رائعه سيتروين - سى اليزيه الجديدة

[AlGazar2]

بسم الله الرحمن الرحيم

انا شوفت العربية فى المعرض انهارده العربية الوحيدة الى شدتنى فعلا رغم العربيات الاكثر من رائعه و الى تعقد الواحد فى عيشته

و قابلت الاستاذ جورج اسكندر و راجل قمه فى الذوق و الاخلاق و خنقته من كتر الاسئله و امشى و افتكر حاجات و ارجع اسئله تانى اكتر من مره لاكتر من ساعه تقريبا و صورت فيديو و صور بس مش معايا دلوقتى

و الى طلعت بيه ان
العربية نازله 3 فئات اتنين زى بعض كومفورت ( مانيوال / اوتو ) و فئة اكسكلوسف اوتو

اسعارها 105 و 115 و 125 بالترتيب و الكلام ده خلال فتره المعرض و لسه مش عارفين هتزيد بعد المعرض ولا لا بس الاستاذ جورج قالى انها مش هتزيد دلوقتى على طول

مواصفات الفئة الكومفورت
ايرباج للسائق - التحكم فى ارتفاع كرسى قياده السائق - tungstene trim - مقابض داخلية كروم - مقاعد خلفية 2/3-1/3 - closed glove box - مصابيح ضباب امامية - ريموت كنترول - تكيف هواء بكر - radio with integrated screen ( 2 speakers) - abs - جنوط 15 بوصه حديد و معاها طاسات و استبن 15 - المرايات و المقابض الخارجية بلون السياره - 4 زجاج كهرباء - interior mistral birdy cloth

الفئة الاكسكلوسيف تزيد عن العادية
ايرباج للراكب الامامى - مسند يد - جرابات خلف المقاعد الامامية - عجلة قياده من الجلد - تكيف اوتوماتيك - جنوط 15 اسبور - بلوتوث - chrome look pack ( windows trim) - radio with deported screen + connecting box ( 4 speaker ) - sensor park - ولاعه سجائر

و العربية المعروضه هناك شوفت فيها زرار ال esp و سألت الاستاذ جورج قالى ان الفئات كلها فيها
abs - ebd - esp - eps و ان الماتور بتاعها هوه هوه بتاع السيتروين c4 مع زياده العزم و القدرة الحصانية

تقييم عام للعربية

العربية بجد واسعه جدا جدا و قاعد فيها مستريح جدا ( الكروز مكانتش مريحانى زيها ) انا من اصحاب الوزن الثقيل يعنى طول بعرض بارتفاع و كنت قاعد فى العربية و مرجع الكرسى على الاخر و فى تقريبا حوالى 15 سم او اكتر ورايا - العربية على عكس النظره الخارجية بانها ضيقة الا انها اوسع من الار بى و الالنترا و شنطتها بحر بكل ما تحتويه الكلمة من معانى مش عارف جايبين المساحات الداخلية دى منين 506 ليتر

الماتور نفس ماتور الc4 بس حسنوه شويه
4 سلندر / 16 صباب متغير التوقيت ( حلوه متغير التوقيت دى ) / 115 حصان عند 6050 لفه فى الدقيقة / عزم 150 نيوتن.متر على 4000 لفه فى الدقيقة / متوسط استهلاك الوقود 6.6 ليتر لكل 100 كيلو / التسارع من 0:100 فى 9.4 ثانية للمانيوال و 10.8 للاوتو ( على اساس ان مصر فيها طرق تسمح ) / اقصى سرعه 188 / خزان الوقود 50 ليتر / الشنطة 506 ليتر / الوزن 1165 كيلو و ضمان العربية 3 سنوات او 100 الف كيلو متر

العربية الفئه الاعلى الخامات الداخليه عجبتنى اكتر من الفئة الى قبلها خصوصا التابلوه على الرغم من انه بيلمع بس احسن من الفئة الى قبلها

