رابطة ملاك كيا سبكترا وقطع غيارها

[mohamedkaouh]

الحساس قبل علبة البيئة وطبعا بتأثر على الحساس
حضرتك بأختصار مشكلة الفرقعة هى علبة البيئة وسحب بنزين والبوجيهات سودا
لو عايز تحل مشكلتلك غير علبة البيئة وحساس الشكمان

شكراا على الرد , بس انا مشكلتي ان العربيه بتكون مكتومه و تفتح بعد حوالي 3 ثواني من دوسة البنزين و بحس ان الماتور مش على راحته خالص ... انا مغير طقم دبرياج و فلاتر و بوجيهات و منضف بوابه و رشاشات و الميكانيكي شاكك في علبة البيئه او ماتور طرمبة البنزين بس العربيه الحمدلله مش بتغيب في الدواره بتاعتها و لا بتنتش , و عديت على واحد بتاع شكمانات و قاللي علبة البيئه مكتومه علشان كده كلمت ابو اليزيد و شكلي كده هركب علبة الرنان

[montaser_rehab]

انا عندي ابعتلي الايميل و انا ابعتله لحضرتك

شكرا يا باشا على الكتالوج جدا جدا جدا

[montaser_rehab]

انا أرسلته لحضرتك على كل الايملات اللى انت كتبها

وصل يا باشا شكرا جدا جدا

[montaser_rehab]

بصوا يا جماعة المشكلة عندى ان الفرقعة ديه مبتظهرش إلا لما بيكون تانك البنزين ماليان يعنى البنزين في العربية كان في أوخره محصلش فرقعة خالص لمدة يومين رحت البنزينة وحطيت صفيحة بنزين بدات تظهر الفرقعة تانى

[Muhammed helmy]

ارجو الافاده

يا جماعه السلام عليكم اولا

بالله عليكوا انا الكيا سبيكترا عربيه عجبانى جدا جدا مع انى مجربتهاش وانا اول مره اركب عربيه بس الحمد لله بسوق من زمان اوى المهم انا نفسى اجيبها اوتوماتيك بس فيه ناس بتحذرنى من حاجتين
اول حاجه بيقولولى انها ف الاتوماتيك مش حلوه وان الفتيس بتاعها وحش ومش بيستحمل ومش هتلاقيه اصلا

الحاجه التانيه مخوفنى من اسعار قطع غيارها وانها كمان مش موجوده وانا مش عارف اصدق كلام مين ؟

دا غير ان انا سمعت انها تقفيل مصرى تقفيل مصنع السخانات .

بالله عليكم ارجو الافاده عايز اعرف مميزاتها وعيوبها

[ahmed bashandy]

أنا عندي 2 مشكلة :
أولاً : بحس بحرارة طلعة عليا من عند الدركسيون و انا ماشي .
ثانياً : ساعات بلاقي قربة المياه بتغلي على الرغم من أن مؤشر الحرارة بيبقى في منتصف الربع الثاني قبل النص

أرجو الأفادة

محدش فكر يرد على المشكلة ,,, ما فيش حد عارف ولا أيه ؟

[mohamedmamdooh]

السلام عليكم،
افضل حاجة يا جماعة ان هذا المنتدي موجود لملاك كيا سبكترا ، لندرة العربية دي، وكويس اننا نتبادل خبرات بعض فيها.
انا امتلك السيارة من 2007، كل قطع غيار العربية من اول ما امتلكت العربية بجيبها من حلمي سليمان اللي في رمسيس، هو صحيح معندوش فصال خالص بس حاجته مضمونة جدا.
في اقتراح ان كل زاحد ممكن يدخل يحكي عن مشكلة كانت في عربيته و صلحها ازاي و العيب كان ايه عشان كلنا نستفيد.
و انا ممكن انقل بعض خبرتي الصغيرة في العربية دي لكم هنا.
المروحة التانية بتشتغل عند الوصول لدرجة حرارة محددة، و هي بالطبع لها تروستات، و اذا لم تعمل عند درجة الحرارة دي مؤشر الحرارة هيزيد جدا و الميه هتغلي في الرادياتير و لازم توقف العربية فورا، لان انا حصلت معايا قبل كدة و كان فيوز المروحة بيعلق فبيخليها متشتغلش.
مؤخرا كباس التكييف (الكمبريسور) باظ، وغيرته جديد ب 1200 جنيه من عند حلمي سليمان، و سعره استيراد من عند واحد تاني كان 500 جنيه، لكني بفضل الجديد دائما، وعلي فكرة بالنسبة لفلتر التكييف مفيش فلتر خاص بالعربية بتاع التكييف بيبقي عنده و انا اشتريته بحوالي 100 جنيه.
ان شاء الله كل مرة قدم لكم حاجة من اللي صادفتني مع العربية دي و اتمني يعجبكم الموضوع.

