منتدى الواجا

[mnmmm]

واجا 2007 اتوماتيك

[islamnabil]

ياترى حد حصل معاه الموضوع ده او يقدر يفيدني فيه

http://www.nilemotors.net/Nile/274534-a.html

[abdohod]

بص يا باشا ... على معلوماتي بيقولوا ان في حاجة بتسخن في المرش (تقريبا المخدات أو الموبينة) وبتلزق مع السخونية ولما بتبرد بترجع تفك تاني والعربية بتدور .... قول الكلام لكهرائي شاطر وخليه يفكلك المرش اهو منه تتأكد ومنه تنضف المرش بتاعك

[Sindibad]

انطباعاتى عن الواجا بعد 11000 كم

انا معايا واجا 2010 اتوماتيك واشتريتها فى 2011 زيرو وبقى ليها حوالى 8 شهور معايا وانطباعاتى سجلتها من فترة وحبيت اسجل بعض الأنطباعات الأخرى

1- هى سيارة ليست جديرة بالأهتمام لأنها فعلا مش مميزة فى شىء
2- فراملها ضعيفه ولازم تدوس جامد علشان تلحق نفسك يعنى لو واحده سايقة لازم تتمرن على عضلات الرجل قبل ما تركب
3- خشنه خشنه خشنه جدا وصوت الموتور عالى وعلى سرعة 120 تحس انك ماشى 180 لأن صوت الموتور عالى
4- عزل الكابينه مش كويس وبحس بحرارة اسفل رجلى من الشكمان أو الموتور مش عارف
5- لأن العزل مش تمام فصوت الهواء الخارجى عالى و معامل مقاومة الهواء عالى ولذلك لازم تعلى الكاسيت على السرعات العاليه وتصدع دماغك
6- تقفيل الصاج مع بعضه وخاصة فى الأبواب والشنطة زباله لازم ترزع علشان الباب يتقفل وحاولت كتير عند صنايعيه وسمكريه ومفيش فايده
7- استهلاك البنزين عالى جدا حوالى 170 - 190 كيلو لكل 20 لتر وده استهلاك سيارة 2000 سى سى
8- الكرسى مش طرى وناشف
9- العفشه ناشفه ولو انها بدأت تنعم من حوالى 2000 كم كده لكن مازالت ناشفه
10 الدركسيون ثقيل واللى ركب يابانى يعرف يعنى ايه دركسيون وباور تحس انها مش باور
11- الصاج تقيل لكن مش ناشف يعنى بيتنى بسهوله غريبه
12- بدات اصوات داخل الكابينه وخارجها ومش قادر احدد منين والله يرحمك يا هوندا سيتى بعتك وانتى عامله 120 الف كيلو ومفيش فيها حتى صوت تزييقه
13- قدرة المحرك بتروح فى داهيه مع تشغيل التكييف
14- تحس برعشة فى الدركسيون وانت مشغل السياره وواقف وحاطط الجير على ال d والرعشه بتزيد لو شغلت التكييف
15- الريموت بيعلق وغيرت البطاريات بتاعت المفتاح ظنا منى انها بايظه لكن نفس المشكلة النهارده عملتها معايا بالرغم من ان الزجاج الأمامى مفتوح ورفضت انها تفتح وفضلت أحاول يمكن عشر مرات الى ان فتحت و احيانا من مره واحده بمزاجها
16- بتاخد ملف شمال على الواسع جدا مع ثقل الدركسيون بتحرجك فى مواقف كتير
17- الشكل القديم بتاعها ودى طبعا بتختلف من واحد للتانى
18- السماعات صوتها وحش والكاسيت مش عالى قوى نص نص

الحاجات اللى ممكن اشوف انها كويسه فيها هى كالاتى

1- الثبات الى حد كبير كويس
2- وضعية القيادة لذيذه وانت قاعد فيها
3- العفشه ناشفه لكن قويه
4- الأوبشنز عالى ينقصها مثبت السرعه والفرش الجلد
5- الأضاءة الأماميه معقولة
6- التابلوة معمول من مواد الى حد ما افضل من الصينى وزى الكورى (الألنترا مثلا)
7- الأ abs بيشتغل كويس مش منظر
8- الوسع الخلفى فى الكنبة (عيالى واخدين راحتهم على الأخر)
9- عاليه عن الأرض يعنى خد اى مطب وانت مطمئن

