رابطة مالكى الويرا (2) فيد وأستفيد .

[budokonta]

الحمد لله انك رديت عليا يا استاذ يوسف انا فعلا وديتها على الكمبيوتر بس بعد ما ركب الفيشة و قعد يجرب ملقاش سوفت وير للعربيه عنده و قالى غير البوجيهات و غيرتها
2- العمة دى هو شاورلى على الجزء اللى فى اعلى الموتور من ناحية الزجاج و اللى فيه البوابة وقالى كل ده لازم يتغير علشان تريح نفسك؟
3- لما لمبة الcheck engine تيجى تطفى بحس ان العربية زى ما يكون جالها زغطة واحدة بالذات و انا على سرعة منخفضة لكن لما بأكون على سرعات كبيرة مش بأحس بيها
4- بيقول حساس اللى على الجكمان
من فضلك يا استاذ يوسف هو كد العربية فيها مشكلة كبيرة ؟ انا رحت ل 3 ميكانيكية و محدش قالى غير يا تغير يا تكبر يا سيبها مش حتعمل حاجة و امبارح لقيت الموتور كمان عمال يعلى و يوطى مع نفسه راح شايلى فاصل حاجة عاملة زى الفيشة كدة (ورا البوابة و قريبة جدا من صدر العربية ) و غيرت تانى سيور التكييف و الباور و الدينامو بس برضه العربية على السلانسيه صوتها عالى مضايقنى انا اسف بس انا مش عارف اعمل ايه و الله و الموضوع شاغلنى مش بحب امشى و العربية مش مضبوطة

[yousefsemsem]

بص ياباشا هي لا مشكله كبيره ولا حاجه وباذن الله كله بيتظبط
اولا ديه السوفت وير بتاعها مش بروتون ديه لانسر بطه لانها موديل 2000 فخليه يخش علي الانسر
العمه ايه اللي خليها تتغير ده معلشي بقي المكانيكي مش بيفهم لانها لو مكسوره والخرطوم بايظ بيتغير
حساس الشكمان ما تعرفش انه بايظ الا لو قرصت علي العربيه او عديت ال100 اللمبه تنور لو مابتعملش معاك كده يبقي سليم وهتلاحظ برضه اكل بنزين
العلو والوطو بتاع العربيه البوابه عاوز تتنضف تنضيف كويس وهترجع تتظبط تاني ماتخافش منها وايه عرفهم ان المانفولد والبوابه عاوزه تتغير من غير كشف عليها
ولو ماوصلتش لحاجه تعالي طنطا او روح القاهره في الحرفين اللي اقربلك وهنظبطك باذن الله وتبقي ماشي مرضي من العربيه وادائها

[budokonta]

الف الف شكر يا استاذ يوسف ربنا يطمنك يعنى انا ممكن اسافر بالعربية انا من اسكندرية و اكيد طنطا اقربلى ان شاء الله لو موصلتش لحل هنا اجرب فى طنطا
-فعلا ساعات لما اقرص على العربية او اجرى جامد ال check engine تنور بس مش تماللى و لما تيجى تطفى تعمل نتشة كده
- بالنسبة للبنزين انا بمون 92 و هى حوالى بتعمل100 كيلو/10 لتر
-الزيت موبيل/ 5000
-هى الفيشة اللى شالها البنى ادم ده ارجعها و لا اسيبها مفصولة و هى ايه شغلتها؟

[budokonta]

اه نسيت اقولك امبارح رحت لواحد و انا راجع من الشغل كل الناس بتشكر فيه وكشف على العربية قالى ما تقلقش و انسى موضوع تغيير البوابة و متقلقش من الصوت العالى ده سهل يتضبط لكن انت عندك التاكيهات عاوزة ضبط (حكاية جديدة) يعنى ايه و ازاى بيتم ضبطها انا عمرى ما عملتها قبل كده فى عربية كانت معايا

[yousefsemsem]

ظبط التكهات سهل ممكن تعملها وتجرب وخليه ينضفلك البوابه ويظبطلك الدمبا ورجع كل تلفيش مكتنها

[m_suez_m]

شكرا يا استاذ يوسف على الرد
بس كنت عاوز اعرف اية وظيفة حساس الكامة وحساس الهواء اللى فى العمة والحساس اللى فى صدر العربية علشان مافيش ميكانيكى عندى فاهم هما بيعملو اية

[ahmed_h_g]