[mohamedmamdooh]

بعض اسعار قطع الغيار من حلمي سليمان - رمسيس
2 مقص كامل 750 جنيه
2 صباع ميزان 200 جنيه
طقم كاوتش قنطرة 50 جنيه
علبة دركسيون كاملة بالبارات 2000 جنيه
بلي عجل امامي و خلفي 500 جنيه
حشو عصا الفتيس 40 جنيه
طقم مساعدين امامي 700 جنيه
طقم مساعدين خلفي 700 جنيه
طقم باكتتات 600 جنيه
فانوس امامي 225
كرتيرة 170 جنيه
اسعار الحاجت دي في التوكيل اغلي بكتير.
اتمني اكون افدتكم شوية.

[dreamsmake]

بص ياباشا مبدئياً شيك على الميه عاملة طحين ولا لا ... لأن غليان القربة ده كتير بيكون من الجوان او الوش وممكن تكون طرمبة المايه
وبالنسبة للمؤشر لازم تشيك عليه ممكن يكون الحساس في مشكله فانتا ممكن تفصل المراوح وتسخن العربية شوية بس من غير ما تمشي بيها وشوف المؤشر هايرفع معاك سنة زياده عن الطبيعي بتاعة ولا لا بس بالعقل ووانتا واخد بالك لاتجيبلها انت وش مش ناقصة تدعي عليا
وممكن تقوانا سحب العربية عامل ايه ؟؟ وبتتهز جامد على السلانسية ولا لا

[dreamsmake]

تسلم ايدك ياباشا
انا برضه في بعض الاسعار معايا من شركة تارجت اول فيصل و ابوزيد مريوطية فيصل
سير كاتينه 85 تارجت 100 ابوزيد
بلي كاتينة 150 تارجت 185 ابوزيد
سير دينامو او تكييف 35 تارجت 50 ابوزيد
جوان وش سلندر 35 تارجت 75ابوزيد
اولسيهات كامة 20 عند ابوزيد بس
كف مرايه جديد 50 تارجت
رادياتير جديد كوري 450
اكصدام امامي جديد 850 من حلمي سليمان او تارجت نفس السعر
اكصدام استيراد من 500 ل800 بس ده بالشاسيه بتاعة
طقم ابواب استيراد كاملين بالفرش والازاز والمكن ب 2400ج
مرايه استيراد 175
ولو في حاجة جديده ان شاء الله هاقولكم عليها

[nawar_132]

محدش فكر يرد على المشكلة ,,, ما فيش حد عارف ولا أيه ؟

لو المياة زايدة فى القربه تغلى لحد مالزياده تطلع بص على المقاس كويس لازم مايعديش full

[nawar_132]

انا كلمت ابو اليزيد و قاللي علبة البيئه ب 800 جنيه بالتركيب و في علبة رنان ب 300 جنيه بالتركيب و هي زي علبة البيئه في كل حاجه ماعدا تحويل العادم الضار بالبيئه مش بتعمله ...

بس بردوا محدش رد على سؤالي تغيير العلبه ده بالرنان او حشوها ممكنن ياثر على الحساس اللي بعد علبة البيئه

مش هتاثر على الحساس اطلاقا بس هتلاحظ ارتقاع نسبى فى صوت العربيه

[mohamedkaouh]

مش هتاثر على الحساس اطلاقا بس هتلاحظ ارتقاع نسبى فى صوت العربيه

شكرا على الرد ... انا وديتها لحد بتاع شكمانات تاني و قالي علبة البيئه تمام الحمدلله :)

[mohamedkaouh]

يا جماعه انا لاحظت في بقعة زيت مكان ما بركن العربيه بتكون تحت على شمال العربيه .. انا كنت لسه مغير طقم دبرياج من اسبوع تقريبا و ظهر بعد كده الموضوع ده, تفتكروا ايه السبب ؟ انا هروح للميكانيكي تاني بس مش فاضي خالص الايام ده فهل فيه مشكله ان اتاخرت شويه على الموضوع ده ...بالنسبه لزيت الفرامل و الباور تمام الحمدلله بس ان شاكك غالبا الزيت ده زيت فتيس

[mhbh]

اريد كتالوج سبكترا 2003
m_hashim2006@yahoo.com