تقفيل العربية حلو جدا و تقفيل الماتور حلو برضه على الرغم من شكل الهيدر بتاع الشكمان معجبنيش حاسه مش بتاع عربيه جديده شكله مصدى و قديم و سألت المبيعات قالى عشان ده حديد زهر مصدقتش بس بلعتها عادى

العربية دى لو استمرت بالسعر ده و بالمواصفات دى و خصوصا abs - ebd - esp - eps هتاكل عربيات كتير جدا فى السوق و خصوصا الاوبترا الى بقت ب 112 و الار بى و الالنترا مسألتش على سعرها عشان متعصبش على حد من الى فى هيونداى - الريو و السيراتو الى بقت ب 186 الف :) يعنى بتمن ال ds4 ان مكانش اكتر :) و اللينا الجميله و البونتو العظيمه الى رفعوا سعرهم جامد جدا واحده بماتور 1600 للاوتو و 1400 للمانيوال و التانية 1400 و 77 حصان على ايه الله اعلم و ده كان رأى اكتر من 2:3 من الى ركبوا العربية هناك لانى قعدت عند العربية دى حوالى ساعه و نص او ساعتين و لفيت المعرض كله و رجعت لها تانى عشان اكمل استطلاعاتى عليها و الخوف كله كان من توكيلها و صياناتها و قطع غيارها و اعاده البيع

[Waleed_Fathy]

انا روحت المعرض النهارده مخصوص علشان اتفرج عليها
العربيه هايله بالنسبة لسعرها و انا شايف انه لو سعرها ما زدش عن كده هيكون ليها السبق عن كل السياره اللي فى فئتها
لانها من رائي افضل من الاكسنت و النيسان الصني و كل العربيات اللي فى تفس الفئه

[Hossam_hassan4]

بس الesp قالي مش هاينزل بيها ؟! قال انه موجود في العربيه في المعرض بس اللي هتتباع مافيهاش esp

[AlGazar2]

بس الesp قالي مش هاينزل بيها ؟! قال انه موجود في العربيه في المعرض بس اللي هتتباع مافيهاش esp

انا قالى انه هينزل بيها بس و هتنزل بتكييف ديجيتال و مسند يد غير الى معروضه

[Waleed_Fathy]

بس الesp قالي مش هاينزل بيها ؟! قال انه موجود في العربيه في المعرض بس اللي هتتباع مافيهاش esp

هو ال esp موجود فى عربيات فى نفس الفئه تانية؟؟؟؟؟؟

[A.Adel]

ال brochure بتاع العربية فعلا فيه تكييف ديجيتال و مسند يد
بس زي ما حسام قال , فعلا مفيش فيه ESP

[A.Adel]

هو ال esp موجود فى عربيات فى نفس الفئه تانية؟؟؟؟؟؟

أقرب عربية فيها ESP هي c3 picasso

الفئة دي كلها مفيهاش و حتى الفئات الكبار منها في الكوري والياباني مفيهمش

[A.Adel]

دي صورة من ال brochure

[AlGazar2]

البروشور فعلا مفيهوش بس انا بقول الاستاذ جورج اسكاندر قالى انه موجود لانى شوفت الزرار بتاعه و قالى عليه انه موجود

و حتى لو مش موجود الهيونداى و الكيا حتى الهاى لاين بتاعهم مفيهوش esp
و فى السعر ده مفيش عربيه فيها فعلا abs and 2 airbag

[AlGazar2]

و ده المواصفات الى فى البروشور بتاعها





و مصورها فيديو من الخارج و الداخل بس مش معايا دلوقتى ان شاء الله لما يجيلى هرفعه على اليوتيوب و انزله هنا

[khaled_afandy]

البروشور فعلا مفيهوش بس انا بقول الاستاذ جورج اسكاندر قالى انه موجود لانى شوفت الزرار بتاعه و قالى عليه انه موجود

و حتى لو مش موجود الهيونداى و الكيا حتى الهاى لاين بتاعهم مفيهوش esp
و فى السعر ده مفيش عربيه فيها فعلا abs and 2 airbag

الصنى بها abs and 2 airbag بس يصراحة الصاج بتاعها ضعيف قوى و الأكصدام راكب على الهواء و ده خلانى اصرف نظر عنها!!!

