أفيدونا ياأهل الميجان

[dudu99990]

انا كان نفسي اشتري ميجان زيرو سألت ولقيت تحّذيرات كتييييرة
خلي بالك اوعي تجيب الاوتوماتيك فيه مشكله من اول الشكل الجديد 2005 و حتي اليوم بختك يابو بخيت
الكويلات بتتغير علي طوووول
علبه الدركسيون ضعيفة
الكارت بيهنج
عموما التركي فيه مشكلة صناعة دايما و حاجات غريبه المفروض ما تتغيرش تلاقيك بتغيرها
التوكيل محترم و بيغير اي حجه فورا بس العربية بتروح التوكيا عمال علي بطال
النصيحه كانت غريبه .. اشتري مستعمل عمر سنتين علشان تكون العربيه خاصت مشاكلها و كل اللي بايظ اتصلح

انا لسه العربيه عاجباني و نفسي اجيب 2008 بس خااايف

أفيدونا أفادكم الله

[pampino]

ياراجل اتوكل على الله كل دة كلام متواتر ومش صحيح السيارة الميجان بامانة اثبتت وجودها بس هنقول اية فى شعبنا

[Ramy_Tantawi]

السلام عليكم .
هاحاول على قد ما أقدر أجاوب على أسئلة حضرتك سؤال سؤال.

خلي بالك اوعي تجيب الاوتوماتيك فيه مشكله من اول الشكل الجديد 2005 و حتي اليوم بختك يابو بخيت

مشاكل الآوتوماتيك دي مشاكل سوفتوير والعكس هو اللي حاصل كان الأول الموديلات القديمه فيها مشاكل بسيطه لكن في السوفتوير الجديد اتحلت كمان الشكل الجديد ده بدأ ينزل السوق 2007 ....مشاكل الاوتوماتيك كلها مشاكل سوفتوير وحلها بسيط.

الكويلات بتتغير علي طوووول

الكويلات بتتغير على طول نتيجة مشكله او عيب تصنيع غير كده بيكون عمرها الافتراضي وعموماً الضمان مغطي العربيه 3 سنوات او 100 الف من أول 2008 وبالتالي مش معقوله هيكون الضمان 100 الف والطبيعي بتاع الكويلات اقل من المعدل ده . اي مشكله في الكويلات قبل 100 الف يبقى على الضمان وبيكون عيب تصنيع او مشكله عرضيه مش الطبيعي ان الكويلات بتتغير بسرعه.

علبه الدركسيون ضعيفة

دي ممكن تكون فعلاً نقول عليها ضعيفه شويه لئن فعلاً بتتغير كتير لكن برضه كل اللي غير علبة الدركسيون كان في الضمان فا غالبا ممكن تكون مشكله في الدفعه دي انا الحمد لله لم اعاني منها حتى الآن وانا كان معايا موديل 2006 ثم 2007 اعتقد ده راجع للطرق هنا وحلها اننا نحافظ عليها قدر الامكان مش اكتر .

الكارت بيهنج

عمرها ما حصلت معايا ولا حد قال هنا من الاخوه المحترمين مالكي الميجان ان الكارت هنج ابداً الكارت ما هو إلا ريموت لفتح وغلق السياره و ايموبلايزر لتشغيل السياره واطفاءها ايه اللي هيهنج فيه ؟ مفيش مشاكل مع الكارت ابداً عن تجارب كتير.

عموما التركي فيه مشكلة صناعة دايما و حاجات غريبه المفروض ما تتغيرش تلاقيك بتغيرها

التركي يا فندم تقفيل فقط لا دخل له في صناعه السياره بمعنى ان اجزاء السياره كلها فرنسي التركي ده ممكن يكون في الفرش والكاوتش والموكيت وبعض اجزاء الصالون غير كده كلها فرنسي فقط تركية التقفيل وبالتالي تغيير حاجات كتير ده ملهوش علاقه بانها تقفيل تركي لكن اوقات بيكون حظ سيء مش اكتر والتوكيل بيتخذ اللازم فوراً.