عاوز منكم التعليق على الحاجات دى هل سيارتى هى اللى كده والا كله كده مع العلم ان دى مش أول ولا تانى سياره اركبها انا ركبت تقريبا 10 انواع من أوروبى زى الجولف والفكترا الجديد والميجان والكورى زى الألنترا و اللانوس واليابانى زى المازدا والكورولا والهوندا والدايهاتسو

وشكرا على صبركم معايا فى التقرير الطويل ده واخيرا انا قررت ان أشترى سيارة اخرى واترك هذه السيارة لزوجتى اللى هى معجبه بيها قوى مش عارف ليه

[mido_295]

أ / Sindibad
إسمحلى أعلق من وجه نظرى فى عربيتى على تقيمك للسياره
مبدئيا أنا معايا واجا 2009 أوتو بريمير
فيما يخص ردى على العيوب
1. أعتقد العربيه من وجهه نظرى فيها كتير مميز وخصوصا لما تقارنها بنفس الفئه السعريه
2. الفرامل أنا شايفها كويسه جدا وكل اللى ساق عربيتى محدش اشتكى منها ابدا وما تقلقش البنات ممكن تسوقها عادى - انا علمت مراتى السواقه عليها وكله تمام وزى الفل
3.الماتور فعلا صوته عالى شويه وانا لاحظت ده على السرعات العاليه كمان فى النقطه دى بشكل كبير متفق معاك بس مش لحد انها لا تطاق أو مزعجه لأنى من نوعيه البشر اللى بيحب أوات المواتير القويه وممكن تكون مشكله فى نوع الزيت اللى بتستخدمه
4. ماحسيتش بالمشكله دى خالص وأعتقد انها ممكن تكون مشكله فى العربيه مش فى الموديل بثفه عامه
5. احيانا بحس بده
6. كان عندى فرق فى الصاج وفى صيانه الألف ظبطتها وكله بقى تمام الحمد لله
7. هو معدل إستهلاكها عالى جدا بس فى طرق السفر بتبفى عاديه جدا بس للعلم كتير راكب 1600 من زمايلى وقالولى نفس المعدل تقريبا
8. بالنسبالى ميزه مش عيب نشفان الكرسى صحى بالنسبالى أكتر من أنه يبقى عيب
9. العفشه مقبوله بالنسبالى ولو ركبت كيا سيراتو هتعرف ان عفشه روتون أحسن مليون مره
10. عيب وميزه على السرعات العاليه لأنى بمشى 160 وانا مطمن من تحكمى فى العربيه
11. مش عارف ماعانيتش من ده ومالاحظتوش
12. انا عندى الصوت جاى من الشنطه
13. إتحلت المشكله دى بعد صيانه الألف
14. حصلت معايا مره أو إتنين وبتبقى لمده ثوانى أول ما بدور العربيه وإختفت بعد كده ومش عارف سبب منطقى ليها
15. مشكلتى الأزليه اللى مش لاقيلها حل وبرده غيرت البطاريه ولا جديد نفس الجنان بتاع كل يوم
16. لأ مش بيحصل حقيقى دع معايا أو يمكن أكون أتعودت فى تحكمى فيها على كده
17. مش فاهم حاجه :)
18. انا عندى كويسه جدا الحمد لله ومش عارف السماعات بتختلف من فئه للتانيه ولا كله واحد
.... فى عيب تانى بقى محدش بيتكلم عليه كتير : إن تيل الفرامل لأن العربيه تقيله مش بيستحمل أمتر من 15 ألف كيلو بالكتير أوى وبعدها لازم يتغير
ومعلش طولت عليك فى الرد

[Sindibad]

اولا اشكرك على تفاعلك

جرب تمشى مشوار طويل 100 كم مثلا او تمشى فى الحر جوه البلد ساعة كده وحط ايدك فى تلات اماكن
الأول - تحت رجلك بس شيل الدواسه
التنى - تحت رجل اللى جنبك وبرضه شيل الدواسه
التالت - جوه الشنطه شمال ناحيه الفانوس الشمال وانت هتعرف معنى كلامى عن العزل والسخونه

الموتور عزمه بيقل عند 2000 لفه فى الدقيقه يعنى بيزحف زحف ولما تطلع لحد 2400 لفه تقريبا يبدأ يديلك عزم وسرعه وده بيخلينى اعمل تسقيط لنقله عن طريق الكيك داون او اجيب الفتيس على ثلاثه علشان اديله عزم خاصة لو التكييف شغال (ملحوظه لم اكن احس بذلك ابدا مع الهوندا ال 1300 سى سى)