[A.Adel]

البروشور فعلا مفيهوش بس انا بقول الاستاذ جورج اسكاندر قالى انه موجود لانى شوفت الزرار بتاعه و قالى عليه انه موجود

و حتى لو مش موجود الهيونداى و الكيا حتى الهاى لاين بتاعهم مفيهوش esp
و فى السعر ده مفيش عربيه فيها فعلا abs and 2 airbag

هو موجود في العربية المعروضة فعلا
بس دي مش للبيع

المواصفات اللي جاية مختلفة بدليل عدم وجود التكييف الديجيتال و مسند اليد

[A.Adel]

الصنى بها abs and 2 airbag بس يصراحة الصاج بتاعها ضعيف قوى و الأكصدام راكب على الهواء و ده خلانى اصرف نظر عنها!!!

عربية فرنساوي تقفيل اسباني ,إزاي عايز تقارنها يا راجل بعربية هندي و تقفيل مصري
و فيها 40 % تقريبا مكونات مصري

سيبك من ده كله
عربية 1600 cc و 115 حصان (net)و فتيس ستبترونيك
و الصني 1500 و 99 حصان (مش net على فكرة كمان )و فتيس auto

ده غير شكل الصني و تابلوها اللي من التسعينات
و كمان قطع غيرها مش متوفرة و دي حصلت مع كذا عضو هنا
و كمان عليها overprice اد كده

بصراحة أنا مش شايف فيه وجه للمقارنة و ده مش تحيز واللهِ

[AlGazar2]

هو موجود في العربية المعروضة فعلا
بس دي مش للبيع

المواصفات اللي جاية مختلفة بدليل عدم وجود التكييف الديجيتال و مسند اليد

ايوه يا باشا انا شوفتها فى العربيه المعروضه و لما البنات الى واقفه مقلوهاليش فى ضمن الاوبشن و مش عارفين اذا كان فيها abs ولا لا افتكرت انهم مش فاهمين حاجة فى العربيه و كان الاستاذ جورج لسه مجاش لما جه سألته قالى ان فيها abs + ebd + esp + eps و هيبقى فيها تكييف ديجيتال و مسند يد و ده اول مدخلت العربيه و ركبتها و ملقتهوش اتخنقت من العربيه جدا بس عرفت بعد كده انها هاتنزل بيه

بس لو مفيهاش esp فده ميعيبهاش عشان سعرها مناسب جدا حتى لو مفيهاش

و فعليا مينفعش العربيه دى تتقارن بالصنى عشان سعرهم قريب

الصنى ب 112 تقريبا و تجميع مصرى يعنى معليهاش جمارك تقريبا يعنى مضحوك علينا فيها للصبح كاى عربيه تجميع مصرى ده غير انها هندى اساسا

و شكل الصنى من جوه و من بره جنب السيتروين مينفعش اساسا احطهم فى مقارنه مع بعض يبقى حرام و الله

عربيه تحفه و شكلها من جوه حلو جدا و من بره شكلها رائع كعاده سيتروين اقارنها بالصنى الجديده الى شكلها عربيه غريب و وشها مش لايق على ضهرها

ده غير وسع السيتروين الرهيب جوه بالنسبه ليا وزنى 150 و طولى 175 قاعد جوه مستريح جدا جدا و ده ملقتهوش فى عربيات كتير جدا تقريبا منها الصنى الجديده مش متأكد اوى و شنطتها البحر الى ورا دى ممكن ادخل افرد جواها لو تعبان شويه

[monamize4]

اكيد هتدخل ف لعبة الاوفر برايس