التوكيل محترم و بيغير اي حجه فورا بس العربية بتروح التوكيا عمال علي بطال

العربيه بتروح التوكيل كل 5000 كيلو وحرصا من التوكيل على سلامة السياره والعملاء نزل من شهور ان لازم كل 5000 كيلو السياره تروح التوكيل لعمل فحص مجاني كل 10.000 وإلا الضمان هيتأثر بمعنى ان 5000 مجاناً و 5000 حضرتك بتتحمل تكلفتهم وبالتالي فعلاً زيارة التوكيل قد تكون متكرره بس للمصلحه العربيه فعلاً من العربيات اللي عاوزه معامله خاصه ومحافظه باستمرار وده مش عيب حضرتك أول ما تتعامل معاها هيحصلك نفس اللي حاصل لينا وتقع في غرامها:) ومن نفسك هتلاقيك بتحافظ عليها وزيارة التوكيل ده حفاظاً على العربيه وما بيها من تكنولوجيا وامكانات كتيره فامحتاجه باستمرار كشف عليها وحفاظ مش أكتر ولا أقل.

آخر نقطه حضرتك ذكرتها طبعاً ماليش الحق في التعليق على النصيحه وبالطبع حضرتك لك كامل الحريه المطلقه لكن لو انا اللي بفكر هاقول العكس لئني اشتري عربيه جديده بضمان 3 سنين او 100 الف وتفضل معايا ان شاء الله الفتره دي كلها واي اعطال التوكيل والضمان متكفل بيها ان شاء الله بعد كده هاطمئن وهاكون عارف ايه فيها وايه اتغير ............ده رأيي الشخصي وهو خطأ يحتمل الصواب.

[sshafie]

انا هاقولك عن تجربة
العربية معايا من الزيرو من يونيو 2005 و عملت بيها 35000 كم
-غيرت علبة الدركسيون على 20000 كم و غالبا محتاجة تتغير تانى
-غيرت الكاوتش و الجنوط بسبب ضعفهم على 25000 كم
غيرت عامود الدركسيون على 30000 كم
-Softwear الفتيس اتغير 3 مرات تقريبا و مازال غير مريح بالمرة، النقلات بتخبط و بتنقل بدرى اوى...... اغلب الوقت انا بعملها مانيوال عشان ماحسش بكل ده
-التوكيل محترم و بيغير كل حاجة مجانا طول ما العربية فى الضمان بس عموما محترمين اوى
-الثبات ممتاز لحد سرعة 180 و بعد كدة مش قلق اوى. اقصى سرعة جبتها 200
-المساعدين ممتازين
-التكييف حلو بس محتاج وقت فى الاول
-الشنطة كبيرة و العربية عموما واسعة
-سعر اعادة البيع فى الارض بسبب سمعتها
-مرة فى التوكيل كان فى واحد معاه ال2007 و بيتخانق عشان الطنابير اتغيرت مرتين فى الضمان و باظت تانى رغم انى سمعت انهم عالجوا مشاكل ال 2005 فيها
اخيرا حاول تسأل حد معاه ال2007 و شوف اخبارها ايه

[sshafie]

اسف نسيت اقول ان عمر الكارت ما عمل اى مشاكل معايا

[Ramy_Tantawi]

أستاذ sshafie
ممكن حضرتك توضح بس ايه اعراض مشاكل علبة الدركسيون وعامود الدركسيون يعني هل في مشاكل بتبان مع حضرتك وبعدين اتغيرت ولا التوكيل كشف وقال محتاجه تتغير ؟ السؤال لئني للأمانه مش فاهم ايه هو عطل علبة الدركسيون أو أعراضه اقصد ولك جزيل الشكر يا فندم وجزاك الله خير عن نقل خبرة وتجربة حضرتك .

[sshafie]

-اعراض علبة الدركسيون كانت لما بكسر الطارة للاخر يمين او شمال كنت بسمع طقة جامدة
-اعراض عامود الدركسيون كانت بتبان فى المطبات الناشفة و الكات ايز و كنت بسمع صوت حديد بيخبط ف بعضه و الطارة تتهز جامد اوى

[Ramy_Tantawi]

أنا شاكر جداً لحضرتك .

