات الامامية والنص التانى بيطلع من الهوايات اللى تحت البرابريز.

نفس الموضوع وهو قاااافل اوبشن تدوير الهواء وقافل التكييف ومشغل المراوح ومحدد اتجاه الهواء يطلع من الهوايات الامامية فقط، اللى بيحصل ان نص الهواء بيطلع من الهوايات الامامية والنص التانى بيطلع من الهوايات اللى تحت البرابريز.

بالنسبة لموضوع البوجيهات المرطبة فممكن تسبب مشكلة والعربية دايرة عشان الحرق مش ها يكون مظبوط، لكن المشكلة كانت بتظهر اول ما يفتح الكونتاكت.

على العموم لو المشكلة حصلت تانى قبل صيانة ال10 الاف ها اروح معاه واقولهم على موضوع البوجيهات دى.

[amrelsaqqa]

ماله التكييف المانيوال البكر الحلو ده ، زي الفل والله
على فكرة انا ملاحظ شكاوى عامة من التكييف التتش في كل العربيات مش بيجو بس ، من اول الاوكتافيا مرورا بالاسترا ودلوقتى الـ 301

[Ramy Hazem]

ماله التكييف المانيوال البكر الحلو ده ، زي الفل والله
على فكرة انا ملاحظ شكاوى عامة من التكييف التتش في كل العربيات مش بيجو بس ، من اول الاوكتافيا مرورا بالاسترا ودلوقتى الـ 301

ايه المشاكل الي في التكييف التاتش ؟؟ علشان الواحد يبقي عامل حسابه
وهل المشاكل دي ليها حل ولا هنضطر نتعايش معاها ؟؟؟

[amrelsaqqa]

ايه المشاكل الي في التكييف التاتش ؟؟ علشان الواحد يبقي عامل حسابه
وهل المشاكل دي ليها حل ولا هنضطر نتعايش معاها ؟؟؟

ماهو انا مش معايا التتش انا معايا مانيوال ، بس حاسس الناس بتشتكى منه في اماكن كتير ، يعنى واحد يقوللك الظبطة اللى بظبطها ما بتتسيفش ، واحد يقول الهوا بيدخل من فوق ومن تحت ، وهكذا ..

[Ramy Hazem]

ماهو انا مش معايا التتش انا معايا مانيوال ، بس حاسس الناس بتشتكى منه في اماكن كتير ، يعنى واحد يقوللك الظبطة اللى بظبطها ما بتتسيفش ، واحد يقول الهوا بيدخل من فوق ومن تحت ، وهكذا ..

انا افتكرته مش شغال او بيعطل كتير او ليه مشاكل قوية
يعني لو علي الحاجات دي ممكن تسال التوكيل فيها يمكن يكون ليها ظبطة في السوفت وير بتاع السيارة
ولو مفيش يبقي نتاقلم معاه بس
احنا ما صدقنا استقرينا علي سيارة ماركة حلوة واوروبي وامكانيات حلوة وسعر مناسب

[damasry]

المشكلة حصلت تالت وانا فى التوكيل دلوقتى بنشوف حل ليها