مشاكل هيونداي الانترا (متجدد)

[Ghost2]

السلام عليكم
اعزائي اعضاء قسم هيونداي .. انا جتلي فكرة اننا نعمل موضوع يكون فيه مشاكل هيونداي الانترا من ملاكها .. يعني حد ظهر معاه مشكلة في العربية و ظهرت ليه وحلها ازاي .. وهكذا عشان الناس تستفيد وتعرف كل حاجه عنها ولو صاحبها عايز يجيب قطع غيار نضيفه ورخيصه يجيبها منين .. الاكسسوار بتاعها يجيبه منين .. الموضوع طبعا هيكون متجدد ان شاء الله وتقبلوا فائق تحياتي وكل سنة وحضراتكم طيبين

[tarekabosdera]

الحمد لله الالنترا لا يوجد بها مشاكل جوهرية تستاهل اننا نعمل موضوع عليها .

[gebreel]

متابع

[banboty]

قرات في احد المداخلات ان كبالن الالنترا 2007 تقريبا كان سعرها في التوكيل 5000 جنيه و مش موجود منها بره في السوق

هل المعلومة حقيقية ؟

[collyre]

العربية مش ثابتة على السرعات العالية وكمان بتحدف عل السرعات اقل من 60 مش عارف لية

[kaka_8]

الباور بيبقى خفيف جداااااا على الطريق السريع ودى مشكله كبيره

[Ahmed_Gadalah]

موضوع الباور الخفيف ده سمعت عنه من ناس كتير , طب ده معناه إن أنت وأنت سايق متعرفش تتحكم في التاره؟ وإلا إيه؟
وموضوع إنها واطيه وبتحك في الطبات , مش ممكن يتركب لها جنوط مقاس أكبر وتعلى؟

[waelfox]

معلومة هامة
البور بتاع الالنترا غير اي سيارة يعمل بنظام موتور كهربي مش علي زيت زي زمان علشان كدة الناس بتحس انة غريب شوية وخفيف اوي :b4_388:

[M.almaghraby]

انا بحب العربية دي جدا

بس هيا مش ثابتة علي الاطلاق عند 100 كم فالساعة

[Ghost2]

ههههههههههههههههه احنا كده بوظنا العربية خالص ... يا شباب الموضوع لملاك السيارة اللي قابلتهم مشاكل فيها .. لكن مش هننتقد عربية عشان سمعنا عنها مجرد كلام .. العربية ثابته على الطريق .. الباور بتاعها مش خفيف اوي زي ما الناس فاكرة .. هو عشان الباور كهربا من كتر ما هو ناعم الناس فاكراه خفيف .. وهو بيتقل فعلا على السرعات .. خلونا نتكلم عن عيوب جوهرية في السيارة .. او مشاكل مع مراكز الخدمة .. كده يعني .. لكن مش على مجرد السمع

[M.almaghraby]

باشا لو حضرتك اصدك عليا انا جربتها علي طريق سريع و لفترة كمان

والعربية مش ثابتة مية فالمية

و بالنسبة للبرسونا مثلا لازم تفضل مركز معاها شوية و ماسك الدركسيون جامد

ممكن انا الي مبعرفش اسوق مش عارف بقا!!

بس عامة العربية دي مريحة جدا جدا و ناعمة و بتجري اكتر من الجين

[HANGMAN]

هي سرعة من غير فرامل
لازم يركبلها abs

[tarekabosdera]

ههههههههههههههههه احنا كده بوظنا العربية خالص ... يا شباب الموضوع لملاك السيارة اللي قابلتهم مشاكل فيها .. لكن مش هننتقد عربية عشان سمعنا عنها مجرد كلام .. العربية ثابته على الطريق .. الباور بتاعها مش خفيف اوي زي ما الناس فاكرة .. هو عشان الباور كهربا من كتر ما هو ناعم الناس فاكراه خفيف .. وهو بيتقل فعلا على السرعات .. خلونا نتكلم عن عيوب جوهرية في السيارة .. او مشاكل مع مراكز الخدمة .. كده يعني .. لكن مش على مجرد السمع

يا سيدي الفاضل عشان كده اانا من الاول قلت لحضرتك مافيش داعي لموضوع بالعنوان ده عشان كل واحد سمع كلمتين غلط هييجي يحطهم عن الالنترا فالموضوع مش هيبقى مصدر موثوق وسليم .

وممكن اي واحد بيكره العربية من غير سبب هييجي يقول عيوب ليس لها وجود .

وأنا كمالك للانترا مع احترامي ليك ولكل اللي شاركوا في الموضوع بقول ان 90 % من المعلومات اللي اتقالت عن الالنترا في الموضوع ده غلط او مبالغ فيها او مشاكل فردية يتم فيها التعميم وكل ده هيضر القارئ .

وبكرر الالنترا مفيهاش مشاكل جوهرية والحمد لله .

وبقول لوجه الله اي حد دخل الموضوع ده عايز معلومات عن الالنترا انصحه ياخدها من ملاكها مش من واحد جربها مرة ولا مرتين .... ولا واحد عنده مشكلة فردية وعمم ...

[M.almaghraby]

هوا ليه يا جماعة محدش بيتقبل النقض

هيا الالنترا دي مايبخ مثلا؟؟؟؟؟؟

اذا كان انا كنت بقول قبل المشاركة اني بحب العربية دي جدا

و اي عربية فيها عيوب يعني

لكن بلاش بقا التعصب الاعمي دا

[M.Osman]

الحمد لله الالنترا لا يوجد بها مشاكل جوهرية تستاهل اننا نعمل موضوع عليها .

لو سمحت...
بعد التحية لصاحب فكرة الموضوع

فكرة الموضوع عشان لو فيه اي نوع مشاكل حتى لو فردية تتقال هنا عشان اي حد تظهر معاه مشكلة مشابهة يستفيد...

يعني اية العربية مفيهاش مشاكل تستحق الموضوع؟؟
هو خلاص عشان حضرتك العربية مريحاك مش عايز اي حد يستفيد ؟؟
بلاش...
مش حضرتك اللي كنت بتشتكي من طقطة في الدركسيون و طلعت مشكلة كبالن بعد 30 ألف كم في الموضوع ده:

http://www.nilemotors.net/Nile/108062-2-2007-5000-a.html

؟؟

اية المشكلة او العيب ان احنا نعرض الحاجات اللي زي دي في موضوع مجمع عشان الكل يستفيد؟؟ زي مواضيع الأكسنت و الفيرنا و الماتركس؟؟