بعد إذنك يا أستاذ يوسف

حساس الكامه له علاقه بالتوقيت زى حساس الكرنك وحساس الهوا اللى فى العمه بيقيس درجة حرارة الهواء الداخل للموتور وعلى أساسه الكنترول بيقدم أو يأخر الحرق على حسب كثافة الهواء ودرجة حرارته وايه الحساس اللى فى الصدر اللى تقصده ؟
ياريت لو عندك صوره ليه ترفعها
عالعموم مشكلتك فى حساس الأيدل وال tps

[yousefsemsem]

لا اذن ولا حاجه يااستاذ احمد احنا بنتعلم منك ياباشا احنا مانقدرش نتعداك يابيه انت المهم هنا
والله لولاك مكنتش اتعلمت حاجه انت اللي جمدت قلبي ان العب في الحاجه مااخافش انت الكبير بتاعنا ياباشا

[ahmed_h_g]

الله يكرمك ويبارك فيك
ويارب كل اللى بيدخل الرابطه علشان يقرأ فقط ومش هاين عليه ينزل بموضوع جديد على الأقل أو يكتب مشاركه أو يعمل حاجه جديده
ولا خايف على الكيبورد
على العموم مفيش حاجه بتستخبى الحمد لله

[yousefsemsem]

ياريت كل واحد يشارك ولو حتي بغسيل العربيه ههههههههههههههههههههه اهو نحس بتفاعل معانا ومانحسش اننا مكانكيه ههههههههههههههههههههههه

[ahmed_h_g]

هههههههههههه

[estemalek]

ازيكم يا شباب
انا كنت بسال فين فلتر التكييف في العربية انا معايا ويرا 2000 علشان عايز افكه انضفة هوا و التلاجة

اول امبارح راجع من المعادى لقيت العربية بتعمل حاجة غريبة علي السلانيسة و انا واقف لما اكسر الدركسيون الاقي لمبة الديناموا بتنور و الدركسيون تقيل قوي و البطارية فاضية فكرت السير مرخي كلمت الكهربائي قاللي هتهالي ابص عليها وديتهاله شافها و قالي دى طنبورة الكرنك مفوته قلتله ازاي ماهي يتلف الديناموا و طرمبة الباور قالي هيا بتلفهم بس مش بالسرعة المطلوبة (بطيئة يعني) فراح مزود بنزين شوية لكن الطرمبة برضو بطيئة زود تانى برضو الطرمبة ماشية بنفس السرعة فقالي روح لميكانيكي خليه يغيرلك طمبورة الكرنك رحت لميكانيكى بص علي العربية و قالى الكهربائي كلامه مظبوط لان الطمبورة دي طمبورتين جوا بعض و بينهم كاوتش الكاوتش اللي بينهم دا نشف فقالي يا اما تتغير يا اما نلحم الطمبورتين مع بعض روحت سألت عليها لاقيتها بتاعة الاكسيل ب 100 جنية بس شكلها معفن قوي رجعتله قولتله نلحمها لحمها و ركبها و الشحن و الباور اشتغلوا تمام

[yousefsemsem]

تمام الله ينور بس قدام غيرها علشان ماتكسرش منك عملتها معايا مره في رمضان اللي فات وانا نازل من الدائري وراجع طنطا وقبل الفاطار بساعتين واتزليت لواحد في قليوب لغايه لما ظبطها ولدعني في تمن تصليحا بس الحمد لله
اا العربيه مالهاش فلتر تكيف ولو فكيت الكويل تنضفه لازم هتشحن

[budokonta]

استاذ احمد و استاذ يوسف انتم ناس راقية و محترمة و لكم جزيل الشكر على معلوماتكم الوفيرة اللى بتنفع امثالى من قليلى الخبرة و المعرفة بأسرار البروتون

[m_suez_m]

شكرا يا استاذ احمد على الرد
بس حساس الايدل وحساس الtps فى 2004 جوة البوابة ازاى انضفهم او اغيرهم وبعدين انا غيرت البوابة من شهرين واكتفتها والعربية زى السحب قليل صوت الموتور على فى رجرجة على الغيار الثانى مع تسقيفة لو كبست بنزين بعد مطب بس الميكانيكى لما بيفتح الكبوت ويزود من البوابة بنزين بتعد معاه زى الفل العيب يظهر لما تركب العربية وتمشى بيها
مع العلم انى غيرت طقم دبرياج كامل مرتين وبوابة وقواعد موتور ممكن يكون العيب فى حساس الكامة او حساس عمة الهواء او القنطرة الطولية عندى فيها خبطة بسيطة مش عارف
اسف على الاطالة....