الشكل الخارجى من الأمام مقبول ومن الخلف مزبول

جرب تسوق النترا مثلا او تويوتا كورولا واعمل لفه شمال هتعرف يعنى ايه كلامى
انا مش بتجنى على السيارة لكن هى فعلا مفيهاش أشياء تشدك مميزة - ولذلك انا انصح كل اللى عاوز يجيبها يركبها ويسوقها الأول وميحكمشى نظرى

[mido_295]

انا عاوز أقولك انا بسافر بالعربيه دى الحمد لله بشكل كبير جدا ويمكن أكتر من مشى جوه القاهره والحمد لله مريحاتى جدا وأغلب المشاكل دى الحمد لله ماعانيتش منها
انا كل اللى بعانيه فعلا زى ما قولتلك البنزين وصوت الخبط فى الشنطه وموضوع الريموت والتيل اللى بيتاكل ده بسرعه غير كده الحمد لله مفيش مشاكل
أنا سوقت أكسنت أر بى وكنت حاسس انها خفيفه جدا ودريكسيونها خفيف أوى زياده عن اللزوم ومكنتش مرتاح أيدا فى قعدتها وعربيه ضيقه جدا بس احنا هنا مش موضوعنا مزايا وعيوب الأكسنت بس القصد من كلامى انى جربت أسوق حاجه تانيه مرتحتش
يمكن أتعودت على تقل وثبات الواجا وعلى إحساسى أنها عربيه واثقه من نفسها أو بحكم عشقى للعربيات الألمانى فى تقلها وصوت ماتورها العالى ده اللى مخلينى بحب الواجا
وللعلم انا مش بقول ان حضرتك بتتجنى على العربيه دى عربيتك وأنت أولى واحد تقدر تقول اللى فيها من مزايا وعيوب بس انا عاوزك تاخد أراء ناس تانيه معاها نفس العربيه لأن لو لقيت العيب اللى مضايقك مش متكرر تعرف انه حاله خاصه حاول إنك تشوفلها حل مع التوكيل وهو ده غرضى من الرد عليك بالتفصيل للإفاده لو هى مشكله عامه ماشى أنما لو حاجه خاصه فى عربيتك يبقى التوكيل أولى بيها
كمان صعب أوى تقارن صوت ماتور الرشيقه هوندا فى نعومته وهدوئه مع الواجا مقارنه ظالمه جدا من وجهه نظرى اليابانى معروف بهدوئه وقوته فبلاش تظلم العربيه وتقارنها بالهوندا
يعنى انا مثلا بعشق الباسات مش هعقد نفسى وأقول تيجى أيه دى جمب الباسات لأ الحمد لله على الواجا واهى عربيه ماسكه نفسها وتمام ومميزاتها أحسن من عيوبها
وعلى فكره سوقت الإلنترا وخفيفه جداااا جدااا زى باقى العربيات الهيونداى
عموما ربنا يباركلك فى أى عربيه تختارها إن شاء الله وربنا يجعل حظك فيها أحسن من اللى فات إن شاء الله
وتقبل تحياتى وأسف طولت عليك

[Sindibad]

متشكر لك على النصيحة والتفاعل

طيب ممكن تقولى هل السيارة بتحدف يمين على السرعات العالىة معاك؟ دى مشكلة حاولت اصلحها ولكن لم استطع واخر ماقيل لى عند بتوع الزوايا ان العجلة الأماميه يمين راجعه للوراء عن الشمال . !!!! وده بسبب أما عيب صناعة أو خبطه وطبعا التوكيل نفضلى

[eng.m7md.ali]

متشكر لك على النصيحة والتفاعل

طيب ممكن تقولى هل السيارة بتحدف يمين على السرعات العالىة معاك؟ دى مشكلة حاولت اصلحها ولكن لم استطع واخر ماقيل لى عند بتوع الزوايا ان العجلة الأماميه يمين راجعه للوراء عن الشمال . !!!! وده بسبب أما عيب صناعة أو خبطه وطبعا التوكيل نفضلى

موضوع الحدفة ده عندي فعلا
بس ساعات بتحصل وساعات لا
وده دليل ان الطريق ممكن يكون هو السبب