[شاهين - بنز]

أنا ماركبتش الميجان كتير عشان أعرف عيوبها وأعطالها لكن حقولك تبعد عنها لسبب واحد وهو لو جبت العربية إنهاردة ب 140 وحصلت أي ظروف وحبيت تبيع العربية بعد شهرين حتخسر 40 ألف فخسارة جامدة أوي

[Ahmed Selim]

انا كان نفسي اشتري ميجان زيرو سألت ولقيت تحّذيرات كتييييرة
خلي بالك اوعي تجيب الاوتوماتيك فيه مشكله من اول الشكل الجديد 2005 و حتي اليوم بختك يابو بخيت
الكويلات بتتغير علي طوووول
علبه الدركسيون ضعيفة
الكارت بيهنج
عموما التركي فيه مشكلة صناعة دايما و حاجات غريبه المفروض ما تتغيرش تلاقيك بتغيرها
التوكيل محترم و بيغير اي حجه فورا بس العربية بتروح التوكيا عمال علي بطال
النصيحه كانت غريبه .. اشتري مستعمل عمر سنتين علشان تكون العربيه خاصت مشاكلها و كل اللي بايظ اتصلح

انا لسه العربيه عاجباني و نفسي اجيب 2008 بس خااايف

أفيدونا أفادكم الله

ممكن يا باشا تنفض للأشاعات اللى الناس اللى عمرها ما ركبت العربية بتطلعها وتشوف أعطال الميجان من تجارب ملاكها فى المنتدى على الرابط التالى

http://www.nilemotors.net/Nile/showthread.php?t=12198

ممكن كمان تشوف اللينك ده

http://www.nilemotors.net/Nile/showthread.php?t=14369

واللينك ده

http://www.nilemotors.net/Nile/showthread.php?t=22030

وبعد كده أحكم بنفسك

[fahd_628]

يا باشا متقلقش مفيش اى حاجة فى العربية كلها اشاعات و لو فية حاجة بيتغير فى الضمان و التوكيل بجد محترم جدا

و نفسى اعرف مين طلع اشاعة ان الكرت بيهنج ؟؟؟

دة زية زى اى مفتاح عربية بريموت ! اية الى حيخلية يهنج علشان شكلة كارت يعنى ؟؟

[Sharky]

خلي بالك اوعي تجيب الاوتوماتيك فيه مشكله من اول الشكل الجديد 2005 و حتي اليوم بختك يابو بخيت

أنا معايا الأتوماتياك موديل 2005 و مافيهوش مشاكل غير إنه بيحصل نتشة خفيفة بين الاول و التانى عند عدم إتزان السواقة من جانب السائق (يعنى بتجرى و تهدى فى فترات قريبة ) و دى بتحصل فى الزحمة فقط و يتم معاجتها بسوفت وير بيأخر النقلات غير كده الفتيس بتاعه زى الفل و ضمانه 100 الف كم .

الكويلات بتتغير علي طوووول

أنا غيرت أول واحد على 40000 الف كم يعنى بعد الضمان ما خلص و قام التوكيل مشكورا بعد مراجعة رينو فرنسا بتغيير الأربع كويلات القديمة بكويلات جديدة ذات عمر إفتراضى أعلى بدون مقابل .
يعنى فى خلال 3 سنوات و 40000 كم تم تغير عدد (1) كويل وا حد فقط يعنى مش عالطول !

علبه الدركسيون ضعيفة

هى ممكن تكون ضعيفة بس دا حال جميع العربيات الجديدة و دا راجع لشوارع مصر المكسرة و أنا عن نفسى لسع العربية دلوقتى التوكيل بيقولى فى بداية تغييير علبة دريكسيون و على فكرة أنا بره الضمان دلوقتى و التوكيل عرض عليه لما احب أغيرها بمبلغ 500 جم .

الكارت بيهنج

دى إشاعة منتشرة ليس لها أساس من الصحة

عموما التركي فيه مشكلة صناعة دايما و حاجات غريبه المفروض ما تتغيرش تلاقيك بتغيرها

ما حصلش الكلام دا معايا
أنا معايا موديل 2005 و تركى يعنى السيدان و ماغيرتش اى حاجة فى العربية و الحمد لله حتى الان غير الكويل و البطارية

التوكيل محترم و بيغير اي حجه فورا بس العربية بتروح التوكيا عمال علي بطال
النصيحه كانت غريبه

فعلا التوكيل محترم للغاية و أى حاجة بتتغير فى الضمان و عمرى ما حصل غن العربية راحت للتوكيل خارج مواعيد الصيانة الدورية