اما لو موضوع الخبطة اللي في العجلة ده يبىقى العربية كدة تقريبا فيها مقص
وده ممكن يتعدل او يتغير احسن

ومتفق معاك في بعض العيوب بردو
بس بالنسبة لصوت الموتور حلو اوي ومينفعش نقارن الياباني او الكوري بالبروتون في نعومة القيادة

مشكلة العربية دي هيا .. الخامات - التقفيل - العزل - الطنابير واتيال الفرامل - الفتيس الاوتو وحش بالنسبة للموتور

[mido_295]

موضوع الحدف حصل معايا مره واحده بس ومش متأكد عيب من الأرض ولا من العربيه بس طالما ما تكررش يبقى الأغلب أنه كان من الأرض
وأعتقد زى ما قال Ene f3lix ولا يفتى وهو فى المدينه ممكن تكون فعلا مشكله مقصات

[abdohod]

يمكن تكونوا قرأتم لي بعض المواضيع هنا ع الموقع .... أرجوا ايضاح ان الفارق يبدوا أنه كبير من واجا الشكل القديم ذات الموتور الياباني (لانسر بوما) والواجا الشكل الجديد ....انا معايا واجا ماتيك 2006 الشكل القديم هاي لاين (2 ايرباج + ِِ(abs) + فرش جلد طبيعي الفبريقة + مرايات كهرباء ضم ) كل العيوب اللي قرأتها مش موجودة عندي إلا:
1- أصوات التزييق من الكراسي وانا ماشي ويمكن يكون من الشنطة
2- العفشة مش حلوة ومش وحشة (متوسطة) مع ان ال 2005 كانت افضل لأن جنطها 15 وليس 16
3- ريموت المفتاح مش بيعلق ولكن لازم يكون قريب من العربية
4- رعشة الدركسيون دي مظبوطه فعلا وبحسها مع اني فكيت علبة الدركسيون وغيرت البيض الداخلي والطرف
ولكن مع احترامي لكل ده .... العربية سعرها مذهل بالنسبة للإمكانيات ولو قارنتها بالانسر البوما التي تحمل نفس الموتور بالسيراتو الشكل القديم وهما تقريبا نفس الامكانيات مع ان الواجا تزيد بالمرايات والملتي ميديا تلاقي الفرق من 15 إلى 20 ألف جنيه ولكم الحكم وانتظر الآراء .... شكرا لمشاركتكم في المنتدى الذي بدأته. عبدالرحيم من السويس

[Sindibad]

أنا أعتقد صوت الموتور ممكن يهدأ لو مونت بنزين 95 هعمل كده وأشوف
كمان فى أختراع مذهل عاملاه شركة امريكية وده موقعها Archoil, Nano Borate, Nano Particles, Arch Oil, Friction Modifier, Fuel Treatments, Greases Corrosion Control, MotorSilk, LubriSilk, Synthetic Oil Engine Treatments, Carbon Credits, Eco-Friendly Biodegradable - Evergreen America Corporation
وليهم موزع فى مصر , اهم منتجين من وجهة نظرى , الأول friction modifier وهو بيقلل الأحتكاك بنسبة تصل الى 80 % ويضاف على الزيت مع كل تغيير وطبعا يفضل استخدام زيت طويل العمر
والثانى fuel catalyst وده بيحسن من خواص البنزين والعلبة الصغيره منه بتكفى 2000 لتر بنزين
انا اتصلت بالموزع فى مصر وهجرب واقولكم

سلام

[abo3bdolrahman]

واجا 2006 كاملة أتوماتيك سوداء و عاملة 88 ألف كم المحرك الميتسوبيشى بدون إيرباج و abs الجنوط ال 16 و العربية حتى الآن أدائها جيد و أهم حاجة فيها الإرتفاع الممتاز عن الأرض و العفشة الجيدة و ده حسب التجربة بالسير فى طرق مكسرة يوميا للذهاب للعمل

[abdohod]

لو يسمح المهندس هاني بما انه بورسعيدي أن يعطيني أرقام تجار قطع غيار واجا (جديد - استيراد) في بورسعيد ان أمكن لأن الجماعة بتوع الحرفيين تعبونا جدا

[mada3030]

يا جماعه انا عاوز ميكانيكى واجا قريب من المعادى وتانى حاجه لما بحط للواجا بنزين 92 بتسقف انما لو حطيت 95 بتبقى زى الفل